1. Vukuasi vuka tue ku uana mu ku kunguluka ku Mulalelo?

 MUA VUSUNGA nkombelo ya pua vuana vua ku linga na umo uahi a hasa ku i fueta! (2 Kol. 9:15) Omo lia nkombelo ya Yesu, tue ku hasa ku likuata vusamba na Yehova Njambi kaha na ku kala na vukovelelo vua ku ka yoya miaka yose. Ngeci mukemuo, tua pande ku muesa ku santsela kuli Yehova omo lia cilemo ca muesele mu ku tu hana nkombelo. (Loma 5:8) Kaha mu ku tu kuasa ku tualelelaho ku muesa ku santsela cetu ku nkombelo, Yesu ua tumbikile Mulalelo. Cilika caco ce ku kalako lumo lika mu muaka.—Luka 22:​19, 20.

2. Vika tu simutuila mu cilongesa cino?

² Mulalelo ua muaka uno u ka kalako lia Sapalalo, 12 ya Abril ya 2025. Mua vusunga, tu vose tuli na ku liviukisila ku ka kalako. Mu vingonde via lihata na Mulalelo, tu ka tambula vukuasi vua vuingi mu ku hilula a ha viuma via tu lingila Yehova na Munendi. Mu cilongesa cino, tu mona vika nkombelo ya tu longesa hali Yehova na Munendi. Kaha mu cilongesa ci na hatako, tu ka mona vati tu hasa ku uana vukuasi ku nkombelo na vati tu hasa ku muesa ku santsela cetu ku ikeyo.

 VI TU LONGESA KU NKOMBELO KU TUALA HALI YEHOVA

3. Vati kutsa ca muntu umo ci hasa ku patula mbunga ya yingi? (Talenu naua cikupulo.)

³ Nkombelo ye ku tu longesa via vingi ku tuala ha vuoloke vua Yehova. (Ndeu. 32:4) Mu njila ika? Omo lia lisino lia Andama, tua suana vupi na kutsa. (Loma 5:12) Linga a tu patule ku vupi na kutsa, Yehova ua tumine Yesu a ku pue nkombelo. Vunoni vati honi nkombelo ya muntu umo ya hasa ku patula vantu vose? Kapostolo Paulu ua lombolola nguendi: “Muomu ngue ha lisino lia muntu uze umo lika [Andama], vaze va vengi va na pu vakua vupi, ngecize naua ha kuononoka ca uze ueka umo lika [Yesu], vaze va vengi va ka pua vakua vuviuke.” (Loma 5:19; 1 Tim. 2:6) Ni nguetu, nga yala umo lika ua ku tantuluka ikeye ua tu kokelele vupi na kutsa, citava naua yala umo lika ua ku tantuluka a tu patule.

4. Omo lia vika Yehova kecelele vana va Andama va kuononoka va tualeleho ku yoya miaka yose?

⁴ Vuno ca tondekele vene Yesu ku tu tsila ni? Kati nga ca puile ca casi kuecelela lika vana va Andama va kuononoka va tualeleho ku yoya miaka yose? Ku vantu va ku hona ku tantuluka ni, nga omo vene. Vunoni Yehova ua pua mukua vuoloke. Muomu nga Yehova ua lingilemo, ue ku sembuluile lisino na vupi vua lingile Andama, na ku soloka ngue via na lingi viahi.

5. Vusunga vuka tuli navuo ngecize Yehova a ka linga vuoloke ntsimbu yose?

⁵ Vati nga Yehova ka hanene nkombelo, na ku hakela vuoloke vuendi ku mukulo, kaha na ku tavesa vantu va ku hona ku tantuluka va yoye miaka yose? Nga ua lingilemo, vantu halumo ve ku singaniekele nguavo Njambi a ka sembulula vuoloke vuendi cipue mu vimpande vikuavo. Ca ku muenako, halumo kaka puisamo vimo vikulaheso viendi. Vunoni ka tue ku lisosomua novio. Muomu nga Yehova ua hetele na ha ku kombeleya Munendi umo lika, mua vusunga a ka linga vuoloke ntsimbu yose.

