1-2. Viuma vika vie ku soloka nga muntu va mu mbatiza kaha vika tu lilongesa?

 MUA mueneho laza civunga ca vantu va va ka mbatiza ni? Nga eyo, mua va vuile va kumbulula na lizi lia ku tambeka kaha na mutima uose ku vihula vivali ntsimbu kanda va va mbatize. Kaha mua muene vavusoko na va vusamba vavo va na vuahelela mua kama. Kaha omo va kele na ku tuhuka mu mema, mua vuile vantu va kanda ku mavoko na ku mona ndzolela ya kele ku vihanga viavo. Mua vusunga, mu nkala simano makulukazi na makulukazi a vantu ve ku puisamo eci cinanga mu ku lihana na kuli mbatiza mu ku pua Vakaleho va Yehova Njambi.

² Nga muli na ku singanieka ku mi mbatiza, mu na pu ngue vumo vupite vua seho ku meso a Yehova mu mavu ano a ku pihia, muomu “muli na ku lengeya Yehova.” (Visa. 14:1, 2) Cino cilongesa, va na ci sonekela vakuendze na vakuluntu. Tu vose va tu mbatiza laza, tua pande ku lihakela kapandi ka ku tualelelaho ku pangela Yehova ku miaka yose. Kua kala vusunga vua vuingi vue ku tu lingisa ku pangela Yehova, vunoni tu hilulenuho lika viuma vitatu.

3. Omo lia vika vangamba va Yehova va lema vusunga na vuoloke? (Visamo 119:128, 163)

³ Yehova ua mamuna vangamba veni va “leme vusunga.” (Zak. 8:19) Yesu ua mamuine vandongesi veni ku lengeya vuviuke. (Mat. 5:6) Eci ca lomboloka ngecize tua pande ku kala na cizango ca kama ca ku pua vakua vuviuke, ku linga via cili na ku pua va ku lela ku meso a Njambi. Vuno mua lema vusunga na vuviuke ni? Tuli na vusunga nguetu, eyo. Ngeci mue ku lihakela kapandi ka ku zinda makuli na viuma viose via ku vihia mu mavu ano a Satana. (Tandenu Visamo 119:128, 163.) Makuli a solola vuntu  vua Satana, muangana ua mavu ano. (Yoa. 8:44; 12:31) Kaha vumo vua vutumbe vua Satana, vua pua ku zualesa lizina lia ku lela lia Yehova Njambi. Tunde ku citungu ca Endene, ikeye ue ku sanduola makuli ku tuala hali Njambi. Ue ku lingisa vantu ku singanieka ngecize Yehova ka puile muangana ua cili kaha ue ku suekela viuma via cili ku vantu. (Njen. 3:1, 4, 5) Satana ali na ku tualelelaho ku sanduola makuli ku tuala hali Yehova na ku hungumuna vantu va vengi. Kaha omo vantu mu ve ku viana ku lema vusunga, Satana ue ku va lingisa ku kala na vilinga viose ovio via ku vihia na ku linga via mazilo.—Loma 1:25-31.

4. Vati Yehova ua lisolola ku pua “Njambi ua vusunga”? (Talenu cikupulo.)

⁴ Yehova ua pua “Njambi ua vusunga,” kaha na vuhuanga vuose ue ku longesa vusunga kuli vose va mu lema. (Visa. 31:5) Mu ku lingamo, ue ku va zundula na ku va patula ku visaki via Satana. Cikuavo naua, Yehova ue ku longesa vangamba veni ku pua vakua vusunga na vakua vuviuke. Ku lingamo, ce ku va kuasa ku livua ngecize va kala na seho kaha eci ce ku va nehela ciyulo. (Visi. 13:5, 6) Nenu mukemuo mu mue ku livua tunde ha mua putukile ku lilongesa Mbimbiliya ni? Mua lilongesa ngecize vinjila via Yehova vikevio via hiana cipue mu ku kuasa vantu vose ni ku mi kuasa yenu mpundu. (Visa. 77:13) Ngeci mukemuo, mua pande ku lihakela kapandi ka ku hakuila vuviuke vua Njambi. (Mat. 6:33) Mu hasa ku lingamo mu ku hakuila vusunga na ku muesa ngecize Satana ua handekele visaki ku tuala hali Yehova Njambi. Vati mu hasa ku vi puisamo?

5. Vati tu hasa ku hakuila vusunga na vuviuke?

⁵ Mu hasa ku hangula ku yoya mu cifua cize ci muesa ha toma ngue muli na ku handeka nguenu, nja viana makuli a Satana kaha nje ku hakuila vusunga. Nji tonda Yehova a pue Muangana uange kaha nji tonda ku linga vize vie ku nji leka ikeye ngueni via cili. Vati mu hasa ku lingamo? Mu ku vundila kuli Yehova na ku lihana kuli ikeye kaha mu nima yaco na ku solola ku lihana cenu ku mbunga mu ku mi mbatiza. Ngeci mukemuo, ku lema vusunga na vuviuke ce ku tu hana ndzili ya kuli mbatiza.

