1. Vika vie ku tu kuasa ku tualelelaho ku lemesa Yehova vutuhu tue ku hita visoti?

 MBIMBILIYA ya muesa ngecize, tuli na ku yoyela ku “zintsimbu zia ku kaluua.” (2 Tim. 3:1) Ngeci mua vantu vose, netu tue ku hita mu visoti via kama. Cikuavo naua, ve ku tu luisa omo lia ku lemesa Yehova. Vika vie ku tu kuasa ku tualelelaho ku lemesa Yehova vutuhu tue ku hita mu visoti viaco? Vumo vusunga vua pua muomu tua tantekeya nguetu, Yehova ua pua “Njambi ua muono.”—Yele. 10:10; 2 Tim. 1:12.

2. Vika tua tantekeya ku tuala hali Yehova vi hasa ku tu kaniamesa?

² Yehova ue ku mona visoti viose vi tue ku lihita navio kaha ntsimbu yose ue ku tonda ku tu kuasa. (2 Miz. 16:9; Visa. 23:4) Ku tantekeya nguetu Njambi ua tu haka seho kaha ue ku tu kuasa, ce ku tu kuasa ku kolesa mu visoti viose-ovio. Tu ci simutuilenu vati Muangana Ndaviti ua uanene vukuasi vuaco.

3. Vika Ndaviti ua tondele ku handeka mua tumbuile nguendi “Yehova a ku yoya”?

³ Ndaviti ua tantekeyele Yehova kaha na ku mu kulahela. Omo va kele na ku tonda ku mu tsiha kuli Muangana Saulu na vakuavo, Ndaviti ua vundilile kuli Yehova na ku mpinga vukuasi. (Visa. 18:6) Munima ya Njambi ku kumbulula civundilo cendi na ku mu kuasa, Ndaviti ua handekele nguendi: “Yehova a ku yoya.” (Visa. 18:46) Vika Ndaviti ua tondele ku handeka? Ndaviti ua kele na ku handeka nguendi, Yehova ua pua Njambi ua vusunga kaha ue ku kuasa vangamba vendi ntsimbu yose. Ndaviti ua kele na vusunga nguendi, Njambi a ka mu kuasa muomu ua tantekeyele ngecize Yehova ua kele na  ku mona viose via kele na ku lihita navio. Kaha via kaniamesele Ndaviti ku tualelelaho ku lemesa na ku sangaziala Yehova.—Visa. 18:​28, 29, 49.

4. Vukuasi vuka tu hasa ku uana mu ku tantekeya nguetu Yehova ua pua Njambi ua muono?

⁴ Ku kala na vusunga ngecize Yehova ua pua Njambi ua muono, ci hasa ku tu kuasa ku mu lemesa na mutima uose. Ci hasa naua ku tu kuasa ku kolesa mu visoti na ku tu kaniamesa ku tualelelaho ku panga na ndzili yose mu cipanga ca Yehova. Cikuavo naua, tu ka tualelelaho ku kala mu hiehi na Njambi.

NJAMBI UA MUONO A KA MI KOLESA

5. Vika vi hasa ku tu kuasa ku kolesa nga tu hita mu vieseko? (Filipu 4:13)

⁵ Tu hasa ku kolesa mu visoti viose-ovio, nga tu vuluka nguetu Yehova ua pua Njambi ua muono kaha ntsimbu yose a ka tu kuasa. Muomu kuli Njambi yetu na vimo visoti viahi via pua via vikalu. Yehova ua pua Mukua Ngolo Yose, kaha a ku tu kuasa ku kolesa. (Tandenu Filipu 4:13.) Ku tantekeya evi, ci ka tu kuasa ku lua na vieseko. Kaha mu tue ku mona nguetu Yehova ue ku tu kuasa mu visoti via vindende, ce ku tu kuasa ku kala na vusunga ngecize a ka tu kuasa ku lua na visoti via kama.

6. Vika via solokelele Ndaviti via mu ku kuasele ku kaniamesa lutsilielo luendi muli Yehova?

⁶ Tu ci hilulenu ha viuma vivali via solokelele Ndaviti, via mu kuasele ku kaniamesa lutsilielo luendi muli Yehova. Mua puile kaniungi mu vukankavala, urso ua kuatele umo mpanga ua ise kaha ntsimbu ikuavo naua ndumba ua kuateleko umo mpanga. Ha vintsimbu evi vivali, na ku simpa cose Ndaviti uohielele vampanga. Vunoni Ndaviti ka singaniekele nguendi, ua hasele ku vipuisamo ku ngolo yendi. Muomu ua tantekeyele ngecize Yehova ua mu kuasele. (1 Sam. 17:​34-37) Ndaviti ka suvile vukuasi vua tambuile. Kaha ku hilula ha vukuasi vuaco, ca mu kuasele ku kulahela ngecize Njambi ua muono a ka mu kolesa na ku lutue.

