1. Ngeci mu ua muesa 3 Yoano 3, 4, vika vie ku tu vuisa Ndzolela?

ACI SINGANIEKENU ha ndzolela ya vuile kapostolo Yoano, mua vuile ngecize, vaze va kuasele ku tantekeya vusunga va kele na ku tualeleho ku pangela Yehova na lukakatela! Mu ku linga va kele na ku hita mu visoti via vingi, Yoano ua kele na ku lihakela kapandi ka kama mu ku va kuasa linga va kaniame mu lutsilielo. Muomu ua va puisile ngue vana veni va mu lutsilielo. Na vuno vene, tue ku ivua ndzolela ya kama nga vana vetu cipue va ku ntsitu ni va mu lutsilielo va lihana kuli Yehova na ku tualelelaho ku mu pangela.—Tandenu 3 Yoano 3, 4.

2. Vutumbe vuka vua lingisile Yoano ku soneka mikanda?

² Mu 98 T.K.N., Yoano halumo ua kele na ku yoyele ku Efeso ni ku yehi nayo. Citava ua ile na ku tunga ku mbonge yaco mu nima ya ku patuka ku vundzinda vua ka kele ku nkundu ya Patemose. Kaha ku ntsimbu ize, Yehova ku hitila mu sipilitu santu yeni ua mu huiminine ku soneka mikanda itatu. Vutumbe vua mikanda yaco, vua puile ku kaniamesa vaze Vakua Kilistu va tualeleleho ku niunga lutsilielo luavo muli Yesu na ku tualelelaho ku endela mu vusunga.

3. Vihula vika tu kumbulula mu cilongesa cino?

³ Yoano, ikeye kapostolo ua ku manusuila ua lisupile na muono. Ngeci ua lisosomuene cikuma ngecize, vilongesa via valongisi va makuli vi ka tanganesa vantu mu cikungulukilo. * (1 Yoa. 2:18, 19, 26) Vaze vakua ku luisa vusunga, va kele na ku litumbula nguavo va tantekeya Yehova, vunoni ka va kele na ku ononoka masiko eni. Ngeci Yehova ua huiminine Yoano ku hana cimo cimamuna.  Tu ci hilulenu cimamuna caco. Kaha omo tu lingamo tu kumbulula vihula vitatu: Ca katete, vika ca lomboloka ku endela mu vusunga? Ca mu civali, vioua vika vi hasa ku tu vindika ku endela mu vusunga? Ca mu citatu, vati tu hasa ku li kuasa umo na mukuavo linga tu tualeleleho ku kala mu vusunga?

4. Kuliya na 1 Yoano 2:3-6 na 2 Yoano 4, 6, vika ca lomboloka ku endela mu vusunga?

⁴ Linga tu endele mu vusunga, tua pande ku tantekeya vusunga vua mu Lizi lia Njambi, Mbimbiliya. Cikuavo naua, tua pande ku niunga mezi eni a lisiko ni nguetu ku ononoka. (Tandenu 1 Yoano 2:3-6; 2 Yoano 4, 6.) Yesu ua tu sila lungano lua ku tantuluka mu ku ononoka Yehova. Ngeci mukemuo, imo njila ya seho i tu hasa ku ononokelamo Yehova ya pua mu ku kava lungano lua Yesu, kuliya na ndzili yetu.—Yoa. 8:29; 1 Pet. 2:21.

5. Vusunga vuka tua pande ku kala navuo?

⁵ Linga tu tualeleho ku endela mu vusunga, tua pande ku kala na vusunga ngecize, Yehova ikeye Njambi ua vusunga. Kaha viose vie ku tu leka mu Lizi lieni Mbimbiliya, via pua via vusunga. Kaha naua tua pande ku kala na vusunga ngecize, Yesu ikeye Mesiya u va kulahesele. Vantu vavengi lelo lino, va kala na vimpata ngecize Yesu kati ikeye Muangana ua Vuangana vua Njambi. Yoano ua mamuine Vakua Kilistu ngueni, vakua ku onga va vengi va ka hungumuisa vaze ka va li viukisilile ku hakuila vusunga ku tuala hali Yehova na Yesu Kilistu. (2 Yoa. 7-11) Yoano ua sonekele ngueni: “Mukua makuli iyandzo, kati uze a viana ngecize Yesu ikeye Kulistu, ni?” (1 Yoa. 2:22) Njila imo lika i tu hasa ku liniungilamo ku ku tu sevuisa, ya pua mu ku lilongesa Lizi li Njambi. Muomu ku lingamo, cikeco lika ce ku tu kuasa ku tantekeya Yehova na Yesu. (Yoa. 17:3) Kaha ku tantekeya Yehova na Yesu, cikeco lika ci ka tu hana vusunga ngecize, nkuma tua kala mu vulombelo vua vusunga.