6. Mu njila ika nkombelo ya muesa cilemo ca Yehova? (1 Yoano 4:​9, 10)

⁶ Vutuhu nkombelo ya tu kuasa kuivuisisa vuoloke vua Yehova, vunoni ya tu kuasa mua kama kuivuisisa vukama vua cilemo cendi. (Yoa. 3:16; tandenu 1 Yoano 4:​9, 10.) Nkombelo ya muesa ngecize Yehova ka tondele lika tu yoye miaka yose, vunoni tu pue naua mutamba ua vusoko vuendi. Muomu, Andama mua vulumuine, Yehova ua mu shekele ku vusoko Vuendi. Ngeci tu vose tua semukila ku mbandza ya vusoko vua Njambi. Vunoni ku hitila mu nkombelo, Yehova ua  tuecela, kaha tangua a ka hiluisa ku vusoko vuendi vose vaze ve ku muesa lutsilielo na ku muononoka. Kaha cipue mu ntsimbu ino tu hasa ku likuata vusamba vua kama na Yehova kaha na vamuanetu. Mua vusunga, Yehova ua tu lema cikuma-kuma!—Loma 5:​10, 11.

7. Vati lamba ya hitile Yesu ya tu kuasa kuivuisisa cilemo ca Yehova kuli yetu?

⁷ Kuivuisisa ku kaluua ca nkombelo, ci tu kuasa kuivuisisa vukama vua cilemo ca Yehova kuli yetu. Satana ue ku handeka nguendi nga viuma vi na kaluua, na umo muntu uahi a hasa ku ka kakatela kuli Njambi. Mu ku payesa Satana, Yehova ua tavesele Yesu a yande na ha kutsa. (Yombi 2:​1-5; 1 Pet. 2:21) Ua limuenene Munendi va mu tsopa ku vakuluntu va malombelo, va mu zumuna na makote, na ku mu sukika ha citi. Mu nima yaco, ua limuenene Munendi ali na kuivua ku vavala ca kama kaha a tsa kamandende-kamandende. (Mat. 27:​28-31, 39) Yehova ua kele na ngolo ya kuimika viose vize ha ntsimbu yose-oyo. Ca ku muenako, omo vamo vitozi va handekele nguavo: “Kati nguendi ua tsiliela muli Njambi? Kaha Njambi a muohieleni.” Yehova nga ua lingilemo haze vene. (Mat. 27:​42, 43) Vunoni nga ua lingilemo, nkombelo nga ka va i fuetele kaha etu nga ka tua kele na lulavelelo. Ngeci Yehova uecelelele vene Munendi noho ha tsile.

8. Vuno Yehova ua vuile ku mutima ku vavala mua muene Munendi a yanda ni? Lombololenu. (Talenu naua cikupulo.)

⁸ Vutuhu Njambi ua pua Mukua Ngolo Yose, kati tu singanieke nguetu ke kuivua ku vavala ku mutima. Mu ku linga ua tu tangele mu cifua cendi, tue kuivua vusiua, ndzolela na vikuavo. Mbimbiliya ya muesa ngecize nendi vene mukemuo ue ku livua. Ue kuivua vusiua na ku vavala ku mutima. (Visa. 78:​40, 41) Tu hilulenu ha muzimbu ua Avilahama na Isake. Avilahama va mu tumine ku kombeleya Munendi umo lika Isake. (Njen. 22:​9-12; VaHe. 11:​17-19) Aci singaniekenu ku vavala ca vuile Avilahama ku mutima mua kele na ku liviukisila ku tsiha Munendi. Kaha singaniekenu honi ha vati ua livuile Yehova ku mutima mua muene Munendi va mu yandesa mua vukenia na ku mu tsiha ku vakua vupi!—Talenu video Exemplos de Fé—Abraão, Parte 2, mu jw.org.

