LIZI “likalu” li va tumbula mu muzimbu uaco, li hasa ku pua makalu ni nguetu matemba a ku liseza-seza. (Vili. 8:28, 29, 38) Vunoni ci soloka ngue uze mukua Etiopia, uendele mu litemba lia kama ku hiana matemba a va kele na ku pangesa mu ndzita ni ku vueho vua ku tunta. Tu hilulenu vika vi tu handekesa ngoco.

Uze mukua Etiopia ua puile mukua vukama kaha uendele tunda ya kama. Mbimbiliya nguayo, ua puile “muata mukua ngolo ya kama ua kuli Kandase, muangana ua mpuevo ua vakua Etiopia, ikeye ua niungile vufuko vueni vuose.” (Vili. 8:27) Etiopia ya laza ya puile cihela ci tue ku tumbula lelo nguetu Sudão ku tuala ku mavanda a cifuti ci tue ku tumbula lelo nguetu Ingito. Halumo yala uaco kendelele mu likalu limo lika mu vungendzi vuose. Vunoni citava ua ambatele viuma via vingi vie ku tondekele mu vuze vungendzi vua laza. Matemba a va kele na ku pangesa ku sekulu ya ku livanga mu ku ambata vantu, a puile a ku liseza-seza. A kele na vipeneu viuana kaha a vualo vua ku fuika. Limo livulu ngualio: “Vualo vua matemba aco vua kele na ku tavesa ku ambata vitenga via vingi na ku tumama vuino. Kaha citava matemba aco va kele na ku endela mu mangendzi a laha.”—An Exegetical Commentary

Uze mukua Etiopia ua kele na ku tanda mua mu uanene Filipu. Muzimbu uaco nguauo: “Filipu ua tuntilile kuli ikeye, ua mu vuile a ku tanda ku kapolofeto Isaya.” (Vili. 8:30) Matemba a mangendzi ka va a pangelele ku tunta mua kama. Kuenda cao ca civando cikeco ca tavesele uze muata ku tanda kaha na Filipu linga a hase ku tuntilako ha mikono.

Uze mukua Etiopia “ua lambelele Filipu ku londa na ku tumama hamo neni.” (Vili. 8:31) Mu matemba a lusi, vakua ku endelamo va pandele ku imana, vunoni mu matemba a mangendzi co, kuahi. Ngeci uze kaEtiopia na Filipu va hasele ku tumama.

Omo lia mezi a ku vilinga kapitulu 8 na mizimbu ya vakua ku tondesesa, mikanda yetu i na putuka honi ku muesa kaEtiopia endela mu litemba lia kama. Kati naua mu matemba a andende a va kele na ku pangesa ku ndzita na ku vueho.