1-2. Vika tue ku ila ku Mulalelo nkala muaka?

 KAMPE miaka 2.000 ku nima, Yesu ua hele muono ueni mu ku tu patula, na ku tu sokoluela njila ya ku ka tambula muono ka ue ku hua. Mu kua lisupile vutsiki vumo lika tele kanda va mu tsihe, Yesu ua sikile vakua ku mu kava va pue na ku vuluka eci cilinga ceni ca cilemo, ku hitila muli kamo ka cilika ka kakandende, ka mbolo na viniu.—1 Kol. 11:23-26.

² Tue ku ononoka eli lisiko lia Yesu muomu tua mu lema cikuma. (Yoa. 14:15) Nkala muaka mu ntsimbu ya Mulalelo, tue ku muesa ku santsela cetu ku viuma via tu lingila, mu ku uana ntsimbu ya ku hilula ha viuma viaco na ku vundila. Cikuavo naua, omo lia ku santsela cetu tue ku vueza ku ku ambulula cetu linga tu kaniamese na ku lania vantu vavengi va keze ku ciuano caco ca ku lifuila. Kaha kasi, tue ku lihakela kapandi ka ku linga cose linga kati ku kale na vimo viahi vi tu vindika ku ka soloka ku ciuano caco.

3. Vika tu hilula mu cilongesa cino?

³ Mu cilongesa cino, tu hilula ha vinjila vitatu vi tu kuasa ku mona kapandi ka ve ku lihakela vangamba va Yehova mu ku vuluka ku-tsa ca Yesu: (1) mu ku linga Mulalelo ngue muze vene mua u sikile Yesu, (2) mu ku lania vakuetu ku ciuano caco, kaha (3) mu ku linga ciuano caco ambe mu vintsimbu via vikalu.

4. Vusunga vuka ve ku tsindika ku Mulalelo nkala muaka, kaha omo lia vika ka tua pandele ku sembulula vusunga vuaco? (Luka 22:19, 20)

⁴ Nkala muaka ku Mulalelo, tue ku ivua cimpande ca mu Mbimbiliya ce ku kumbulula vihula via vingi via seho. Ca ku muenako, tue ku tantekeya omo lia vika vantu va tondeka ku va kula, kaha vati ku-tsa ca muntu umo lika ci hasa ku kula vantu vavengi ku vupi. Ve ku tu vuluisa naua vika viemanena vimueso via mbolo na viniu, kaha iya na pande kulia na ku nua ku vimueso viaco. (Tandenu Luka 22:19, 20.) Kaha tue ku hilula naua ha vivezikiso vi va lavelela vaze va ka yoyela ha mavu. (Isaya 35:5, 6; 65:17, 21-23) Ka tua pandele ku sembulula ovu vusunga vuaco. Makulukazi na makulukazi a vantu ka va vu tantekeya, kaha ka ve ku ivuisisa seho ya nkombelo ya lingile Yesu. Cikuavo naua, ka ve ku linga Mulalelo ua ku-tsa ceni ngue muze vene mua u lingile ikeye. Omo lia vika?

5. Mu nima ya ku-tsa ca cingi ca vapostolo, vati vantu va putukile ku linga Mulalelo ua ku-tsa ca Yesu?

⁵ Mu nima ya ku-tsa ca cingi ca vapostolo, mu cikungulukilo mua kovelele vakua makuli vavengi. (Mat. 13:24-27, 37-39) Kaha va putukile “ku handeka via vipi mu ku hungumuna vandongesi.” (Vili. 20:29, 30) Vimo “viuma via vipi” vi va kele na ku longesa Vakua Kilistu vaco, via puile nguavo, Yesu ka va mu kombeleyele lumo “lika linga ambate vipi via vavengi” ngue mu ya muesa Mbimbiliya. Vunoni nguavo cikombelo caco ca pande ku ci hilukila ku sua kumo. (VaHe. 9:27, 28) Lelo lino vantu vavengi ve ku tsiliela eci cilongesa ca makuli. Ve ku ya ku vitembele viavo ku sua kumo, vamo ni matangua ose vene mu ku ka linga cilika ci va luka nguavo: “Cikombelo ca Misa.” b Malombelo akuavo ve ku linga cilika ca ku vuluka ku-tsa ca Yesu vintsimbu via vindende. Vutuhu ngoco cingi ca vantu va kala mu malombelo aco ka va tantekeya vuino vika ca puisamo mpundu cikombelo ca Yesu. Ngeci vamo ve ku lihula nguavo: ‘Vuno ku-tsa ca Yesu ci hasa vene ku lingisa linga va nji ecele ku vipi viange ni?’ Vika ve ku lihuila ngoco? Vamo ve ku lihula ngoco, muomu va va tangula kuli vaze ve ku singanieka nguavo cikombelo ca Yesu ka cesi na ndzili ya ku tu lingisa va tu ecele ku vipi vietu. Vati honi Vakua Kilistu va vusunga ve ku linga eci cilika caco?

