Vamo va kolela ku visemua via ku linga, cingi ca vamala ka ve ku singimika vampuevo. Ca ku muenako, muanetu Hans, umo kaniungi ua ku zinguluka ku Bolivia ngueni: “Vamo vamala va kolela ku visemua vie ku sambeya visinganieka via ku lihalesa. Ava vamala va tsiliela nguavo va hiana vampuevo ngeci ka ve ku va singimika.” Muanetu Shengxian, umo mukuluntu mu cikungulukilo ku Taiwan ngueni: “Kuno ku nja kala, vamala vavengi ve ku ivua ngecize vampuevo ka va pandele ku lihaka mu vimpande via vamala. Nga umo yala a tumbula imo nguli ya mpuevo, vakuavo ve ku mu sembulula.” Vamala vakuavo co, ve ku muesa kahangu ku vampuevo mu vinjila vikuavo. Ca ku muenako, ve ku lisakalala mu cifua ci sahula vampuevo.

Vunoni ce ku vuisa ndzolela ya kama ku tantekeya nguetu, yala ambe nga ua semukila ku cisemua ca ku fua vati, a hasa ku aluluka. A hasa ku lilongesa ngecize vamala na vampuevo, vose va pua vamo lika. (Efe. 4:22-24) Kaha tu hasa ku vi puisamo mu ku tambuluisa lungano lua Yehova. Mu cilongesa cino, tu mona vati Yehova ue ku mona vampuevo, vati vamuanetu va hasa ku mona vampuevo mu cifua ce ku va muenamo Yehova kaha vati vakuluntu mu cikungulukilo va hasa ku pua lungano mu ku singimika vandumbuetu.

VATI YEHOVA UE KU MONA VAMPUEVO?

Yehova ua tu hana lungano lua ku tantuluka lua ku muenamo vampuevo. Yehova ua pua Cisemi ua nkenke kaha ua lema vusoko vueni vuose. (Yoa. 3:16) Kaha vampuevo va tsilielo, vapua vana va seho ya kama kuli Ikeye. Tu simutuilenu vimo vinjila via muesa ngecize Yehova ua lema na ku singimika vampuevo.

 Ke ku va muesa kahangu. Yehova ua tangele vampuevo na vamala mu ciseteko ceni. (Njen. 1:27) Ka vuezele mana ku vamala ni ku tanga vamala na vuana vua ku lifuila ku hiana vampuevo. Cikuavo naua, vose ue ku va muesa cilemo cimo lika. (2 Miz. 19:7) Yehova ua tangele vamala na vampuevo na vuhasi vumo lika vua ku ivuisisa vusunga vua mu Mbimbiliya kaha na ku tambuluisa vifua vieni. Cikuavo naua, Yehova ua haka seho ku lutsilielo lua vamala na vampuevo. Ngeci vose ua va hana lulavelelo lua ku ka yoyela ha mavu ku miaka yose ni muilu, mu ku pua vamiangana na vasasendote. (2 Pet. 1:1) Mua vusunga, Yehova ke ku muesa vampuevo kahangu.

Ue ku va halakana. Yehova ua haka seho ku cifua ci ve ku livuilamo vampuevo na ku visoti viavo. Ca ku muenako, ua halakanene na ku kumbulula vivundilo via Hana na Lakele. (Njen. 30:22; 1 Sam. 1:10, 11, 19, 20) Yehova ua huiminine vakua ku soneka Mbimbiliya va hakemo mizimbu ya vamala va halakanene vampuevo. Ca ku muenako, Avilahama uononokele cimamuna ca Yehova ca ku halakana kuli mpueyeni Sala. (Njen. 21:12-14) Muangana Ndaviti ua halakanene Avingaile. Ni nguetu, ua muene ngueni Yehova ikeye ua mu tumine ku handeka neni. (1 Sam. 25:32-35) Yesu, uze ua muesele vifua via Ise mu vutantuluke, ua halakanene naye Maliya. (Yoa. 2:3-10) Aa malungano a muesa imo njila ye ku mueselamo Yehova kasingimiko ku vampuevo: Ku va halakana.