7. Vati ku mona viuma mu njila ya cili, ca kuasele Ndaviti ku vula Ngoliata?

⁷ Mu ku hita ca ntsimbu, kasi mu vukankavala, ua ka menekele cilombo ca vaIsaleli. Ndaviti ua tantekeyele ngecize masualele va kele na liova, muomu kaFilisteo Ngoliata ua katukile na ku saula “masualale vaIsaleli.” (1 Sam. 17:​10, 11) Masualale vaIsaleli va kele na liova, muomu va kele na ku tuala mana ku vukama vua Ngoliata na ku mezi a kele na ku handeka. (1 Sam. 17:​24, 25) Vunoni Ndaviti ua kele na ku mona viuma mu njila ya cili. Kaha Ndaviti ua tantekeyele nguendi, Ngoliata ka kele na ku saula vaIsaleli lika vunoni na “Njambi ua muono.” (1 Sam. 17:26) Ndaviti ua tsilielele muli Yehova. Kaha ua tsilielele ngecize, Njambi uze ua mu kuasele mua puile kaniungi, ue ku mu kuasele naua mu ntsimbu yaco. Omo lia ku tsiliela muli Yehova, Ndaviti ua vulile Ngoliata!—1 Sam. 17:​45-51.

8. Vika vi tu kuasa ku tsiliela mu vukuasi vua Yehova nga tu ku hita mu visoti? (Talenu naua cikupulo.)

⁸ Netu vene tu hasa ku vula visoti nga tu vuluka ngecize, Njambi ua muono a ka tu kuasa. (Visa. 118:6) Nga tu hilula ha viuma via tu lingilile Yehova ku nima, tu hasa ku kulahela nguetu a ka tu kuasa. Puenu na ku tanda mizimbu ya mu Mbimbiliya, ize i mi vuluisa vati Yehova ua kuasele vangamba vendi. (Isaya 37:​17, 33-37) Cikuavo naua, puenu na ku tanda ni ku tala mizimbu ya vamuanetu mu saiti yetu jw.org, mu mone vati Yehova ali na ku va kuasa mu ntsimbu ino. Kaha naua vulukenu vintsimbu via mi kuasele Yehova. Vunoni kati mu lisosomue nga ka mu vuluka vumo  vukuasi vua ku komouesa, ngeci mua ku lua na urso ni ndumba. Omo lia vika? Muomu Yehova ua tu lingila viuma via vingi mu muono! Kaha Ua tu lania tu pue vavusamba vendi. (Yoa. 6:44) Cikuavo naua, tuli mu vusunga mu ntsimbu ino, muomu Yehova ali na ku tu kuasa. Ngeci mukemuo, vundilenu kuli Yehova a mi kuase ku vuluka vintsimbu via mi kuasele ku hita mu visoti via kama, kaha na vati ua kumbuluile vivundilo vienu. Ku hilula ha viuma evi, ci tu kuasa ku tsiliela nguetu Yehova a ka tualelelaho ku tu kuasa.

9. Vika tua pande ku vuluka nga tu hita mu vieseko? (Visimo 27:11)

⁹ Ku mona Yehova kupua muntu mpundu, ci tu kuasa ku mona vieseko vietu mu njila ya cili. Vati omuo? Muomu tu pua na ku mona visoti vietu mu ku pua cimpande ca kama ca Yehova na Satana. Kaha Ndiavu ua muesa nguendi nga tu hita mu vieseko, tu likela ku lemesa Yehova. (Yombi 1:​10, 11; tandenu Visimo 27:11.) Mu tue ku vula vieseko, tue ku muesa nguetu tua lema Yehova, kaha Ndiavu ua pua mukua makuli. Ca ku muenako, halumo vali na ku mi luisa ku nguvulu, ni muli na ku hita mu vitanga via ku honoua vimbongo, ni halumo vantu ka vesi na ku tava muzimbu ua cili ni muli na ku hita mu visoti vikuavo. Nga mukemuo, vulukenu ngecize vieseko viaco vi hasa ku mi hana vukovelelo vua ku vuisa Yehova ndzolela. Cikuavo naua, Yehova ka ka tavesa tu hite mu vieseko ka tu hasa ku vula. (1 Kol. 10:13) Vunoni a ka tu hana ngolo ya ku kolesa.

