1-2. (a) Tangua lika tue ku vuluka mua kama muntu u tua lema ua tsa? (b) Vika ua tu sikile ku linga Yesu ku vutsiki vua ku manusula tele kanda a tse?

MU TUE ku tsisa muntu u tua lema, ambe mu hite miaka ya ingi vati, kasi tue ku mu vuluka. Kaha tue ku mu vuluka mua kama ha litangua lia tsile.

² Nkala muaka, tue ku lipandakana ha makulukazi a vantu ve ku likungulula mu ku vuluka litangua lia tsile muntu u tua lema cikuma—Yesu Kilistu. (1 Pet. 1:8) Tue ku likungulula mu ku vuluka ku-tsa ca muntu ua hele muono ueni mu ku tu kula ku vupi na kutsa. (Mat. 20:28) Kaha ivene Yesu neni, ua tonda vakua ku mu kava va pue na ku vuluka kutsa ceni. Ku vutsiki vua ku manusuila tele kanda a tse, ua lingile cimo ciuano ca ku lifuila na ku sika vandongesi veni ngueni: “Lingenu ngecize mu ku nji vulukilaho ange.”—Luka 22:19.

3. vika tu simutuila mu cilongesa cino?

³ Vamo vamuanetu va vandende ve ku kunguluka ku Mulalelo, va lavelela ku ka yoyela muilu. Vunoni kue ku kala naua makulukazi na makulukazi a vantu va lavelela ku ka yoyela ha mavu. Mu cilongesa cino, tu hilula ha vusunga vue ku lingisa evi vivunga vivali ku kala na cizango ca kama ca ku kunguluka ku Mulalelo nkala muaka. Kaha tu hilula naua, ha vukuasi vu tue ku uana mu ku lingamo. Tu putukenu mu ku simutuila vumo vusunga vue ku lingisa vamuanetu va ku vuavesa ku kunguluka ku Mulalelo.

4. Omo lia vika Vakua Kilistu va ku vuavesa ve ku lila ku vimueso via Mulalelo?

⁴ Nkala muaka omo Vakua Kilistu va ku vuavesa ve ku kunguluka ku Mulalelo, ve ku lia ku vimueso via Mulalelo. Omo lia vika honi ve ku lila ku vimueso viaco? Linga tu kumbulule eci cihula, tu hilulenu vika via solokele ku vutsiki vua ku manusuila vua muono ua Yesu hano ha mavu. Mu nima ya ciuano ca Pasovala, Yesu ua lingile ciuano ceka ca tsimana lelo ku pua, Mulalelo ua Muangana. Ua hanene mbolo na viniu ku vapostolo veni 11 na ku va leka va lie na ku nua. Ha ntsimbu yaco Yesu ua va lekele via matavasiano avali, litavasiano lia liha na litavasiano lia Vuangana. * (Luka 22:19, 20, 28-30) Aa matavasiano, a hele vukovelelo kuli vapostolo na vamo vantu va ku puamo vua ku pua vamiangana na vasasendote muilu. (Ku-So. 5:10; 14:1) Vakua Kilistu va ku vuavesa vakevo lika va kala mu matavasiano aa avali. Ngeci mukemuo Vakua Kilistu va ku vuavesa va lisupaho * vakevo lika va pande ku lia ku mbolo na ku viniu via Mulalelo.

5. Vika va tantekeya Vakua Kilistu va ku vuavesa ku tuala ha lulavelelo lu va tambula?

⁵ Vusunga vukuavo vua lingisa Vakua Kilistu va ku vuavesa ku lavelela cikuma litangua lia Mulalelo, ovu: Ciuano caco, ce ku va hana vukovelelo vua ku singanieka ha lulavelelo luavo. Yehova ua va hana lulavelelo lua ku lifuila, muono ka ue ku tsa cipue ku nonga muilu, ku ka pangela hamo lika na muangana Yesu Kilistu na vakuavo va 144.000 kaha helu lia viose, ku kala mpundu ku meso a Yehova Njambi! (1 Kol. 15:51-53; 1 Yoa. 3:2) Vakua Kilistu va ku vuavesa va tantekeya ngecize va va lania linga va ka tambule evi vivezikiso via ku lifuila muilu. Vunoni linga va va tave ku ka kovela muilu, va na pande ku tualelelaho ku pua vakua vuoloke na ha kutsa cavo. (2 Tim. 4:7, 8) Ku singanieka ha lulavelelo luavo lua ku ka yoyela muilu, ce ku va vuisa ndzolela ya kama. (Tito 2:13) Amba vampanga veka co? (Yoa. 10:16) Vumo vusunga vuka vue ku va lingisa ku kunguluka ku Mulalelo?

