1. Vika tua lilongesele ku ciuano ca muaka ca 2023?

 KU CIUANO ca muaka ca 2023, a kua kele kualuluka ku tuala ha kuivuisisa cetu, kaha tua tambuile naua imo mizimbu ku tuala ha cipanga ca kuambulula. Ca ku muenako, tua lilongesele nguetu vantu va ka hasa ku kala na vukovelelo vua ku lipandakana na vangamba va Yehova ambe mu nima ya ku nonga ca Mbambilone ya Kama. Cikuavo naua, ku putuka mu Novembro ya 2023, vakua kuambulula ka va kapua naua na ku hana viola vi ve ku linga mu kuambulula. Vuno kualuluka caco ca muesa ngecize cipanga ca kuambulula kacesi naua na seho ni? Houe, kati mukemuo!

2. Omo lia vika cipanga ca kuambulula ci napu ca vuasi? (Mako 13:10)

² Omo matangua ali na ku hita, ce ku tondeka mua kama tuambulule muzimbu ua cili. Omo lia vika? Muomu kua lisupu ntsimbu ya indende linga ku kotoka ci hete. Tu hilulenu via polofetele Yesu ku tuala ha cipanga ca kuambulula kuno ku matangua a ku kotokela. (Tandenu Mako 13:10.) Kuliya na muzimbu ua Mateo, Yesu nguendi, muzimbu ua cili ve ku uambuluile ku vifuti viose amba “ku-kotoka” ci keza. (Mat. 24:14) Mezi aco emanena ku nonga ca mavu a Satana mu vutuntu. Yehova ua tumbika ‘litangua na ola’ ya viuma vi ka  soloka ku lutue. (Mat. 24:36; 25:13; Vili. 1:7) Viuma viaco vuovuno vi soloka, muomu ntsimbu yaco ili mu hiehi. (Loma 13:11) Ngeci mukemuo, tua pande ku tualelelaho kuambulula ntsimbu kanda ku kotoka ci hete.

3. Omo lia vika tue kuambulula?

³ Omo tuambulula, tu vose tua pande ku hilula ha cihula eci: Omo lia vika tue kuambuluila muzimbu ua cili? Mua vusunga, tue ku lingamo omo lia cilemo. Ngeci mukemuo, mu tue kuambulula tue ku muesa cilemo cetu ku muzimbu ua cili, ku vantu, kaha cikumakuma kuli Yehova na lizina liendi. Tu hilulenu cimo ku cimo.

TUE KUAMBULULA MUOMU TUA LEMA MUZIMBU UA CILI

4. Vati tue ku livua mu tue ku tambula muzimbu ua cili?

⁴ Aci singaniekenu vati mua livuile mu mua tambuile muzimbu ua cili! Halumo umo kavusoko ua kuatele kakeke, ni kuli umo ua mi hele cipanga ci mua tondele. Mua vusunga, mua vuile ndzolela ya kama kaha mua lekeleko vavusoko na vavusamba via muzimbu uaco. Vuno vikevio via mi solokelele mu mua vuile muzimbu ua cili cikuma, ua Vuangana vua Njambi ni?

5. Vati mua livuile mu mua tantekeyele lua katete vusunga vua mu Lizi lia Njambi? (Talenu naua vikupulo.)

⁵ Aci singaniekenu vati mua vuile mu mua tantekeyele lua katete vusunga vua mu Lizi lia Njambi. Mua tantekeyele ngecize Isuenu ua muilu ua mi lema, kaha a tonda mu lipandakane ku vusuko vuendi. Yehova ua kulahesa ku ka munusula tuyando na ku sangula vavusoko venu vatsa linga va ka yoye mu mavu a aha, kaha na vikuavo via vingi. (Mako 10:​29, 30; Joano 5:​28, 29; Loma 8:​38, 39; Ku-So. 21:​3, 4) Mua vusunga, viuma vi mua lilongesele via mi vuisile ndzolela ya kama. (Luka 24:32) Kaha mua lemene cikuma vi mua lilongesele, ngeci mua tondele ku lekako vose!—Setekesenu na Yelemiya 20:9.

