1. Vizango vika va kala navio visemi ku tuala ha vana vavo?

 VISEMI, tua tantekeya nguetu mua tonda ku kuasa vana venu ku tantekeya Yehova na ku mu lema. Vunoni ka tue ku mona Njambi. Vati honi mu hasa ku kuasa vana venu, ku mona Njambi ku pua muntu mpundu na ku likuata vusamba neni?—Tia. 4:8.

2. Vati visemi va hasa ku longesa vana vavo ku tuala ha vifua via Yehova?

² Njila ya seho ya ku kuaselamo vana kuli kuata vusamba na Njambi, ya pua ku lilongesa navo Mbimbiliya. (2 Tim. 3:14-17) Cikuavo naua, Mbimbiliya ya solola njila ikuavo i hasa ku kuasa vakuendze ku lilongesa via Yehova. Mu mukanda ua Visimo, va tumbulamo cisemi ua yala a vuluisa muneni ua yala, linga kati a suve vifua via Yehova vie ku soloka ku viuma via ku tanga. (Visi. 3:19-21) Tu hilula vimo vinjila vi va hasa ku pangesa visemi, mu ku kuasa vana vavo ku lilongesa vuntu vua Yehova ku viuma via ku tanga.

3. Vukuasi vuka visemi va na pande ku hana ku vana vavo?

³ Mbimbiliya nguayo: “Vifua via [Njambi] vize vintsa ka tu hasa ku mona, ngolo yeni ya miaka yose na vuNjambi vueni, tu vi mona mpundu ha viuma via ku tanga.” (Loma 1:20) Visemi, halumo mu hasa ku nona ntsimbu ya ku tuhuka na vana venu. Kaha puenu na ku pangesa ntsimbu yaco mu ku kuasa vana venu, ku mona ku likata cika ca kala ha “viuma via tangele” Yehova na vifua vieni via ku komouesa. Ku tuala hali evi,  tu talenu honi vika visemi va hasa ku lilongesa ku lungano lua Yesu.

4. Vati Yesu ua pangesele viuma via ku tanga mu ku longesa vandongesi veni? (Luka 12:24, 27-30)

⁴ Talenu vati Yesu ua pangesele viuma via ku tanga mu ku longesa. Ha ntsimbu imo, ua lekele vandongesi veni va tale makololo na zintsani. (Tandenu Luka 12:24, 27-30.) Yesu nga ua tumbuile kasitu ni muti uose-ouo, vunoni ua hanguile umo kazila na ntemo vi va tantekeyele vuino vandongesi veni. Vandongesi, halumo va muene makololo va pulula ha ntsimbu oyo vene kaha vintemo vi kola. Aci singaniekenu Yesu a lombolola viuma viaco oku a vi inika mpundu! Kaha vika ua lingile mu nima ya ku pangesa evi vimueso? Ua longesele vandongesi veni cimo cilongesa ca kama, ku tuala ha vuhuanga na ngozi ya Iseavo ua muilu: Yehova a ka zika na ku suka vangamba veni ngue mue ku linga na makololo na vintemo.

5. Tumbulenu vimo viuma via ku tanga vi va hasa ku pangesa visemi, mu ku longesa vana vavo via Yehova?

⁵ Enu visemi, vuno mu ka tambuluisa cifua ca longeselemo Yesu ni? Mu hasa ku leka muanenu cimo cuma ca ku tanga ci mua lema mua kama, ngeci mua umo kasitu ni umo muti. Omo mu lingamo, mu lombololenu vika cuma caco ca muesa ku tuala hali Yehova. Kaha mu nima yaco, mu hasa ku i hula muanenu, a tumbule kasitu ni ntemo ya lema cikuma. Mua vusunga, a ka mi tuala cikuma mana omo mu lombolola vifua via Yehova, via likuata na cuma ca ku tanga ca lema mua kama.

