1. Ntsimbu ika Vakua Kilistu va ku vuavesa vose va kaya muilu?

 VANGAMBA va Yehova va kele na ku lihula nguavo: ‘Ntsimbu muka Vakua Kilistu va ku vuavesa va ku manusuila va kaya muilu?’ Ku laza tua kele na ku singanieka nguetu, Vakua Kilistu va ku vuavesa va ka tualelelaho ku yoya mu citungu mu kamo ka ntsimbu mu nima ya kuhua ca Alemangendo. Vunoni, mu Vutala vua 15 ya Julho ya 2013 tua lilongesele ngecize vose Vakua Kilistu va ku vuavesa 144.000 va kaya muilu ntsimbu kanda ndzita ya Alemangendo i putuke.—Mat. 24:31.

2. Vika vamo va hasa ku lihula, kaha vika tu simutuila mu cilongesa cino?

² Vamo halumo ve ku lihula nguavo: Vika vi ka solokela “vampanga veka” mu ntsimbu ya “lamba ya kama”? (Yoano 10:16; Mat. 24:21) Vamo “vampanga veka” ve ku lisosomua nguavo, ku va ka ntantekeya via ku linga mu va kaya vamuanetu Vakua Kilistu va ku vuavesa muilu. Tu hiluleni ha mizimbu ivali ya mu Mbimbiliya i hasa ku tu lingisa halumo ku lisosomua. Kaha mu nima yaco, tu simutuila omo lia vika ka tua pandele ku lisosomua.

VIKA KA VI KA SOLOKELA VAMPANGA VEKA?

3-4. Vamo halumo ve ku lisosomua na vika? Kaha omo lia vika?

³ Vamo halumo ve ku lisosomua nga vampanga veka va ka likela ku lemesa Yehova omo ka va ka kala naua na Vakua Kilistu va ku vuavesa va mu Civunga ca Vantuamena mu ku va tuamenena. Ve ku livua ngoco, halumo omo lia imo mizimbu ya mu Mbimbiliya. Tu ci simutuilenu ha imo mizimbu ivali.  Ha katete muzimbu ua Yehoyanda, Sasendote ua Kama. Ua puile umo ngamba ua Njambi ua lutsilielo. Neni na mpueyendi Yehosaveate va niungile umo kanike Yoase kaha na ku mu kuasa a pue muangana ua cili. Omo Yehoyanda tele acili na muono, Yoase ua lemesele Yehova na ku linga via cili. Vunoni mua tsile Yehoyanda, Yoase ua halakanene ku vamiata vakua ku alulukila Njambi, omo liaco ua likelele ku lemesa Yehova.—2 Miz. 24:2, 15-19.

⁴ Muzimbu ua mu civali, ua Vakua Kilistu va ku sekulu ya mu civali. Kapostolo ua ku sulumuina kutsa ua puile Yoano. Te a cili na muono, ua kuasele Vakua Kilistu va vengi ku tualelelaho kupangela Yehova. (3 Yoano 4) Ngue mu va lingile vapostolo va Yesu, Yoano ua fuitanganene mu ku niunga vikungulukilo ku vilongesa via makuli na vilinga via ku pihia. (1 Yoa. 2:18; 2 Tes. 2:7) Mua tsile Yoano, vilongesa via makuli via lisanduokele ngeci mua tuhia. Mu miaka ya hateleko, vakua ku alulukila vusunga va sanduele vilongesa via vingi via makuli kaha na ku tavesa vilinga via ku pihia vi kovele mu vikungulukilo.

5. Vika ka tua pandele ku singanieka ku tuala ha mizimbu eyi ivali ya mu Mbimbiliya?

⁵ Vuno eyi mizimbu ivali ya mu Mbimbiliya, ya muesa ngecize vampanga veka va ka putuka ku linga via vipi ngeci mua Yoase, ni ku alulukila vusunga omo Vakua Kilistu va ku vuavesa va kaya muilu ni? Houe! Na limo litangua liahi. Vampanga veka va ka tualelelaho ku lemesa ca vusunga, kaha Yehova a ka tualelelaho ku va niunga. Vusunga vuka tuli navuo?

KU LEMESA CA VUSUNGA CI KA TUALELELAHO

6. Vintsimbu vika vitatu vi tu hilula?

⁶ Vusunga vuka tuli navuo ngecize ku lemesa ca vusunga ci ka tualelelaho mu vintsimbu via vikalu via ku lutue? Omo lia viuma vi tua lilongesa mu Mbimbiliya ku tuala ha ntsimbu i tuli na ku yoyela. Ntsimbu ya vaIsaleli va ku laza na Vakua Kilistu va ku sekulu ya mu civali, ya liseza mua kama na ntsimbu yetu. Tu hilulenu ha vintsimbu viaco vitatu: (1) Ntsimbu ya vaIsaleli va ku laza, (2) mu nima ya kutsa ca vapostolo, kaha (3) “ku sungamesa viuma viose” ku ntsimbu yetu.—Vilinga 3:21.

