Ku laza nga yala tonda ku ambata mpuevo, kaha vusoko vua mpuevo vu na tava, vusoko vua yala vua kele na ku hana vionda ku vusoko vua mpuevo. Kaha va kele na kuonda viuma ngeci mua vupite, vimuna ni vimbongo. Vintsimbu vimo ca tavele ku fueta vionda mu ku pangela vusoko vua mpuevo ngue muze mua lingile Yakomba mua tondele ku ambata Lakele. Yakomba ua pangelele isemueno miaka 7. (Njen. 29:17, 18, 20) Vika honi vantu va kele na ku fuetela vionda?

Mulongisi ua Mbimbiliya Carol Meyers ngueni: “Ku ntsimbu ize, masoko a hitukilile ha ku lima, ngeci mukemuo ku hana vionda, ca puile ngue ku hingisa vipangi via kele na ku linga muana mpuevo mu ku kuasa va ise na va naye.” Vionda, hamo naua va kele na ku vi fuetela mu ku kaniamesa vusamba vua putukile ku kala ha masoko avali omo lia kuli ambatela. Kaha masoko aco a kele na kuli kuasa naua ku ntsimbu ya visoti. Cikuavo naua, vionda via muesele ha toma ngecize mpuevo va na mu handekeya kaha tangua a ka tunda ku ndzivo ya ise na kuya ku ndzivo ya yalieni.

Vutumbe vua vionda ka vua puile ku landa mpuevo ni ku muesa ngecize vampuevo citava ku va landa houe. Limo livulu ngualio: “Ku fueta vimbongo ni vikuata vieka mu ku pua vionda, ca lingisile malo a mu Isaleli ku soloka ngue a puile mingoso. Vunoni vionda via puile lika ndando i va kele na ku hana ku vusoko vua mpuevo kati via ku landa mpundu mpuevo.—Ancient Israel—Its Life and Institutions.

Lelo lino ku vifuti vimo, vantu ve ku tualelelaho na cisemua ca ku fueta vionda. Nga visemi Vakua Kilistu va vundila vionda ku votsika cavo ni nguetu ngozi yavo ci soloke ku vose mu ku toma vionda via ku puamo. (Filp. 4:5; 1 Kol. 10:32, 33) Mu ku lingamo va ka muesa ngecize ka va puile “vakua ku lema zimbongo” ni vakua lizangamena. (2 Tim. 3:2) Cikuavo naua, nga visemi Vakua Kilistu ka va tomo ndando ya kama cikuma, eci ce ku asiuisa yala linga kati a suenese cilika ca vulo ku laako cikuma omo lia ku tonda vionda. Kaha nga yala ua pua pioneiro, ka kevu ntsindiye ya ku likela eci cipanga ca ntsimbu yose a ka heliangele mu ku tonde vipanga vieka via kama linga a ka puisemo ku fueta vionda.

Mu vifuti vimo, nguvulu ya tumbika ndando ya vionda. Vakua Kilistu va kala mu vifuti viaco, va pande ku ononoka masiko aco. Omo lia vika? Muomu Lizi lia Njambi lia sika Vakua Kilistu “vononoke kuli vakua ku suana” na ku niunga masiko aze ka e ku liluisa na masiko a Njambi.—Loma 13:1; Vili. 5:29.