6. Mu ua hetele muaka ua 1872, vika ca nongonuene cimo civunga ca vakua ku lilongesa Mbimbiliya?

⁶ Mu 1970, cimo civunga ca vakua ku lilongesa Mbimbiliya ca tuamenene Charles Taze Russell ca putukile ku lilongesa Mbimbiliya mu ku lova. Va tondele ku tantekeya vusunga ku tuala ha seho ya nkombelo ya Yesu na vati tua pande ku vuluka ku-tsa ceni. Kaha mu ua hetele muaka ua 1872, va nongonuene ngecize cili vene Yesu ua hele nkombelo mu ku patula vantu vose. Kaha ovu vusunga vu va nongonuene, ka va vu holokele. Vunoni va putukile ku vu ambulula ku hitila mu mavulu, mapapelo a mizimbu na mikanda. Mu nima ya ntsimbu ya indende va putukile ku tambuluisa Vakua Kilistu va ku livanga, mu ku linga ciuano ca Mulalelo lumo lika mu muaka.

7. Vati viuma vi va tondesesele vaze Vakua ku lilongesa Mbimbiliya vie ku tu kuasa lelo lino?

⁷ Lelo lino, tue ku uana vukuasi vua kama ku ku tondesesa ci va lingile vaze vamala Vakua Kilistu ku laza. Mu njila ika? Na civezikiso ca Yehova va tu fukula meso mu ku tantekeya vusunga vua nkombelo ya Yesu na viuma vi ya puisamo. (1 Yoa. 2:1, 2) Tua lilongesa naua ngecize, mu Mbimbiliya va tumbulamo malulavelelo avali a vantu ve ku ononoka Njambi: muono ka ue ku-tsa kuli vamo muilu, kaha na muono ua ya-ye kuli makulukazi a vakuavo hano ha mavu. Tue ku lema mua kama Yehova mu tue ku hilula ha vukama vua cilemo  ceni kuli yetu, na ha vukuasi vu tue ku uana muntu ku muntu ku nkombelo ya muaneni Yesu. (1 Pet. 3:18; 1 Yoa. 4:9) Ngeci mua vaze vamuanetu va lutsilielo va ku laza, netu tue ku lihakela kapandi ka ku lania vakuetu linga tua ku kunguluke hamo lika ku Mulalelo ngue muze vene mua u lingile Yesu.

8. Vika ve ku linga vangamba va Yehova mu ku lania vakuavo ku Mulalelo? (Talenu cikupulo.)

⁸ Vangamba va Yehova, laza va sua ku lania vakuavo ku Mulalelo. Tunde vene mu 1881, vamuanetu na vandumbuetu ku Estados Unidos va va laniene va ka likunguluile ku imo ndzivo ya muntu ku Allegheny, Pennsylvania ku ciuano eci ca ku lifuila. Mu nima ya ntsimbu nkala cikungulukilo ca kele na ku lilingila Mulalelo uaco. Kaha mu Março ya 1940, vakua ku ambulula va laniene uose-ouo a tonda ku ka kunguluka ku Mulalelo muimbo liavo. Mu 1960, Mbetele ya tuhuile vilanio via ku livanga na ku vi tuma mu vikungulukilo linga vamuanetu va ka vi pangese mu ku lania vantu. Kaha tunde mu muaka uaco, vangamba va Yehova ve ku tuhula makulukazi na makulukazi a vilanio. Omo lia vika tue ku lihakela kapandi kose na ku pangesa ntsimbu ya kama mu ku lania vantu ku Mulalelo?