7. Ku ntsimbu ya vaIsaleli va ku laza, omo lia vika vakua kuononoka ka va zeyele, vutuhu vamiangana na vaIsaleli vakuavo va muesele lisino?

⁷ Ntsimbu ya vaIsaleli va ku laza. Mosesa te kanda a tse, ua lekele vaIsaleli ngueni: “Nji tantekeya ngecize omo nji na tsi laza mu ka lipihisa muose, na ku litenga ku njila ize i nji na mi siki.” (Ndeu. 31:29) Mosesa ua lekele naua vaIsaleli ngecize va ka va tuala ku vundzinda nga va muesa lisino. (Ndeu. 28:35, 36) Vuno mezi aco a lipuisilemo ni? Eyo. Mu miaka ya yingi, vamiangana va kele na ku linga via ku pihia ku meso a Yehova kaha na ku hungumuna vangamba va Njambi. Ngeci Yehova ua va hele kasitiku na ku viana vuangana vua ku muyati ua vaIsaleli ku sika vantu veni. (Ezek. 21:25-27) Vunoni vaIsaleli va kuononoka va muene ku lipuisamo ca mezi aco, kaha ca va hele vusunga vua ku tualelelaho ku lemesa Njambi.—Isaya 55:10, 11.

8. Omo lia vika ka ci tu komouesa ku tantekeya nguetu Vakua Kilistu va ku sekulu ya mu civali ve ku hungumukile? Lombololenu.

⁸ Mu nima ya kutsa ca vapostolo. Ka vie ku tu komouesa ku tantekeya ngecize Vakua Kilistu va ku sekulu ya mu civali ve ku hungumukile. Muomu Yesu ua polofetele ngueni ku ka soloka vakua ku alulukila vusunga. (Mat. 7:21-23; 13:24-30, 36-43) Kapostolo Paulu, Petulu na Yoano va limuenene mu vua putukile ku lipuisamo ca vupolofeto vuaco. (2 Tes. 2:3, 7; 2 Pet. 2:1; 1 Yoano 2:18) Mu nima ya kutsa ca kapostolo ua ku manusuila,  vakua kualulukila vusunga va puile mutamba ua Mbambilone ya Kama, ni nguetu civunga cose ca malombelo a makuli. Via polofetele Yesu via lipuisilemo.

9. Vati ntsimbu i tuli na ku yoyela ya liseza na ya vaIsaleli va ku laza na Vakua Kilistu va ku sekulu ya mu civali?

⁹ Ntsimbu ya “ku sungamesa viuma viose.” Ntsimbu ya vaIsaleli va ku laza na Vakua Kilistu va ku sekulu ya mu civali, ya liseza mua kama na ntsimbu yetu. Vati veku tumbula ntsimbu i tuli na ku yoyela? Tue ku i tumbula nguetu “matangua aze a ku kotokela” ca mavu ano a ku pihia. (2 Tim. 3:1) Vunoni Mbimbiliya ya muesa ngecize kua kele ntsimbu yeka ya kama ya putukile ha ntsimbu yaco. Kaha i ka tualelelaho noho Vuangana vua vu Mesiya vu ka kuasa vantu kupua va ku tantuluka na puisa mavu citungu. Ntsimbu yaco ve ku i tumbula nguayo, ntsimbu ya “ku sungamesa viuma viose.” (Vili. 3:21) Kaha ya putukile mu 1914. Vika vi va sungamesele? Yesu ua putukile ku sika muilu. Cikuavo naua, Yehova ue ku kele na muangana ua ku cikota ca Muangana Ndaviti. Kati ovio lika via sungamesele Yehova, vunoni na ku kuasa vangamba veni ku mu lemesa mu njila ya tonda ikeye. (Isaya 2:2-4; Ezek. 11:17-20) Vuno ku lemesa ca vusunga tangua ci ka zimangana naua ni?

10. (a) Vika Mbimbiliya ya polofetele ku tuala ha ku lemesa ca vusunga ku matangua ano? (Isaya 54:17) (b) Vusunga vuka vue ku tu hana vupolofeto vuaco?