9. Vati Loma 8:​32, 38, 39, ya mi kuasa kuivuisisa vukama vua cilemo ca Yehova kuli yenu na vamuanetu vose?

⁹ Nkombelo ye ku tu longesa ngecize, na umo uahi ua tu lema mua kama ku hiana Yehova, ambe vene kavusoko ni kavusamba ketu ua kama. (Tandenu Loma 8:​32, 38, 39.) Mua vusunga, Yehova ua tu lema mua kama ku hiana etu vavene. Vuno mua tonda ku yoya miaka yose ni? Yehova ua tonda mua kama ku lingamo, ku hiana etu vavene. Vuno  mua tonda ku miecela ku vipi vienu ni? Yehova ua tonda mua kama ku lingamo, ku hiana etu vavene. Kaha via tonda kuli yetu, via pua lika ku tava vuana vuendi mu ku muesa lutsilielo na kuononoka. Mua vusunga, nkombelo ya pua njila ya kama ya tu mueselamo Njambi cilemo. Kaha kati ovio lika, mu mavu a aha tu ka lilongesa vikuavo ku tuala ha cilemo ca Yehova.—Ekel. 3:11.

VI TU LONGESA KU NKOMBELO KU TUALA HALI YESU

10. (a) Vika via vuisile Yesu vusiua vua kama ku tuala ha kutsa cendi? (b) Mu vinjila vika Yesu ua hakuilile lizina lia Yehova? (Talenu naua cikasa “ Lukakatela lua Yesu lua Hakuilile Lizina lia Yehova.”)

¹⁰ Yesu ua haka seho ya kama ku lutsimo lua cili lua Ise. (Yoa. 14:31) Yesu ua lisosomuene ngecize ku mu vangeya nguavo ua pua mukua ku sahula Njambi kaha mbanditu, ci ka kuita mazilo ku lizina lia Ise. Vikevio via mu lingisile ku vundila nguendi: “Tata, nga citava, eyi ngandza i hitile ku lahako nange.” (Mat. 26:39) Omo lia ku kakatela kuli Yehova na ha kutsa cendi, Yesu ua hakuilile lizina lia Ise.

11. Vati Yesu ua muesele cilemo ca kama ku vantu? (Yoano 13:1)

¹¹ Nkombelo ya muesa naua ngecize Yesu ua lema mua kama vantu, cikuma-kuma vandongesi vendi. (Visi. 8:31; tandenu Yoano 13:1.) Ca ku muenako, Yesu ua tantekeyele ngecize imo mitamba ya cipanga cendi ha mavu ika kaluua, cikuma-kuma kutsa cendi. Vunoni muezile ha mavu ka puisilemo lika cipanga cendi muomu ca tondekele ku ci puisamo houe. Ua ci lingile na mutima uose. Ua ambuluile, ku longesa, na ku pangela vantu na cizango cose. Ambe ha litangua lia kutsa cendi, Yesu ua uanene ntsimbu ya ku tanesa viliato via vapostolo vendi, ku va hana vimamuna na ku va lembezieka. (Yoano 13:​12-15) Kaha  mua kele ha citi, ua noneleko kamo kantsimbu ka ku hana lulavelelo kuli umo muhuza ua kele ku mukulo uendi na ku hangula muntu a mu niungilako vanaye. (Luka 23:​42, 43; Yoa. 19:​26, 27) Yesu ka muesele lika cilemo ku hitila mu kutsa cendi, vunoni na mu muono uendi uose.

12. Mu njila ika Yesu ali na ku tualelelaho ku tu kuasa?

¹² Vutuhu Kilistu “ua tsile lumo lika” vunoni kasi ue ku tualelelaho ku tu kuasa. (Loma 6:10) Mu njila ika? Ali na ku tualelelaho ku pangesa ntsimbu na ndzili yendi mu ku tu hana viuma viose via cili omo lia nkombelo. Aci singaniekenu ha viuma viali na ku linga mu ntsimbu ino. Ua pua Muangana uetu, Sasendote ua Kama na mutue ua cikungulukilo. (1 Kol. 15:25; Efe. 5:23; VaHe. 2:17) Ali na ku tuamenena cipanga ca ku kungulula Vakua Kilistu va ku vuavesa na vakua civunga ca kama. Kaha cipanga caco ci ka hua lika, mu i kahua lamba ya kama. b (Mat. 25:32; Mako 13:27) Ue ku linga naua cose linga vangamba vendi va kale na viakulia via mu lutsilielo via ku puamo kuno ku matangua a ku kotokela. (Mat. 24:45) Kaha mu ku hita ca Likulukazi lia Miaka, a ka tualelelaho ku tu kuasa. Mua vusunga, Yehova ua tu hana vene Munendi.

