1-2. Nga kanda mu puisemo ku mi mbatiza, omo lia vika ka mua pandele ku ivua vusiua? (Talenu cikupulo helu lia Vutala.)

 NGA mu tonda ku mi mbatiza, muli na cizango ca cili cikuma. Mua liviukisila ku mi mbatiza mu ntsimbu ino vene ni? Nga nguenu eyo kaha na vakuluntu va tava, kati mu likanuuele ku puisamo cizango caco mu vu ka mi solokela vukovelelo vua ku lingamo. Muono ua ndzolela mu vipanga via Yehova, ua mi lavelela ku lutue.

² Vuno va na mi leka nguavo, kasi mu ci tondeka ku kola mu lutsilielo ni? Ni enu vavene mu na limuenamo? Nga mukemuo, kati mu ivue vusiua. Mu hasa ku tualelelaho ku kola mu lutsilielo linga mu puisemo eci cinanga ca seho, ambe nga mu vanike ni mu na kolo.

3. Vika muata ua ku Etiopia ue huile Filipu kaha cihula cika ci ka tukaho? (Vilinga 8:36, 38)

³ Tandenu Vilinga 8:36, 38. Umo muata ua ku Etiopia ue huile Filipu mukua ku ambulula ngueni: “Vika vi ku nji vindika ku nji mbatiza?” Uze yala ua ku Etiopia, ua tondele ku mu mbatiza. Vunoni ha katuka cihula: Vuno ua puisilemo mpundu via tondeka mu ku mu mbatiza ni?

4. Vati uze muata ua ku Etiopia ua muesele ngecize ua lihakelele kapandi ka ku tualelelaho ku lilongesa?

⁴ Uze yala ua ku Etiopia, “uezile ku Yelusalema mu ku lemesa.” (Vili. 8:27) Ngeci mukemuo, yala uaco ka puile kaYundeya, vunoni ua li kovelesele mu vulombelo vua vaYundeya. Tuli na vusunga ngecize ua lilongesele via Yehova mu Visoneka via ku Lela ni nguetu, Visoneka via ciHevelu. Vutuhu ngoco, kasi ua tondele ku lilongesa vikuavo naua. Ngeci mukemuo, omo  Filipu ua mu uanene mu tapalo, yala uaco ua kele na ku linga vika? Ua kele na ku tanda na civando visoneka via kapolofeto Isaya. (Vili. 8:28) Viuma via kele na ku lilongesa, via puile via ku-lia via kola via mu lutsilielo. Uze yala ka viukilile lika mu ku tantekeya vilongesa via katete, ua tondele ku tualelelaho ku lilongesa vikuavo naua.

5. Vati muata ua ku Etiopia ua pangesele via lilongesele?

⁵ Uze yala ua puile muata mukua ngolo ya kama ua kuli Kandase, muangana ua mpuevo ua vakua Etiopia. Kaha “ikeye ua niungile vufuko vueni vuose.” (Vili. 8:27) Ngeci mukemuo, citava yala uaco ua kele na via vingi via ku linga. Vutuhu ngoco, ua uanene ntsimbu ya ku lemesa Yehova. Ka viukilile lika mu ku lilongesa vusunga, vunoni ua pangesele via lilongesele. Ca ku muenako, uendele vungendzi vua kama vua ku tunda ku Etiopia linga a ka lemese Yehova mu tembele ku Yelusalema. Vungendzi vuaco vua tondekele ntsimbu ya kama na viuma vikuavo, vunoni uze yala ka likanuuele ku linga viose evi, muomu ua tondele ku lemesa Yehova.

6-7. Vati uze yala ua ku Etiopia ua tualeleho ku kolesa cilemo ceni kuli Yehova?

⁶ Uze yala ua ku Etiopia ua lilongesele vumo vusunga vua seho kuli Filipu, ngeci mua ku nongonona Mesiya. (Vili. 8:34, 35) Mua vusunga, uze yala ua komokele mua kama mua tantekeyele via mu lingilile Yesu. Vati ue ku lingile ku tuala ha cilemo ca mu muesele Yesu? Citava nga ua tualeleho ngue muze mua fuile laza, ku pua muntu ua ku tsimana ha kati ka vaYundeya. Vunoni cilemo ceni kuli Yehova na Muaneni, ca tualeleho ku kola. Ngeci mukemuo, ua vuile cizango ca ku linga cihangula ca seho ya kama mu muono, ca ku mu mbatiza ku pua ndongesi ya Yesu Kilistu. Filipu ua muene ngecize uze yala, ua puisilemo viose via tondekele ngeci ua mu mbatizile.