9-10. Veya ve ku uana vukuasi ku kapandi ka tue ku lihakela mu ku lania vantu ku Mulalelo? (Yoano. 3:16)

⁹ Vumo vusunga vue ku tu lingisa ku lania vakuetu ku Mulalelo, vua pua muomu tua tonda ngecize vantu vaco va ka tantekeye viuma vi va tu lingila Yehova na Yesu, tu vose. (Tandenu Yoano 3:16.) Kaha tue ku lavelela ngecize, viuma vi ve ku mona na ku halakana ku Mulalelo vi ka va vuisa cizango ca ku lilongesa  vikuavo na ku pua vangamba va Yehova. Vunoni kua kala naua vakuavo ve ku uanaho vukuasi.

¹⁰ Tue ku lania naua vaze va likela ku pangela Yehova. Cingi cavo ve ku tava cilanio cetu kaha tue ku ivua ndzolela ya kama ya ku va mona. Ku kunguluka ku Mulalelo ce ku va vuluisa ndzolela i va vuile mu ntsimbu i va kele na ku pangela Yehova ku nima. Halakanenu muzimbu ua vaMonica. c Va mu tavesele naua ku pua mukua ku ambulula mu ku hita ca COVID-19. Kaha mu nima ya ku ka kunguluka ku Mulalelo ua 2021, ua handekele ngueni: “Mulalelo ua muaka uno unapu ua ku lifuila cikuma kuli ange. Muomu mu na hiti honi miaka 20, amba nji hase naua ku lania vantu veze ku Mulalelo ua ku-tsa ca Yesu. Nja lihakelele kapandi ka ku linga cipanga caco na mutima uose, linga nji muese ku santsela cange ku viuma viose via nji lingila Yehova na Yesu.” (Visa. 103:1-4) Ambe nga vantu va tava vilanio vietu ni kuahi, tue ku lihakela kapandi ka ku lania vantu ku Mulalelo muomu tua tantekeya ngecize Yehova ua haka seho ku kapandi ka kama ka tue ku lihakela mu ku lingamo.

11. Vati Yehova ue ku vezikisa kapandi ketu ka ku lania vantu ku Mulalelo? (Hangai 2:7)

¹¹ Yehova ue ku vezikisa mua kama kapandi ka tue ku lihakela mu ku lania vantu ku Mulalelo. Mu 2021, vutuhu na visoti via musongo ua COVID-19, vantu va ku pua 21.367,603 va kungulukile ku Mulalelo. Numelu yaco ya hiana kampe lutatu numelu ya Vakaleho va Yehova mu mavu ose! Vutuhu ngoco tu tantekeya nguetu, Yehova ke ku tuala cikuma mana ku numelu ya vantu vunoni ua haka seho ku muntu na muntu. (Luka 15:7; 1 Tim. 2:3, 4) Tuli na vusunga ngecize, Yehova ue ku pangesa cipanga cetu ca ku lania mu ku tu kuasa ku uana vantu vakua mitima ya cili.—Tandenu Hangai 2:7.

12. Vika vi hasa ku tu kaluuisa ku kunguluka ku Mulalelo? (Talenu cikupulo.)

¹² Yesu ua polofetele ngecize ku matangua a ku kotokela tu ka hita mu visoti via vifua viose: ku tu luisa ku vavusoko, ku tu luisa ku nguvulu, vindzita, misongo ya ku litambuisa na vikuavo via ku liseza-seza. (Mat. 10:36; Mako 13:9; Luka 21:10, 11) Kaha vintsimbu vimo, visoti viaco vie ku tu kaluuisa ku ka kunguluka ku Mulalelo. Vika ve ku linga vamuanetu na vandumbuetu linga va vule visoti viaco, kaha vati Yehova ue ku va kuasa?