6. Omo lia vika vampanga veka ve ku kunguluka ku Mulalelo nkala muaka?

⁶ Vampanga veka, ve ku kunguluka ku Mulalelo kati lika mu ku lia ku vimueso via Mulalelo, vunoni mu ku pua vakua ku tala lika. Muaka ua 1938, ukeuo ua katete uva laniene mpundu vaze va lavelela ku ka yoyela ha mavu va ka kunguluke ku Mulalelo. Vutala vua 1 ya Março ya 1938 mu Inglês vua handekele nguavuo: “Ci ka pua ca cili kaha ca ku sungama vene, vampanga veka navo va ka kunguluke ku ciuano caco, linga va ka mone vati ce kuenda. . . . Ya pande ku pua ntsimbu ya ndzolela na kuli vakevo, kaha mukemuo mu ya pua vene.” Ngeci mua vantu va ve ku lania ku cilika ca vulo ve ku ivua ndzolela ya ku kalako, vampanga veka navo ve ku ivua ndzolela ya ku kala ku ciuano ca Mulalelo mu ku pua vakua ku tala lika.

7. Omo lia vika vampanga veka va lavelela na ndzolela cimpande ca Mulalelo?

⁷ Vampanga veka navo ve ku singanieka ha lulavelelo luavo. Va lavelela na ndzolela cimpande ca Mulalelo, muomu mutamba ua kama ua cimpande caco ua tsindika ha viuma  via ka linga Yesu Kilistu na va 144.000 mu ku kuasa vantu mu Likulukazi lia Miaka. Mu ku kava ntuamena yavo Yesu Kilistu, ava Vamiangana va muilu va ka alulula ano mavu ku pua citungu na ku hetesa vantu ku vutantuluke. Mua vusunga, vaze ve kuya ku Mulalelo mu ku tala, ve ku ivua ndzolela ya kama mu ku singanieka ha ku lipuisamo vupolofeto vua mu Mbimbiliya ngeci mua, Isaya 35:5, 6; 65:21-23; na Ku-So. 21:3, 4. Ku lisinganieka ngue vali mu mavu a aha hamo lika na vantu va va lema, ce ku kaniamesa lulavelelo luavo na kapandi kavo ka ku tualelelaho ku pangela Yehova ku miaka yose.—Mat. 24:13; Ngal. 6:9.

8. Vusunga vuka vukuavo vue ku lingisa vampanga veka ku kunguluka ku Mulalelo?

⁸ Tu hilulenu vusunga vukuavo, vue ku lingisa vampanga veka ku kunguluka ku mulalelo. Ve ku lingamo mu ku muesa cilemo cavo na ku kuasa Vakua Kilistu va ku vuavesa. Mbimbiliya ya polofetele ngecize ha ka kala ku likata ca kama ha kati ka Vakua Kilistu va ku vuavesa na vaze va lavelela ku ka yoyela hano ha mavu. Mu nji ika? Tu hilulenu vimo vimueso.

9. Kuliya na Zakaliya 8:23, vati vampanga veka ve ku livua ku tuala hali Vakua Kilistu va ku vuavesa?

⁹ Tandenu Zakaliya 8:23. Ovu vupolofeto vuaco vua muesa mu njila ya ku tovala, cifua ci ve ku livuilamo vampanga veka, ku tuala hali vamuanaye va ku vuavesa. Lizi “kaYundeya” na lizi “nove” ose emanena civunga cimo lika, Vakua Kilistu va ku vuavesa. (Loma 2:28, 29) Kaha mezi “likumi lia vamala va ku malimi ose a vakua vifuti,” emanena vampanga veka. Ve ku “kuata” ku Vakua Kilistu va ku vuavesa mu ku lemesa ca ku lela. Ni nguetu ku likuatasana navo ku ku lemesa ca ku lela. Ngeci mukemuo, ha litangua lia Mulalelo, vampanga veka ve ku muesa ku likata cavo mu ku kunguluka hamo navo.

