CILONGESA 5
MUASO 108 Cilemo ca Njambi ka ce ku Hua
Vivezikiso Vika tue ku Tambula omo lia Cilemo ca Yehova?
“Kilistu Yesu uezile hano ha mavu mu ku ohiela vakua vupi.” —1 TIM. 1:15.
VUTUMBE
Ku tantekeya vivezikiso vi tua tambula omo lia nkombelo, na vati tu hasa ku muesa ku santsela cetu kuli Yehova.
1. Vika tua pande ku linga tu vuise Yehova ndzolela?
ACI SINGANIEKENU, nga mua hana vuana vua ku lifuila ku muntu u mua lema. Mu kevua vusiua nga muntu uaco ka vu pangesa. Vunoni, mu kevua ndzolela nga muntu a pangesa vuino vuana vuaco na ku muesa ku santsela. Vika tu lilongesaho? Yehova ua tumine Munendi mu ku tu tsila. Ngeci mukemuo, ue kuivua ndzolela nga tu muesa ku santsela ku vuana vuaco na cilemo cendi, ca mu lingisile ku tuma Munendi kupua nkombelo.—Yoa. 3:16; Loma 5:7, 8.
2. Vika tu lilongesa mu cilongesa cino?
2 Mu ku hita ca ntsimbu, tu hasa ku likela ku haka seho ku nkombelo. Ku lingamo, ci kapua ngue tua tulika vuana vua tu hana Njambi, ku cihela ka tu hasa ku vu mona ambe ku vu singanieka. Vunoni linga kati vi tu solokele, tua pande ku tualelelaho ku muesa ku santsela ku viuma viose vi va tu lingila Yehova na Kilistu. Kaha cino cilongesa ci tu kuasa ku lingamo. Tu lilongesa vivezikiso vi tue ku tambula lelo lino omo lia nkombelo, na vivezikiso vi tu ka tambula ku lutue. Tu lilongesa naua vati tu hasa ku muesa ku santsela ku cilemo ca Yehova, cikumakuma mu ntsimbu ino ya Mulalelo.
VIVEZIKISO VI TUE KU TAMBULA LELO LINO
3. Vivezikiso vika tue ku tambula lelo lino omo lia nkombelo?
3 Lelo lino tue ku tambula vivezikiso omo lia nkombelo ya Kilistu. Ca ku muenako, Yehova ue ku tuecela ku vipi vietu ku hitila mu nkombelo. Vutuhu ka tua fuililile ku tuecela, vunoni Yehova ue ku lingamo. Mukua visamo ua muesele ku santsela ku kuecela ca Yehova, nguendi: “Muomu ove, [Yehova] ua viuka, kaha u li na vuasi mu ku ecela milonga.”—Visa. 86:5; 103:3, 10-13.
4. Yehova ua hele nkombelo kuli veya? (Luka 5:32; 1 Timoteu 1:15)
4 Vamo ve ku livua nguavo ka va fuililile ku vecela kuli Yehova. Mua vusunga, tu vose ka tua fuililile ku tuecela. Ambe vene kapostolo Paulu uevuisisile vusunga vuaco, ngeci ua handekele nguendi: “Ka va pandele ku nji tumbula kapostolo.” Kaha ua vuezeleko naua nguendi: “Vunoni ku kavumbi ka Njambi, ha nji na pu ha nja pua vene.” (1 Kol. 15:9, 10) Mu tue ku liveya ku vipi vietu na kualuluka, Yehova ue ku tuecela. Omo lia vika? Kati muomu tua fuila ku tuecela, vunoni muomu ua tu lema. Ngeci mukemuo, nga mue ku livua vungoco omo lia ku singanieka nguenu ka mua fuililile ku miecela, vulukenu nguenu Yehova ua hele nkombelo kati ku vantu va ku tantuluka, vunoni kuli vakua vupi ve kualuluka.—Tandenu Luka 5:32; 1 Timoteu 1:15.