6. Vika tu lilongesa ku lungano lua va naye ya vaCristophers?

⁶ Vuno visemi, va tondeka ku kala ntsimbu ya kama, mu ku tondesesa via umo kasitu ni umo ntemo, ntsimbu kanda va vi simutuile na vana vavo ni? Houe, kati ntsimbu yose. Yesu ka lomboluele via vingi ku tuala ha vifua na vilinga via makololo ni via vintsani via tumbuile. Ngeci mukemuo, vutuhu vintsimbu vimo muneni ci ka mu ya ku mutima nga mu mu lomboluela via vingi, vunoni vintsimbu vimo, ku mu lomboluela viuma via viasi kaha mu vundende, ci ka mu kuata ku mutima. Halakanenu via handekele umo muanetu ua lizina Cristophers, mu ku vuluka vunike vueni, ngueni: “Va nana va kele na ku handeka mezi a andende ha viuma vi va kele na ku komoka ku tuala ha viuma via ku tanga via tu zengeleka. Ca ku muenako, nga tuli ku mukulo ua mincinda, halumo va kele na ku handeka nguavo: ‘Talenu ku hama na ku vuaha cou muncinda! Yehova ua pua ua ku komouesa ni vati vana vange?’ Ni nga tu nai ku kalunga ndonga, halumo va kele na ku handeka nguavo: ‘Talenu ndzili ya aze mankimba! Njambi ua kala na ndzili ni vati?” Muanetu Cristophers ngueni: “Aze mezi a asi, a kele na ku tu lingisa ku singanieka mua kama kaha na ku tu kuata ku mitima.”

7. Vati mu hasa ku longesa vana venu va pue na ku hilula viuma via ku tanga?

⁷ Omo vana venu va ya na ku kola, mu hasa ku va longesa mua ku hilula ha viuma via ku tanga, linga va lilongeseho vimo ku tuala ha vuntu vua Yehova. Mu hasa ku tsindika ha cimo cuma ca tangele Yehova na ku i hula vana venu nguenu: “Vika evi via tu longesa ku tuala hali Yehova?” Mu hasa ku ka komoka ku vikumbululo viavo vi va ka hana vana venu ku tuala ha cuma caco.—Mat. 21:16.

8. Vukovelelo vuka va kele navuo visemi mu Isaleli mu va kele na “ku enda mu njila”?

⁸ Visemi mu Isaleli, va va mamuine ku longesa vana vavo, masiko a Yehova mu va kele na ku “enda mu njila.” (Ndeu. 11:19) Vinjila via hitanganene muaya musenge ua Isaleli.  Ngeci mukemuo, ca tavele ku mona tusitu, tuzila na vimo vintemo nga muntu endelamo. Kaha omo masoko a vaIsaleli a kele na ku endela mu vinjila viaco, a kele na ku pangesa vukovelelo vuaco vua ku kuasa vana vavo va hake seho ku viuma via tangele Yehova. Citava nenu visemi, mua kala na vukovelelo ngeci mu ovu lelo lino, vua ku longesa vana venu via Yehova ku hitila ku viuma via ku tanga. Tu talenu vati vamo visemi va lingamo.

9. Vika mu hasa ku lilongesa kuli va Punitha na Katya?

⁹ Umo cisemi ua mpuevo ua lizina Punitha, ua kala ku imo mbonge ya kama ku India Ngueni: “Mu tue ku ya na ku meneka vavusoko kuimbo, tue ku pangesa vukovelelo vuaco mu ku longesa vana vetu, viuma via ku komouesa via tangele Yehova. Nje ku mona ngecize vana vange, ve ku ivuisisa vuino viuma via ku tanga nga ka tuesi mu mbonge muze mua sula na liuayanga.” Visemi, citava vana venu ka va ka suva na limo tangua liahi ntsimbu i mue ku kala navo ku vihela via cili. Katya, umo ndumbuetu ua ku Moldavia ngueni: “Viuma vi nje ku vuluka mua kama ku vunike vuange, via pua ntsimbu i tua kele na visemi vange ku membo. Nje ku va santsela mua kama mu ku nji longesa tunde ku vunike, ku tala viuma via tangele Yehova na ku tala vifua vieni ku hitila mu viuma viaco.”

10. Vika va hasa ku linga visemi, nga ce ku va kaluuila kuya na vana vavo ku membo? (Talenu cikasa “ Vukuasi ku Visemi.”)

¹⁰ Vati co nga ka citava kuya ku membo na vana venu, ni nguetu ku vihela vize kua kala viuma via vingi via ku tanga? Amol ua kala ku India, neni ua handekele ngueni: “Kuno ku nja kala, visemi ve ku panga vi ola via vingi kaha ve ku fuetesa ndando ya kama kuya vungendzi ku membo. Vunoni kamo ka citungu ka ha hiehi ni ka kala ku ndzivo, ka hasa ku puamo mu ku longesa vana ku tuala ha vifua via Yehova.” Nga mu talesesa vuino, mu hasa  ku nongonona viuma via vingi via ku tanga via kala ku hiehi nenu vi mu hasa ku pangesa mu ku longesa vana. (Visa. 104:24) Citava halumo mu ka uana tuzila, tulongolo, vintemo na vikuavo. Ndumbuetu Karina, ua ku Alemanha ngueni: “Va nana mueka va lema vintemo. Ngeci mukemuo, mu nja puile nji kanike va kele na ku nji inikila vintemo via cili nga tuli na kuenda. Visemi, mu hasa ku pangesa naua mikanda na vivideo via vingi vi lue ku tuhula lukungulukilo ku tuala ha viuma via ku tanga, mu ku longesa vana venu. Mua vusunga, muose-omo mu ua fua muono uenu, kasi mu hasa ku kuasa vana venu, va mone viuma via tangele Njambi na ku lilongesako vimo. Mu ntsimbu ino, tu hilulenu honi vimo vifua via Yehova vi mu hasa ku longesa vana venu.

