LISA * ngueni: “Cilemo ci va nji muesele Vakaleho va Yehova ca nji kuatele cikuma ku mutima.” Vikevio naua via lingikile na Anne. Ivene ngueni: “Cuma ca nji ile cikuma ku mutima, ca puile, cilemo ci va nji muesele Vakaleho va Yehova.” Vutuhu vose vavali ve ku ivua ndzolela ya kama mu ku tanda Mbimbiliya na ku i hilula, vunoni ngozi ikeyo ye ku va ya cikuma ku mutima.

Vati ku muesa Ngozi ce ku kuata ku mitima ya vantu va tua lihata navo? Tu simutuilenu ha vinjila vivali: ca ku livanga, mezi etu, ca mu civali, vilinga vietu. Kaha tu simutuila naua, ha veya tua pande ku muesa ngozi.

Mpuevo ua ku hia ku coto u va tumbula ku Visimo kapitulu 31, ue ku pangesa “lisiko lia ngozi” ku hitila mu mezi eni. Ue ku tavesa “lisiko” lia ngozi li mu tuamenene ku vize via handeka na vati a handeka. Cisemi ua yala neni na pande ku tavesa “lisiko” lia ngozi li tuamenene mezi eni. Cingi ca visemi, va tantekeya ngecize ku pangesa mezi a ku vihia, eku vavalesa ku mitima ya vana vavo, kaha ce ku lingisa vana ku hona ku ononoka visemi. Vunoni, nga visemi va handeka mu civuovuo, ce ku kuasa vana linga va va halakane na ku va ononoka.

Vati mu hasa ku lilongesa ku handeka na civuovuo, ambe nga ka mua kele na vana? Visimo 31:26 i hasa ku tu kuasa. Nguayo: “A asama kanua keni na mangana.” Eci ca lomboloka ngecize tua pande ku hangula mua cili mezi etu kaha na vati tu handeka. Kaha citava tu lihule nguetu: ‘Vuno vihandeka viange, vie ku katula matoto ni vie ku sambeya ciyulo’? (Visi. 15:1) Mua vusunga, capua ca seho ku singanieka ntsimbu kanda tu handeke.

Mbimbiliya ya muesa ngecize ku handeka mezi a ku hona ku a singanieka vuino, ‘e ku tuva ngue mukuale.’ (Visi. 12:18) Mu tue ku hilula ha vati mezi etu na cifua ca handekesi etu e ku kuata ku vakuetu, tue ku linga cose tu niunge mua cili mezi etu. Kaha ku muesa “lisiko lia ngozi” ci hasa ku tu kuasa ku niunga mezi a tue handeka na cifua ca handekesi cize ka ce kuya Njambi ku mutima. (Efe. 4:31, 32) Ngeci mukemuo, mu cihela ca ku pangesa aa mezi, tua pande ku hingisamo visinganieka na mezi a cili. Ku hitila muli kangelo keni, Yehova ua kaniamesele Eliya, mu ku handeka na “lizi lia ku yeveta ka vundendende.” (1 Vam. 19:12) Vunoni ku pua vakua ngozi ka ca lengelele lika ha ku handeka mezi a cili houe. Tua pande ku kala na vilinga vi muesa ngozi. Vati omo?

Ku tambuluisa Yehova, ce ku tu kuasa ku handeka mezi a cili na ku muesa vilinga via ngozi. (Efe. 4:32; 5:1, 2) Lisa, u tu na tumbula kuilu, ua lomboluele cifua ca ngozi ci va mu muesele Vakaleho va Yehova. Ivene ngueni: “Omo vavusoko vuange va vasindiyile ku nunguluka mu vuasi-vuasi, vamuanetu vavali hamo lika na vampuevo vavo, valombele lisesa ha vipanga, linga va ku tu kuase ku longekeya viuma. Ha ntsimbu yaco oyo, tele kanda nji putuke ku lilongesa Mbimbiliya.” Ngozi yose i va mu muesele, ya mu kuasele ku lilongesa vusunga.

 Anne neni, ngozi i va mu muesele ku Vakaleho va Yehova ya mu ile cikuma ku mutima. Ivene ngueni: “Omo lia civembulu ca vantu mu mavu ano, nja kele na citanga ca ku kulahela ku vantu.” Ua vuezeleko naua ngueni: “Ambe vene mu nja liuanene na Vakaleho va Yehova, ku nja kele na ku va tsiliela. Ngeci nja kele na ku lihula nguange, ‘Vutumbe vuka vali navuo mu ku nji muesa ngozi?’ Vunoni ngozi ya kele na ku nji muesa mulongisi uange ua Mbimbiliya ca nji kuatele cikuma ku mutima.” Vika viezilemo? Mu nima yaco, nja putukile honi ku hilula ha viuma vi nja kele na ku lilongesa.”

