1. Cifua cika va kala naco vangamba va Yehova?

 TUNDE ku laza, Mbimbiliya ya muesa ngecize vantu va Njambi “va ka lihana ku cizango cavo” mu ku pangela Yehova kaha ve ku lingilemo mu ku ononoka ku tuamenena ca muaneni Yesu. (Visa. 110:3) Lelo lino vupolofeto vuaco vuli na ku lipuisamo mpundu. muaka ku muaka, vangamba va Yehova ve ku pangesa makulukazi a makulukazi a vi ola mu ku ambulula muzimbu ua cili. Cipanga caco ve ku ci linga ku cizango cavo. Cikuavo naua, ve ku kala na ntsimbu ya ku hana vukuasi vua ku muvila, vua mu visinganieka na vua mu lutsilielo ku vamuanaye. Kaha vakuluntu, ve ku pangesa ntsimbu yavo mu ku liviukisila vimpande via ku viuano na ku kaniamesa vamuanaye. Vika vie ku sindiya vangamba va Yehova ku linga viose evi? Cilemo—cilemo cavo kuli Yehova na ku vantu.—Mat. 22:37-39.

2. Kuliya na Loma 15:1-3, Yesu ua tu sila lungano luka?

² Yesu ua tuamekele vizango via vakuavo lutue lua vieni. Tue ku lihakela kapandi ka ku tambuluisa lungano lueni. (Tandenu Loma 15:1-3.) Kaha tue ku uanamo ku vezika ca kama mu tue ku lingamo. Yesu ngueni: “Ku-hana ca hiana ku tambula mu ku vezika.”—Vili. 20:35.

3. Vika tu simutuila mu cilongesa cino?

³ Mu cilongesa cino, tu simutuila ha viuma vika ua lingile Yesu mu ku kuasa vakuavo kaha na vati tu hasa ku tambuluisa lungano lueni. Tu mona naua, vika tua pande ku linga tu kale na cizango ca ku kuasa vakuetu.

4. Vati Yesu ua tuamekele vizango via vakuavo ku lutue lua vieni?

⁴ Yesu ua kuasele vakuavo ambe mua zeyele. Aci singaniekenu omo civunga ca vantu vezile kuli ikeye, ku muncinda ua kele ku hiehi na Kapenama. Oho Yesu tele na hono cikuma, muomu ua hitila vutsiki vuose mu ku vundila. Vutuhu ngoco, Yesu omo ua muene civunga caco ua va vuilile cikeketima, ngeci ua putukile ku va kanguisa. Kaha kati vikevio lika via lingile, vunoni va lingile cimo cimpande ca seho ya kama, ci tue ku tumbula nguetu Cimpande ca ha Muncinda.—Luka 6:12-20.

5. Vati mitue ya ndzivo, va hasa ku tambuluisa lungano lua Yesu ku ku muesa cilemo?

⁵ Vi ve ku linga mitue ya ndzivo mu ku tambuluisa Yesu. Aci singaniekenu hali evi, umo cisemi mu nima ya ku fuitangana cikuma ku vipanga, a heta ha ndzivo oku na hono mua kama. Kaha a singanieka litangua lieka lia ku lemesa mu vusoko mu nima yaco, a vundila kuli Yehova. Kaha Yehova a kumbulula civundilo ceni kaha a va lemesa mu vusoko. Mu ku lingamo, vana va mona ngecize visemi va haka seho ya kama ku viuma via mu lutsilielo.