6. Vika mua lilongesa ku muzimbu ua muanetu Ernest na mpueyendi Rose?

 ⁶ Tu hilulenu muzimbu ua muanetu Ernest, ha ntsimbu ya tsile ise, ikeye tele ali na miaka kampe 10. Muanetu Ernest nguendi: “Nja lihuile nguange: ‘Vuno vatata vanayi muilu? Ni va natsi vene kunahu?’ Nja vuilile cipululu ca vakuetu vanike va kele na vaiseavo.” Ngeci muanetu Ernest ua kele na kuya ku mbumbo ya vaise kusua kumo, kaha na ku vundila nguendi: “Njambi sukulukambu, nji tonda ku tantekeya kulihi vali vatata.” Kaha mu mua hitile miaka kampe 17 fume ha kutsa ca vaise, muanetu Ernest ua putukile ku lilongesa Mbimbiliya. Ua vuile ndzolela mua tantekeyele ngecize vatsi ka va tantekeya na vimo viahi, vunoni vali ngue mu tulo va kama. Ua vuile naua ndzolela mua tantekeyele via cisangukilo. (Ekel. 9:​5, 10; Vili. 24:15) Hano honi, muanetu Ernest ua uana vikumbululo via vihula via kele navio mu miaka ya yingi. Ua vuile ndzolela omo lia vusunga vua kele na ku lilongesa. Mpueyendi Rose, nendi ua putukile ku lilongesa Mbimbiliya na ku lema via kele na ku lilongesa. Ngeci va va mbatizile mu 1978. Kaha vambuluilileko vavusoko, vavusamba na vakuavo, vusunga vu va lilongesele. Omo liaco, muanetu Ernest na mpueyendi Rose, va kuasele vantu va tuvakana 70 va tantekeye Yehova na ku va mbatiza.

7. Vika vie kuizamo mu tue ku lema vusunga vua mu Mbimbiliya? (Luka 6:45)

⁷ Cili vene, mu tue ku lema vusunga vua mu Mbimbiliya, tue kuivua cizango ca ku lekako vakuetu via muzimbu uaco. (Tandenu Luka 6:45.) Netu tu hasa ku livua ngue vandongesi va Yesu va handekele nguavo: “Ka tu ku hasa ku holoka vunoni ku handeka evi vi tua muene nevi vi tua vuile.” (Vili. 4:20) Cili vene, tua lema vusunga ngeci tu tonda ku vuambuluila ku vantu vavengi.

TUE KUAMBULULA MUOMU TUA LEMA VANTU

8. Omo lia vika tue kuambuluila vantu muzimbu ua cili? (Talenu cikasa “ Lemenu Vantu—Mu va Puise Vandongesi.”) (Talenu naua cikupulo.)

⁸ Ngeci mua Yehova na Muanendi, netu tua lema vantu. (Visi. 8:31; Joano 3:16) Ngeci tue ku va vuila cikeketima muomu ka vesi “na Njambi” kaha ‘na lulavelelo.’ (Efe. 2:12) Mua vusunga, vantu vali mu vusiua omo lia visoti via vingi mu muono. Vunoni tuli na muzimbu ua cili ua Vuangana vua Njambi u hasa ku va kuasa. Mu ku linga tua lema vantu na ku va vuila cikeketima, ngeci tue ku linga cose tu vambuluile muzimbu ua cili. Kaha muzimbu uaco, ue ku va kuasa ku kala na lulavelelo, ku yoya mu ndzolela na ku kala na vukovelelo vua ku ka tambula  “muono [ua] vusunga,” ni nguetu, muono ua ya-ye mu mavu a aha.—1 Tim. 6:19.