5. Vuno tua fuila ku tambula cikeketima ca Yehova ni? Lombololenu.
5 Na umo uahi na pande ku livua nguendi na fuila ku tambula cikeketima ca Yehova, ambe nga ali na ku pangela Yehova mu miaka ya yingi. Vutuhu ngoco, Yehova ke ku suva viose vi tue ku mu lingila. (VaHe. 6:10) Ngeci mukemuo, ua tu hele Munendi mu kupua vuana, kati mu kupua fueto omo lia viose vi tue ku mu lingila. Kaha capua cisevuka ku singanieka nguetu, tua fuila ku tambula cikeketima ca Yehova muomu tua mu lingila via vingi. Muomu nga tu lingamo, ci kapua vene ngue tuli na ku handeka nguetu Yesu ka tondekele ku tu tsila.—Setekesenu na Ngalata 2:21.
6. Omo lia vika Paulu ua fuitanganene mu cipanga ca Yehova?
6 Paulu ua tantekeyele nguendi ambe nga a fuitangana mu cipanga ca Yehova, kasi vene ka fuililile ku muecela kuli Yehova. Kaha omo lia vika honi ua fuitanganene mu cipanga ca Yehova? Ua lingilemo, muomu ua tondele ku muesa ku santsela ku ngozi na cikeketima ca Yehova. (Efe. 3:7) Na vuno vene, ngeci mua Paulu netu tue ku fuitangana mu cipanga ca Yehova, kati linga a tu muese cikeketima cendi. Vunoni muomu tu tonda ku muesa ku santsela ku cikeketima cendi.
7. Vivezikiso vika naua tue ku tambula lelo lino omo lia nkombelo? (Loma 5:1; Tiango 2:23)
7 Ku likuata vusamba na Yehova, a capua civezikiso cikuavo ci tue ku tambula. Ngue mu ca muesa cilongesa ci na hiti, ka tue ku likuata vusamba na Njambi mu tue ku semuka. Vunoni omo lia nkombelo tue ku ‘lihamba na Njambi’ kaha na ku suena mu hiehi nendi.—Tandenu Loma 5:1; Tiango 2:23.
8. Omo lia vika tua pande ku santsela Yehova ku civezikiso ca ku vundila?
8 Ku vundila capua civezikiso ci tua tambula omo lia ku likuata vusamba na Yehova. Keku halakana lika vivundilo vi ve ku linga vangamba vendi nga va na likungulula, vunoni ambe vi ve ku linga kua likaliavo. Vivundilo ka vie ku lembamesa lika mitima yetu na ku tu hana ciyulo ca mu visinganieka, vunoni vie ku kaniamesa naua vusamba vuetu na Njambi. (Visa. 65:2; Tia. 4:8; 1 Yoa. 5:14) Yesu mua kele hano ha mavu, ua kele na ku vundila kusua kumo muomu ua tantekeyele nguendi Yehova ua kele na ku halakana vivundilo viendi. Cikuavo naua, ua tantekeyele nguendi vivundilo viendi ve ku kaniamesele vusamba vuendi na Ise. (Luka 5:16) Mua vusunga, tue ku santsela cikuma kuli Yehova omo lia nkombelo ya Yesu, muomu tue ku hasa ku likuata vusamba na ku handeka Nendi ku hitila mu vivundilo.
VIVEZIKISO VI TU KA TAMBULA KU LUTUE
9. Vivezikiso vika va ka tambula vangamba va Yehova va kuononoka?
9 Vivezikiso vika vi va ka tambula ku lutue vangamba va Yehova va kuononoka omo lia nkombelo? Va ka tambula muono ua yaye. Vunoni cingi ca vantu ve ku singanieka nguavo ka citava, muomu vantu laza vasua kutsa. Fume ku laza, Yehova ua tonda vantu va yoye miaka yose. Kaha nga Andama ka vulumuine, na umo uahi ue ku singaniekele nguendi ka citava ku yoya miaka yose. Vutuhu mu ntsimbu ino ci hasa ku kaluua ku singanieka nguetu citava ku yoya miaka yose, vunoni tuli na vusunga nguetu vi ka lipuisamo mpundu. Muomu Yehova ua hele Munendi mu kupua nkombelo linga tu ka yoye miaka yose.—Loma 8:32.