10. Vika Yehova ua linga mu ku puisamo vupolofeto vua ku Ezekiele 37:15-19, 24, 25?

¹⁰ Tandenu Ezekiele 37:15-19, 24, 25. Mu ku puisamo, ovu vupolofeto Yehova ua pandakana Vakua Kilistu va ku vuavesa na vampanga veka mu lizitiko ka citava ku livatula. Vupolofeto vuaco vua handeka via viti vivali. Lizi citi “ca Yunda” liemanena Vakua Kilistu va ku vuavesa (ku muyati ua Yunda kukekuo ku va kele na ku hangula vamiangana vaIsaleli kaha lizi citi “ca Efalimi” liemanena vampanga veka. * Vupolofeto vua muesele ngecize Yehova a ka pandakana evi vivunga vivali, mu ku pua “citi cimo.” Eci ca muesa ngecize va likuata kumo mu ku pangela Yehova, oku va kava ku tuamenena ca Muangana umo Kilistu Yesu. Nkala muaka, Vakua Kilistu va ku vuavesa na vampanga veka, ve ku kunguluka ku Mulalelo, kati mu ku pua vivunga vivali, vunoni mu ku pua “vutanga vumo lika” muintsi lia “kaniungi umo lika.”—Yoa. 10:16.

11. Kuliya na Mateo 25:31-36, 40, njila ika ya kama i ve ku pangesa “vampanga” mu ku kuasa Vakua Kilistu va ku vuavesa?

¹¹ Tandenu Mateo 25:31-36, 40. Vampanga va va tumbula mu cisimo eci, vemanena vakua vuviuke va ku matangua a ku kotokela vaze va lavelela ku ka yoyela hano ha mavu ni nguetu vampanga veka. Ve ku kuasa Vakua Kilistu va ku vuavesa va lisupa ha mavu, va puisemo kapandi ka kama ka va tambula. Kapandi kaka? Ka ku ambulula muzimbu ua cili mu mavu ose na ku puisa vantu va ndongesi.—Mat. 24:14; 28:19, 20.

12-13. Mu vinjila vika naua vampanga veka ve ku kuasa vamuanaye ya Kilistu?

¹² Nkala muaka, mu kue ku lisupa visimano via vindende ku Mulalelo, vampanga veka ve  ku kuasa vamuanaye ya Kilistu mu ku lania vantu mu mavu ose va keze ku Mulalelo. (Talenu cikasa “ Muli na ku Liviukisila Vualumo via ku ka Linga mu Ntsimbu ya Mulalelo Ni?”) Cikuavo naua, ve ku linga cose mangana Mulalelo u ka hite mu vikungulukilo viose ha mavu, vutuhu mu vikungulukilo via vingi ka mua kele vakua kulia ku vimueso via Mulalelo. Vampanga veka ve ku ivua ndzolela ya kama mu ku kuasa vamuanaye ya Kilistu mu vifua evi. Vampanga vaco, va tantekeya ngecize Yesu ue ku mona vukuasi vu ve ku hana kuli vamuanaye va ku vuavesa ngue vali na ku vu hana mpundu kuli ikeye.—Mat. 25:37-40.

¹³ Vusunga vuka vue ku tu lingisa tu vose, cipue vaze va kaya muilu ni vaze va ka kala ha mavu, ku kunguluka ku Mulalelo?

14. Vati Yehova na Yesu va tu muesele cilemo?

¹⁴ Tue ku santsela cikuma ku cilemo ci ve ku tu muesa Yehova na Yesu. Yehova ua tu muesa cilemo mu vinjila via vingi, vunoni kua kala imo ya hiana viose. Njila yaco ya puile, ku tuma muaneni ua seho ya kama linga a ku yande na ku tsa omo lietu. (Yoa. 3:16) Tuli na vusunga ngecize Yesu neni ua muesele cilemo ca kama mu ku tava ku hana muono ueni. (Yoa. 15:13) Na limo litangua liahi li tu ka hasa ku fueta cilemo ce ku tu muesa Yehova na Yesu. Vunoni tu hasa ku muesa ku santsela mu cifua ci tue ku yoyelamo nkala litangua. (Kolo. 3:15) Kaha ku kunguluka ku Mulalelo, ce ku tu vuluisa cilemo ca kala naco Yehova na Yesu hali yetu kaha na ku tu hana vukovelelo vua ku va muesa cilemo.

15. Omo lia vika Vakua Kilistu va ku vuavesa hamo na vampanga veka vose va haka seho ya kama ku vuana vua nkombelo?

¹⁵ Tua haka seho ya kama ku vuana vua nkombelo. (Mat. 20:28) Vakua Kilistu va ku vuavesa va haka seho ya kama ku nkombelo. Ku hitila muli ikeyo, lulavelelo luavo lu ka lipuisamo. Omo lia lutsilielo luavo ku nkombelo ya Kilistu, Yehova ua va tumbula ku pua vakua vuviuke na ku va hangula ku pua vana veni. (Loma 5:1; 8:15-17, 23) Vampanga veka navo veku santsela cikuma ku vuana vua nkombelo. Omo lia ku tsiliela mu cikombelo ca Yesu, va kala na mutima ua ku lela ku meso a Njambi, Yehova ua va tavesa ku mu pangela kaha naua va lavelela ku “kovoka ku lamba ya kama.” (Ku-So. 7:13-15) Kaha njila imo i va hasa ku mueselamo ku santsela Vakua Kilistu va ku vuavesa na vampanga veka, ya pua mu ku kunguluka ku Mulalelo nkala muaka.