6. Coua cika ve ku li uana naco vakuendze na vahumbe Vakua Kilistu?

⁶ Vakua Kilistu vose va pande ku liniunga linga kati va tanguke na Filosofiya, ni nguetu vilongesa via vakua mavu. (1 Yoa. 2: 26) Cikuma-kuma vakuendze na vahumbe Vakua Kilistu, vakevo va na pande ku liniunga ku muheto uaco ou. Ku França, umo ndumbuetu ua miaka 25 ua lizina Alexia * ngueni: “Mu nja puile nji kanike, vilongesa via vakua mavu via kele na ku nji tanga cikuma, vilongesa ngeci mua evolução na filosofiya.  Vunoni vintsimbu vimo, vilongesa viaco via kele na ku nji ya ku mutima. Vunoni, nja muene ngecize ka nja pandele lika ku halakana ku viuma vi va kele na ku nji longesa ku sikola, ca ku hona ku tavesa Yehova neni a lihakuile.” Alexia ua lilongesele livulu A Vida—Qual é a Sua Origem? A Evolução ou a Criação? mu nima ya visimano via vindende lika, vimpata viose via kele navio mu mutima via huile. Kaha ivene ngueni: “Nja li tavesele yange ivene nguange Mbimbiliya ya handeka vusunga. Kaha nja nongonuene naua ngecize, ku ononoka vitume viayo vi ka nji hana ndzolela na ciyulo.”

7. Ntsindiye ika tua pande ku viana, kaha omo lia vika?

⁷ Vakua Kilistu vose, vanike ni vakuluntu va na pande ku viana ntsindiye ya ku yoya muono ua vuongono. Yoano ua handekele ngueni, ka ci tava tu tualeleho ku endela mu vusunga, oku naua tu yoya muono ua vuongono mu ku linga via mazilo. (1 Yoa. 1:6) Nga tu tonda Yehova a tu tave lelo lino na ku lutue, tua pande ku linga viose ngue tuli mu ceke. Kuli Yehova, ka kua kele lihungu na limo liahi, viose vi tue ku linga ue ku vi mona.—VaHe. 4:13.

8. Vika tua pande ku viana?

⁸ Tua pande ku viana cifua ci ve ku muenamo vakua mavu vupi. Kapostolo Yoano ua sonekele ngueni: “Nga tu handeka, nguetu ka tuesi na vupi, tu ku lionga etu vavene.” (1 Yoa. 1:8) Ku matangua a Yoano, vakua ku luisa vusunga va kele na ku handeka nguavo, muntu citava a tualelelaho ku linga vupi ku cizango, oku kasi a tualelelaho ku pua ka vusamba ka Njambi. Lelo lino, tuli na ku yoyela ha kati ka vantu va kala na visinganieka ngeci muevi. Vavengi ve ku handeka nguavo va tsiliela muli Njambi, vunoni ka ve ku tava masiko eni ku tuala ha vupi cikuma-kama ku tuala ha ku limona ku muvila. Kaha viuma vie ku tumbula Yehova ngueni via pua vupi vakevo nguavo, ci na liyi na cifua ce ku vi muenamo muntu viuma.

9. Vukuasi vuka ve ku uana vakuendze nga va kava vitume via mu Mbimbiliya?

⁹ Cikuma-kuma vakuendze na vahumbe Vakua Kilistu, va hasa ku hita mu ntsindiye ya ku mona vupangala mu cifua ci ve ku vu muenamo vakuavo ku sikola ni ku vipanga. Evi vikevio via lihitile  navio Aleksandar. Ivene ngueni: “Vamo vanike va vampuevo ku sikola va nji sindiyile nji li mone navo ku mivila. Vunoni mu nja vianene va nji lekele nguavo mu ku linga ka nja kele na lipangala, nja puile mukua ku linga vundeyi na vamala.” Nga nenu muli na ku hita mu vieseko viaco, kati mu suve ngecize, ku kakatela ku vitume via mu Mbimbiliya ca pua ku niunga kasingimiko ka va mi haka vantu, cihindu cenu ca ku muvila na mu visinganieka, kaha na vusamba vuenu na Yehova. Nkala ntsimbu i mu viana cimo ceseko, ci ka mi puila ca casi ku linga via cili. Vulukenu naua ngecize, cifua ca ku vihia ci ve ku muenamo vantu via ku limona ku mivila ce ku tunda kuli Satana. Ngeci mukemuo, nga mu viana cifua ci ve ku singaniekelamo vakua mavu, “kaha uze mukua vupi mua mu hiana.”—1 Yoa. 2:14.

