Vihula via Vakua ku Tanda
Vuno mezi “U ka va niunga,” a ku Visamo 12:7, emanena “vahutu” (cinimbu 5) ni “mezi a Yehova” (cinimbu 6)?
Muzimbu ua muesa ngecize, eci cinimbu ca handeka via vantu.
Ku Visamo 12:1-4, Ndaviti ua handekele nguendi: “Vakua cili va hua ha kati ka vana va vantu.” Vunoni ku Visamo 12:5-7, nguendi:
“Muomu mapakeso a vahutu,
muomu ku-vindzuoka ca vakua ku vindama,
vuovuno nji ka katuka, ngueni Yehova;
nji ka mu tumbika mu vusueke vuze vu a sunguiya.
Mezi a Yehova akeo mezi a ku lela;
ngue palata ya ku eseka mu lutengo lua ha mavu, ya ku lelesa lutanu na luvali.
Yove u ka va niunga, A Yehova,
U ka va niunga ku lizimo eli ku miaka yose.”
Cinimbu 5 ca handeka via ka lingila Njambi vakua ku yanda. Nguaco a ka vovola.
Cinimbu 6 ca vuezako nguaco: “Mezi a Yehova akeo mezi a ku lela” a pua “ngue palata ya ku eseka.” Evi via muesa vati tue ku muenamo mezi a Yehova.—Visa. 18:30; 119:140.
Hilulenu honi cinimbu ci na hatako. Visamo 12:7 nguayo: “Yove u ka va niunga, A Yehova, U ka va niunga ku lizimo eli ku miaka yose.” Vantu vaco va va ka niunga kuli Yehova va pua veya?
Cinimbu 6 ca handeka via “mezi a Yehova.” Kaha vamo ve ku singanieka nguavo mezi aco a lomboloka ngecize, Njambi ‘ue ku niunga’ mezi endi. Tua tantekeya nguetu Njambi ua niungile Mbimbiliya vutuhu vakua ku luisa va tondele ku i nongesa.—Isaya 40:8; 1 Pet. 1:25.
Vunoni naua cinimbu 5 nguaco, Yehova ue ku niunga vantu. Yehova a ka tualelelaho ku kuasa na kuovola “vakua tuyando” na vaze ve ku hita mu ‘mapakeso.’—Yombi 36:15; Visa. 6:4; 31:1, 2; 54:7; 145:20.
Cinimbu 7 ca handeka via veya?
Nga tu tanda samo yaco tu ka mona nguetu, ya handeka vene via vantu.
Visamo 12:1 ya handeka via vangamba va Njambi “vakua cili” vaze va vongele ku vakua vupi. Kaha cinimbu ci na hatako nguaco, Yehova a ka nongesa vakua ku handeka makuli. Samo yaco ya muesa ngecize tu hasa ku kala na vusunga nguetu, Njambi a ka niunga vangamba vendi muomu mezi endi a pua a vusunga.
Ngeci mukemuo, cinimbu 7 nguaco Yehova a ka “va” niunga, ni nguetu, a ka niunga vaze va ve ku yandesa ku vakua vupi.
Lizi “va” va lipangesele mu vikopia via Visoneka via ciHevelu. Kaha Septuaginta Grega ya tumbula luvali lizi “yetu” mu cinimbu 7, mu ku handeka via vakua ku yanda na vaze va ve ku yandesa ku vakua vupi. Cinimbu 7 nguaco, Yehova a ka niunga vakua cili ku vakua vupi “ku lizimo eli.” (Visa. 12:7, 8) Mu Visoneka via ciHevelu vi va languluile mu ciAlamaiku, cinimbu 7 va ci langulula nguavo: “Yove, A MUANGANA, u ka niunga vakua vuviuke, u ka va niunga ku lizimo eli lia vakua vupi ku miaka yose.” Ou muzimbu ua muesa naua vusunga vukuavo ngecize, Visamo 12:7 ka ya handekele via mezi a Njambi.
Omo liaco, eci cinimbu ca hana lulavelelo ku “vakua cili” ngecize, Njambi a ka lingako mumo.