11. Vati visemi va hasa ku kuasa vana vavo ku nongonona cilemo ca Yehova?

¹¹ Linga mu kuase vana venu ku nongonona mpundu cilemo ca Yehova, mu hasa ku va leka via vamo tusitu ve ku niunga vuino vana vavo. (Mat. 23:37) Kaha mu hasa naua ku tsindika ha viuma via ku liseza-seza via tangele Yehova vi tua lema mua kama. Karina u tu na livangele ku tumbula ngueni: “Mu tua kele na ku endangana, va nana va kele na ku nji kaniamesa ku hilula nkala ntemo na ku mona vati ku vuaha cayo ca muesa cilemo ca Yehova. Mu nima ya miaka, kasi vene nje ku tala ku vintemo, ku liseza-seza cavio, ku vifua na ku mavala avio. Kaha, vie ku nji vuluisa ngecize Yehova ua tu lema mua kama.”

12. Vati visemi va hasa ku kuasa vana vavo ku nongonona mana a Njambi? (Visamo 139:14) (Talenu cikupulo.)

¹² Kuasenu vana venu va nongonone mana a Njambi. Yehova ua tu hiana cikumakuma ku mana. (Loma 11:33) Ca ku muenako, mu hasa ku leka vana venu mua vati mema e kuli kondela muilu na ku pua maselua, kaha na ku hungumuka ku tunda ku cimo cihela na kuya ku cikuavo ca ku hona ku uila ha mavu. (Yombi 38:36, 37) Mu hasa naua ku tsindika ha cifua ca ku komouesa ci va tangelamo muvila ua muntu. (Tandenu Visamo 139:14.) Halakanenu vati umo cisemi ua lizina Vladimir ua lingelemo. Ivene ngueni: “Tangua limo, muanange ua uile ha kinga yeni na ku livulumuna. Vunoni mu nima ya amo matangua, mbandu yeni ya kangukile. Ngeci mukemuo,  nange na mpuevo yange, tua mu lomboluele ngecize Yehova ua tanga mivila yetu mu cifua ca kuli kangukila ikeyo ivene. Kaha ka kua kele viuma na vimo viahi vi va linga vantu via kala na vuhasi vuaco. Ca ku muenako, nga likalu li na vihia, ka lie ku livuhesa likelio livene. Ku lomboluela evi kuli munetu, ca mu kuasele ku ivuisisa mana a Yehova.

13. Vati visemi va hasa ku kuasa vana vavo ku nongonona ngolo ya Njambi? (Isaya 40:26)

¹³ Yehova ua tu lania tu tale muilu na ku singanieka ha ngolo ya ku komouesa ya kala mu kaye. (Tandenu Isaya 40:26.) Mu hasa ku kaniamesa vana venu va pue na ku tala muilu na ku hilula. Halakanenu vie ku vuluka ndumbuetu Tingting ua ku Taiwan, ku vunike vueni. Ngueni: “Tangua limo, va nana va nji tualele mu ku ka kosela mu vitenda kaha vutsiki tua talele muilu ca ku hona vitanganeso via ceke ca mu mbonge. Ha ntsimbu yaco ize, tele nje ku lisosomua mua kama na ntsindiye ya vakuetu kaha nja kele na ku mona nguange, ku nji hasa ku tualelelaho ku pangela Yehova. Va nana va nji kaniamesele ku singanieka ha ngolo ya pangesele Yehova mu panga vintangantanga vi nja kele na ku mona, na ku vuluka ngecize cili vene Yehova a ka pangesa ngolo yaco, mu ku nji kuasa ku vula nkala ceseko. Mu nima ya ku tala viuma via ku tanga mu vungendzi vuaco vuze, nja vuile cizango ca ku tantekeya vuino Yehova na ku kaniamesa naua vutumbe vuange vua ku tualelelaho ku mu pangela.”

