1. Vika Yesu ua lekele vandongesi veni ku tuala ha ku kotoka kaha cilungula cika ua va hele?

 MUKUA lisupile matangua a andende ku ku-tsa ca Yesu, vandongesi veni va uana va mu ihuile nguavo: “Citantekeyeso cika tu ka tantekeya naco . . . ku-kotoka ca mavu?” (Mat. 24:3) Vandongesi va tondele ku tantekeya vati ve ku nongonuene ku kotoka ca Yunda. Kaha mua va kumbuluile, ka va lekele lika ku kotoka ca Yunda, vunoni na via ku kotoka ca mavu a tuli na ku yoyelamo mu ntsimbu ino. Kaha ku tuala ha ntsimbu ya ku kotoka ca mavu, Yesu ua handekele ngueni: “Vunoni litangua lize, cipue ola ize, na umo uahi a vi tantekeya, cipue tungelo va muilu, cipue Muana, vunoni Ise lika.” Kaha mu nima yaco ua lunguile vandongesi veni vose ngueni: “Zangamenu kaha vingilenu.”—Mako 13:32-37.

2. Omo lia vika Vakua Kilistu va kele mu Yunda va pandele ku vingila?

² VaYundeya, Vakua Kilistu va ku sekulu ya ku livanga, va pandele ku tualelelaho ku vingila, muomu hakeho hemanene miono yavo. Yesu ua lekele vakua ku mu kava va lavelele vitantekeyeso vie ku va kuasele ku nongonona ngecize ku nonga ca Yunda cili ha hiehi. Kaha ua va lekele ngueni: “Omo mu ka mona mikana ya masualale i na zingilika Yelusalema, kaha tantekeyenu ngecize ku papuoka cayo ci na heta.” Mu nima ya ku mona evi, va pandele ku niunga cilungula ca Yesu na ku “tinina ku mincinda.” (Luka 21:20, 21) Vaze va vingilile na ku niunga cilungula caco, vovokele omo vakua Loma va nongesele Yelusalema.

3. Vika tu simutuila mu cilongesa cino?

 ³ Tuli na ku yoyela ku matangua a ku kotokela a mavu ano. Ngeci mukemuo, netu tua pande ku zangama na ku vingila. Mu cilongesa cino, tu simutuila vati tu hasa ku kala na liano omo tu mona viuma vie ku soloka hano ha mavu. Tu hilula naua, vati tu hasa ku tuala mana kuli etu va vene na vati tu hasa ku pangesa vuino ntsimbu i tu na lisupu nayo.

4. Omo lia vika tua pande ku tuala mana ku vati viuma vili na ku soloka hano ha mavu, vili na ku puisamo vupolofeto vua mu Mbimbiliya?

⁴ Tuli na vusunga vua ku tuala mana ku vati viuma vili na ku soloka matangua ano, vili na ku puisamo vupolofeto vua mu Mbimbiliya. Ca ku muenako, Yesu ua tandangele mpundu viuma vi ka soloka mu ku tu kuasa ku nongonona ngecize ku kotoka ca mavu cili mu hiehi. (Mat. 24:3-14) Kapostolo Petulu ua tu kaniamesa tu tuale mana ku kuli puisamo ca vupolofeto, linga lutsilielo luetu lu tualeleleho ku kaniama. (2 Pet. 1:19-21) Livulu lia ku manusula lia mu Mbimbiliya, lia putuka na mezi: “Ku-Solola ca Yesu Kilistu, cize ca mu hele Njambi ku solola ku vakuamanda veni, viuma vize vi na pande ku soloka ku ntsimbu ya indende.” (Ku-So. 1:1) Ngeci mukemuo, tua haka seho ya kama ku viuma vili na ku soloka matangua ano ha mavu, linga tu hase ku tantekeya vati vie ku puisamo vupolofeto vua mu Mbimbiliya. Kaha tu hasa ku ivua cizango ca ku simutuila viuma viaco na vakuetu.

5. Vika ka tua pandele ku linga, vunoni vika tua pande ku linga? (Talenu naua cikupulo.)

⁵ Nga tuli na ku simutuila vumo vupolofeto vua mu Mbimbiliya, ka tua pandele ku vu tokakana ngoco ku vimo viuma vili na ku soloka. Omo lia vika? Muomu ka tu tondo ku handeka na vimo viahi vi koka matepeso mu cikungulukilo. Ca ku muenako, tu hasa ku ivua vantuamena va mavu va handeka via ku manusula cimo citanga na ku neha ciyulo na ku lembama. Vunoni ka tua pandele ku tuntila ku singanieka nguetu, muzimbu uaco u na pu vene ku lipuisamo ca ku 1 Tesalonika 5:3. Tua pande ku lihakela kapandi ka ku endela hamo lika na mizimbu i tue ku tambula ku hitila mu mikanda yetu. Mu tue ku handeka viuma kuliya na muze mua vi tuhuilamo lukungulukilo lua Yehova, tue ku kuasa cikungulukilo ku likuata kumo “na cizango cimo.”—1 Kol. 1:10; 4:6.

