1. Vusunga vuka vua lingisa Yehova ku tumbika vulo?

 YEHOVA uapua ‘Njambi ua ndzolela,’ kaha a tonda netu tu yoye mu ndzolela. (1 Tim. 1:11) Ngeci ua tu hana vuana vua vuingi mu ku tu kuasa ku litovalesa muono. (Tia. 1:17) Vumo vua vuana vuaco vua pua vulo. Yala na mpuevo mu ve ku liambata, ve ku likuminya ku limuesa cilemo, kasingimiko na ku liniunga umo na mukuavo. Kaha mu ve ku tualelelaho ku limuesa cilemo, ve ku yoya mu ndzolela.—Visi. 5:18.

2. Vika vie ku soloka mu malo a engi lelo lino?

² Lelo lino, cingi ca vaze va liambata ka ve ku puisamo nkuminyo i ve ku linga ha litangua lia vulo. Omo liaco, ka ve ku yoya mu ndzolela. Umo muzimbu ua vakua Organizações Mundial de Saúde nguauo, vamala vavengi ve ku veta vampuevo vavo, na ku va handeka mezi a kasahuntu. Ve ku likuisa ku muesa kasingimiko kuli mpuevo nga vali ha mbunga, vunoni nga vali ku ndzivo ka ve ku lingamo. Cikuavo naua, cingi ca malo ka ekuenda vuino nga yala ue ku tala via vuntselentsele.

3. Omo lia vika vamo vamala ve ku yandesa vampuevo vavo?

³ Vika vie ku lingisa vamo vamala ku yandesa vampuevo vavo? Vamo va va lelele ku visemi va vikenia, ngeci ve ku singanieka nguavo ka ca puile vupi ku lingamo. Vakuavo co ve ku kava visinganieka via mbunga nguavo, “yala mpundu” na pande ku pua mukua vutenu linga muese nguendi ua pua ndumba ha ndzivo. Vamo vamala ka va va longesele ku kuata vutenu. Kaha vakuavo co ve ku mona vampuevo na ku limona ku muvila mu njila ya ku henga omo lia ku tala via vuntselentsele kusua kumo. Cikuavo naua, umo muzimbu ua muesa nguauo, vitanga viaco  via livuezelele cikuma mu ntsimbu ya musongo ua COVID-19. Vutuhu ngoco, na vumo vusunga vuahi vua pande ku lingisa yala a yandese mpueyendi.

4. Vamala vaze ve ku pangela Yehova va pande ku zangama na vika, kaha omo lia vika?

⁴ Vamala ve ku pangela Yehova va pande ku zangama na visinganieka via ku henga ku tuala ha vampuevo. a Omo lia vika? Muomu visinganieka via muntu vikevio vie ku mu lingisa ku linga vimo viuma. Kapostolo Paulu ua mamuine Vakua Kilistu ku Loma nguendi: “Kati mu lifuise na viuma via ntsimbu ino.” (Loma 12:1, 2) Kapotolo Paulu mua sonekelele cikungulukilo ku Loma, vakua cikungulukilo caco tele vapua Vakua Kilistu mu miaka ya yingi. Vunoni mezi endi a muesa ngecize, vamo kasi va kele na ku kava visinganieka via mbunga via ku henga. Ngeci ua va mamuine valulule visinganieka na vilinga viavo. Cimamuna caco, ca kuata na ku vamala Vakua Kilistu lelo lino. Ca vusiua, vamo ve ku kava visinganieka via mbunga via ku henga na ku yandesa vampuevo vavo. b Vuno Yehova ua lavelela yala a yoye vati na mpueyendi? Cikumbululo tu ci uana ku mukanda uva na tundisa mutue ua cilongesa cino.

5. Kuliya na 1 Petulu 3:7, vati yala na pande ku yoya na mpueyendi?

⁵ Tandenu 1 Petulu 3:7. Yehova ua hana lisiko ku vamala lia ku lema na ku singimika vampuevo vavo. Yala ua singimika mpueyendi, ue ku ku muesa ngozi na cilemo. Mu cilongesa cino, tu mona vati yala a hasa ku muesa kasingimiko kuli mpueyendi. Vunoni ha katete tu simutuila vilinga vika ka vie ku muesa cilemo na kasingimiko.

