YEHOVA ua tavele vaIsaleli ku kombeleya tumboua na mavembe. Ava tuzila vavali ntsimbu yose va va tumbuila hamo, kaha ca tavele ku hingisa umo mu cihela ca mukuavo. (Levi. 1:14; 12:8; 14:30) Vati evi via kuasele vaIsaleli? Ca ku livanga, tumboua ka va kele na soloka ntsimbu yose. Omo lia vika?

Tumboua va pua viendangane, ka va kele na limbo limo lika. Ve ku lana mu Isaleli mu vingonde via ntuima. Vunoni mu Outubro ve ku ya ku vifuti vieka via ku yukuma, kaha ve ku hiluka lika mu Isaleli nga ntondue ili ha hiehi. (Muaso 2:11, 12; Yele. 8:7) Eci ci tu kuasa ku ivuisisa ngecize vaIsaleli ca kele na ku va kaluuila ku kombeleya tumboua mu cisika.

Vunoni mavembe va pua tuzila va limbo limo lika. Ngeci ka ca puile ca casi ku va uana mu Isaleli ntsimbu yose-oyo ya muaka. Cikuavo naua, ca tavele ku va pita. (Setekesenu na Yoano 2:14, 16.) Limo livulu ngualio: “Mu vimbonge na membo ose a mu Palestina mua kele mavembe va ku pita. Nkala ndzivo ya kele na camba ni nguetu imo mpako i va kele na ku tsokola ha civumbe linga va va pitilemo. Bible Plants and Animals.—Setekesenu na Isaya 60:8.

Ngeci mukemuo, mu ku tava tumboua na mavembe ku pua vikombelo, Yehova ua muesele ngecize ua pua mukua cilemo kaha ua ku votsika. Muomu ua hanguile tuzila vaze va va hasele ku uana vaIsaleli ntsimbu yose-oyo ya muaka.