TUALELENUHO KU LILONGESA

13. Vati ku hilula ci ka mi kuasa ku tualelelaho ku lilongesa via cilemo ca Njambi na Kilistu?

¹³ Mu hasa ku tualelelaho ku lilongesa via cilemo ca Yehova Njambi na Kilistu Yesu mu ku tualelelaho ku hilulaho. Ca ku muenako, mu vingonde via lihata na Mulalelo ua muaka uno, mu hasa ku tanda na civando Mavulu a Muzimbu ua Cili, cipue livulu limo lika. Vunoni kati mu tandele lika na vutumbe vua ku manusula. Tandenu na civando na ku tonda vusunga vukuavo vua pande ku tu lingisa ku lema Yehova na Yesu. Kaha viose vi mu lilongesamo, likenuko vakuenu.

14. Kuliya na Visamo 119:​97, vati ku tondesesa ci hasa ku tu kuasa ku lilongesa via vingi ku tuala ha nkombelo na vilongesa vikuavo? (Talenu naua cikupulo.)

¹⁴ Nga muli miaka ya yingi mu vusunga, halumo mu hasa ku lihula nga citava vene mu lilongese viuma via viha ku tuala ha vimpande vi mu tantekeya vuino ngeci mua: vuoloke vua Njambi, cilemo cendi na nkombelo. Vunoni kasi tu hasa ku lilongesaho vimpande vikuavo. Muomu via ku lilongesa mu via kaya muze, ka vie kuhua. Ngeci mukemuo, vika mu  hasa ku linga? Puenu na ku pangesa vuino viakulia via mu lutsilielo vi tua kala navio. Ca ku muenako, nga mu na uana cimo cinimbu ka muevuisilile vuino, tondesesenuho. Kaha mu ku hita ca litangua hilulenu ha viuma vi mu na nongonona na vika mua lilongesa ku tuala hali Yehova, Yesu kaha na cilemo cavo kuli yetu.—Tandenu Visamo 119:97.

15. Omo lia vika tua pande ku tualelaho ku hinda vupite mu Lizi lia Njambi?

¹⁵ Nga ntsimbu yose i mue ku tanda na ku tondesesa ka muesi na ku uana viuma via viha ni via ku tovala, kati mu hilukile mu nima. Ku lilongesa ca pua ngue ku tonda olu. Vakua ku hinda olu halumo ve ku salulula mavue mu viola via vingi ni vene matangua, amba va uaneko kamo. Vunoni ve ku tualelelaho muomu livue lia olu cipue lia lindende, lia kala na seho ya kama. Na vuno vene, vusunga vua mu lizi lia Njambi vua hiana olu! (Visa. 119:127; Visi. 8:10) Ngeci mukemuo, kalenu na ntsintsa kaha tualeleho ku tanda Mbimbiliya.—Visa. 1:2.

16. Vati tu hasa ku tambuluisa Yehova na Yesu?

¹⁶ Omo mu lilongesa, tondenu naua vinjila via ku pangeselamo vize vi mue ku lilongesa. Ca ku muenako, tambuluisenu vuoloke vua Yehova mu ku muesa vuoloke ku vakuenu. Tambuluisenu cilemo ca Yesu kuli Ise na ku vantu, mu ku tualelelaho ku kakatela kuli Yehova na ku vamuanoko mu lutsilielo, ambe nga ku lingamo ci mi kokela visoti. Cikuavo naua, tambuluisenu Yesu mu ku ambuluilako vakuenu, linga navo va uane vukuasi ku nkombelo.

17. Vika tu ka lilongesa mu cilongesa ci na hatako?

¹⁷ Omo tu tualelelaho kuivuisisa na ku muesa ku santsela omo lia nkombelo, cilemo cetu kuli Yehova na Yesu ci ka livuezelela. (Yoa. 14:21; Tia. 4:8) Ngeci mukemuo, tu puenu na ku pangesa viose vie ku tu hana Yehova mu ku tualelelaho ku lilongesa via nkombelo. Cilongesa ci na hatako ci ka tsindika ha vukuasi vu tu hasa ku uana ku nkombelo na vati tu hasa ku muesa ku santsela ku cilemo ca Yehova.