CILONGESA 19
MUASO 22 Vuangana Vuli na ku Sika—Vu ize!
Vika tu Tantekeya ku Tuala ha Vati Yehova a ka Sompesa Vantu ku Lutue?
‘Yehova . . . ka tondo ngueni umosi a ka nonge.’—2 PET. 3:9.
VUTUMBE
Tu hasa ku kala na vusunga nguetu, Yehova mua ka sompesa vantu, a ka lingamo na vuviuke.
1. Omo lia vika tu hasa ku handeka nguetu, tuli na ku yoyela ku ntsimbu ya ku komouesa?
TULI na ku yoyela ku ntsimbu ya ku komouesa! Muomu tangua na tangua, tue ku limuena ku lipuisamo ca vupolofeto vua mu Mbimbiliya. Ca ku muenako, tue ku mona “muangana ua ku nolote” na “muangana ua ku sulu” va liluisa, muomu vose va tonda ku sika ano mavu. (Ndan. 11:40) Tue ku limuena naua ngecize, muzimbu ua cili ua Vuangana vua Njambi, vali na ku uambulula mu mavu ose. Kaha vantu vavengi vali na ku hangula ku lemesa Yehova. (Isaya 60:22; Mat. 24:14) Cikuavo naua, tue ku tambula via kulia via vingi via mu lutsilielo “ku ntsimbu [yaco].”—Mat. 24:45-47.
2. Vusunga vuka tu hasa ku kala navuo, vunoni vika tua pande ku nongonona?
2 Yehova ue ku tualelelaho ku tu kuasa ku tantekeya vuino viuma vi ka soloka ku lutue. (Visi. 4:18; Ndan. 2:28) Ngeci mukemuo, tuli na vusunga nguetu mu i ka putuka lamba ya kama, tu ka tantekeya vati tua pande ku kolesa. Vunoni, tua pande ku nongonona ngecize vimo viuma vi ka soloka ku lutue, ka tu vi tantekeya. Mu cilongesa cino, ha katete tu simutuila omo lia vika tualulula cifua ci tua kele na kuivuisisilamo vimo viuma vi ka soloka ku lutue. Kaha mu nima yaco, tu hilula vimo viuma vi ka soloka vi tu tantekeya, na vati a ka linga Tatetu ua muilu.
VIKA KA TU TANTEKEYA
3. Laza vika tua kele na ku singanieka ku tuala ha vukovelelo vua vantu vua ku tsiliela muli Yehova, kaha omo lia vika tua singaniekelemo?
3 Laza tua kele na ku singanieka nguetu, mu i ka putuka lamba ya kama, vantu ka va ka kala na vukovelelo vua ku tsiliela muli Yehova na kuovoka ku Alemangendo. Tua kele na ku singaniekamo muomu tuevuisisile nguetu, viuma via solokele ku ntsimbu ya Lizavi viemanena viuma vi ka soloka ku lutue. Ca ku muenako, tua kele na ku singanieka nguetu, ngue muze vene mua patele Yehova mbelo ya ku vuato linga na umo uahi a hase ku kovelamo, na vuno vene uahi a ka hasa ku tsiliela muli Yehova na kuovoka, mu i ka putuka lamba ya kama.—Mat. 24:37-39.
4. Vuno viuma viose via solokele ku ntsimbu ya Livazi, viemanena viuma vi ka soloka ku lutue ni? Lombololenu.
4 Vuno citava tu handeke nguetu, viuma viose via solokele ku ntsimbu ya Livazi, viemanena viuma vi ka soloka ku lutue ni? Houe. Omo lia vika? Muomu Mbimbiliya ka ya vi handekele. a Yesu ua setekesele kuiza cendi “ku matangua a Noa.” Vunoni ka handekele nguendi, viose via solokele ku ntsimbu ya Livazi vi ka lipuisamo ku lutue, ngeci mua patele Yehova mbelo ya ku vuato. Vunoni ka ca lombolokele ngecize, viahi tu hasa ku lilongesa ku muzimbu ua Noa na Livazi.
5. (a) Vati Noa ua muesele lutsilielo tele kanda Livazi li putuke? (VaHevelu 11:7; 1 Petulu 3:20) (b) Ku litombola cika ca kala ha kuambulula ca Noa na kuambulula ca lelo lino?