6. Vusunga vuka vua kala ku Visamo 45:4, vua pande ku mi lingisa ku lema Yesu Kilistu?

⁶ Vika mua lemena Yesu Kilistu? Talenu vumo vusunga vua seho vua kala ku Visamo 45:4. (Tandenu.) Yesu ue ku hakuila vusunga, ku likehesa na vuoloke. Ngeci mukemuo, nga mua lema vusunga na vuoloke kaha ka ci tu  komouesa ku tantekeya ngecize mua lema naua Yesu Kilistu. Yesu ua hakuilile vusunga na vuoloke na ku simpa cose. (Yoa. 18:37) Vunoni, vati honi Yesu ue ku sambeya ku likehesa?

7. Vika vie ku mi ya ku mutima ku tuala ha ku likehesa ca Yesu?

⁷ Yesu ue ku sambeya ku likehesa ku hitila ku lungano lueni. Ca ku muenako, ue ku talekesa vumpahu vuose kuli Ise kati kuli ikeye ivene. (Mako 10:17, 18; Yoa. 5:19) Vati mue ku livua mu mue ku mona ku likehesa caco? Ka mue ku ivua cizango ca ku lema ou Muana Njambi na ku kava lungano lueni ni? Mua vusunga, mue ku ivua cizango caco. Omo lia vika Yesu ua pua ua ku likehesa? Muomu ue lema Ise, uze ua pua ua ku likehesa kaha ue ku mu tambuluisa. (Visa. 18:35; VaHe. 1:3) Nkuma ka mue ku ivua cizango ca ku likata na Yesu, uze ue ku muesa mu vutantuluke vifua via Yehova ni?

8. Omo lia vika tua lema Yesu ku pua Muangana uetu?

⁸ Tua lema Yesu ku pua Muangana uetu, muomu ikeye ua fuila ku pua Muangana. Yehova mpundu ua mu longesa kaha naua ua mu hangula ku pua Muangana. (Isaya 50:4, 5) Aci singaniekenu naua ha cilemo ca ku lihana ca muesele Yesu. (Yoa. 13:1) Mu ku pua Muangana uetu, Yesu ua fuila cilemo cetu. Ua lomboluele ngueni, vaze vose va mu lema, ue ku va sana ngueni vavusamba veni, kaha ve ku muesa cilemo caco mu ku ononoka masiko eni. (Yoa. 14:15; 15:14, 15) Mua vusunga, ca pua ku vezika ca kama ku pua kavusamba ka Muana Yehova!

9. Vati mbatizimu ya Vakua Kilistu ya lifua na mbatizimu ya Kilistu?

⁹ Limo lisiko lia Yesu lia hele kuli vandongesi veni lia, pua kuli mbatiza. (Mat. 28:19, 20) Kaha neni ua lingilemo. Mu vinjila vimo, mbatizimu yeni ya liseza na mbatizimu ya vandongesi veni. (Talenu cikasa “ Mbatizimu ya Yesu na Mbatizimu ya Vandongesi Veni—Haka ya Litepela.”) Vunoni mu vinjila vikuavo, evi mbatizimu vivali via lifua. Mu ku mu mbatiza, Yesu ua lisoluele mu ku linga cizango ca Ise. (VaHe. 10:7) Kaha netu Vakua Kilistu mu ve ku tu mbatiza, tue ku muesa ku mbunga ngecize tua lihana kuli Yehova Njambi. Muono uetu tu u talekesa honi mu ku linga cizango ceni, kati cetu. Ngeci mukemuo mu ku linga evi, ca pua ku tambuluisa lungano lua Muangana uetu Yesu.

10. Omo lia vika ku lema Yesu ca pande ku mi vuisa cizango ca ku mi mbatiza?

¹⁰ Mua tava Yesu ku pua Muana umo lika ua Yehova kaha naua Muangana ya hangula mu ku tu sika. Mue ku mona Yesu ku pua ua ku tantuluka kaha mukua ku tambuluisa ku likehesa ca Ise. Mua lilongesa ngecize ua sukile vakua ndzala, ua lembeziekele vaze va kele mu vusiua kaha na ku kanguisa vavezi. (Mat. 14:14-21) Mua limuena vati ue ku tuamenena lukungulukilo lelo lino. (Mat. 23:10) Kaha mu tantekeya ngecize ku lutue a ka puisamo via vingi cikuma ku hiana na ntsimbu ino mu ku pua Muangana ua Vuangana vua Njambi. Vati honi mu hasa ku muesa ngecize mua mu lema? Mu ku kava lungano lueni. (Yoa. 14:21) Mu hasa ku putuka ku lingamo, mu ku lihana kuli Yehova na ku mi mbatiza.