Ua va kulahela. Ca ku muenako, Yehova ua kulahelele Eva linga a kuase Andama mu ku niunga mavu ose. (Njen. 1:28) Eci ka ca lombolokele nguavo Eva ka kele na seho, vunoni ca muesele ngecize ua puile mukuasi ua seho ya kama kuli ikeye. Cikuavo naua, Yehova ua kulahelele kapolofeto Ndevola na Hulunda va handekele vantu veni, hamo lika na vangazi kaha na muangana. (Vang. 4:4-9; 2 Vam. 22:14-20) Na lelo lino, Yehova ua kulahela vampuevo Vakua Kilistu mu ku va kundika cipanga ceni. Ava vandumbuetu va lutsilielo, va pua vakua ku ambulula, vapioneiru na vamisionaliu. Ve ku kuasa ku tunga na ku viukisa Vindzivo via Vuangana na viMbetele. Vakuavo co, ve ku pangela ha Mbetele na ku viseketa via vakua ku langulula. Ava vandumbuetu va pua ngue “civunga ca kama” ca masualale ve ku pangesa Yehova mu ku puisamo vutumbe vueni. (Visa. 68:11) Mua vusunga, Yehova ke ku mona vampuevo ngue va ku zeya ni ka va hasa ku linga viuma.

VAMUANETU, TAMBULUISENU LUNGANO LUA YEHOVA

Vamuanetu, linga tu tantekeye nga tue ku mona vandumbuetu mu cifua ce ku va muenamo Yehova, tua pande ku lihilula mu vusunga ku tuala ha visinganieka vietu na vilinga vietu. Linga tu vi puisemo, tua tondeka vukuasi. Ngeci mua likina li ve ku pangesa vandotolo lie ku va kuasa ku mona musongo uli mu muvila, na vuno vene, vavusamba va cili na Lizi lia Njambi vi hasa ku mi kuasa ku tantekeya nga cifua ci mue ku muenamo vampuevo ce kuya Yehova ku mutima ni kuahi. Vika honi tua pande ku linga mangana tu tambule vukuasi vuaco?

Hulenu kavusamba ua cili. (Visi. 18:17) Tu hasa ku hula umo kavusamba u tua kulahela, mukua ngozi na vusunga nguetu: “Mu ku mona cenu, vati nja yoya na vandumbuetu? Vuno ve ku livua nguavo nja va singimika ni? Kuli hamo ha nja pande ku pangela?” Nga kavusamba kenu a tumbula vino vi mua pande ku pangela, kati mu lihakuile ni ku niengua. Vunoni lihakelenu kapandi ka ku sungamesa hose ha tondeka.

Lilongesenu Lizi lia Njambi. Njila ya cili i tu hasa ku tantekeyelamo nga tua yoya vuino na vandumbuetu ni kuahi, ya pua mu ku pangesa Lizi lia Njambi li tu kuase ku hilula visinganieka na vilinga vietu. (VaHe. 4:12) Omo tu lilongesa Mbimbiliya, tu ka tantekeya vamala va yoyele vuino na vampuevo na vaze ka va lingilemo. Mu nima yaco tu hasa ku setekesa na vati yetu honi tue ku mona vampuevo. Cikuavo naua, kati mu uile mu cisevuka ca ku hangula lika cinimbu cimo ca mu Mbimbiliya, linga mu hakuile visinganieka via ku vihia ku tuala ha vampuevo, vunoni hilulenu Mbimbiliya yose linga mu hase ku nongonona vati Njambi ue ku muenamo vampuevo. Ca ku muenako, kuliya na 1 Petulu 3:7, yala na pande ku singimika mpueyeni “ngue citenga cize ca hiana ku votsika.” b Vuno eci ca lomboloka ngecize  mpuevo ka kele na seho ni ka hasa ku puisamo viuma ni? Na limo litangua liahi! Muomu nga tu setekesa mezi a kapostolo Petulu na mezi a tu uana ku Ngalata 3:26-29, a muesa ngecize Yehova ua hangula vamala na vampuevo va ka sike hamo na Yesu muilu. Ngeci mukemuo, nga tu lillongesa Lizi lia Njambi na ku hula umo kavusamba ua cili ku tuala ha cifua ci tue ku muenamo vampuevo, tu ka lilongesa mua ku singimikila vandumbuetu.