6. Hanenu cimo cimueso ca vati Yesu ua kuasele vantu ambe mua tondele ku kala ku lika lieni.

⁶ Yesu ua pangesele ntsimbu yeni mu ku kuasa vakuavo. Mua singaniekeleho laza vati Yesu ua livuile mua tantekeyele ngecize kavusamba keni Yoano mukua ku mbatiza va na mu tsihi ni? Mua vusunga, ua vuile ku vavala ca kama ku mutima.mbimbiliya nguayo: “Omo Yesu” [ua vuile ngecize Yoano mukua ku mbatiza va na mu tsihi] “ua fumine kuze, ua ile mu vuato ku mpambo kua lika lieni.” (Mat. 14:10-13) Eci ci tu kuasa ku ivuisisa omo lia vika Yesu ua ile kua lika lieni. Vamo nga va na tsisa umo kavusoko ve ku tonda ku kala kua lika liavo. Vutuhu ngoco, Yesu ka hasele ku lingamo. Omo cimo civunga ca kama ca tantekeyele kulihi ali na kuya Yesu, va livangele ku heta ku cihela caco. Vati Yesu ua lingile? Ua singaniekele ha visoti via kele na ku pinda navio vantu vaco, ngeci ua va vuile cikeketima. Yesu ua nongonuene ngecize vantu vaco va tondekele vukuasi vua mu lutsilielo. Ngeci mukemuo, ua “sangumukile ku va longesa viuma via vingi.”—Mako 6:31-34; Luka 9:10, 11.

7-8. Hanenu cimo cimueso ca vati vakuluntu va hasa ku muesa cilemo mu ku tambuluisa Yesu nga umo mu cikungulukilo a tondeka ku mu kuasa.

 ⁷ Vi ve ku linga vakuluntu mu ku tambuluisa Yesu. Mua vusunga tua haka seho ya kama ku kapandi ka ve ku lihakela vakuluntu mu ku tu kuasa! Cingi ca vipanga ci ve ku fuitangana vakuluntu mu cikungulukilo, ka tue ku vitantekeya. Ca ku muenako, nga umo muanetu ali na ku vavala mua kama, vamuanetu vakua Ndzango ya tala via Cihindu ve ku kuasa vuasi-vuasi. Kaha vintsimbu via vingi, visoti viaco vie ku soloka mu kati ka vutsiki! Ambe ngoco, ava vamuanetu va cilemo hamo lika na masoko avo ve ku tuameka vizango via vamuanetu ku lutue lua vizango viavo.

⁸ Cikuavo naua, vakuluntu ve ku kuasa ku cipanga ca ku tunga Vindzivo via Vuangana, vindzivo vikuavo via ku lemesela kaha na ku Ndzango via tala via viyovo via mavu. Kaha naua ve ku pangesa ntsimbu yavo mu ku longesa na ku kaniamesa vamuanetu mu cikungulukilo. Mua vusunga, ava vamuanetu vose na masoko avo, va tondeka ku va sangala mua kama. Yehova a tualeleleho ku vezikisa eci cifua ca cili ci ve ku muesa! Ngeci mua vantu vose, navo va tondeka ku haka viuma mu cihela cavio. Ka va pandele lika ku tuala mana ku viuma via mu cikungulukilo houe, vunoni na ku uana ntsimbu ka ku kala na masoko avo.

9. Kuliya na Filipu 2:4, 5, cifua cika va pande ku muesa Vakua Kilistu vose?

⁹ Tandenu Filipu 2:4, 5. Tu vose tua pande ku tambuluisa lungano lua Yesu, kati lika vakuluntu. Mbimbiliya nguayo: “[Yesu] ua tambuile  muvila ua mukuamanda.” (Filipu 2:7) Talenu vi tu hasa ku lilongesaho. Umo mukua ku panga, ntsimbu yose ue ku tonda vukovelelo vua ku linga viuma vie ku lingisa mukuluntu ueni ha vipanga ku viukilila. Omo lia ku pua vangamba va Yehova kaha tue kuasa vamuanetu, tu tonda ku lihakela kapandi ka ku muya ku mutima na ku linga cose mu ku kuasa vamuanetu. Tu talenu vimo vinjila vi tu nji hasa ku lingilamo.

