1. Vika tue ku tondeka ku linga tu vose?

 TANGUA NA TANGUA, tu vose tue ku tondeka ku linga vihangula. Vimo vihangula via pua via viasi, ngeci mua: Vika tulia ni ntsimbu ika tu kosa. Vunoni vikuavo via vikalu, muomu via kuata ku viuma ngeci mua: Cihindu, ndzolela, vusoko ni ku lemesa cetu. Kaha tue ku tonda vihangula viaco vi tu kuase hamo lika na vavusoko vetu. Helu lia viose, tue ku tonda vihangula vietu vi vuise Yehova ndzolela.—Loma 12:1, 2.

2. Vinanga vika vi hasa ku tu kuasa ku linga vihangula via mana?

² Vinanga vi na hatako vi hasa ku mi kuasa ku linga vihangula via mana: (1) ku tondesesa, (2) ku nongonona vati Yehova ue ku muenamo cimpande caco, kaha (3) ku hilula vinjila vikuavo. Mu cilongesa cino, tu simutuila ha vinanga viaco na ku tu kuasa ku vueza ku vuhasi vua ku tepesa via cili ku via vipi.—Visi. 2:11.

PUENU NA KU TONDESESA

3. Hanenu cimueso ca solola seho ya ku tondesesa ntsimbu kanda tu linge cihangula.

³ Cinanga ca katete ku tuala ha ku linga vihangula via cili, ca pua ku tondesesa. Omo lia vika? Aci singaniekenu nga muntu ali na vuvezivua vukalu kaha aya kuli ndotolo. Vuno ndotolo a ka mu sonekela vihemba ca ku hona ku tantekeya vuvezi vuka ali navuo ni? Houe. Na vuno vene, nenu mua pande ku  tondesesa ntsimbu kanda mu linge vihangula. Vati mu hasa ku lingamo?

4. Kuliya na Visimo 18:13, vati mu hasa ku tantekeya mizimbu? (Talenu naua cikupulo.)

⁴ Vintsimbu via vingi tue ku tantekeya mizimbu nga tu linga vihula. Aci singaniekenu nga va na mi lania ku cilika, vunoni ka mu tantekeya vuino ivene cilika na vati na ci viukisa. Vati mu linga? Mu ka linga vihula ngeci mua: “Kulihi ci ka hitila kaha tangua lika? Vantu vangahi va ka kalako? Iya a ka ci tuamenena? Veya va ka kalako? Ku ka kala vuala ni?” Ku tantekeya eyi mizimbu, ci mi kuasa ku linga cihangula ca mana.—Tandenu Visimo 18:13.

5. Vika mua pande ku linga nga mua uana mizimbu?

⁵ Mu nima ya ku uana mizimbu, hilulenu honi ha cimpande cose mu vutuntu. Ca ku muenako, nga muivua ngecize vantu ka veku kava vitume via mu Mbimbiliya va kayako kaha ku ka kala ku linuina ngoco vuala? Cilika caco halumo ci ka hasa ku uila mu liuayanga. (1 Pet. 4:3) Kaha vatico nga ntsimbu ya cilika caco ya lisungama na ntsimbu ya ciuano cenu ni ya kuambulula cenu? Mua vusunga, ku hilula cimpande mu vutuntu, ci ka mi kuasa ku linga cihangula ca mana. Vunoni kuli cinanga cikuavo. Muomu enu muli laza na cifua ci muli na ku muenamo cimpande caco. Amba Yehova co, vati ue ku ci muenamo?—Visi. 2:6.

 NONGONONENU CIFUA CE KU MUENAMO YEHOVA VIUMA

6. Kuliya na Tiango 1:5, omo lia vika tua pande ku vundila vukuasi vua Yehova?

⁶ Puenu na ku vundilenu Yehova a mi kuase ku mona cifua ce ku muenamo viuma. Yehova ua kulahesa ku tu hana mana mu ku tu kuasa ku nongonona nga cimo cihangula ci muya ku mutima ni kuahi. Kaha ue ku tu hana mana aco ‘ca ku hona ku tu tozekela.’—Tandenu Tiango 1:5.