¹⁰ Tandenu Isaya 54:17. Aci singaniekenu ha vupolofeto vuaco, nguavo: “Citua na cimo cahi ca ku ku fulila ci ka vezika”! Mezi aco ali na ku lipuisamo lelo lino. Mezi a na hatako nao eku tu kaniamesa, nguao: “Kaha vana vove vose va ka lilongesa kuli Yehova; na ciyulo ca vana vove ci ka kama. Va ka ku tumbika mu vuviuke . . . Ka u kevua vuoma; na ku vize vi zuzuisa, muomu ka vi ka ku suena.” Mezi aco eku lipuisamo lelo lino. (Isaya 54:13, 14) Ambe vene Satana “njambi ua ntsimbu ino,” ka hasa ku vindika cipanga ca ku longesa ci ve ku puisamo vangamba va Yehova. (2 Kol. 4:4) Ku lemesa ca vusunga ci ka tualelelaho na ku miaka yose. Ngeci mukemuo, citua na cimo cahi ca ku tu fulila ci ka vezika!

VIKA VI KA SOLOKA?

11. Vusunga vuka tuli navuo ngecize, vakua civunga ca kama ka va ka va mbila kuti omo Vakua Kilistu va ku vuavesa va kaya muilu?

¹¹ Vika vi ka soloka omo Vakua Kilistu va ku vuavesa va kaya muilu? Kati mu suve nguenu, Yesu ua pua Kaniungi uetu. Ua pua mutue ua cikungulukilo. Kaha Yesu ngueni: “Umo  lika mukua ku tuamena, ikeye Kilistu.” (Mat. 23:10) Yesu ali na ku sika muilu, ue ku tuamenena na ku niunga vandongesi veni ntsimbu yose. Ngeci mukemuo, vandongesi va Kilistu ka va pandele kuivua vuoma. Mua vusunga, vutuhu ka tu tantekeya vati a ka tuamenena vantu veni ha ntsimbu yaco. Vunoni tu hilulenu amo malungano a mu Mbimbiliya a hasa ku tu kaniamesa.

12. Vati Yehova ua niungile vantu veni (a) mua tsile Mosesa? (b) mua tambuile Eliya cipanga ceka? (Talenu naua cikupulo.)

¹² Mosesa ua tsile, ntsimbu kanda vaIsaleli va kovele mu Cifuti ca Cikulaheso. Vika via solokelele vangamba va Njambi? Vuno Yehova ua likelele ku va kuasa mua tsile Mosesa ni? Houe. Yehova ua tualeleleho ku va kuasa mu va kele na ku muononoka. Mosesa ntsimbu kanda a tse, Yehova ua mu lekele a hangule Yehosua linga a tuamenene vantu veni. Mu miaka ya yingi, Mosesa ua mu longesele ku puisamo cipanga caco. (Ezu. 33:11; Ndeu. 34:9) Cikuavo naua, kua kele vamala va ku hia vavengi va kuasele ngeci mua tupitau va makulukazi, va vihita, va makumi atanu kaha na tupuitau va makumi. (Ndeu. 1:15) Njambi ua kuasele vantu veni. Ca ku muenako, Eliya ua fuitanganene mu miaka ya yingi mu ku kuasa vaIsaleli linga va lemese Yehova. Mu nima ya ntsimbu, Yehova ua mu hele cipanga ceka mu Yunda. (2 Vam. 2:1; 2 Miz. 21:12) Vuno vakua kuononoka va ku vuangana vua miyati likumi ya Isaleli va va mbilile kuti ni? Houe. Mu miaka ya yingi Eliya ua longesele Elisa. Na “vana va vapolofeto” navo naua va va longesele. (2 Vam. 2:7) Ngeci mukemuo, kua kele vamala vavengi va kuasele vantu va Njambi. Kaha Yehova ua tualeleleho ku puisamo vutumbe vueni na ku niunga vakua ku mu lemesa mu vusunga.

13. Kuliya na VaHevelu 13:5b, vika Yehova ua tu kulahesa? (Talenu naua cikupulo.)

¹³ Kuliya na malungano a tu na tumbula, mu ku mona cenu, vika vi ka soloka omo Vakua Kilistu va ku vuavesa va ku manusuila va kaya muilu? Ka tua pandele ku lisosomua, muomu Mbimbiliya ya solola vumo vusunga vue ku tu kaniamesa: Yehova ka ka mbila kuti vangamba veni. (Tandenu VaHevelu 13:5b.) Ngeci mu va lingele Mosesa na Eliya, Vakua Kilistu va ku vuavesa navo va tantekeya seho ya ku longesa vakuavo linga va puisemo cipanga ci va va kundika. Kaha mu miaka ya yingi, vakua Civunga ca Vantuamena ve ku tualelelaho ku longesa vamuanetu va ku vampanga veka linga va tuamenene vakuavo. Ca ku muenako, ve ku  viukisa visikola via Vakuluntu mu cikungulukilo, tuniungi va ku zinguluka, civunga ca Vakuluntu va Mbetele, kaha na vikuavo. Cikuavo naua, vakua Civunga ca Vantuamena ve ku longesa vakuasi vavo va ku vindzango via ku liseza-seza. Vamuanetu vaco, ve ku puisamo viteli via vingi mu lukungulukilo. Kaha va liviukisila ku tualelelaho ku niunga vampanga va Kilistu.