5 Noa mua mu tumine Yehova ku tunga vuato ua muesele lutsilielo na kuononoka. (Tandenu VaHevelu 11:7; 1 Petulu 3:20.) Na vuno vene, vose ve kuivua muzimbu ua cili ua Vuangana vua Njambi, va pande ku muesa lutsilielo ku hitila mu vilinga viavo. (Vili. 3:17-20) Petulu ua tumbuile Noa nguendi: “mukua ku ambulula vuvuike.” (2 Pet. 2:5) Ngue mu tua lilongesa mu cilongesa ci na hiti, ka tu tantekeya nga Noa ua setekele kuambuluila vantu vose. Vunoni lelo lino, tue kuambulula na ntuima mu mavu ose. Ambe ngoco, ka tu hasa kuambuluila vantu vose ntsimbu kanda ku kotoka ci hete. Omo lia vika?
6-7. Vusunga vuka tuli navuo nguetu, ka tu ka hasa kuambuluila vantu vose ntsimbu kanda ku kotoka ci hete?
6 Aci singaniekenu via handekele Yesu ku tuala ha cipanga ca kuambulula. Ua polofetele nguendi, muzimbu ua cili ve ku uambuluile “ku vifuti viose, [ku] pua vukaleho vua kuli vakua vifuti viose.” (Mat. 24:14) Vupolofeto vuaco, vuli na ku lipuisamo mu vutuntu lelo lino. Muzimbu ua Vuangana tue ku uambulula mu malimi a tuvakana 1.000, kaha ku hitila mu saiti yetu, jw.org, vantu vavengi lelo lino va hasa ku tantekeya muzimbu ua cili ua Vuangana.
7 Cikuavo naua, Yesu ua lekele vandongesi vendi nguendi, ka va “ka manesa membo ose” ni nguetu kuambuluila vantu vose, ntsimbu kanda Yesu eze. (Mat. 10:23; 25:31-33) Lelo lino aa mezi a Yesu eku lipuisamo, muomu vantu vavengi va yoyela ku vihela vi va vindika cipanga cetu ca kuambulula. Cikuavo naua, vantu vavengi vali na ku semuka tangua na tangua. Ngeci mukemuo, ka tu hasa kuambuluila vantu vose, ntsimbu kanda ku kotoka ci hete, vutuhu tue ku lihakela kapandi ka kuambuluila vantu va ku “vifuti viose, na miyati yose na malimi ose.”—Ku-So. 14:6.
8. Vika tu hasa ku lihula ku tuala ha vati Yehova a ka sompesa vantu ku lutue? (Talenu naua vikupulo.)
8 Ku tuala ha mizimbu i tua simutuila, halumo tu hasa ku lihula nguetu: Vika vi ka solokela vaze halumo ka va ka uana vukovelelo vua kuivua muzimbu ua cili ntsimbu kanda lamba ya kama i putuke? Vati Yehova na Muaneni, va ka va sompesa? (Yoa. 5:19, 22, 27; Vili. 17:31) Mukanda u va na tundisa mutue ua cilongesa cino ua muesa ngecize, Yehova “ka hianga ngecize umosi a ka nonge.” Vunoni a tonda “vose va hete ku ku-aluluka.” (2 Pet. 3:9; 1 Tim. 2:4) Vutuhu tu tantekeya vusunga vuaco ku tuala hali Yehova, kasi ka tu lekele vati a ka sompesa vantu ka va uanene vukovelelo vua kuivua muzimbu ua cili. Mua vusunga, Yehova ka tondeka ku tu leka via lingile ni via ka linga.
Vika Yehova a ka linga na vaze halumo ka va ka kala na vukovelelo vua ku halakana muzimbu ua cili ntsimbu kanda lamba ya kama i putuke? (Talenu cinanga 8) c
9. Vika Yehova ua tu leka ku hitila mu Mbimbiliya?
9 Ku hitila mu Mbimbiliya, Yehova ua tu leka vimo via ka linga. Ca ku muenako, a ka sangula “vakua vuhenge” vaze ka va kele na vukovelelo vua ku lilongesa muzimbu ua cili na kualuluka. (Vili. 24:15; Luka 23:42, 43) Vusunga vuaco, vue ku katula vihula vikuavo via seho.