10. Vati ua 1 Yoano 1:9, ue ku tu kuasa ku pangela Yehova na mutima ua ku lela?

¹⁰ Tu tantekeya ngecize, Yehova ikeye ua kala na mpoko ya ku handeka nga cimo cuma ca pua vupi ni kuahi. Kaha tue ku linga cose linga kati tu linge vupi. Vunoni nga tua vulumuna, tue ku litavela vupi vuetu kuli Yehova mu civundilo. (Tandenu 1 Yoano 1:9.) Kaha nga tua lingi vupi vua kama, tue ku vundila vukuasi vua vakuluntu mu cikungulukilo vaze va a hangula Yehova mu ku tu niunga. (Tia. 5:14-16) Vunoni, ka tua pandele ku ecelela visinganieka via ku livua mulonga vi tu vule. Omo lia vika? Muomu Tatetu ua cilemo Yehova ua tu hanene cikombelo ca muaneni Yesu Kilistu, linga a tu ecele ku vipi vietu. Ngeci mukemuo, nga Yehova a handeka ngueni a ka ecela vivulumuna via vakua vupi, kesi na ku handeka makuli. Kaha naua, ka kuesi na vimo viahi vi hasa ku tu vindika ku pangela Yehova na mutima ua ku lela.—1 Yoa. 2:1, 2, 12; 3:19, 20.

11. Vati tu hasa ku niunga visinganieka vietu ku vilongesa vize vi hasa ku zeyesa lutsilielo luetu?

¹¹ Tua pande ku viana vilongesa via vakua ku alulukila vusunga. Tunde ha ca putukilile cikungulukilo ca Vakua Kilistu ca ku livanga, Satana Ndiavu ue ku pangesa vakua makuli vavengi mu ku kuna vimpata mu mitima ya vangamba va Njambi va ku ononoka. Omo liaco, tua pande ku lihakela kapandi ka ku kala na vunongotima vua ku  tepesa vusunga ku makuli. * Vitozi vetu, va hasa ku pangesa internete ni viprograma vieka via mizimbu linga va zeyese lukulahelo luetu muli Yehova na cilemo cetu ku vamuanetu. Ngeci mukemuo, kati mu suve iya ali ku ntsina ya viose evi, kaha vi vianenu!—1 Yoa. 4:1, 6; Ku-So. 12:9.

12. Omo lia vika tua pande ku vueza ku seho i tua haka ku vusunga vu tua lilongesa?

¹² Linga tu vule ku luisa ca Satana, tua pande ku vueza ku lukulahelo lu tua kala naluo muli Yesu na cipanga ca mu kundika Njambi mu vutumbe vueni. Kaha naua, tua pande ku kulahela njila imo lika ye ku pangesa Yehova mu ku tu suka mu lutsilielo ku matangua ano. (Mat. 24:45-47) Kaha tue ku vuezelela lukulahelo luetu, mu ku lilongesa Lizi lia Njambi ku-sua kumo. Nga tu lingamo, lutsilielo luetu lu ka pua ngue muti ua kala na mizi ya kovela cikuma mu livu. Paulu, neni ua handekele mezi a ku lifua na aa mua tumine mukanda ku cikungulukilo ca ku Kolose. Mu mukanda uaco, ua handekele ngueni: “Ngoco vene ngue omo mua tambuile Kilistu Yesu Muangana, ngecize vene endenu muli ikeye, sokenu mizi na ku litungisa muli ikeye, na ku kolesa mu ku-tsiliela cenu.” (Kolo. 2:6, 7) Ka kuesi na vimo viahi via hasa ku linga Satana ni vaze vakua ku mu kava, mu ku tukula mizi ya lutsilielo lua Mukua Kilistu ue ku lihakela kapandi ka ku kaniamesa lutsilielo lueni.—2 Yoa. 8, 9.

13. Vika tua pande ku lavelela, kaha omo lia vika?

¹³ Tua pande ku lavelela vizindo kuli vakua mavu. (1 Yoa. 3:13) Yoano ua tu vuluisile ngueni, “mavu ose a kundama kuli uze mukua vupi.” (1 Yoa. 5:19) Omo ku kotoka ca ano mavu ci ya na ku suena mu hiehi, matoto a Satana nao a ya na ku livuezelela. (Ku-So. 12:12) Kaha ke ku tu hitila lika ku nima na vieseko ngeci mua, vupangala na makuli a vakua ku luisa vusunga. Vunoni, ue ku tu luisa naua cito na meso mu ku tu yandesa na vukenia ku hitila mu vitozi. Satana, a tantekeya ngecize na lisupu na kantsimbu ka kandende lika mu ku seteka ku imika cipanga ca ku ambulula na ku tsiha lutsilielo luetu. Ngeci mukemuo, ka ce ku tu komouesa ku tantekeya ngecize, mu vimo vifuti vipanga vietu va vi vindika mu vutuntu ni imo mitamba yavio. Vutuhu ngoco, vamuanetu na vandumbuetu va kala mu vifuti viaco ve ku tualelelaho ku kolesa. Mu ku lingamo vali na ku muesa ngecize, cipue mukua vupi a linge vati, na vimo vieseko vieni ka tu hasa ku vula viahi.