KATI MU LINGE NA VIMO VIAHI VI VAVALESA MPUEYENU

6. Vati Yehova ue ku muenamo vamala ve ku veta vampuevo vavo? (Kolose 3:19)

⁶ Ka pandele ku veta mpueyendi. Yehova ua zinda mukua luozi. (Visa. 11:5) Cikumakuma vamala ve ku veta vampuevo vavo. (Mal. 2:16; tandenu Kolose 3:19.) Kuliya na mukanda ha va na tundisa mutue ua cilongesa, 1 Petulu 3:7 nguayo, nga yala ke ku niunga vuino mpueyendi, ce ku kuata ku vusamba vuendi na Yehova. Kaha halumo Yehova ka ka halakana vivundilo viendi.

7. Kuliya na Efesu 4:31, 32, yala ka pandele ku handeka mu cifua cika? (Talenu naua “Lizi li va Lombolola.”)

⁷ Ka pandele ku tenukila mpueyendi. Vamo ve ku tenukila vampuevo vavo na ku va handeka mezi eku va vavalesa ku mutima. Vunoni Yehova ua zinda “vutenu, na matoto, na muyoyo [ni ku handeka mua ku vihia].” c (Tandenu Efesu 4:31, 32.) Yehova ue ku halakana viose, kaha ue ku tuala mana ku cifua ce ku handekelamo yala na mpueyendi, ambe nga vali kua likaliavo. Yala ue ku tenukila mpueyendi ke ku pihisa lika vulo, vunoni na vusamba vuendi na Yehova.—Tia. 1:26.

8. Vati Yehova ue ku muenamo via vuntselentsele, kaha omo lia vika?

⁸ Ka pandele ku tala via vuntselentsele. Vati Yehova ue ku muenamo via vuntselentsele? Ua vi zinda, ngeci mukemuo, yala ue ku tala via vuntselentsele ue ku pihisa vusamba vuendi na Yehova kaha ke ku muesa kasingimiko kuli mpueyendi. d Yehova ua tonda vaze vambata vapue vakua vusunga ku vampuevo vavo, kati lika mu vilinga vunoni na mu visinganieka.  Kaha Yesu ua handekele nguendi yala nga a tala mpuevo na lisungu, na lingi laza vukoyi “mu mutima.” e—Mat. 5:28, 29.

9. Omo lia vika Yehova ua zinda nga yala a limona na mpueyendi ku ndzili?

⁹ Ka pandele ku limona na mpueyendi ku ndzili. Vamo vamala ve ku sindiya vampuevo ku limona ku muvila, kaha ku lingamo ce ku lingisa vampuevo va livue vungoco, na ku va sila citaku-taku. Yehova ua zinda cikuma vilinga viaco. Ngeci mukemuo, ua tonda vamala va leme na ku niunga vampuevo vavo na ku singimika cifua ci ve ku livuilamo. (Efe. 5:28, 29) Vatico nga yala ue ku limona na mpueyendi ku ndzili, ku mu tenukila, ni ku tala via vuntselentsele? Vati a hasa kualulula visinganieka na vilinga viendi?

VATI YALA A HASA KU LIKELA VILINGA VIA KU PIHIA?

10. Vati vaze vambata va hasa ku uana vukuasi ku lungano lua Yesu?

¹⁰ Vika vi hasa ku kuasa yala ku likela vilinga via ku pihia? A hasa ku lingamo mu ku lihakela kapandi ka ku kava lungano lua Yesu. Vutuhu Yesu kambatele, vunoni cifua ca yoyelemo na vandongesi vendi, ce ku kuasa vaze vambata va yoye vuino na vampuevo vavo. (Efe. 5:25) Ca ku muenako, tu talenu vi va hasa ku lilongesa vaze vambata ku cifua ca yoyelelemo Yesu na vapostolo, na cifua ca kele na ku handeka navo.