10. Vivezikiso vika va lavelela ku ka tambula vamuanetu va ku vuavesa na vampanga veka?
10 Vutuhu muono ua yaye ua pua civezikiso ci tu ka tambula ku lutue, vunoni Yehova a tonda tu pue na ku singanieka ha civezikiso caco mu ntsimbu ino. Va ku vuavesa va lavelela ku ka yoya muilu na ku sika hamo na Kilistu. (Kuso. 20:6) Kaha vampanga veka va lavelela ku ka yoyela mu Citungu ha mavu ka mu ka kala ku vavala, tuyando ni vusiua. (Kuso. 21:3, 4) Vuno mua lavelela ku ka yoyela ha mavu ni? Cilunguiso caco, naco ca kala na seho, kati lika cilunguiso ca ku ka yoyela muilu. Muomu Yehova ua tu tangele linga tu yoyele ha mavu. Ngeci mukemuo, tu kevua ndzolela ya kama ku yoyela ha mavu miaka yose.
11-12. Vivezikiso vika tua lavelela ku ka tambula mu Citungu? (Talenu naua vikupulo.)
11 Aci singaniekenu vati muono u ka fua mu Citungu. Na limo litangua liahi mu ka lisosomua nguenu mu ka vavala ni kutsa. (Isaya 25:8; 33:24) Yehova a ka mi hana viose via cili vi mu ka tondeka. Vika mu tonda ku ka lilongesa? Via tusitu, kuimba ni via ku sona-sona? Mua vusunga, mu Citungu mu ka tondeka vakua ku sona-sona, vakua ku tunga vindzivo na vakua ku lima. Cikuavo naua, ku ka tondeka vakua ku lihana mu ku kuasa vipanga ngeci mua ku teleka, ku panga vikuata, na ku viukisa vihela. (Isaya 35:1; 65:21) Kaha mu ku linga mu ka yoya miaka ya yaye, mu ka kala na ntsimbu ya yingi ya ku lilongesa vuhasi vuose vu mu ka tonda.
12 Mua vusunga, tu kevua ndzolela ya ku tambula vaze va ka sanguka. (Vili. 24:15) Aci singaniekenu ndzolela i mu kevua mu ku lilongesa via vingi ku tuala hali Yehova, ku hitila mu viuma via ku tanga. (Visa. 104:24; Isaya 11:9) Helu lia viose, tu kevua ndzolela ya ku pangela Yehova ca ku hona ku livua mulonga. Vuno mu tonda ku liputuisa vivezikiso viaco omo lia “ku viukilila ndzolela ya vupi” ni? (VaHe. 11:25) Mua vusunga houe, muomu vivezikiso viose vi tu ka tambula, via hiana kapandi kose ka tue ku lihakela mu kuononoka Yehova. Vulukenu nguenu, cikulaheso ca ku yoya miaka yose mu Citungu, ci ka lipuisamo mpundu. Vunoni nga Yehova ka tu lemene na ku tuma Munendi mu kupua nkombelo, nga cikulaheso caco ka ci ka lipuisamo.
Vivezikiso vika mua lavelela mu Citungu? (Talenu vinanga 11-12)
MUESENU KU SANTSELA KU CILEMO CA YEHOVA
13. Vati tu hasa ku muesa ku santsela ku cilemo ca Yehova? (2 Kolintu 6:1)
13 Vati tu hasa ku muesa ku santsela kuli Yehova omo lia nkombelo? Mu ku tuameka vipanga via Yehova mu muono uetu. (Mat. 6:33) Muomu, Yesu ua tsile “linga vose va li na ku yoya kati va liyoyele vakevo vavene naua, vunoni va yoyele uze ua va tsililile kaha ua sangukile.” (2 Kol. 5:15) Mua vusunga, ka tu tondo ku suva vutumbe vua Yehova vua ku tu muesa kavumbi kendi.—Tandenu 2 Kolintu 6:1.
14. Vati tu hasa ku muesa lutsilielo mu ku tuamenena ca Yehova?
14 Tu hasa naua ku muesa ku santsela ku cilemo Yehova mu ku tsiliela ku tuamenena cendi. Vati tu hasa ku lingamo? Nga tu linga vihangula ku tuala ha ku lilongesa ni vipanga, tua pande ku singanieka vika Yehova ua lavelela kuli yetu. (1 Kol. 10:31; 2 Kol. 5:7) Kaha mu tue ku muesa lutsilielo, vusamba vuetu na Yehova na lulavelelo luetu lua ku ka yoya miaka yose lue ku kaniama.—Loma 5:3-5; Tia. 2:21, 22.
