Mua vi Tantekeyele Ni?
Vuno nguvulu ya Loma ya tavesele ku tsinda muntu ua ku sukika ha citi, ngeci mua Yesu ni?
VAVENGI va tantekeya muzimbu ua muesa ngecize Yesu va mu sukikile ha kati ka vakua vupi vavali. (Mat. 27:35-38) Vunoni vavengi va kala na makankasiano ku tuala ha muzimbu ua ku tsinda Yesu, nga cili vene va viukisile muvila ueni na ku u tuala mu cihilo ni kuahi.—Mako 15:42-46.
Vamo vakua ku paya nguavo, halumo nguvulu ya Loma ka ya tavesele muntu ua ku sukika va mu tsinde vuino, ngeci mua ku mu haka mu cihilo. Nguavo halumo vantu vaco va kele na ku va linga mueka. Mukua mizimbu Ariel Sabar, ua sonekele mu umo mukanda ku tuala ha ndundzi ya visinganieka viaco, ngueni: “Ku sukika ca puile kasitiku ka va kele na ku hana ku vilinge via ngoco. Ngeci vamo nguavo halumo nguvulu ya Loma ka ya kele na ku muesa kasingimiko ku vantu vaco mu ku va tsinda.” Nguvulu ya Loma ya kele na ku linga cose mu ku sahuisa vantu, ngeci halumo mivila yavo va kele na ku i seza vene ha viti linga i liue ku tusitu. Kaha viose via lisupileko citava va kele na ku vi mbila lika mu cimo cihilo ca mbunga.
Vunoni vakua ku hinda mu vingundu va uana mizimbu yeka, cikumakuma kuli vamo vaYundeya va sukikile. Mu 1968, va uanene vitsiha via umo yala u va tsihile ku sekulu ya ku livanga. Va vi uanene mu cimo cihilo ca vusoko ku hiehi na Yelusalema. Vitsiha viaco via kele mu cimo cikasa ca vitsiha. Ha kati kavio ha kele cimo citsiha ca ku ntsintsino. Ci va pangeyele ha livaya na mbambo ya 11,5 sentimetru. Mukua mizimbu Sabar ngueni: “Ntsintsino ya umo yala ua lizina Yehochanan, ya manusula cimo cimpande ca laza, ku tuala ha Mavulu a Muzimbu ua cili a muesa ngecize Yesu va mu tsindile mu cihilo.” Ku tsiha mpanga, “ntsintsino ya Yehochanan ya muesa ngecize nkuma cili vene, ku matangua a Yesu kua kele vantu va va sukikile kaha nguvulu ya Loma ya tavesele ku va tsinda.”
Ntsintsino yaco ye ku katula naua vimpata ku tuala ha cifua ci va sukikilemo Yesu ha citi. Vunoni cuma ca kama ci tu tonda ku tsindika ca pua ngecize, vamo vantu va va sukikile va kele na ku va tsinda vuino, kati ku va mbila ngoco. Ngeci mukemuo, citava tu tsiliele ngecize muzimbu ua ku tsinda vuino Yesu mu cihilo, ua pua ua vusunga. Vukaleho vua hakuila muzimbu ua mu Mbimbiliya.
Ca seho ya kama, Yehova ua polofetele ngecize Yesu va ka mu tsinda mu cihilo ca umo mpite, kaha na umo uahi a hasa ku vindika ku lipuisamo ca lizi lia Njambi.—Isaya 53:9; 55:11.