11. Vati Yesu ua yoyele na vapostolo vendi?

¹¹ Yesu ua muesele ngozi na kasingimiko ku vapostolo vendi. Na limo litangua liahi ua puile muntu ua mukalu. Vutuhu u puile Muangana uavo kaha ua kele na ngolo ku hiana vakevo, vunoni ka pangesele ngolo yendi mu ku va vuisa vuoma na ku singanieka nguavo va ku zeya. Vunoni ua va pangelele na ku likehesa cose. (Yoa. 13:12-17) Ua va lekele nguendi: “[Lilongesenu] kuli yange, muomu nji ua kukonkama, cikuavo naua nji ua kulikehesa mu mutima kaha mu ka huima.” (Mat. 11:28-30) Mua vusunga, Yesu ua puile ua ku konkama. Mukua ku konkama ka puile ua ku zeya, vunoni ue ku hasa ku simpa na ku kuata mutima nga va na mu sangumuka.

12. Vati Yesu ua kele na ku handeka na vakuavo?

¹² Yesu ua pangesele mezi endi mu ku kaniamesa vakuavo. Ka handekele mua ku pihia na vandongesi vendi. (Luka 8:47, 48) Ambe vitozi vendi mu va mu tukile na ku mu sangumuka, “ka [va] tukanene.” (1 Pet. 2:21-23) Kaha mu cihela ca ku kumbulula mua ku pihia, Yesu ua kele na ku holoka. (Mat. 27:12-14) Mua vusunga, uapua lungano lua cili kuli vaze vambata!

13. Kuliya na Mateu 19:4-6, vati yala a hasa ku “lipandakana na mpueyendi”? (Talenu naua cikupulo.)

¹³ Yesu ua hele lisiko kuli vaze vambata nguendi, va pande kupua vakua vusunga ku vampuevo vavo. Kaha ua tumbuile via handekele Ise nguendi, yala na pande ku “lipandakana na mpueyendi.” (Tandenu Mateu 19:4-6.) Lizi lia ciNgelengu liva tumbula mu cinimbu eci nguavo ku “lipandakana” lia lomboloka “ku kakatela.” Ngeci mukemuo, vulo vua pande ku kola ngo, ngue yala na mpuevo va na kakatela kuli umo na mukuavo. Nga umo a vavalesa mukuavo ku mutima, vose vavali ve ku yanda. Kaha yala ua lema mpueyendi, ke ku tala via vuntselentsele. Vunoni nga via mu solokela, vuasi-vuasi ue ku lihakela kapandi ka ku hona ku tala “via ngoco.” (Visa. 119:37) Cikuavo naua, ue ku kava lungano lua Yombi, mu ku linga litavasiano na meso endi, lia ku hona ku tala mpuevo ueka na masungu.—Yombi 31:1.

14. Yala ua kala na vilinga via ku pihia na pande ku linga vika a hiluise vusamba vuendi na Yehova kaha na mpueyendi?

 ¹⁴ Yala ue ku veta mpueyendi ue ku tondeka ku linga viuma via vingi linga a sungamese viose via na pihisa mu vulo vuavo. Vika ue ku tondeka ku linga? Ca ku livanga, na pande ku litavela nguendi ali na citanga ca kama. Muomu Yehova ue ku mona viose vie ku linga na kuivua viose vie ku handeka. (Visa. 44:21; Ekel. 12:14; VaHe. 4:13) Ca mu civali, na pande ku likela ku yandesa mpueyendi na kualulula vilinga viendi. (Visi. 28:13) Ca mu citatu, na pande ku pinga kuecela kuli mpueyendi na kuli Yehova. (Vili. 3:19) Na pande naua ku lembelela Yehova a mu kuase ku kala na cizango ca kualulula visinganieka, vihandeka na ku kala na vilinga via cili. (Visa. 51:10-12; 2 Kol. 10:5; Filp. 2:13) Ca mu ciuana, na pande ku zinda via vipi mu ku muesa ngecize ali na ku yoya kuliya na vivundilo viendi. (Visa. 97:10) Ca mu citanu, na pande ku vundila vukuasi vua vakuluntu mu cikungulukilo vuasi-vuasi. (Tia. 5:14-16) Kaha ca mu citanu na cimo, na pande ku litumbikila vutumbe vu mu kuasa ku liniunga ku viuma via ku pihia via lingile linga kati a vi hilukile. Yala ue ku tala via vuntselentsele na pande ku kava evi vinanga. Kaha nga a lingamo, Yehova a ka vezikisa kapandi kendi ka kualuluka. (Visa. 37:5) Ka pandele ku lengela lika ha ku likela ku linga via ku pihia. Vunoni na pande naua ku lihakela kapandi ka ku lema na ku singimika mpueyendi. Vati a hasa ku lingamo?