VATI VAKULUNTU MU CIKUNGULUKILO VA HASA KU SINGIMIKA VANDUMBUETU?

Vamuanetu mu cikungulukilo va hasa ku singimika vandumbuetu, nga va kava lungano lua vakuluntu va cilemo. Vati honi vakuluntu mu cikungulukilo va hasa ku pua lungano lua cili mu ku singimika vandumbuetu? Tu hilulenu vimo vinjila.

Ve ku sangala vandumbuetu. Kapostolo Paulu, ua seza lungano lua cili lu va pande ku tambuluisa vakuluntu mu cikungulukilo. Ua sangalele ha mbunga vandumbuetu vavengi, mu mukanda ua sonekelele cikungulukilo ca ku Loma. (Loma 16:12) Aci singaniekenu ndzolela i va vuile ava vandumbuetu mu va vuile ou mukanda va u tanda mu cikungulukilo. Na vuno vene, vakuluntu va hasa ku muesa ngozi mu ku sangala vandumbuetu ku vifua viavo via cili na ku vipanga vi ve ku lingila Yehova. Eci ce ku kuasa vandumbuetu va mone nguavo cikungulukilo ca va lema na ku va singimika mua kama. Vintsimbu vimo, mezi a ku kaniamesa a mukuluntu mu cikungulukilo akeo mpundu, a ve ku tondeka ava vandumbuetu linga va tualeleho ku kolesa mu ku pangela Yehova.—Visi. 15:23.

Vakuluntu, nga mu sangala vandumbuetu, puenu na ku lingamo na mutima uose kaha tumbulenu mpundu vimo vi mu tonda ku sangala. Omo lia vika? Umo ndumbuetu ua lizina Jessica ngueni: “Ca pua ca cili nga vamuanetu va tu leka nguavo ‘tua santsela ku vipangi vienu.’ Vunoni ce ku kaniamesa mua kama nga vamuanetu va sangala mpundu ha vimo ngeci mua, ku longesa vana vetu va lisingimike ku viuano, ni ku ka hitula umo ndongesi  na ku mu neha ku ciuano.” Mua vusunga, nga vakuluntu mu cikungulukilo va sangala vandumbuetu ha vimo viuma mpundu, ce ku kuasa vandumbuetu ku livua ngecize va tondeka kaha va kala na seho mu cikungulukilo.

Ve ku halakana vandumbuetu. Vakuluntu va ku likehesa va tantekeya nguavo vinguli via cili ka via puile lika viavo. Ava vakuluntu ve ku hula visinganieka via vandumbuetu na ku va halakana vuino nga va handeka. Ku lingamo, ce ku kaniamesa kati lika vandumbuetu vunoni na vakuluntu naua. Mu njila ika? Umo mukuluntu mu cikungulukilo, ua pangela ha Mbetele ua lizina Gerardo ngueni: “Nje ku hula vinguli via vandumbuetu, muomu ce ku nji kuasa ku panga vuino. Vintsimbu via vingi, va linga vipanga viaco mu miaka ya yingi ku hiana vamuanetu vavengi.” Mu cikungulukilo, vandumbuetu vavengi va pua vapioneiru ngeci va tantekeya vantu vavengi muimbo. Umo mukuluntu mu cikungulukilo ua lizina Bryan ngueni: “Vandumbuetu va kala na vifua na vuhasi ni vutongue vua vuingi vu tondeka mu lukungulukilo. Ngeci mukemuo, lilongeselenu ku vutongue vuavo!”