11. Vuno mbatizimu ya pua ya seho kuli yenu ni? Vika mu handekaho? Kaha omo lia vika? (Talenu cikupulo.)

¹¹ Cuma cika ca seho ci hasa ku mi lingisa kuli mbatiza? Yesu ua soluele limo lisiko lia kama ku masiko a Njambi mua handekele ngueni: “U ka lema Muangana Njambi yove na mutima uove uose, na muono uove uose, na mana ove ose, na ngolo yove yose.” (Mako 12:30) Vuno aa mezi a muesa ngecize mua lema mpundu Njambi ni?

12. Omo lia vika mua lema Yehova? (Talenu cikupulo.)

¹² Kua kala vusunga vua vuingi vue ku tu lingisa ku lema Yehova. Ca ku muenako, mua heta ha ku tantekeya ngecize ikeye “ndundzi ya muono” kaha ikeye naua mukua ku hana “Vuana vuose vua ku viuka na vuana vuose vua ku tantuluka.” (Visa. 36:9; Tia. 1:17) Nkala cuma ca  cili ci mua kala laza naco, ca tunda kuli Njambi uetu ua vuhuanga na cilemo, Yehova.

13. Vika via lingisa nkombelo ku pua vuana vua seho ya kama?

¹³ Nkombelo ya pua vuana vua seho ya kama vua tu hana Yehova. Omo lia vika? Tu ci singaniekenu ku likata ca kama ca kala hali Yehova na Muaneni Yesu. Yesu ua handekele ngueni: “Ange nji lema Tata, kaha ngue omo Tata” a nji lema ange. (Yoa. 10:17; 14:31) Ku likata cavo, ca tualeleho ku livuezelela mu ku hita ca makulukazi a makulukazi a miaka. (Visi. 8:22, 23, 30) Ngeci mukemuo, a ci singaniekenu honi ha ku vavala ca vuile Njambi ku mutima mu ku tavesa muaneni ya lema mua kama a ku yande na ku-tsa. Mua vusunga, Yehova ua lema mua kama vantu hamo lika nenu, ngeci ua tavele muaneni umo lika ku pua nkombelo ya ku mi tavesa enu hamo lika na vantu veka mu ka yoye miaka yose. (Yoa. 3:16; Ngal. 2:20) Ka kuesi vusunga vua hiana ovu vua pande ku tu lingisa ku lema Njambi.

14. Vutumbe vuka vua hiana seho mu hasa ku hangula mu muono?

¹⁴ Cilemo cenu muli Yehova, cili na ku livuezelela omo mu ya na ku lilongesa via vingi ku tuala hali ikeye. Ngeci mukemuo, mu tonda ku likuata neni vusamba mu ntsimbu ino na ku miaka yose. Kaha mu hasa ku lingamo vene. Ikeye ua mi kaniamesa ku mi vuisa ndzolela. (Visi. 23:15, 16) Kaha mu hasa ku lingamo, kati lika ku hitila mu mezi, vunoni na mu vilinga  vienu. Cifua ci mu yoyelamo, ci ka muesa ngecize mua lema mpundu Yehova. (1 Yoa. 5:3) Kaha ovu vutumbe, vukevuo vua hiana seho ya kama cikuma mu muono u mu hasa ku hangula.

15. Vati mu hasa ku muesa cilemo cenu kuli Yehova?

¹⁵ Vati mu hasa ku muesa cilemo cenu kuli Yehova? Ha katete, mu ku linga civundilo ca ku lifuila kuli ikeye na ku mu lekesa ngecize mua lihana kuli ikeye mu ku pua Njambi ua vusunga. (Visa. 40:8) Mu nima yaco, mua pande ku lisolola eci ku lihana ci mua lingile kua lika lieni ha mbunga mu ku mi mbatiza. Ngue mu tu na simutuilile laza mu cino cilongesa, ku mi mbatiza ce ku pua cimo cinanga ca seho ya kama, cinanga ca ndzolela. Muomu mua putukile ku yoya muono ua u hua, kati mu ku liyoyela enu va vene, vunoni mu ku yoyela Yehova. (Loma 14:8; 1 Pet. 4:1, 2) Cinanga caco, ci hasa ku zivika ngue ca kama cikuma kaha mukemuo vene. Vunoni ce ku sokolola njila ku muono ua cili cikuma. Mu njila ika?

