Vukaleho vua muesa ngecize Yesu ua puile Sasendote ua Kama mu muaka ua 29 T.K.N. Vukaleho vuka? Mu va mu mbatizile, Yesu ua lihele ivene ku pua cikombelo ha mutula ua ku linga “cizango” ca Njambi. (Ngal. 1:4; VaHe. 10:5-10) Kaha mutula uaco ua cimueso, ua kalako tunde ha mbatizimu ya Yesu. Ngeci mukemuo, tu hasa ku handeka nguetu, tembele ya kama ya mu lutsilielo nayo ya putukile mu muaka uaco. Tembele yaco yemanena ku lemesa ca ku lela ca tumbika Yehova ku hitila mu cikombelo ca Yesu. Mutula ua pua mutamba ua seho mu tembele ya mu lutsilielo.—Mat. 3:16, 17; VaHe. 5:4-6.

Mu ku linga tembele ya mu lutsilielo tele ku ili laza, kua tondekele sasendote ua kama linga a pangelemo. Ngeci Yehova, ua vuavesele Yesu na “sipilitu santu na ngolo.” (Vili. 10:37, 38; Mako 1:9-11) Vunoni vusunga vuka tuli navuo ngecize Yesu va mu vuavesele mu ku pua Sasendote ua Kama tele kanda a tse na ku sanguka? Vusunga vuaco, tu vu uana mu ku hilula muzimbu ua sasendote ua kama Alone na vantu veka va mu suanene ha vusasendote vuaco, mu ntsimbu ya kele na ku panga masiko a Mosesa.

Masiko a muesele ngecize sasendote ua kama ikeye lika ua pandele ku kovela mu Hondo ya ku Hiana ku Lela ya mu tavenakulu, na Hondo ya ku Hiana ku Lela ya mu tembele. Kaha Hondo ya ku Hiana ku Lela va i tepesele ku Hondo ya ku Lela na imo ntanga. Sasendote ua Kama ua kele na ku pulakana ntanga yaco mu ku kovela mu Hondo ya ku Hiana ku Lela, ha Litangua lia ku Sambuesa lika ku nahu. (VaHe. 9:1-3, 6, 7) Alone na vantu veka va mu suanene ha vusasendote, va kele lika na mpoko ya ku pulakana “ntanga” yaco, mu nima ya ku va vuavesa mu ku pua vasasendote va kama. Sasendote ua Kama ua mu lutsilielo neni va mu hanguile tele kanda a tse kaha mu nima yaco, amba vuose ue ‘ku pulakanene ntanga’ ni nguetu “ntsitu yeni” na ku kovela muilu. (VaHe. 10:20) Evi vikevio via lingisile kapostolo Paulu ku handeka ngueni Yesu uezile ngue “sasendote ua kama” kaha ua kovelele mu “tembele ize ya hiana ku kama na ku tantuluka, kati ya ku panga na mavoko . . . vunoni muilu vene.”—VaHe. 9:11, 24.

Houe, ka ha kele ku litepa ha ntsimbu i va lingile litavasiano lia liha na ntsimbu i lia putukile ku panga mpundu. Omo lia vika? Muomu omo Yesu ua hilukile muilu, ua ka hanene seho ya cikombelo ca muono ueni ua ku tantuluka mu lizina lietu. Kaha mu ku lingamo, ua puisilemo cinanga ca katete, ha vinanga vitatu via tondekele mu ku kundika litavasiano liaco. Evi vinanga viaco vikevio naua via lingisile litavasiano liaco li kale na seho na ku putuka ku panga. Vinanga viaco vika?

Ha katete, Yesu ua ka lisoluele kuli Yehova. Ca mu civali, ua hele seho ya cikombelo ceni kuli Yehova. Ca mu citatu, Yehova ua tavele seho ya maninga a Yesu. Tele kanda evi vinanga vitatu vi lipuisemo, litavasiano lia liha ka lia kele na ku panga.

Mbimbiliya ka ya tumbuile mpundu ntsimbu ya tavele Yehova seho ya cikombelo ca Yesu. Ngeci mukemuo, ka tu hasa ku tumbula mpundu ntsimbu ika litavasiano lia liha lia putukile ku panga. Vunoni tu tantekeya ngecize Yesu ua ile muilu tele kua lisupu matangua 10 ku ciuano ca Pentekosta. (Vili. 1:3) Kaha mu tumatangua tuze vene, Yesu ua soluele seho ya cikombelo ceni kuli Yehova. Kaha Yehova ua tavele. (VaHe. 9:12) Vukaleho vua muesa ngecize litavasiano lia liha lia putukile ku panga, vantu va vu muene na meso ha ciuano ca Pentekosta. (Vili. 2:1-4, 32, 33) Viuma vi va muene, via muesele ngecize va na tumbika litavasiano lia liha kaha lili na ku panga.

Ku handeka muvatu, litavasiano lia liha va likundikile mu nima ya Yehova ku tava seho ya maninga a Yesu. Kaha mu ntsimbu yaco, mukemuo naua mu lia putukile ku panga, muomu Sasendote ua Kama Yesu tele na putuka honi ku panga mu ku pua lihako ua litavasiano liaco.—VaHe. 7:25; 8:1-3, 6; 9:13-15.