NJAMBI UA MUONO A KA MI LUNGUISA

10. Vika Njambi ua muono a ka lingila vaze ve ku mu lemesa?

¹⁰ Yehova ue ku lunguisa vaze ve ku mu lemesa. (VaHe. 11:6) Ue ku tu hana ciyulo na ndzolela mu ntsimbu ino kaha naua a ka tu hana muono ka ue kuhua ku lutue. Tua kulahela nguetu Yehova a tonda ku tu lunguisa kaha ua kala na ngolo ya ku lingamo. Ngeci mukemuo, tu tonda ku tualelelaho ku mu lemesa na mutima uose, ngeci mu va lingile vangamba  vendi ku nima. Evi vikevio via lingile Timoteo.—VaHe. 6:​10-12.

11. Omo lia vika Timoteo ua pangele na ndzili yose mu cikungulukilo?

¹¹ Tandenu 1 Timoteo 4:10. Timoteo ua tsilielele nguendi, Yehova a ka mu lunguisa. Ngeci mukemuo, ua pangelele Yehova na vakuavo na ndzili yendi yose. Vati ua lingilemo? Kapostolo Paulu ua mu kaniamesele kupua mulongisi ua cili mu lihia na mu cikungulukilo. Kaha Paulu ua mu kaniamesele naua kupua lungano lua cili ku vamuanaye, vakuendze na vakulupe. Cikuavo naua, va mu hanene viteli via vikalu ngeci mua, ku hana vimamuna na kasingimiko ku vamuanaye vaze va tondekele. (1 Tim. 4:​11-16; 2 Tim. 4:​1-5) Vutuhu Timoteo ua tantekeyele nguendi, vakuavo ka va kele na ku mona kapandi kendi ni ku mu santsela, vunoni ua kele na vusunga nguendi Yehova a ka mu lunguisa.—Loma 2:​6, 7.

12. Omo lia vika vakuluntu ve ku tualelelaho ku panga na ndzili yose mu cikungulukilo? (Talenu naua cikupulo.)

¹² Lelo lino, vakuluntu mu cikungulukilo va pande ku kala na vusunga nguavo, Yehova ue ku mona na ku haka seho ku vipanga vi ve ku linga. Kaha naua vutuhu ve ku linga mangendzi a ku kaniamesa, ku longesa na kuambulula, vakuluntu vavengi ve ku kuasa ku cipanga ca ku tunga kaha na ku kuasa nga ku na soloka viyovo via mavu. Kaha vamo ve ku kuasa ku Vivunga via Tala via Visipitali. Cikuavo naua, vakuluntu va tantekeya nguavo cikungulukilo ca pua ca Yehova kati ca vantu. Kaha ve ku panga na ndzili yose mu cikungulukilo, muomu va kala na vusunga nguavo Yehova a ka vezikisa kapandi kavo.—Kolo. 3:​23, 24.

13. Vati Yehova ue ku livua ku tuala ha kapandi ka tue ku lihakela mu ku mu pangela?

¹³ Kati vose va hasa kupua vakuluntu mu cikungulukilo. Vunoni tu vose tua kala na vimo vi tu hasa ku hana kuli Yehova. Njambi yetu  ue ku viukilila mua kama mu tue ku lihakela kapandi ka ku mu pangela. Ue ku mona milambu i tue ku hana, ambe nga ya indende. Yehova ue kuivua ndzolela mue ku mona kapandi ka tue ku lihakela mu ku kumbulula ku viuano, vutuhu tua pua va muekulu. Yehova ue kuivua naua ndzolela nga tuecela vakuetu va na tu vulumuina. Ambe nga muli na ku livua nguenu muli na ku linga via vindende, kalenu na vusunga ngecize Yehova ue ku haka seho ku viose vi mue ku hasa ku mu lingila. Ngeci mukemuo, Njambi ua mi lema kaha a ka mi lunguisa.—Luka 21:​1-4.