10. Vihula vika tua pande kuli linga?

¹⁰ Hilulenu cifua ci mue ku muenamo viuma. Lilingenu cihula ngeci muevi: ‘Vika nja pande ku linga mu ku vueza ku cizango cange ca ku kuasa vamuanetu? Ca ku muenako, Vati nji ne ku livuile nga va nji vundila ku ka kuasa umo muanetu ua kasinakazi ku ndzivo ya vakulupe, ni ku ka kuasa umo ndumbuetu ua kasinakazi kuya mu ku kunguluka? Vuno nje ku lihana mu ku komba mu Ndzivo ya Vuangana ni ku vihela vikuavo kue ku hitila viuano via muhato ni?’ Mu tua lihanene kuli Yehova, tua mu ku laheselele ngecize tu ka mu pangela na mutima uose. Yehova ua lavelela tu pangese ntsimbu yetu, ndzili yetu na vikuata vietu tu kuase vakuetu. Nga tu lingamo, Yehova a ka viukilila cikuma.

11. Vati civundilo ci hasa ku tu kuasa ku tuameka vizango via vakuetu?

¹¹ Vundilenu na mutima uose kuli Yehova. Ca ku muenako, nga mu mona ngecize kuli hamo ha mua pande ku pangelaho, vunoni ka muesi na ku hasa ku lingamo. Ku vundila na mutima uose kuli Yehova ci hasa ku mi kuasa. Sokololenu mutima uenu. Lekenu Yehova vati muli na ku livua, kaha mu vundilenu a mi hane “cizango na ngolo ya ku vilinga.”—Filp. 2:13.

12. Vati vamo vamuanetu va vakuendze va ku mbatiza va hasa ku kuasa lukungulukilo lua Yehova?

¹² Nga u mukuendze ua ku mbatiza, vundilenu Yehova a mi kuase ku kala na cizango ca ku pangela vamuanetu na vandumbuetu mu cikungulukilo cenu. Ku vifuti vimo, mu vikungulukilo mua kala vakuluntu vavengi, vunoni na vakua ku kuasa vipanga ka va puile vakuendze. Lukungulukilo lua Yehova lu li na ku kola, ngeci mukemuo ku tondeka vamuanetu va vakuendze va kuase vakuluntu mu vikungulukilo. Ngeci mukemuo, enu vakuendze nga mu lihana mu ku vueza ku cizango cenu ca ku kuasa, mua vusunga mu ka kala na ndzolela ya kama cikuma. Omo lia vika? Muomu mu ka vuisa Yehova ndzolela, vamuanetu va ka mi tsiliela, kaha mu ka kala na ndzolela ye ku iza mu ku kuasa vakuenu.

13-14. Vika tua pande ku linga tu kuase vamuanetu na vandumbuetu? (Talenu cikupulo cili helu lia Vutala.)

¹³ Puenu na ku tuala mana ku vize vi va tondeka vakuenu. kapostolo Paulu ua mamuine Vakua Kilistu va kele mu Yundeya ngueni: “Kati mu suve ku muesa ngozi na ku pangeziela vakuenu vi muli navio: muomu Njambi ua lema vikombelo viaco.” (VaHe. 13:16) Mua vusunga ua va hele cimamuna ca cili! Mu nima ya ku tambula mukanda ua va sonekelele kapostolo Paulu, ka mua hitile ntsimbu ya kama vaze Vakua Kilistu va pandele ku seza vindzivo viavo, mingoso yavo, vavusoko vuavo vaze ka va puile Vakua Kilistu na ku tinina “ku mincinda.” (Mat. 24:16) Mu ntsimbu yaco, ca puile ca seho cikuma ku li kuasa umo na mukuavo. Nga va kele na cizilila ca ku linga vize via va lekele kapostolo Paulu, ca va puililile ca casi ku likuasa umo na mukuavo ha visoti vi va kele na ku pinda navio.