6. Vika tu lilongesa ku 2 Petulu 3:11-13?

⁶ Tandenu 2 Petulu 3:11-13. Kapostolo Petulu ua tu kuasa ku kala na liano omo tu hilula vupolofeto vua mu Mbimbiliya. Ua tu kuasa ku tuala mana ku “ku-sololoka ca litangua lia Njambi.” Omo lia vika? Kati linga tu seteke ku nongonona “litangua na ola” i ikeza Alemangendo, vunoni linga tu pangese vuino ntsimbu i tu na lisupu nayo mu ku linga “vilinga viose via ku lela na mu ku lemesa Njambi.” (Mat. 24:36; Luka 12:40) Ni nguetu, tu tonda ku lihakela kapandi ka ku kala na vilinga via cili mu ku linga cose linga viose vi tu lingila Yehova, vi pue omo lia cilemo cetu muli ikeye. Linga tu hase ku puisamo evi, tua pande ku lituala mana etu vavene.

7. Vati tue ku muesa ngecize tue ku lituala mana etu vavene? (Luka 21:34)

⁷ Yesu ua lekele vandongesi veni kati lika va tuale mana ku viuma vili na ku soloka ha mavu, vunoni na kuli vakevo vavene. Muzimbu uaco va u muesa ha toma ku Luka 21:34 (Tandenu.) Yesu ua handekele ngueni:  “Liniungienu.” Muntu ue ku liniunga ni nguetu ue ku lituala mana ikeye ivene, ue ku zangama mu ku tala vusonde vuose vu hasa ku tanganesa vusamba vueni na Yehova kaha ue ku lihakela kapandi ka ku vu tina. Mu ku lingamo, ue ku kala mu cilemo ca Njambi.—Visi. 22:3; Yun. 20, 21.

8. Cilungula cika kapostolo Paulu ua hele kuli Vakua Kilistu?

⁸ Kapostolo Paulu ua lunguile Vakua Kilistu, va lituale mana vakevo vavene. Ca ku muenako, ua lekele Vakua Kilistu ku Efeso ngueni: “Ngoco vene talenu ngecize mu ende na ku zangama, kati ngue visiname, vunoni ngue vakua mangana.” (Efe. 5:15, 16) Lutsilielo luetu, lua kala mu vusonde ntsimbu yose. ngeci mukemuo, Mbimbiliya ya tu mamuna ku tualelelaho ku nongonona ni nguetu ku “tantekeya cizango ca Muangana” Yehova linga tu hase ku liniunga ku vieseko viose via Satana.—Efe. 5:17.

9. Vati tu hasa ku nongonona cizango ca Yehova kuli etu?

⁹ Mbimbiliya ka ya tumbuile vusonde vuose vu hasa ku tsiha vusamba vuetu na Yehova. Kaha vintsimbu via vingi, tue ku linga vihangula ku tuala ha viuma ka va tumbuile mpundu mu Mbimbiliya. Ngeci mukemuo, linga tu hase ku linga vuino vihangula viaco, tua pande ku nongonona ni nguetu ku tantekeya “cizango ca Yehova.” Kaha tu hasa ku lingamo, mu ku lilongesa na ku hilula Lizi lia Njambi ku sua kumo. Omo tu tualelelaho ku lihakela kapandi ka ku nongonona cizango ca Yehova na ku kala “na visinganieka via Kilistu” kaha tu ka hasa kuenda ngue “vakua mangana,” ambe vene nga ka kuesi na limo lisiko liahi lia handeka ha viuma vi tu tonda ku linga. (1 Kol. 2:14-16) Vumo vusonde, vua vuasi ku vu nongonona, vunoni vukuavo co kuahi.

10. Ku vusonde vuka tua pande ku liniunga?

¹⁰ Tua pande ku liniunga ku vusonde ngeci mua, ku lisakalala via masungu na vakua vilio vieka, mutupu, mezi a ku vihia kaha na ku tala vueho vua vukenia, via vuntsele-ntsele na vikuavo. (Visa. 101:3) Citozi cetu Satana, ue ku tualelelaho ku tonda vukovelelo vua ku vihisa vusamba vuetu na Yehova. (1 Pet. 5:8) Nga ka tua zangamene, Satana a hasa ku kuna vimbuto via cipululu, makuli, lizangamena, vizindo, kulihasa na nkulundundu mu mitima yetu. (Ngal. 5:19-21) Ha katete, tu hasa ku mona ngue evi vifua viaco ka via puile citanga ca kama. Vunoni nga ka tu litundisavio mu vuasi-vuasi, vi hasa ku kola na ku tu kokela vitanga.—Tia. 1:14, 15.