14. Tumbulenu imo njila i tu hasa ku kuaselamo vamuanetu na vandumbuetu ku tualelelaho ku kala mu vusunga?

¹⁴ Linga tu kuase vamuanetu na vandumbuetu ku tualelelaho ku kala mu vusunga, tua pande ku muesa cikeketima. (1 Yoa. 3:10, 11, 16-18) Tua pande ku lilema umo na mukuavo, kati lika nga viuma vili vuino vunoni cikuma-kuma nga ku na katuka cisoti. Ca ku muenako, vuno kuli umo muanetu na tsisa kavusoko kaha a tondeka vukuasi na ku mu lembezieka ni? Vuno mu nevu ngecize vamo vamuanetu va na hiti mu ciyovo ca mavu, kaha va tondeka vukuasi vua ku tungulula Ndzivo yavo ya Vuangana ni vindzivo viavo mpundu ni? Mua vusunga, tue ku muesa vukama vua cilemo cetu na cikeketima cetu ku vamuanetu na vandumbuetu, kati lika mu mezi etu vunoni cikuma-kuma mu vilinga.

15. Ngue mu ua muesa ua 1 Yoano 4:7, 8, vika tua pande ku linga?

¹⁵ Tue ku tambuluisa Tatetu ua muilu nga tu limuesa cilemo umo na mukuavo. (Tandenu 1 Yoano 4:7, 8.) Njila imo ya seho i tu hasa ku mueselamo cilemo ku vamuanetu, ya pua mu ku liecele umo na mukuavo. Ca ku muenako, umo muanetu a hasa ku tu vulumuina, vunoni mu nima yaco a vundila ku ecela. Tu ka muesa cilemo mu ku mu ecela na ku suva cisevuka ceni. (Kolo. 3:13) Umo muanetu ua lizina Aldo, ua hitile mu ceseko caco eci omo ua vuile umo muanetu ya singimikile  cikuma a sahula vakua cisemua ceni. Muanetu Aldo ngueni: “Nja tualeleleho ku vundila kuli Yehova linga a nji kuase ku viana visinganieka via ku zinda uze muanetu uaco.” Mu nima yaco, muanetu Aldo ua lingile viuma via ku komouesa. Ua laniene uze muanetu linga a tuhuke neni mu lihia, kaha muanetu Aldo ua lekele muanetu uaco ngueni aze mezi, a kele na ku mu vavala cikuma. Kaha naua muanetu Aldo ngueni: “Omo uze muanetu ua vuile ngecize mezi eni a nji vavalele ku mutima, ua pingile ku ecela. Mua kele na ku nji pinga ku ecela, nja vuile ku lizi lieni ngecize, ua liveyele cikuma mezi a handekele. Mu nima yaco, nja mu ecelele na ku suva cisevuka ceni. Kaha tua puile naua vavusamba va cili.”

16-17. Kapandi kaka tua pande ku lihakela?

¹⁶ Kapostolo Yoano ua lisosomuene cikuma na cihindu ca mu lutsilielo ca vamuanaye. Kaha ku lisosomua caco, ca li soluele ha toma mu vimamuna via cili via va hele mu mikanda itatu ya va sonekelele. Mua vusunga, ce ku tu kaniamesa ku tantekeya ngecize, vamala na vampuevo va mitima ngeci mueni va va vuavesa mu ku sika hamo na Kilistu muilu.—1 Yoa. 2:27.

¹⁷ Tu lihakelenu kapandi ka ku vuluka ntsimbu yose vimamuna vi tua simutuila mu cilongesa cino. Tu lihakelenu naua kapandi ka ku tualelelaho ku endela mu vusunga, mu ku ononoka Yehova mu vifua viose via muono uetu. Puenu na ku lilongesa Lizi lieni na ku likulahela na mutima uose. Kaniamesenu lutsilielo luenu muli Yesu. Puenu na ku viana vilongesa via vakua mavu na via vakua ku alulukila vusunga. Vianenu ntsindiye ya ku yoya muono ua vuongono, na ku hona ku tavesa vupi vu mi vule. Puenu na ku lihakela kapandi ka ku pua na ku ononoka vitume via ku hiana via Yehova. Kaha tu vose tu lihakelenu kapandi ka ku tualelelaho ku kaniamesa vamuanetu, mu ku vecela nga va na tu vulumuina na ku kuasa vaze ve ku tondeka vukuasi. Nga tu lingamo, cipue nga tu ka hita mu cisoti ca kama kasi tu ka hasa ku tualelelaho ku endela mu vusunga.