14. Ntsina yika ya seho mu cilongesa eci?

¹⁴ Ntsina ya seho mu cilongesa, eyi: Ku lemesa ca vusunga ci ka tualelelaho ha mavu, ambe omo Vakua Kilistu va ku vuavesa va ku manusuila va kaya muilu, mu hiehi na ku ntsongo ya lamba ya kama. Vangamba va Yehova ka va ka likela ku mu lemesa na mutima uose. Tu tantekeya ngecize ha ntsimbu yaco, civunga ca vifuti, ni nguetu Ngonge ya Mangonge ci ka luisa vangamba va Njambi. (Ezek. 38:18-20) Vunoni ku luisa caco ka ci ka lingisa vangamba va Njambi ku likela ku mu lemesa, muomu Yehova a ka va niunga! Mu cimo cimona, kapostolo Yoano ua muene “civunga ca kama” ca vampanga veka va Kilistu. Kaha va mu lekele nguavo civunga caco ca “fumine ku lamba ize ya kama.” (Ku-So. 7:9, 14) Ngeci mukemuo, tuli na vusunga nguetu Yehova a ka vohiela!

15-16. Kuliya na mukanda ua Ku-Solola 17:14, vika va ka linga Vakua Kilistu va ku vuavesa mu ndzita ya Alemangendo? Kaha omo lia vika vie ku tu kaniamesa?

¹⁵ Vamo halumo va hasa ku lihula nguavo: “Vuno vika va ka linga Vakua Kilistu va ku vuavesa mu va kaya muilu?” Mbimbiliya ya kumbulula cihula caco nguayo, vanguvulu va mavu ‘va ka lua na Muana mpanga.’ Vunoni ka va ka vula ndzita yaco. Cinimbu nguaco: “Muana mpanga a ka va vula.” Kaha veya va ka mu kuasa? Cinimbu ca kumbulula nguaco, vakevo “va ku sana,” “va ku hangula,” na “vakua cili.” (Tandenu Ku-Solola 17:14.) Va pua veya? Va pua Vakua Kilistu va ku vuavesa va ka sanguka! Ngeci mukemuo, Vakua Kilistu va ku vuavesa va ku manusuila mu va kaya muilu, mu hiehi na ku ntsongo ya lamba ya kama, va ka putuka mu cipanga ca ku lua. Mua vusunga cipanga caco, ci komouesa.  Vamo Vakua Kilistu va ku vuavesa va puile masualale, ntsimbu kanda va pue Vakaleho va Yehova. Vunoni mu ku pua Vakua Kilistu va vusunga, va likela ku lua ndzita na ku lilongesa ku yoya mu ciyulo na vakuavo. (Ngal. 5:22; 2 Tes. 3:16) Vunoni mu va kaya muilu va ka lipandakana hamo na Kilisitu kaha na tungelo va ku lela mu ku nongesa vitozi va Njambi, mu ndzita ya ku manusuila.

¹⁶ Aci singaniekenu, vamo Vakua Kilistu va ku vuavesa, va na kulupa kaha ka vesi na ndzili. Vunoni mu va ku va sanguila muilu, va ka pua tungelo va ndzili cikuma, va ka lipandakana na Muangana ua Ngolo, Yesu Kilistu. Mu nima ya ndzita ya Alemangendo, va ka fuitangana mu ku kuasa vantu ha mavu va pue va ku tantuluka. Mua vusunga, va ka kuasa cikuma vamuanaye ku hiana muze mu va lingile te va cili va ku hona ku tantuluka!

17. Vusunga vuka tuli navuo nguetu vangamba va Njambi va ka va niunga mu ndzita ya Alemangendo?

¹⁷ Mua pua umo ua vampanaga veka ni? Nga mukemuo, vika mua pande ku ka linga mu i ka putuka ndzita ya Alemangendo? Kulahelenu muli Yehova na kuononoka vimamuna vieni. Ku lingamo ca ambatesela kumo na vika? Mbimbiliya ya tu kaniamesa nguayo: “Kovela mu hondo na ku lisoka mapito ove: vanda kantsimbu ka kandendendende, noho matoto a na hiti.” (Isaya 26:20) Vose vangamba va Njambi vakua kuononoka, va ka va niunga ha ntsimbu yaco. Ngeci mua kapostolo Paulu, netu tuli na vusunga nguetu “cipue via vuangana, cipue evi via vuovuno, cipue evi vi keza . . . ka [vi] hasa ku tu hangununa ku cilemo ca Njambi.” (Loma 8:38, 39) Ntsimbu yose vulukenu nguenu: Yehova ua mi lema kaha na limo litanga liahi a ka mi mbila kuti!