KALENU MU HIEHI NA NJAMBI UA MUONO

14. Vati ku likuata vusamba vua ku kaniama na Yehova ce ku tu kuasa ku tualelelaho ku muononoka? (Talenu naua cikupulo.)

¹⁴ Nga tu likuata vusamba vua ku kaniama na Yehova ci ka pua ca casi ku muononoka. Ca ku muenako, Yosefe ua vianene ku linga vupangala muomu ua tantekeyele nguendi vilinga viaco ka vie kuya Yehova ku mutima. Kaha ka tondele ku mu vuisa vusiua. (Njen. 39:9) Linga tu kaniamese vusamba vuetu na Yehova, tua pande ku uana ntsimbu ya ku pua na ku vundila kaha na ku lilongesa Lizi liendi. Nga tu lingamo, vusamba vuetu nendi vu ka kaniama. Ngeci mua Yosefe, nga tu likuata vusamba vua ku kaniama na Yehova, ka tu ka linga na vimo viahi vi ka mu vuisa vusiua.—Tia. 4:8.

15. Vika tu hasa ku lilongesa ku vaIsaleli mu va kele mu zindinda? (VaHevelu 3:12)

¹⁵ Vaze ve ku likela ku kulahela muli Yehova, ce ku va puila ca casi ku muesa lisino. Ca ku muenako, tu ci hilulenu vika va lingile vamo vaIsaleli mu zindinda. Vutuhu va tantekeyele nguavo Yehova kua kala, vunoni va putukile ku takania nga ue ku va hele vi va tondekele. Kaha vehuile nguavo: “Yehova a li ha kati ketu, ni cahi?” (Ezu. 17:​2, 7) Ngeci va muesele lisino kuli Njambi. Mua vusunga, ka tu tondo ku tambuluisa lungano lua vaIsaleli lua ku pihia.—Tandenu VaHevelu 3:12.

16. Vika vi hasa ku haka lutsilielo luetu mu ceseko?

 ¹⁶ Kupua kavusamba ka Yehova mu mavu ano, ce ku tondeka ku lihakela kapandi ka kama. Muomu vantu vavengi ka va tsilielele nguavo Njambi kua kala. Kaha vintsimbu via vingi ve ku soloka ngue vali na muono ua cili. Omo liaco, lutsilielo luetu lu hasa ku hita mu ceseko. Ngeci mukemuo, vutuhu tua tsiliela nguetu Njambi kua kala, halumo tu hasa ku putuka ku takania nga a ka tu kuasa ni kuahi. Mukemuo mua lizivile mukua Visamo 73. Ua kele na ku mona ngecize, vaze va kele na ku tsiha masiko a Njambi kasi va kele na muono ua cili. Kaha omo liaco, ua putukile ku takania nga ca puile vene ca seho ku tualelaho ku lemesa Njambi ni kuahi.—Visa. 73:​11-13.

17. Vika vi tu kuasa ku tualelelaho ku lemesa Yehova?

¹⁷ Vika via kuasele mukua Visamo kualulula cifua ca kele na ku singaniekelamo? Ua hiluile ha vika vie ku solokelele vaze va likelele ku kulahela muli Yehova. (Visa. 73:​18, 19, 27) Cikuavo naua, ua hiluile ha vivezikiso vie kuizamo omo lia ku lemesa Njambi. (Visa. 73:24) Netu vene, tu hasa ku hilula ha vivezikiso via tu hana Yehova. Aci singaniekenu vati muono uetu ue ku fuile nga ka tua kele na ku lemesa Yehova! Ku hilula ha viuma viaco, ci ka tu kuasa ku tualelelaho ku lemesa Yehova. Kaha ngeci mua mukua Visamo, netu tu ka handeka nguetu: “Ca nji viukila ku suena ha hiehi na Njambi.”—Visa. 73:28.

18. Omo lia vika ka tua pandele kuivua vuoma omo lia viuma vi ka soloka ku lutue?

¹⁸ Tu hasa ku kolesa mu visoti viose-ovio kuno matangua a ku kotokela, muomu tue “ku pangela Njambi ua muono na vusunga.” (1 Tes. 1:9) Ngeci mua kuasele vangamba vendi ku laza, netu a ka tu kuasa ntsimbu yose muomu ua tu haka seho. Vuovuno tu ka hita mu lamba ya kama. Vunoni ka tu ka kala lika lietu, muomu Yehova a ka kala netu. (Isaya 41:10) Tu vose tu hasa “ku simpa vuino mu ku handeka, nguetu, [Yehova] ikeye mukuasi uange; ka nji kevua vuoma.”—VaHe. 13:​5, 6.