Tu na hasa ku mona ngecize ngozi i va va muesele vamuanetu mu cikungulukilo, ca va kuatele cikuma ku mitima. Kaha evi, vikevio via va kuasele ku lilongesa vusunga. Ngeci va putukile honi ku kulahela muli Yehova na ku vangamba veni.

Vamo vantu ve ku muesa ngozi na ndzandzu, omo lia cifua ci va kolelamo. Vutuhu ngoco, ku muesa cifua caco ca pua ca seho. Vunoni nga vutumbe vua ku muesa cifua caco  capua omo lia ku cisemua cetu ni omo lia vuntu vuetu mpundu, ka tuesi na ku tambuluisa ngozi ya Njambi.—Setekesenu na Vilinga 28:2.

Ngozi ya vusunga, ya pua mutamba ua muhako ua sipilitu santu. (Ngal. 5:22, 23) Eci ca lomboloka ngecize tua pande ku tavesa sipilitu santu i tu kuase ku muesa ngozi ya vusunga. Nga tu lingamo, tu ka tambuluisa Yehova na Yesu. Kaha mu ku pua Vakua Kilistu, tua pande ku muesa ngozi ku vantu. Ngeci mukemuo, linga tu hase ku muesa ngozi ku vakuetu, tua pande ku lema Yehova na Yesu. Nga tu lingamo, tu ka hasa ku muesa ngozi ya ku tundilila ku mutima ngue mue ku tonda mpundu Yehova.

Halumo ci hasa ku pua ca casi ku muesa ngozi ku vantu vaze va tu muesele laza ngozi ni vaze ku tu va tantekeya. (2 Sam. 2:6) Kaha njila imo i tua pande ku va mueselamo ngozi, ya pua ku va santsela. (Kolo. 3:15) Vati co nga muntu u tua muesele ngozi ka muesele ku santsela?

Aci singaniekenu hali evi: Yehova ua tu hana lungano lua kama mu ku muesa ngozi ku vantu, ambe nga ka va tondekele ku va muesa ngozi yaco. Kaha mu Lizi lieni Mbimbiliya, tua lilongesamo ngecize ca pua ca seho cikuma, ku lihakela kapandi ka ku muesa cifua caco. Lizi “ngozi” va li pangesa lua luingi mu Visoneka via ciNgelengu. Vati Njambi ue ku tu muesa ngozi?

Aci singaniekenu ha makulukazi na makulukazi a vantu vaze ve ku muesa Yehova ngozi ku hitila ha viuma viose vie ku va hana linga va hase ku yoya. (Mat. 5:45) Ntsimbu tele kanda tu mu tantekeye, Yehova ua kele laza na ku tu muesa ngozi. (Efe. 2:4, 5, 8) Ca ku muenako, Yehova ua tumine Muaneni umo lika a ku tsile vantu vakua vupi. Kapostolo Paulu ua sonekele ngueni, Yehova ua tu hana cikombelo “ngue ku vufuko vua kavumbi keni.” (Efe. 1:7) Vutuhu ka tua tantulukile na ku linga viuma ka vie ku muya ku mutima, Yehova ue ku tualelelaho ku tu tuamenena na ku tu longesa. Vimamuna vieni via pua ngue “mema a noka ha cisoka.” (Ndeu. 32:2) Mua vusunga, na limo litangua liahi tu ka hasa ku fueta Yehova ngozi yose ye ku tu muesa. Kaha cikuavo naua, nga ngozi ya Yehova kuahi, nga ka tua kele na lulavelelo lua ku lutue.—Setekesenu na 1 Petulu 1:13.

Mua vusugna, ngozi ya Yehova, ye ku tu kaniamesa na ku tu sindiya ku i muesa. Ngeci mukemuo, ka tua pande ku hangula veya tua pande ku va muesa cilemo, vunoni tua pande ku lihakela kapandi ka ku tambuluisa Yehova na ku muesa ngozi ku vantu vose. (1 Tes. 5:15) Kaha nga tu pua na ku muesa ngozi, ci ka pua ngue tuli na ku sambeya tuhia nga kuli na ku linga lisika lia kama. Kaha naua, tu ka hasa ku kanimesa vavusoko vuetu, vamuanetu, vakuetu ku vipanga, vakuetu ku sikola kaha na vaze va tua lihata navo.

Ngeci mukemuo, singaniekenu ha vati mezi enu na vilinga vienu vie ku kuata ku vavusoko vuenu ni ku vamuanetu mu cikungulukilo, va kole mu lutsilielo. Halumo umo muanetu mu cikungulukilo a tondeka cikuma vukuasi vua ku niunga ndzivo, kuya mu ku landa na ku niunga citungu. Kaha vati nga muli mu ku ambulula kaha mu liuana na umo muntu a tondeka cikuma vumo vukuasi, vuno citava mu va kuase ni?

Tua pande ku tambuluisa Yehova mu ku tavesa “lisiko lia ngozi” li tuamenene visinganieka na vilinga vietu.