VATI MU MUESA CILEMO NA KASINGIMIKO KULI MPUEYENU?

15. Vati yala a hasa ku muesa cilemo kuli mpueyendi?

¹⁵ Muesenu cilemo kuli mpueyenu. Vamo vamuanetu va kala na cizilila ca ku linga viuma tangua na tangua mu ku muesa nguavo va lema vampuevo vavo. (1 Yoa. 3:18) Mu hasa ku muesa cilemo kuli mpueyenu mu ku linga viuma via vindende ngeci mua, ku mu kuata ku livoko ni ku mu vumbatela. Cikuavo naua, mu hasa ku mu tuma mensagem ngeci mua: “Nja ku vuila  vusona mpueyange” ni “vati uli mu ntsimbu ino?” Kaha vintsimbu vimo, mu hasa ku mu sonekela kamukanda na mezi a muesa ngecize mua mu lema. Nga mu lingamo, mu ka mu muesa cilemo na kasingimiko kaha na ku kaniamesa vulo vueni.

16. Omo lia vika yala na pande ku sangala mpueyendi?

¹⁶ Muesenu ku santsela kuli mpueyenu. Yala ua lema mpueyendi na ku mu singimika, ue ku mu kaniamesa. Ue ku lingamo mu ku muesa ku santsela ku viose vie ku mu lingila mpueyendi mu ku mu kuasa. (Kolo. 3:15) Nga yala a sangala mpueyendi ku fuminina ku mutima, mpuevo ue kuivua ndzolela. Kaha naua ue ku livua ngecize, yaliendi ua mu lema na ku mu singimika.—Visi. 31:28.

17. Vati yala a hasa ku muesa kasingimiko kuli mpueyendi?

¹⁷ Muesenu ngozi na kasingimiko. Yala nga ua lema mpueyendi, ue ku mu haka seho na ku mu mona kupua vuana vua seho vua mu hana Yehova. (Visi. 18:22; 31:10) Kaha ue ku mu muesa ngozi na kasingimiko, ambe vene ha ntsimbu ya ku limona ku muvila. Ke ku mu sindiya va limone ku muvila, mu cifua ci mu lingisa ku hona ku livua ku zituka, ku livua vungoco ni ku mu sila citaku-taku. f Cikuavo naua, ue ku lihakela kapandi ka ku kala na mutima ua ku lela ku meso a Yehova.—Vili. 24:16.

18. Kapandi kaka va pande ku lihakela vaze vambata? (Talenu naua cikasa “ Vinanga Viuana vi Kuasa Yala Kupua Mukua Kasingimiko.”)

¹⁸ Vamuanetu muambata, kalenu na vusunga nguenu Yehova ue ku mona na ku haka seho ku kapandi ka mue ku lihakela ka ku muesa cilemo na ku singimika vampuevo venu mu viose. Ngeci mukemuo, lihakelenu kapandi ka ku liniunga ku vilinga via ku pihia, ku muesa ku ngozi, kasingimiko, na ku muesa cilemo ku vampuevo venu. Nga mu lingamo, mu ka muesa ngecize mua va lema na ku va haka seho. Singimikenu vampuevo venu, nga mu lingamo mu ka niunga vusamba vuenu na Yehova.—Visa. 25:14.