9. Muzimbu uka tue ku leka vantu, kaha omo lia vika? (Ezekiele 33:7, 8)

⁹ Cilemo cetu ku vantu, ce ku tu kuasa naua ku va leka ngecize ku kotoka ca mavu cili mu hiehi. (Tandenu Ezekiele 33:7, 8.) Tue ku vuila vantu vose cikeketima, hamo lika na vavusoko vetu ka ve ku lemesa Yehova. Vantu va vengi kasi ka va tantekeya “lamba ya kama cikuma, fume ku ku-tanga ca mavu na [ku] lelo, cipue ku lutue, ka va ka i mona naua.” (Mat. 24:21) Ngeci mukemuo, tu tonda vantu va tantekeye vika vi ka soloka mu ntsimbu ya ku sompesa. Ha katete, Yehova a ka nongesa malombelo a makuli, amba honi mavu a ka nonge mu Alemangendo. (Kuso. 16:14, 16; 17:16, 17; 19:11, 19, 20) Ngeci tue ku vundila nguetu, vantu vavengi va halakane muzimbu u tue kuambulula na ku lipandakana netu mu ku lemesa Yehova mu ntsimbu ino. Vuno vatico nga vantu vaco hamo lika na vavusoko vetu ka va tu halakana?

10. Omo lia vika ca pua ca seho ya kama ku tualelelaho ku leka vantu viuma vi ka soloka ku lutue?

¹⁰ Ngue mu ci na lombolola cilongesa ci na hiti, halumo Yehova a kovola vaze va ka putuka ku mu tsiliela, mu va ka mona ku nonga ca Mbambilone ya Kama. Kaha nga mukemuo, ca pua ca seho ya kama ku tualelelaho ku va leka via muzimbu uaco mu ntsimbu ino. Aci hilulenu ha mezi aa: Vi tue ku leka vantu mu ntsimbu ino, vi ka kuasa ku vuluka vi tue ku vambuluila. (Setekesenu na Ezekiele 33:33.) Kaha omo va ka vuluka vi tua va lekele, halumo va ka putuka ku lemesa Yehova hamo netu, ntsimbu kanda Alemangendo i hete. Ngeci mua mukua kamenga ku Filipu ualulukile, mu kua solokele ‘lindunduma lia kama lia mavu.’ Halumo vamo lelo lino, vaze ka ve ku tava muzimbu uetu, va kaluluka mu va ka mona ku nonga ca Mbambilone ya Kama.—Vili. 16:​25-34.

TUE KUAMBULULA MUOMU TUA LEMA YEHOVA NA LIZINA LIENDI

11. Vati tue ku sangaziala Yehova, ku mu singimika, kaha na ku mu hana ngolo? (Ku-Solola 4:11) (Talenu naua vikupulo.)

¹¹ Tue kuambulula muzimbu ua cili cikumakuma, muomu tua lema Yehova Njambi na lizina liendi lia kulela. Ngeci mukemuo, mu tue kuambulula tue ku sangaziala Njambi u tua lema. (Tandenu Ku-Solola 4:11.) Mua vunga, Yehova ua fuila ku tambula ku sangaziala na kasingimiko na ngolo. Mu njila ika? Tue ku sangaziala na ku singimika Yehova, mu tue ku lekako vakuetu vusunga  vua muesa ngecize Yehova “ua tangele viuma viose.” Kaha tuli na ku yoya, muomu Ikeye ua tu hana muono. Cikuavo naua, tue ku mu hana ngolo, mu tue ku pangesa ntsimbu, ndzili na vupite vuetu mu kuambulula kuliya na vuhasi vuetu. (Mat. 6:33; Luka 13:24; Kolo. 3:23) Mua vusunga, tua lema Njambi yetu ngeci tue kuambulula. Kaha naua tue ku lekako vakuetu via lizina na vifua viendi. Omo lia vika?