10. Vihula vika tu hasa ku kala navio?
10 Vuno vose va ka tsa mu ntsimbu ya lamba ya kama, ka va ka sanguka ni? Mbimbiliya ya muesa ha toma ngecize, vaze ve kualulukila Yehova ka va ka sanguka. Kaha na vaze va va ka nongesa mu ndzita ya Alemangendo. (2 Tes. 1:6-10) Amba co vaze va katsa omo lia ku vavala, vukulupe, mponde, ni vene ku va tsiha ku vakuavo? (Ekel. 9:11; Zak. 14:13) Vuno navo va pua “vakua vuhenge,” va va ka sangula mu mavu a aha ni? Ku handeka vusungu, ka tu tantekeya.
VIKA TU TANTEKEYA?
11. Vati va ka sompesa vantu ha ntsimbu ya Alemangendo?
11 Tu tantekeya viuma via vingi vi ka soloka ku lutue. Ca ku muenako, mu ntsimbu ya Alemangendo vantu va ka va sompesa, kuliya na cifua ci ve ku yoyelamo na vantsongo va Kilistu. (Mat. 25:40) Vaze va va ka sompesa kupua vampanga, va ka muesa ngecize ve ku kuasa vantsongo va Kilistu. Kaha tu tantekeya naua nguetu, mu ntsimbu ya lamba ya kama, vamo Vakua Kilistu va ku vuavesa va ci ka kala ha mavu, ntsimbu kanda Alemangendo i putuke. Kaha ntsimbu kanda vantsongo va Kilistu vaye muilu, halumo vantu vakua mitima ya cili va ka uana vukovelelo vua ku va kuasa mu cipanga ci vali na ku linga. (Mat. 25:31, 32; Ku-So. 12:17) Omo lia vika vusunga vuaco vua pua vua seho?
12-13. Vantu halumo va ka linga vika mu va ka mona ku nonga ca “Mbambilone ya Kama”? (Talenu naua vikupulo.)
12 Mu i ka putuka lamba ya kama, halumo vamo vantu mu va ka mona ku nonga ca “Mbambilone ya Kama,” va ka vuluka nguavo Vakaleho va Yehova va kele na kuambulula via ku nonga caco. Vuno vaze va ka mona ku nonga caco, va ka tsiliela muli Yehova ni?—Ku-So. 17:5; Ezek. 33:33.
13 Kaha nga mukemuo, vi kapua ngue mu via solokele mu Ingito ku matangua a Mosesa. Vulukenu ngecize, “civunga ca vantu veka na veka” va lipandakanene na vaIsaleli mu va tundile mu Ingito. Kaha halumo vantu vaco va putukile ku tsiliela Yehova, mu va limuenenene ku lipuisamo ca Vipupu Likumi viambuluile Mosesa. (Ezu. 12:38) Nga mukemuo mu vi ka fua mu nima ya ku nonga ca Mbambilone ya Kama, vuno tu ka singanieka nguetu Yehova na lingi vuhenge mu ku va tava ni? Houe. Muomu tu tonda ku tambuluisa Tatetu ua muilu, ua pua “Njambi mukua cikeketima na mukua kavumbi, a livandeka ku vutenu, ua lana ngozi na vusunga.” b—Ezu. 34:6.
Vamo mu va ka mona ku nonga ca “Mbambilone ya Kama,” va ka vuluka nguavo Vakaleho va Yehova va vi handekele laza (Talenu vinanga 12-13) d
14-15. Vuno viuma vi ka solokela vantu ku lutue via hitukila ha ntsimbu i ve kutsa, ni ku cihela ci va yoyela? Lombololenu. (Visamo 33:4, 5)
14 Halumo vamo vamuanetu na vandumbuetu va hasa ku handeka nguavo: “Cili ku lutue vavusoko vange ka ve ku pangela Yehova va katse ntsimbu kanda lamba ya kama i putuke, muomu va ka sanguka.” Cili vene, kuli vusunga vue ku va lingisa ku handekamo. Vunoni viuma vi ka solokela vantu ku lutue ka via hitukilile ha ntsimbu i ve kutsa muntu. Yehova ua pua Ngazi ua ku tantuluka, kaha vihangula viendi via pua via cili ntsimbu yose. (Tandenu Visamo 33:4, 5.) Ngeci mukemuo, tuli na vusunga nguetu, “Ngazi ya mavu ose” a ka linga via cili.—Njen. 18:25.