14. Vati visemi va hasa ku pangesa viuma via ku tanga, mu ku kuasa vana vavo va mone ngecize Yehova ua pua Njambi ua ndzolela?

¹⁴ Viuma via tangele Yehova via muesa ndzolela yeni. Vakua siensia va nongonona ngecize tusitu vavengi navo ve kueha ngeci mua tuzila na vantsi. (Yombi 40:20) Vuno vana venu va zolaho laza mu ku mona umo kasitu a hiehia ni? Halumo va lingilemo, mu va muene umo kambixi a hiehia na mbola ni vamo tutali vavali va hiehiela hamo lika. Ntsimbu ikuavo i mu ka mona kasitu ali na kueha, citava mu pangese vukovelelo vuaco mu ka longese vana venu va nongonone ngecize tue ku pangela Njambi ua ndzolela.—1 Tim. 1:11.

15. Vika via hasa ku kuasa visemi ku tantekeya visinganieka via vana vavo? (Visimo 20:5) (Talenu cikupulo.)

¹⁵ Vintsimbu vimo, visemi va hasa ku mona ngecize ca cikalu ku simutuila na vana vavo ku tuala ha visoti vi ve ku lihita navio. Nga cikeco citanga ci mue ku pinda naco, halumo cika tondeka ku konka visinganieka via vana venu. (Tandenu Visimo 20:5.) Vamo visemi ce ku va asiuila ku lingamo, nga va li na ku tala viuma via ku tanga na vana vavo. Omo lia vika? Vimo vie ku lingisamo via pua muomu, ha ntsimbu yaco ka kue ku kala vitanganeso via vingi cipue ku vana ni ku visemi. Umo cisemi ua ku Taiwan ua lizina Masahiko, ua tumbula vusunga vukuavo ngueni: “Mu tue kuya na ku endangana na vana vetu ambe ku mincinda ni ku mukulo ua kalunga, ve ku livua ku zituka. Ngeci mukemuo, ce ku tu puila ca casi ku tantekeya visinganieka viavo.” Ndumbuetu Katya u tu na livangele ku tumbula ngueni: “Mu nja kele na ku lembuka ku sikola, va nana va kele na ku nji tuala ku cimo citungu ca cili. Kaha ku cihela caco ca nji puililile ca casi ku leka va nana vi nja lihitile ku sikola na viuma via kele na ku nji umisa mutima, muomu nja livuile ku zituka.”

16. Vati masoko a hasa ku sikamena ha viuma via tangele Yehova na ku livuisa ndzolela?

¹⁶ Viuma via tangele Yehova, vi hasa naua ku hana vukovelelo ku masoko a ku sikamenaho na ku livuisa ndzolela kaha eci ce ku kaniamesa ku likata ca mu vusoko. Mbimbiliya nguayo: “Ku ili ntsimbu ya ku zola” na “ntsimbu ya ku cina.” (Ekel. 3:1, 4) Yehova ua panga viuma via ku komouesa vize vi hasa ku tu lingisa ku livuisa ndzolela. Masoko a engi, va lema ku kala hamo lika mu ku tala viuma via ku tanga, ngeci mua mincinda ni kalunga ndonga. Vamo vanike va lema ku tunta, kueha mu vitungu, ku tala tusitu, ku tana mu ndonga, mu cisali ni mu kalunga. Mua vusunga, kuya na ku tala viuma viaco, ce ku hana vukovelelo vua cili ku visemi vua ku tala viuma via tu zengeleka via tangele Yehova!

17. Omo lia vika visemi va pande kuasa vana vavo va livuise ndzolela na viuma via tangele Njambi?

¹⁷ Mu mavu a aha, visemi na vana vose va ka livuisila hamo lika ndzolela viuma via tangele Njambi, ku hiana na lelo lino. Muomu lelo lino, tua kala na liova lia tusitu kaha navo naua va kala na liova netu. (Isaya 11:6-9) Vunoni mu mavu a aha tu ka kala na ntsimbu ya ya-ye, na ku livuisa ndzolela na viuma via tangele Yehova. (Visamo 22:26) Vunoni visemi, kati mu lavelele noho ntsimbu yaco i na hete linga mu livuise ndzolela na viuma via tangele Yehova. Omo mu pangesa viuma via ku tanga linga mu longese vana venu vifua via Yehova, mu ka heta ha ku tava ngue mua tavele Ndaviti ngueni: “A Sukulu; Ka kuesi vipanga ngue viove.”— Visa. 86:8.