7. Vati mu hasa ku zivuka cifua ce ku singaniekelamo Yehova? Hanenu cimueso.

⁷ Mu nima ya ku vundila ku tuamenena ca Yehova, tondesesenu mu njila ika a mi kumbulula. Ca ku muenako, nga mu na zimbala mu imo mbonge, mu hasa kuihula umo mundambo. Vuno mu nima yaco mu lituika na kuya ca ku hona ku vandamena cikumbululo cendi ni? Mua vusunga houe, vunoni mu ka halakana vuino. Na vuno vene, nga mua vundila mana kuli Yehova, puenu na ku lihakela kapandi ka ku nongonona cikumbululo cendi, mu ku tondesesa masiko na vitume via mu Mbimbiliya via likuata na cihangula cenu. Ca ku muenako, ngeci mua cimueso ca kuya ku cilika, linga mu hangule nga muyako, puenu na ku hilula vika Mbimbiliya ya handeka ku tuala ha vilika via liuayanga, vusamba vua vupi, na ku tuameka Vuangana ku hiana vizango vietu.—Mat. 6:33; Loma 13:13; 1 Kol. 15:33.

8. Vati mu hasa ku linga nga mu tondeka vukuasi vua ku uana mizimbu i mu tonda? (Talenu naua cikupulo.)

 ⁸ Vintsimbu vimo mu hasa ku tondeka vukuasi vua ku uana mizimbu i mu tonda, kaha citava mu handeke na umo muanetu ni ndumbuetu ua kuhia. Vunoni, ca pua ca cili naua ku tondesesa mizimbu yaco enu vavene. Mu hasa ku uana mizimbu ya yingi mu vikuata vietu via ku tondesesa navio ngeci mua Mukanda ua ku Tondesesa Nauo ua Vakaleho va Yehova na Visoneka via mu ku Yoya Cetu Vakua Kilistu. Vulukenu vutumbe vuenu: ku linga cihangula ciya Yehova ku mutima.

9. Vati tu hasa ku kala na vusunga ngecize vihangula vietu vi kaya Yehova ku mutima? (Efesu 5:17)

⁹ Vati tu hasa ku kala na vusunga nguetu cihangula cetu ci kaya Yehova ku mutima? Ha katete, mu ku lihakela kapandi ka ku mu tantekeya vuino. Mbimbiliya nguayo: “Ku tantekeya uze Mukua ku lela cikeco mana.” (Visi. 9:10) Cili vene, mana a vusunga ekuiza mu ku tantekeya vifua via Yehova, vutumbe vuendi, viuma via lema na viuma via zinda. Lihulenu nguenu, ‘Kuliya na vize vi nji tantekeya ku tuala hali Yehova, cihangula cika nji hasa ku linga mangana ci muye ku mutima?’—Tandenu Efesu 5:17.

10. Omo lia vika vitume via mu Mbimbiliya via hiana cizilila ca mu vusoko ni cisemua cetu?

¹⁰ Linga tuye Yehova ku mutima, vintsimbu vimo ce ku tondeka ku futula mitima ya vaze va tua lema. Ca ku muenako, visemi va lema munavo, va hasa ku mu kakateya a somboke ku mpite, ni uze a hasa ku va fueta vionda via vingi, ambe nga kesi vuino mu lutsilielo. Vutuhu va tonda munavo a ka yoyenu vuino, amba mu lutsilielo co? Kaha vati Yehova ue ku muenamo cimpande caco? Cikumbululo tu ci uana ku Mateu 6:33. Cinimbu caco ca kaniamesa Vakua Kilistu “kutuameka Vuangana.” Ngeci mukemuo, vutuhu tue ku singimika visemi vetu na vantu muimbo lietu, vunoni vutumbe vuetu vua kama vua pua ku vuisa Yehova ndzolela.

HILULENU VINJILA VIKUAVO VIA KU LINGILAMO CUMA

11. Cifua cika va tumbula ku Filipu 1:9, 10, ci hasa ku mi kuasa ku hilula vinjila vikuavo?

¹¹ Nga mua uana vitume via mu Mbimbiliya via likuata na cihangula cenu, hilulenu ha vinjila vikuavo vi mu hasa ku lingilamo cihangula caco. (Tandenu Filipu 1:9, 10; talenu litota lia ku lilongesa “pleno discernimento” mu nwtsty.) Liano li ka mi kuasa ku muena vualumo viuma vi keza mu nkala cihangula. Vimo vihangula via pua via viasi ku vi linga, vunoni vikuavo via vikalu. Ngeci mukemuo, liano lia tondeka linga tu linge vuino vihangula via vikalu.

12-13. Vati liano li hasa ku mi kuasa ku linga cihangula ca cili ku tuala ha vipanga?