15 Cikuavo naua, ku kala na vukovelelo vua ku ka yoya miaka yose ka ca hitukilile ku cihela kua yoyela muntu. Yehova ka li ka sompesa vantu mu kupua “vampembe” omo lia ku yoyela ku vihela via ku linga, ka va kele na vukovelelo vua ku tantekeya muzimbu ua Vuangana. (Mat. 25:46) Mu kupua Ngazi mukua vuviuke, Yehova ua haka seho ya kama ku vantu vaco ku hiana seho i tua va haka yetu. Ka tu tantekeya vati Yehova a ka linga viuma mu lamba ya kama. Halumo vamo ha kati ka vantu vaco, va ka kala na vukovelelo vua ku lilongesa via Yehova, ku mu tsiliela, na ku kala ku mutamba uendi mua ka tsimanesa lizina liendi ku vantu vose.—Ezek. 38:16.
Vuno mu i ka putuka lamba ya kama, . . . vamo va kaluluka ni?
16. Vika tu tantekeya ku tuala hali Yehova? (Talenu naua cikupulo.)
16 Ku hitila mu cilongesa ca Mbimbiliya, tua tantekeya nguetu Yehova ua haka seho ya kama ku vantu. Ua hele muono ua Munendi linga vantu vose va ka yoye miaka yose. (Yoa. 3:16) Mua vusunga, tu vose tue ku limuena cilemo ca Yehova! (Isaya 49:15) Kaha a tantekeya mazina etu. A tu tantekeya vuino, kaha ambe nga tutsa, a ka tu sangula muomu ue ku vuluka viuma viose ku tuala hali yetu. (Mat. 10:29-31) Cili vene, tuli na vusunga vua ku tsiliela nguetu, Tatetu ua muilu a ka sompesa vuino vantu, muomu ua pua mukua mana, mukua vuviuke, kaha mukua cikeketima.—Tia. 2:13.
Tu hasa ku kala na vusunga nguetu, Yehova a ka sompesa vantu na vuviuke kaha na cikeketima (Talenu cinanga 16)
17. Vika tu ka simutuila mu cilongesa ci na hatako?
17 Omo lia kuivuisisa ca ciha, tua nongonona nguetu, cipanga cetu ca ku ambulula ca tondeka ku ci linga mu vuasi-vuasi. Omo lia vika? Kaha vika vie ku tu kuasa ku tualelelaho kuambulula na ntuima? Tu ka simutuila vikumbululo viaco mu cilongesa ci na hatako.
MUASO 76 Vati Mue ku Livua?
a Linga mu tantekeye omo lia vika tua sungamesele kuivuisisa cetu, tandenu cimpande ‘Esse é o modo aprovado por ti’ mu Vutala vua Kaniungi vua Março ya 2015 mafo 7-11 mu putu.
b Mu nima ya ku nonga ca Mbambilone ya Kama, vose vangamba va Yehova va ka veseka mu va ka va luisa ku Ngonge ya Mangonge. Kaha vose va ka lipandakana na vangamba va Njambi mu nima ya ku nonga ca Mbambilone ya Kama, navo va ka veseka.
c VI LI HA CIKUPULO: Viuma vitatu via muesa vika halumo vi ka lingisa vantu va hone ku kala na vukovelelo vua ku vambuluila: (1) Umo mpuevo ua kala ku cihela kua sula malombelo eku mu lingisa a hone ku livua ku zituka, (2) yala na mpuevo va kala ku cihela kua kala vusonde kaha naua kua kala masiko a vindika cipanga cetu ca kuambulula, (3) umo yala ua kala ku laako cikuma.
d VI LI HA CIKUPULO: Umo muana mpuevo ua likelele ku pangela Yehova, na vuluka via lilongesele ku tuala ha ku nonga ca “Mbambilone ya Kama.” Kaha na hangula ku hiluka kuli Yehova na ku visemi vendi vapua Vakaleho. Nga viuma viaco vi soloka, tu tonda ku hilula cikeketima na ngozi ya Tatetu ua muilu, kaha na ku viukilila nga muntu na hiluka kuli Yehova.