15. Vati tu hasa ku muesa ku santsela mu ntsimbu ya Mulalelo?
15 Kuli njila ikuavo naua i tu hasa ku mueselamo ku santsela ku cilemo ca Yehova. Tu hasa ku muesa ku santsela ku nkombelo ntsimbu kanda Mulalelo u hete na mu nima yaco. Kaha mu cihela ca ku liviukisila lika ku ka kunguluka, tu hasa naua ku lania vakuetu linga va ka kunguluke netu ku Mulalelo. (1 Tim. 2:4) Lombololuenu vantu va mu na lania vati ce kuenda ciuano ca Mulalelo. Kaha mu hasa ku va muesa vivideo via mutue: Omo lia Vika Yesu ua Tsile? na Ku Vuluka Ku-tsa ca Yesu. Vakuluntu mu cikungulukilo va pande ku lania vaze va na zeye mu lutsilielo. Mua vusunga, muilu na ha mavu ve kuivua ndzolela ya kama mu ve ku mona umo mpanga ua Yehova ua zimbalele na hiluka ku vutanga vuendi! (Luka 15:4-7) Kaha ha litangua lia Mulalelo, tu lihakelenu kapandi ka ku meneka vose. Vunoni cikumakuma vaze va vaha na vaze va zeya mu lutsilielo. Cikuavo naua, tu va kuasenu va livue ku zituka.—Loma 12:13.
16. Omo lia vika tua pande ku lihakela kapandi ka kuambulula ntsimbu kanda Mulalelo u hete na mu nima yaco?
16 Vuno citava mu lihakele kapandi ka kuambulula ntsimbu kanda Mulalelo u hete na mu nima yaco ni? Ku lingamo, ya pua imo njila ya cili i tu hasa ku mueselamo ku santsela ku viose via tu lingila Yehova na Yesu. Nga tu fuitangana mu cipanga ca Yehova, tu ka limuena vukuasi vuendi, kaha omo liaco lukulahelo luetu muli Yehova lu ka kaniama. (1 Kol. 3:9) Cikuavo naua, mu hasa ku kavangeya programa ya ku tanda Mbimbiliya mu ntsimbu ya Mulalelo ili mu mukanda Hilulenu Visoneka Tangua na Tangua ni mu cikasa ci tu hasa ku uana mu mukanda uetu ua viuano Muono Uetu Vakua Kilistu. Mu hasa naua ku pangesa viprograma viaco mu ku lilongesa mu vulika.
17. Vika vie ku vuisa Yehova ndzolela? (Talenu naua cikasa “ Vinjila via ku Mueselamo ku Santsela ku Cilemo ca Yehova.”)
17 Omo lia visoti via tangua na tangua ni viuma vieka, halumo ka mu hasa ku linga via vingi mu cipanga ca Yehova. Vunoni vulukenu nguenu, Yehova ke ku setekesa vi mue ku linga na vi ve ku linga vakuenu. Muomu ua haka seho ya kama ku cilemo ci mue ku mu muesa. Kaha ue kuivua ndzolela mu mue ku muesa ku santsela ku vuana vua seho ya kama, ni nguetu nkombelo.—1 Sam. 16:7; Mako 12:41-44.
18. Omo lia vika tue ku muesa ku santsela kuli Yehova na Yesu?
18 Omo lia nkombelo, tua kala na civezikiso ca ku tuecela, ku likuata vusamba na Yehova na ku kala na lulavelelo lua ku yoya miaka yose. Ngeci mukemuo, tu tualelenuho ku muesa ku santsela ku cilemo ca Yehova, ca mu lingisile ku tu hana vivezikiso viaco. (1 Yoa. 4:19) Cikuavo naua, tu muesenu ku santsela kuli Yesu, ua hele muono uendi omo lia ku tu lema!—Yoa. 15:13.
MUASO 154 Cilemo ka ce ku Hua
a Yehova uecelele vipi via vangamba vendi ntsimbu kanda Yesu a hane muono uendi mu kupua nkombelo. Ua lingilemo, muomu Yehova ua kele na vusunga nguendi Munendi ue ku muononokele na ha kutsa cendi. Ngeci mukemuo, kuli Yehova ca puile ngue nkombelo va i fuetele laza ntsimbu kanda Yesu atse.—Loma 3:25.