12. Vati tue ku lelesa lizina lia Yehova mu kuambulula?

¹² Cilemo cetu kuli Yehova, ce ku tu lingisa ku lelesa lizina liendi. (Mat. 6:9) Ngeci mukemuo, tu tonda vakuetu va tantekeye ngecize, via handekele Satana ku tuala hali Yehova via pua makuli. (Njen. 3:1-5; Yombi 2:4; Yoa. 8:44) Mu tue kuambulula, tue kuivua cizango ca ku longesa vusunga ku tuala hali Yehova ku vose ve ku tu halakana. Ngeci tu tonda vose va tantekeye ngecize, Yehova ua pua Muangana ua cilemo na mukua vuviuke. Kaha vuovuno Vuangana vuendi vu ka manusula lamba yose na ku neha ciyulo ku vantu. (Visa. 37:10, 11, 29; 1 Yoa. 4:8) Mu tue ku longesa vakuetu ku tuala hali Yehova, tue ku lelesa lizina liendi. Cikuavo naua, tue kuivua ndzolela, muomu tue ku puisamo vi tua pande ku linga mu ku pua Vakaleho va Yehova. Omo lia vika tu handekela ngoco?

13. Omo lia vika ca pua ku vezika ca kama ku tu sana Vakaleho va Yehova? (Isaya 43:10-12)

¹³ Yehova ua tu hangula ku pua “vakaleho” vendi. (Tandenu Isaya 43:​10-12.) Umo mukanda u va tumine vakua Civunga ca Vantuamena, ua handekele nguauo: “Kupua Vakaleho va Yehova ca pua civezikiso ca kama ci tua kala naco.” Omo lia vika? Tu ci hilulenu cimueso ci na hatako. Nga va mi vangeya vimo, kaha mu tonda ku hangula muntu a leke vakuenu ngueni ka mua lingile  viuma viaco, kaha mua pua muntu ua cili. Muntu ua cifua cika mu hangula? Mua vusunga, mu hangula muntu i mu tantekeya na ku kulahela, kaha ua kala na lutsimo lua cili linga vantu va kulahele via handeka. Na vuno vene, mu ku tu hangula tu pue Vakaleho vendi, Yehova ua muesa ngecize a tu tantekeya vuino. Kaha ua tu kulahela nguendi tu hasa ku leka vakuetu ngecize, ua pua Njambi ua vusunga. Cili vene, ca pua civezikiso ku pua Vakaleho vendi. Ngeci tue ku pangesa vukovelelo vuose, linga tu tsimanese lizina liendi kaha na ku muesa ngecize ua pua Muangana ua cilemo na mukua vuviuke. Ku lingamo, tue ku muesa mpundu nguetu tua pua Vakaleho va Yehova!—Visa. 83:18; Loma 10:13-15.

TU KA TUALELELAHO KUAMBULULA NA KU NTSONGO

14. Vika halumo vi ka soloka ku lutue?

¹⁴ Tua lavelela na ndzolela ku ka mona viuma vi ka soloka ku lutue. Na vukuasi vua Yehova, tu tonda vantu vavengi va tave vusunga, ntsimbu kanda lamba ya kama i putuke. Kaha tue kuivua naua ndzolela ngecize, ambe mu ntsimbu ya ikalu kasi vavengi halumo va ka viana mavu a Satana na ku ka lipandakana netu mu ku sangaziala Yehova!—Vili. 13:48.

15-16. Vika tua pande ku linga, kaha mu ntsimbu ingahi?

¹⁵ Tua kala na cipanga ci tua pande ku puisamo. Ca pua civezikiso ca kama kuambulula muzimbu ua Vuangana vua Njambi mu mavu ose. Kaha cipanga caco ka tu ka ci hilukila naua. Cikuavo naua, tua pande ku tualelelaho ku lungula vantu ku tuala ha viuma vi ka soloka ku lutue. Vantu va pande ku tantekeya ngecize, ku kotoka ca mavu cili mu hiehi. Kaha ntsimbu ya ku sompesa mu i ka heta, va ka tantekeya nguavo, muzimbu u tue kuambulula ua fuma kuli Yehova Njambi.—Ezek. 38:23.

¹⁶ Vika tua pande ku linga mu ntsimbu ino? Tua lema muzimbu ua cili na vantu, kaha naua tua lema cikuma Yehova Njambi na lizina liendi. Ngeci mukemuo, tu tualelenuho kuambulula na ntuima yose, noho Yehova a ka handeka nguendi: “Kunahu!”