13. Vati Yehova ua vezikisile kapandi ka Artems ka ku linga Mulalelo mu kamenga?

¹³ Mu kamenga. Vamuanetu vali mu tumenga omo lia lutsilielo luavo, ve ku lihakela kapandi ka ku linga Mulalelo ua ku-tsa ca Yesu. Halakanenu muzimbu ua muanetu Artems. Mu ntsimbu ya Mulalelo ua 2020, va mu hakele mu kaliavuoso ka 17 metrus kaha mua kele vakuavo vindzinda va ku pua 5. Vutuhu ua kele mu kamenga, ua hasele ku uana vimo viuma via ku pangesa mu ku pua vimueso via Mulalelo. Kaha ua likuminyine ku linga cimpande ca Mulalelo mu ku likaniamesa ikeye ivene. Vunoni vakuavo vindzinda va kele na ku sipa mua kama na ku tuka. Vati ua lingile? Ua va vundilile nga citava va ci likele ku tuka na ku sipa mu ola imo lika. Muanetu Artems ua komokele mua kama mu va mu tavele mua va pingile ngecize, ka va sipi cipue ku tuka mu imo ola ha ntsimbu ya Mulalelo. Kaha Artems ua likuminiye ku va lekako via Mulalelo. Vutuhu va handekele nguavo ka va tondo ku halakana via ciuano caco, mu nima ya ku mona muanetu  Artems a linga Mulalelo na ku mu halakana, va putukile ku mu linga vihula ku tuala ha ciuano caco.

14. Kapandi kaka va lihakelele vangamba va Yehova, mu ku kunguluka ku Mulalelo mu ntsimbu ya COVID-19?

¹⁴ Musongo ua COVID-19. Mu ua putukile ou musongo, vangamba va Yehova ka va hasele ku likungulula citona meso. Vunoni evi ka via vindikile ku likungulula ku ciuano caco. d Vikungulukilo vie ku hasa ku kovela mu Internete via lingile Mulalelo ku hitila mu videoconferencia. Amba co kuli vaze ka va kele na Internet? Vifuti vimo via viukisile vuino viuma, linga cimpande ca Mulalelo ci ka hite ku televizau ni ku visandzi. Cikuavo naua viMbetele via ngalavalele vimpande mu malimi a tuvakana 500, linga cipue vaze va kala ku laako va ka hase ku linga Mulalelo. Kaha, vamuanetu va lihakelele kapandi ka ku tuala vimpande kuli vaze va vi tondekele.

15. Vika mua lilongesa ku lungano lua umo ndongesi ua Mbimbiliya ua lizina Sue?

¹⁵ Ku tu luisa ku vusoko. Kuli vamo, citanga ca kama ci ve ku pinda naco mu ku tala Mulalelo  ca pua ku va luisa ku vavusoko. Halakanenu umo muzimbu ua umo ndongesi ya Mbimbiliya ua lizina Sue. Mu 2021, mu kua lisupile litangua limo lika ku Mulalelo, Sue ua lekele mulongisi ueni ngueni, omo lia ku mu luisa ku vavusoko ka ka hasa kuya ku Mulalelo. Kaha mulongisi ueni ua tandele Luka 22:44, na ku mu lomboluela ngecize, nga tuli na ku hita mu visoti tua pande ku linga ngue mua lingile Yesu, ku vundila kuli Yehova kaha na ku mu kulahela. Lia mukuavo, Sue ua viukisile vimueso via Mulalelo na ku kava ku lemesa ca cimene ca ku lifuila ca ha litangua liaco mu jw.org. Kaha ku cinguezi ua ile mu hondo yeni na ku litokakana ku hitila ku fone. Mu nima yaco ua sonekelele mulongisi ueni ua Mbimbiliya ngueni: “Zau mu na ka nji kaniamesele mua kama, ngeci nji na lingile cose linga nji kunguluke ku Mulalelo, kaha Yehova ua nji kuasele ku vi puisamo. Ndzolela na ku santsela vi njili na ku ivua, ka citava ku vi lombolola!” Mu ku mona cenu, vuno nenu Yehova a hasa ku mi kuasa nga mu hita mu visoti ngeci muevi ni?

16. Omo lia vika tu hasa ku kala na vusunga ngecize Yehova a ka vezikisa kapandi ketu ka ku kunguluka ku Mulalelo? (Loma 8:31, 32)

¹⁶ Yehova ua haka seho ku kapandi ka tue ku lihakela mu ku vuluka ku-tsa ca Yesu. Tu kalenu na vusunga ngecize a ka tu vezikisa, omo tu ka muesa ku santsela cetu ku viuma via tu lingila. (Tandenu Loma 8:31, 32.) Tu lihakelenu kapandi ka ku kunguluka ku Mulalelo ua muaka uno, kaha na ku linga viose vi tu hasa mu ku vueza ku vipanga vietu via mu lutsilielo mu ntsimbu ya Mulalelo.