Vakuluntu va mana, ka ve ku sembulula mu vuasi-vuasi vinguli via vandumbuetu. Omo lia vika? Umo mukuluntu mu cikungulukilo ua lizina Edward ngueni: “Visinganieka na viuma vi va tantekeya vandumbuetu, vi hasa ku kuasa muanetu ku ivuisisa vuino cimo cimpande kaha ci hasa naua ku mu kuasa ku kala na nkenke.” (Visi. 1:5) Ambe nga ka mu pangesa nguli ya ndumbuetu, vunoni mu santselenu ku mana na ku ivuisisas ceni.

Ve ku longesa vandumbuetu. Vakuluntu va ku zangama ve ku tonda vukovelelo vua ku longesa vandumbuetu. Ca ku muenako, va hasa ku longesa vandumbuetu mua ku endesela ciuano ca ku tuhuka mu lihia, nga ka kuesi umo muanetu ua ku mbatiza. Va hasa naua, ku va longesa mua ku pangesela amo makina linga va hase ku kuasa ku ku tunga ni ku vuahesa vihela via ku lemesela. Ha Mbetele, vakuluntu va viseketa va longesa vandumbuetu vipanga via vingi, ngeci mua ku vuahesa viuma, ku pangela ku mikanda, ku vimbongo, ku vikomputador na vikuavo via ku liseza-seza. Nga vakuluntu va longesa vipanga vandumbuetu, ve ku muesa ngecize va va kulahela kaha va hasa ku puisamo via vingi.

Vandumbuetu vavengi, ve ku pangesa viuma vi va longesa vakuluntu mu cikungulukilo mu ku kuasa vakuavo. Ca ku muenako, ve ku pangesa vutongue vua ku tunga mu ku kuasa vakuavo va tungulule vindzivo viavo mu nima ya cimo ciyovo ca mavu. Vakuavo co, ve ku pangesa vutongue vu va lilongesa mu ku ambuluila ku mbunga, mu ku kuasa vandumbuetu vakuavo mu ku ambulula. Vati ve ku livua ku tuala ha vakuluntu va va longesele? Umo ndumbuetu ua lizina Jennifer ngueni: “Mu tua kele na ku tunga imo Ndzivo ya Vuangana, umo mukuluntu ua tondele ntsimbu ya ku nji longesa. Mua muene vipanga vi nja puisilemo, ua nji sangalele. Nja lemene cikuma ku panga neni, muomu nja livuile nguange va nji haka seho na ku nji kulahela.”

VIVEZIKISO VIE KUIZA MU KU MONA VANDUMBUETU NGUE MUE KU VA MONA YEHOVA

Tua lema vandumbuetu ngue vene mua va lema Yehova! Ngeci tua va puisa vusoko vuetu. (1 Tim. 5:1, 2) Ca pua ku vezika ca kama kaha tua lema ku panga hamo navo. Kaha tue ku ivua ndzolela mu ve ku tantekeya nguavo tua va lema na ku va kuasa. Umo ndumbuetu ua lizina Vanessa ngueni: “Nje ku santsela cikuma ku kala mu lukungulukilo lua Yehova muze mua kala vamuanetu ve ku nji kaniamesa mua kama.” Kaha umo ndumbuetu ku Taiwan ngueni: “Nje ku santsela cikuma Yehova na lukulungulukilo lueni, muomu va tu haka seho ya kama kaha va singimika vati tue ku livua. Evi vie ku kaniamesa lutsilielo luange kaha vie ku nji hana ndzili ya ku tualelelaho ku haka seho ku civezikiso ca ku kala mu lukungulukilo lua Yehova.”

Mua vusunga, Yehova ue ku ivua ndzolela ya kama mue ku mona vamala Vakua Kilistu ve ku lihakela kapandi ka ku lema na ku singimika vampuevo, ngue mue ku linga Ikeye. (Visi. 27:11) Umo mukuluntu mu cikungulukilo ku Escócia ngueni: “Vamala vavengi mu mavu ka ve ku singimika vampuevo. Ngeci mukemuo, nga vandumbuetu vali ku Ndzivo ya Vuangana tua pande ku vamuesa cilemo na kasingimiko.” Tu lilhakelenu kapandi tu vose ka ku tambuluisa Yehova, mu ku lema na ku singimika vandumbuetu!—Loma 12:10.