11. Vusonde vuka vua ku ndzimba tu na pande ku liniunga kaha omo lia vika?

¹¹ Vumo vua vusonde vu tua pande ku liniunga, vua pua ku likuata vusamba vua ku vihia. Aci singaniekenu ha cimueso eci. Mue ku panga na umo mukuenu ka puile Mukaleho ua Yehova. Kaha mu tonda muntu uaco a mone Vakaleho va Yehova mu njila ya cili. Ngeci mukemuo, mu lihakela kapandi ka ku mu muesa ngozi na ku mu kuasa. Kaha halumo vintsimbu vimo, mu tava ku simutuila-simutuila na muntu uaco ha ntsimbu ya ku tutumuisa. Ku heta haze ka pua ka lingo-lingo kenu. Kaha mu nima ya ntsimbu, ku simutuila cenu ci kuata-kuata ku via mazilo. Ha katete mu linga cose linga kati mu ci hakuile, vunoni omo lia ku ci halakana vintsimbu via vingi cimpande caco ka ci mi puila citanga. Kaha tangua limo, muntu uaco a mi lania ku ka hitisa vimo mu kanua mu nima ya vipanga kaha mu tava. Mu nima ya ntsimbu ya indende, nenu mu putuka ku linga viuma ngue mue ku vilinga ikeye. Ngeci mukemuo, vutuhu tue ku lihakela kapandi ka ku muesa ngozi  na ku singimika vantu vose, vunoni tua pande ku vuluka ngecize vilinga via vaze va tue ku sikama navo, vi hasa ku tu sambukila. (1 Kol. 15:33) Nga tu tuala mana kuli etu vavene ngue mua tu mamuine Yesu, tu ka liniunga ku ku likata na vantu ka ve ku yoya mua ya vitume via Yehova. (2 Kol. 6:15) Kaha mu tu ka mona vusonde, tu ka linga cose mu ku liniunga ku vukevuo.

12. Vika va pandele ku linga vandongesi va Yesu mu va kele na ku lavelela ku kotoka ca mavu?

¹² Vandongesi va Yesu ka va kosole mukali mu va kele na ku lavelela ku kotoka ca mavu. Yesu ua va kundikile cimo cipanga. Ua va lekele va ambulule muzimbu ua cili “mu Yelusalema, na mu Yundeya yose na Samaliya, na ku mutamba uze ha lenga mavu.” (Vili. 1:6-8) Mua vusunga, vakua ku kava Yesu va tambuile cipanga ca kama! Ngeci mukemuo, va pangesele vuino ntsimbu yavo mu ku lihakela kapandi ka ku puisamo cipanga caco.

13. Omo lia vika tua pande ku pangesa vuino ntsimbu yetu? (Kolose 4:5)

¹³ Tandenu Kolose 4:5. Linga tu hase ku lituala mana etu vavene, tua pande ku lihilula vati tue ku pangesa vuino ntsimbu yetu. Omo lia vika? Muomu ‘luvinda lu hasa ku solokela muntu uose-ouo.’ (Ekel. 9:11) Tu hasa kutsa ha ntsimbu yose oyo.

14-15. Vati tu hasa ku pangesa vuino ntsimbu yetu? (VaHevelu 6:11, 12) (Talenu naua cikupulo.)

 ¹⁴ Tu hasa ku pangesa vuino ntsimbu yetu mu ku linga cizango ca Yehova na ku kaniamesa vusamba vuetu neni. (Yoa. 14:21) Ngeci mukemuo, tua pande ku likolesa ku pua vakua lukakatela na ku lisala “ntsimbu yose na vipanga via Muangana.” (1 Kol. 15:58) Kaha omo ku kotoka ci keza, cipue ku kotoka ca ano mavu ni ca muono uetu, ka tu ka liveye na limo litangua liahi.—Mat. 24:13; Loma 14:8.

¹⁵ Lelo lino, Yesu ali na ku tualelelaho ku tuamenena vandongesi veni linga va ambulule muzimbu ua cili ua Vuangana vua Njambi mu mavu ose. Ikeye ue ku lingako mutamba ueni. Ku hitila mu lukungulukilo lua Yehova, Yesu ue ku tu longesa mua ku ambuluila kaha na ku tu hana vikuata vi tua tondeka linga tu hase ku puisamo cipanga caco. (Mat. 28:18-20) Kaha etu, tue ku lingako mutamba uetu mu ku fuitangana mu cipanga ca ku ambulula na ku longesa kaha na ku vingila, omo tu lavelela ntsimbu ya ka kotola Yehova ano mavu. Kaha mu ku niunga cimamuna ca ku VaHevelu 6:11, 12, tu ka tualelelaho ku kakatela ku lulavelelo luetu “na ha ku sulumuina.”—Tandenu.

16. Kapandi ka ka tua lihakela?

¹⁶ Yehova ua hangula laza litangua na ntsimbu ya ka kotola ano mavu a Satana. Mu li ka heta litangua liaco, Yehova a ka puisamo vupolofeto vua haka mu Lizi lieni. Vintsimbu vimo, ci hasa ku soloka ngue ku kotoka ca ano mavu ci li na ku simbula mua kama. Vunoni ku iza ca litangua lia Yehova ka “ci ka simbula.” (Hav. 2:3) Ngeci mukemuo, tu lihakelenu kapandi ka ku “tala kuli Yehova” na ku “tumamena Njambi ya vuovoke” vuetu.—Mika 7:7.