¹² Aci singaniekenu nga muli na ku tonda cipanga linga mu uane via ku likuasa navio ha ndzivo. Kaha ku na soloka vipanga vivali. Muihula mizimbu yose ku tuala ha cifua ca nkala cipanga, ntsimbu, mangendzi a ci ka tondeka kaha na vikuavo. Kaha mu mona naua nguenu, viose vivali ka vie ku tsiha masiko a mu Mbimbiliya. Halumo mu hangulaho ci mua lema ku linga ni ci li na fueto ya kama. Vuno inapuho vene ntsimbu ya ku hangula ni? Kanda, muomu kua lisupu naua ku hilula vikuavo.

¹³ Ca ku muenako, vuno kuli cimo ci na lisungama na ntsimbu yenu ya ku kunguluka ni? Vuno ci ka milia mua kama ntsimbu ya ku kaniamesa vusoko vuenu lutsilielo na ku sikama navo ni? Vihula ngeci muevi vi ka mi kuasa ku tuameka ‘viuma via seho’ ngeci mua ku lemesa na vusoko vuenu. Nga mu lingamo, mu ka linga cihangula ca ka vezikisa Yehova.

14. Vati liano na cilemo vi ka mi kuasa linga kati mu suntsuise vakuenu?

 ¹⁴ Liano lie ku kuasa naua ku hilula vati cihangula cetu ci ka kuata ku vakuetu, linga kati tu va suntsuise. (Filp. 1:10) Ku lingamo ca pua ca seho, cikumakuma ku viuma ngeci mua vizalo na cifua ci tue ku solokelamo. Ca ku muenako, halumo tua lema imo zalesi ni cifua ca ku solokelamo. Vunoni tua pande ku lihula nguetu: Vuno vamuanetu cipue vantu veka va ka suntsuka ni? Liano li ka tu kuasa ku singimika cifua ci ve ku livuilamo vakuetu. Cilemo ci ka tu kuasa ku tuameka vizango ‘via vakuetu’ na ku muesa ku konkama. (1 Kol. 10:23, 24, 32; 1 Tim. 2:9, 10) Nga tu lingamo, tu ka linga vihangula vi muesa cilemo na kasingimiko ku vakuetu.

15. Vutumbe vuka tua pande ku linga ntsimbu kanda tu linge cihangula ca kama?

¹⁵ Nga mu tonda ku linga cihangula ca  kama, hilulenu vika vi ka tondeka mu ku ci puisamo. Yesu ua tu longesele “kutumama naku hilula ndando.” (Luka 14:28) Ngeci mukemuo, hilulenu ntsimbu, ndzili na vikuavo vi ka tondeka mu ku puisamo cihangula caco. Vimo vihangula vie ku tondeka kuihula vusoko linga mu mone vika a tondeka ku linga nkala muntu mu ku kuasa cihangula caco. Omo lia vika ku linga vutumbe ngeci muovu ce ku kuasa mua kama? Ce ku kuasa muomu, mu ka hasa ku nongonona vika mpundu via tondeka ni ku linga cihangula ceka, ci asiuisa mua kama viuma. Kaha nga muihula vusoko na ku halakana vi va handekaho, navo va ka lihana na mutima uose mu ku kuasa cihangula caco.—Visi. 15:22.

LINGENU CIHANGULA CA CILI

16. Vinanga vika vi mi kuasa ku linga cihangula ca cili? (Talenu naua cikasa “ Mua ku Lingila Vihangula via Mana.”)

¹⁶ Nga mu na kava vitume vi tua simutuila, kaha muli na viose vi tondeka mu ku linga cihangula ca cili. Muomu mu na tondesesa na ku hilula vitume vi mi kuasa ku linga cihangula ciya Yehova ku mutima. Mu nima yaco, citava mu vundile Yehova a vezikise cihangula cenu.

17. Tumbulenu lihungu lie ku kuasa ku linga vihangula via cili?

¹⁷ Ambe nga mua lingile vihangula via cili ku nima, vulukenu nguenu lihungu lie ku kuasa ku linga vihangula via cili lia pua ku kulahela mu mana a Yehova, kati muli etu vavene ni mu vutongue vuetu. Muomu Yehova lika a hasa ku tu hana mangana a vusunga, ku tu kuasa kuivuisisa, kaha na ku tu kuasa ku kala na liano. Viose evi via pua via seho mu ku linga vihangula via cili. (Visi. 2:1-5) Mua vusunga, Yehova a ka tu kuasa ku linga vihangula vi ka muya ku mutima.—Visa. 23:2, 3.