16. Vusunga vukuavo vuka vue ku tu lingisa ku kunguluka ku Mulalelo?

¹⁶ Vusunga vukuavo vue ku tu lingisa ku kunguluka ku Mulalelo vua pua muomu tua tonda ku ononoka Yesu. Cipue nga tua lavelela ku ka yoyela muilu ni hano ha mavu, tua tonda ku ononoka lisiko lia tu sikile Yesu ku vutsiki vua ku manusuila vua muono ueni. Ngueni: “Lingenu ngecize mu ku nji vuluka ange.”—1 Kol. 11:23, 24.

17. Vati Mulalelo ue ku tu kuasa ku suena mu hiehi na Yehova?

¹⁷ Tue ku suena mu hiehi na Yehova. (Tia. 4:8) Ngue mu tu na lilongesa, Mulalelo ue ku tu hana vukovelelo vua ku singanieka ha lulavelelo lua tu hana Yehova na ku hilula ha vukama vua cilemo ca tu muesa. (Yele. 29:11; 1 Yoa. 4:8-10) Ku singanieka ha lulavelelo luetu lua ku lutue na cilemo ca ya-ye ce ku tu muesa Njambi, ce ku vueza cilemo cetu kuli Yehova na ku kaniamesa vusamba vuetu neni.—Loma 8:38, 39.

18. Ku singanieka ha lungano lua Yesu ce ku tu vuisa cizango ca ku linga vika?

 ¹⁸ Tue ku ivua cizango ca ku tambuluisa lungano lua Yesu. (1 Pet. 2:21) Mu tue ku suena ku hiehi na litangua lia Mulalelo, tue ku tanda cikuma mizimbu ya simano ya ku manusuila ya Yesu hano ha mavu. Tue ku tanda naua cikuma via ku-tsa ceni na ku sanguka ceni. Kaha cimpande ca Mulalelo co, ce ku tu vuluisa cilemo ca Yesu hali yetu. (Efe. 5:2; 1 Yoa. 3:16) Mu tue ku tanda na ku hilula ha lungano lua ku lihana ca Yesu, tue ku ivua cizango ca “ku enda-enda ngue omo ikeye naua uendele.”—1 Yoa. 2:6.

19. Vati tu hasa ku tualelelaho ku kala mu cilemo ca Njambi?

¹⁹ Tue ku vueza ku kapandi ketu ka ku tualelelaho ku kala mu cilemo ca Njambi. (Yun. 20, 21) Tue ku tualelelaho ku kala mu cilemo ca Njambi, mu ku lihakela kapandi ka ku linga cose mu ku mu ononoka, ku lelesa lizina lieni, na ku mu vuisa ndzolela ku mutima. (Visi. 27:11; Mat. 6:9; 1 Yoa. 5:3) Ku kunguluka ku Mulalelo, ce ku tu vuisa cizango ca ku vueza ku kapandi ketu ka ku yoya nkala litangua mu cifua cize ci lekesa Yehova ngecize tu tonda ku tualelelaho ku kala mu cilemo eni!

20. Vusunga vuka vua seho vue ku tu lingisa ku kunguluka ku Mulalelo?

²⁰ Cipue nga tua lavelela ku ka yoyela muilu ni hano ha mavu, tua kala na vusunga vua seho vue ku tu lingisa ku kunguluka ku Mulalelo. Nkala muaka u tue ku kungulula ku litangua liaco, tue ku vuluka kutsa ca muntu u tua lema, Yesu Kilistu. Helu lia viose, tue ku vuluka cilemo ca kama cikuma-kuma ca tu muesele Yehova mu ku tuma Muaneni ku pua nkombelo. Mu muaka uno, Mulalelo u ka kalako ku cinguezi ca Lia mu Citanu, 15 ya Abril, 2022. Tua lema Yehova na Muaneni. Ha litangua lia ku vuluka kutsa ca Yesu, ka kua pandele ku kala cuma na cimo cahi ca seho kuli yetu, ku hiana ku ka kunguluka ku Mulalelo.