Mu na hasa ku tanda maVutala ose a muaka uno ni? Nga mukemuo, talenu nga mu hasa ku kumbulula vihula vi na hatako:

Vusunga vuka ya tu hana Tiango 5:11, mu ku handeka nguayo, Yehova na “sulu na nkeke” kaha “mukua cikeketima”?

Tu tantekeya ngecize Yehova ue ku ivua cizango ca ku ecela vipi vietu, omo lia cikeketima ceni. Tiango 5:11, ya tu hana naua vusunga ngecize Yehova ue ku lihana mu ku tu kuasa omo lia nkeke yeni. Tu lihakelenu kapandi ka ku mu tambuluisa.—w21.01, lifo 21.

Omo lia vika Yehova ua tumbika ku tuamenena?

Ua lingamo omo lia cilemo. Ku tumbika ku tuamenena ca lingisa vusoko vueni vu pange mu ciyulo kati mu liuayanga. Nkala muntu mu vusoko ue ku kava eci cifua ca tumbikilamo Yehova viuma, a tantekeya iya na pande ku linga vihangula mu vusoko, kaha na ku tuama ku lutue mu ku vi puisamo.—w21.02, lifo 3.

Omo lia vika Vakua Kilistu va na pande ku zangama mu ku pangesa viprograma via ku simutuila navio via mu internete?

Nga mutima ua Mukua Kilistu u mu tavesa ku pangesa viprograma viaco, kaha na pande ku hangula vuino vantu va na pande ku likata navo. Ca pua ca cikalu ku hangula mua cili vavusamba mu viprograma via kama via ku simutuila mu internete. (1 Tim. 5:13) Kaha naua mua kala vusonde vua ku sanduola mizimbu ka ya kele na ntsongo na ntsina na vakua ku pangesa vivunga viaco mu ku tembesa mingoso yavo.—w21.03, lifo 31.

Tumbulenu vumo vusunga vua lingisile Njambi ku tavesa Yesu a yande na ku tsa

Vumo vusunga, muomu ku sukika Yesu ca lingisile linga vaYundeya va patuke ku cimo cisingo. (Ngal. 3:10, 13) Vusunga vua mu civali vua pua muomu Yehova ua kele na ku viukisila Yesu ku cipanga ceni ca ku pua Sasendote ua Kama. Vusunga vua mu citatu ovu, lukakatela lua Yesu na ha kutsa ceni, lua muesa ha toma ngecize vantu navo va hasa ku muesa lukakatela, ambe nga va hita mu vieseko via kama. (Yombi 1:9-11)— w21.04, mafo 16-17.

Vika mu hasa ku linga nga ca cikalu ku uana vantu mu lihia?

Setekenu ku va tonda ha vintsimbu vi ve ku kala ha vindzivo. Mu hasa naua ku seteka ku va tondela ku vihela vieka. Cikuavo naua, mu hasa ku seteka ku alulula cifua ci mue ku ambuluilamo. Ngeci mua ku soneka mikanda.—w21.05, mafo 15-16.

Vika a lomboloka mezi a kapostolo Paulu “ha mezi a lisiko nja tsile ku mezi a lisiko”? (Ngal. 2:19)

Masiko a Mosesa a soluele ku hona ku tantuluka ca vantu, kaha a tuamenenene vaIsaleli kuli Kilistu. (Ngal. 3:19, 24) Kaha via lingisile Paulu ku tava Kilistu. Mu ku lingamo, Paulu ua tsile ku mezi a lisiko, ni nguetu, masiko aco ka a kele naua na ndzili hali ikeye.—w21.06, lifo 31.

Lungano luka ua tu muesa Yehova ku tuala ha ku muesa lukakatela?

Yehova ua muesa lukakatela kuli vakua ku zualesa lizina lieni, kuli vakua ku luisa mpoko yeni ya ku sika, ku lisino li va muesele vamo vana veni, ku viuma vie ku tualelelaho ku mu vangeya Satana, ku lamba i ve ku mona vangamba veni, ku kutsa ca vavusamba veni, ku vantu va vapi ve ku pakesa vakuavo, ku ku vihia ca viuma via tangele.—w21.07, mafo 9-12.

Lungano luka lua cili ua tu sila Yosefe ku tuala ha ku muesa ntsintsa?

Ua muesele ntsintsa ku vuhenge vu va mu muesele vamuanaye. Vuhenge vuaco vua mu lingisile ku ka heta ku Ingito, kaha kuze va ka mu vangeyele naua na ku mu mbila mu kamenga mu miaka ya ingi.—w21.08, lifo 12.

Ku ndundamesa cika ya polofetele Hangai 2:6-9, 20-22?

Vakua vifuti ve ku viana muzimbu ua Vuangana, vutuhu ngoco vantu vavengi ve ku iza mu vusunga. Vuovuno vakua vifuti, va ka va ndundamesa lua ku manusuila ni nguetu ku va nongesa.—w21.09, mafo 15-19.

Omo lia vika ka tua pandele ku likela ku ambulula?

Kapandi ka tue ku lihakela, Yehova ue ku ka mona kaha ke ku muya ku mutima. Nga ka tu likela cipue ku hilukila mu nima, tu ka tambula muono ka ue ku hua ua ya-ye.—w21.10, mafo 25-26.

Vati Levitiku kapitulu 19, i hasa ku tu kuasa ku puisamo eli lisiko: “Puenu vakua ku lela mu vilinga vienu viose”? (1 Pet. 1:15)

Citava kapostolo Petulu ua tumbuile mezi a ku Levitiku 19:2. Livulu lia Levitiku 19, lia muesa vinjila via vingi vi tu hasa ku puisilamo mezi a ku 1 Petulu 1:15 mu muono uetu.—w21.12, mafo 3-4.