16. Ngue mu ya muesa Visamo 41:12, vati Yehova a ka lunguisa vaze ve ku hana miono yavo mu ku mu pangela?

¹⁶ Yehova ikeye cihuanga ua kama ku hiana vose. Ambe mu mu hane viuma via kama vati, ikeye kasi a ka mi hana viuma via ku hiana vize vi mua mu hanene. (Mako 10:29, 30) Vutuhu tuli muno mu mavu a akalu, vunoni a hasa ku mi hana muono ua ndzolela, ua vilunguiso kaha ua cili cikuma. Kaha kati ovio lika, vungendzi vu mue ku putuka tunde ha mbatizimu ka vue ku hua. Muomu mu ka tualelelaho ku pangela Isuenu ua cilemo ku miaka yose. kaha cilemo ca ha kati kenu neni ci ka tualelelaho ku kola. Cikuavo naua, mu ka tualelelaho ku yoya ku miaka yose, ngeci mueni.—Tandenu Visamo 41:12.

17. Viuma vika mu hasa ku hana kuli Yehova vize ka kele navio?

¹⁷ Mu mue ku puisamo vinanga via ku lihana kuli Yehova na ku mi mbatiza, mue ku kala na vukovelelo vua mu hana viuma via seho ya kama. Ikeye ua mi hana viuma viose via cili, ambe ntsimbu ya cili i mua yoyaho laza mu muono. Ngeci mukemuo, mu hasa ku hana kuli ivene melu na mavu viuma ka kele navio. Viuma vika? Ku mu ononoka na ku mu pangela ku cizango ceni. (Yombi 1:8; 41:11; Visi. 27:11) Vuno kuli vieka vi mu hasa ku pangesa muono uenu  ku hiana evi ni? Cili vene, ku lema Yehova vukevuo vusunga vua kama vua pande ku mi lingisa ku mi mbatiza.

18. Vihula vika mu hasa kuli linga enu vavene?

¹⁸ Vati honi mu hasa ku kumbulula eci cihula? Vuno muli mbatiza ni? Yenu lika mu hasa ku cikumbulula. Vunoni mu hasa ku uana vukuasi vua kama mu ku lihula nguenu: ‘Omo lia vika kasi ku njesi na ku lihana linga va nji mbatize?’ (Vili. 8:36) Vulukenu vusunga vutatu vu tua hilula mu cilongesa cino. Ca katete, mua lema vusunga na vuviuke. Vunoni nji tonda ku ka kalako omo mbunga yose va ka handeka vusunga na ku linga viuma via vuviuke ni? Ca mu ci vali, mua lema Yesu Kilistu. Vuno nja tonda muana Njambi a pue Muangana uange kaha nji tonda ku kava lungano lueni ni? Ca mu citatu kaha ca hiana viose, mua lema Yehova. Lihulenu nguenu: ‘Vuno nji tonda ku vuisa Yehova ndzolela mu mutima mu ku mu pangela ni?’ Nga evi vihula mua vi kumbulula nguenu eyo, kati ca cili ku lihana linga va mi mbatize ni? Vika muli na ku lavelela?—Vili. 16:33.

19. Omo lia vika ka mua pandele ku likanuuela ku mi mbatiza? Hanenu cimueso. (Yoano 4:34)

¹⁹ Nga mue ku likanuuela ku mi mbatiza, singaniekenu ha cimueso ca pangesele Yesu. (Tandenu Yoano 4:34.) Mu muono ueni, Yesu ua setekesele ku linga cizango ca Ise na via ku-lia. Omo lia vika? Via ku-lia vie ku tu kuasa. Yesu ua tantekeyele ngecize viose vie ku tu tuma ku linga Yehova, via pua mu ku tu kuasa etu va vene. Yehova ka tondo tu linge na vimo viuma vi hasa ku tu kokela luvinda viahi. Vuno cizango ca Yehova kuli yenu ca ambatesela kumo na ku mi mbatiza ni? Eyo. (Vili. 2:38) Ngeci mukemuo, kalenu na vusunga ngecize ku ononoka lisiko lia Yehova lia kuli mbatiza ci ka mi kuasa. Nga ka mue ku likanuuela ku lia via ku-lia via cili cikuma, vika honi muli na ku likanuuela ku mi mbatiza?

20. Vika tu ka lilongesa mu cilongesa ci na hatako?

²⁰ Vika mu li na ku lavelela? Vavengi va hasa ku kumbulula nguavo: “Muomu kanda nji puemo.” Vunoni ku handeka vusunga, cihangula ca ku lihana kuli Yehova na ku mi mbatiza, ca pua ca seho ya kama ci mu ka linga. Ngeci mukemuo, ce ku tondeka ntsimbu ya ku ci singanieka vuino, ku ci hilula kaha na ku lihakela kapandi ka kama. Vunoni nga muli mpundu na cizango ca kama ca ku puisamo cinanga caco, vika mu hasa ku linga linga mu liviukisile? Cikumbululo tu ka ci simutuila mu cilongesa ci na hatako.