Linga tu vuise Yehova ndzolela, tua pande ku kala na lutsilielo. Vunoni Mbimbiliya nguayo kati vose “va tsiliela.” (2 Tes. 3:2) Kapostolo Paulu mua tumbuile mezi aco, ua kele na ku handeka via “vakua vupi” va kele na ku mu luisa. Ua handekele naua vumo vusunga ku tuala ha vamo vantu. Vamo ve ku sembulula vusunga vua muesa ngecize, kua kala Sakatanga. (Loma 1:20) Vakuavoco ve ku handeka nguavo va tsiliela mu vimo viuma ni muli umo ua kala na ngolo ya kama. Vunoni lutsilielo luaco kati lukeluo lua tonda Yehova.

Tua pande ku tsiliela nguetu Yehova kua kala mpundu, kaha ue ku lunguisa vose ve ku mu tsiliela. (VaHe. 11:6) Lutsilielo lua pua muhako ua sipilitu santu yendi. Kaha linga tu tambule sipilitu santu, tua pande ku i vundila kuli Yehova. (Luka 11:​9, 10, 13) Tu hasa naua ku tambula sipilitu santu mu ku tanda Lizi lia Njambi. Kaha mu nima ya ku tanda, tua pande ku singanieka ha vi tua tanda na ku lihakela kapandi ka ku vi puisamo. Nga tu lingamo, sipilitu santu i ka tu kuasa ku yoya mu cifua ci muesa ngecize, tua tsiliela mpundu muli Yehova.