Vutuhu ngoco, Yehova ua tonda tu lavelela ntsimbu ya hangula mu ku lingako mumo. Omo lia vika? Vika vi hasa ku tu kuasa ku kala na ndzolela omo tu lavelela?

OMO LIA VIKA YEHOVA UA TONDA TU LAVELELE?

Mbimbiliya nguayo: “Ngoco vene Yehova a ka tumamena, mangana, a mi lingile kavumbi; Na ngoco vene a ka mone vukama linga a mi vuile cikeketima: Muomu Yehova ikeye Njambi ua Vuoloke; Va vezika vaze vose va mu tumamena.” (Isaya 30:18) Aa mezi, ha katete va a talekeselekuli vaYundeya vakua lisino. (Isaya 30:1) Vunoni ha kati ka vaYundeya ha kele vamo vakua lutsilielo, kaha mezi aco a va hele lulavelelo. Netu vangamba va Yehova lelo lino eku tu hana lulavelelo.

Ngeci mukemuo, tua pande ku lavelela na ntsintsa muomu Yehova neni ali na ku lavelela na ntsintsa. Ua hangula ntsimbu ya ka manusula visoti ha mavu, kaha ali na ku lavelela ntsimbu yaco i hete. (Mat. 24:36) Ha ntsimbu yaco, ci ka lisolola ha toma ngecize Satana ue ku vangeya Yehova na vaze ve ku mu pangela. Kaha a ka nongesa Satana na vose ve ku mu hakuila, vunoni yetu a ka tu ‘vuila cikeketima.’

Mu ntsimbu ino, citava Yehova ka ka tundisa visoti vietu, vunoni ua tu kulahesa ngecize tu hasa ku lavelela na ndzolela. Ngue mua handekele Isaya tu hasa ku lavelela viuma na ndzolela. (Isaya 30:18) a Vati tu hasa ku uana ndzolela yaco? Tu hilulenu vinanga viuana vi hasa ku tu kuasa.

VIKA VI TU KUASA KU LAVELELA NA NDZOLELA?

Tualenu mana ku via cili. Muangana Ndaviti ua hitile mu visoti via vingi mu muono. (Visa. 37:35) Vunoni ua sonekele ngueni: “Huima muli Yehova, kaha mu tumamene na ntsintsa: kati ume mutima muomu uze a vezika mu njila yeni, omo yala uze a lingisa vutumbe vua vupi.” (Visa. 37:7) Ndaviti neni ua kavele eci cimamuna, mu ku tuala mana ku lulavelelo lua ku mu ohiela. Kaha ua tualele  mana ku nkala civezikiso ca mu hanene Yehova. (Visa. 40:5) Ngeci mukemuo, nga tu tuala mana ku viuma via cili, ca ku hona ku lisosomua na viuma via ku vihia vie ku soloka, ci ka tu puila ca casi ku lavelela Yehova.

Fuitanganenu mu ku sangaziala Yehova. Mukua ku soneka Visamo 71, citava ua puile Ndaviti, ua lekele Yehova ngueni: “Vunoni ange nji ka lavelela ntsimbu yose, Kaha nji ka vueza-vuezako mu ku ku sangala.” (Visa. 71:14) Vati ua sangazialele Yehova? Mu ku lekako vakuavo via Yehova, na ku muimbila visangala. (Visa. 71:16, 23) Ngeci mua Ndaviti, tu hasa ku yoya mu ndzolela omo tu lavelela Yehova. Tue ku mu sangala mu ku ambulula, ku simutuila cetu ca tangua na tangua, na mu kuimba miaso yetu. Ntsimbu yeka i mu kemba muaso ku Ndzivo ya Vuangana, ka tualenu mana ku muzimbu ulimo.

Tavenu ku kaniamesa ca vamuanoko. Omo Ndaviti ua hitile mu visoti, ua lekele Yehova ngueni: “Nji ka lavelela ku lizina liove, muomu lia viuka, ku meso a vakua ku lela vove.” (Visa. 52:9) Netu tu hasa ku uana ku kaniama ca kama ku vamuanetu, kati lika ku viuano na mu lihia, vunoni na ha vintsimbu via vueho.—Loma 1:11, 12.

Kaniamesenu lulavelelo luenu. Visamo 62:5 nguayo: “Muono uange, tumamena Njambi lika kulu; muomu kuli ikeye nja lavelela.” Tua tondeka ku kala na lulavelelo lua ku kaniama, cikuma-kuma nga ku kotoka ka ciza ha ntsimbu i tua lavelela. Tua pande ku kala na vusunga ngecize vikulaheso via Yehova vi ka lipuisamo, ambe nga vi soloka ngue vili na ku simbula cikuma. Tu hasa ku kaniamesa lulavelelo luetu mu ku lilongesa Lizi lia Njambi. Ku lilongesa vupolofeto, ku litombola ca Mbimbiliya, na mizimbu ikuavo ya tu soluela Yehova ku tuala hali ikeye ivene. (Visa. 1:2, 3) Cikuavo naua, tua pande ku tualelelaho ku “vundila muli sipilitu santu” linga tu niunge vusamba vuetu na Yehova, oku tu lavelela ku lipuisamo ca cikulaheso ceni ca muono ua ya-ye.—Yun. 20, 21.

Ngeci mua Muangana Ndaviti, ua kele na vusunga ngecize Yehova ue ku niunga na ku muesa cilemo kuli vaze ve ku mu lavelela. (Visa. 33:18, 22) Tualelenuho ku lavelela na ntsintsa muli Yehova, mu ku tuala mana ku viuma via cili, mu ku mu sangala, mu ku likata na vamuanoko, na mu ku kaniamesa lulavelelo luenu.