¹⁴ Vintsimbu vimo ce ku va puila ca cikalu kuli vamuanetu ku pinga vukuasi ku vize vi va tondeka. Ca ku muenako, umo muanetu ua tsisile mukua ndzivo yeni, vintsimbu vimo a hasa ku kala mu vusiua. Vuno muanetu uaco,  a tondeka ku ka mu kuasa ku vipanga via ha ndzivo, ku mu telekelako, na mendelo ni? Ka tua pandele ku lavelela ngecize muanetu a ku tu leka vukuasi vuka a tondeka. Vunoni nga tu livangela ku ka mu kuasa, muanetu a ka viukilila cikuma. Cikuavo naua ka tua pandele ku singanieka nguetu kuli vamo vamuanetu vali na ku mu kuasa, ni ikeye a ku tu leka kuahi. Ci pua ca cili nga mu lihula nguenu: nga nji na kele mu cihela ceni, vika nji na tondele vakuetu va nji lingile?

15. Vika tua pande ku linga nga tu tonda ku kuasa vakuetu?

¹⁵ Puenu va ku votsika. Mua vusunga, mu cikungulukilo cenu mua kala vamuanetu na va ndumbuetu va kala na cizango ca ku kuasa vakuavo. Kaha kuli vakevo, ku lingamo ka ca puile citanga. Cikuavo naua, tua tantekeya ngecize tua pande ku kulahela mu vukuasi vuavo hose oho! Mua vusunga netu tu tonda ku tambuluisa lungano lua ava vamuanetu. Muanetu Alan ali na miaka 40, ua pua mukuluntu mu cikungulukilo ua handekele ngueni: “Vutuhu Yesu ua kele na via vingi via ku linga, vunoni vantu va vitso viose, va tondele Yesu a va kuase. Vantu vaco va muene ngecize Yesu ua va hakele seho. Nange nji tonda ku tambuluisa lungano lueni mu ku pua muntu ua muasi ua ku linga neni vusamba, ku pua va ku votsika na ku kuasa vakuetu.”

16. Vati ku pangesa citume ca ku Visamo 119:59, 60, ci hasa ku tu kuasa ku tambuluisa lungano lua Yesu?

¹⁶ Kati tu hilukile mu nima nga tuesi na ku hasa ku tambuluisa Yesu mu vutantuluke. (Tia. 3:2) Aci singaniekenu ha umo ndongesi ali na ku lilongesa vumo vutongue, vunoni ka hasa ku tambuluisa mulongisi ueni mu vutantuluke. Vunoni omo a lilongesa ku vi sevuka vieni, a hasa ku tambuluisa mua cili mulongisi ueni. Kaha mu ku hita ca ntsimbu ndongesi a pua honi mukua vutongue. Na vuno vene,  vutuhu ka tu hasa ku tambuluisa Yesu mu vutantuluke, vunoni nga tu lihakela kapandi ka ku puisamo viose vize vi tue ku lilongesa mu Mbimbiliya, tu ka hasa ku mu tambuluisa.—Tandenu Visamo 119:59, 60.

17-18. Vivezikiso vika tu ka tambula nga tu tambuluisa lungano lua lua Yesu mu ku tuameka vizango via vakuetu?

¹⁷ Nga tu tuameka vizango via vakuetu ku lutue lua vietu, ci ka lingisa vakuetu navo ku tambuluisa lungano luaco. Umo mukuluntu ua lizina Tim ngueni: “Va vamuanetu va vakuendze va va puisile vakua ku kuasa vipanga omo lia ku kava lungano lua cili lua vakuavo. Vamuanetu vaco ve ku kuasa cikuma cikungulukilo kaha na ku pangela hamo na vakuluntu.”

¹⁸ Mu mavu a tua yoya, cingi ca vantu ve ku tuameka vizango viavo ku lutue. Vunoni ngamba va Yehova va lifuila. Tue ku lihakela kapandi ka ku tambuluisa lungano lua Yehova ka ku tuameka vizango via vakuetu lutue lua vietu. Ka tu hasa ku tambuluisa lungano lua Yesu mu vutantuluke, vunoni tu hasa ku kava “zingano zieni.” (1 Pet. 2:21) Mua vusunga, omo tu lihakela kapandi ka ku tambuluisa lungano lua Yesu mu tuameka vizango via vakuetu ku lutue, tu ka kala na ndzolela ka ku tantekeya ngecize tuli na ku vuisa Yehova ndzolela.