⁷ Nga mu kava lungano lua uze yala ua ku Etiopia, nenu mu hasa ku liviukisila linga va mi mbatize. Kaha mu ka hasa ku handeka na ku simpa cose nguenu: “Vika vi ku nji vindika ku nji mbatiza?” Tu talenu vati mu hasa ku kava vinanga via puisilemo uze yala. Ua tualeleho ku lilongesa, ua lingileko mumo ku tuala ha viuma via lilongesele kaha ua tualeleho ku kolesa cilemo ceni kuli Njambi.

8. Vati Yoano 17:3, ya likuata neni?

⁸ Tandenu Yoano 17:3. Vuno aa mezi a Yesu a mi vuisile cizango ca ku tava ku lilongesa Mbimbiliya ni? Cingi cetu a tu vuisilemo vene. Vunoni aa mezi aco, a muesa naua seho ya ku tualelelaho ku lilongesa. Mu njila ika? Ka tu ka likela “ku tantekeya . . . Njambi” umo lika ua vusunga. (Ekel. 3:11)  Tu ka tualelelaho ku lilongesa ku miaka yose ya-ye. Kaha mu tu ka tualelelaho ku lilongesa, na vusamba vuetu na Yehova vu ka tualelelaho ku livuezelela.—Visa. 73:28.

9. Vika tua tondeka ku linga mu nima ya ku lilongesa vusunga vua katete?

⁹ Ngue mu ca pande vene, ku lilongesa via Yehova ce ku putuka na viuma via katete. Mu mukanda ua sonekele Paulu kuli Vakua Kilistu va vaHevelu ua sanene vilongesa viaco ngueni: “Via vindende.” Mu ku handeka ngoco, ka kele na ku sembulula “vilongesa via ku livanga.” Vunoni ua kele na ku setekesa na “mavele” e ku a mua kakeke. (VaHe. 5:12; 6:1) Paulu ua mamuine Vakua Kilistu vose va tualelelaho ku lilongesa vikuavo naua, kati va lengele lika ha vilongesa via katete via mu Lizi lia Njambi. Vuno muli na mpuila ya ku lilongesa viuma via katete via mu Mbimbiliya ni? Vuno muli na cizango ca ku tualelelaho ku lilongesa via Yehova na vutumbe vueni ni?

10. Omo lia vika vamo ce ku va kaluuila ku lilongesa?

¹⁰ Cingi cetu ku lilongesa ce ku tu kaluuila. Enu co? Vuno ku sikola va mi longesele ku tanda na ku lilongesa vuino ni? Vuno mua lemene ku lilongesa na ku uanamo vukuasi vua vuingi ni? Ni mua hetele ha ku limuena nguenu, via ku lilongesa kati vienu? Nga mua muene nguenu, via ku lilongesa kati vienu, kati yenu lika. Vantu vavengi ve ku livua ngoco. Vunoni Yehova a hasa ku mi kuasa. Muomu ka kua kele mulongisi ueka ua ku tantuluka ua hiana Yehova.

11. Vati Yehova ue ku muesa ngecize ua pua “mulongisi ua ku hiana”?

¹¹ Yehova ua litumbula ngueni, “Mulongesi ua ku Hiana.” (Isaya 30:20, 21; NWT.) Ua pua Mulongisi ua ntsintsa, ua ngozi na ku ivuisisa. Ue ku tonda vucili mu vandongesi veni. (Visa. 130:3) Kaha ke ku lavelela tu linge viuma ka tu hasa. Kaha vulukenu naua ngecize ikeye ua tu hana vuongo, vuze vua pua vuana vua ku komouesa. (Visa. 139:14) Tu vose, tue ku semuka na cizango ca ku lilongesa viuma. Sakatanga uetu, ua tonda tu lilongese viuma ku miaka yose kaha mu njila i tu tovala. Ngeci mukemuo, ku “sunguiya” vusunga vua mu Mbimbiliya ca pua ku muesa mana. (1 Pet. 2:2) Lihakelenu vizango vi mu hasa ku puisamo kaha lingenu programa ya ku tanda na ku lilongesa Mbimbiliya na ku lihakela kapandi ka ku vi kava. (Yeho. 1:8) Nga mu lingamo, Yehova a ka vezikisa kapandi kenu ka ku tualelelaho ku tanda na ku lilongesa vieni ntsimbu yose.

12. Vika ca puila ca cili ku tuala mana kuli Yesu omo tu lilongesa mu vulika?

¹² Puenu na ku uana ntsimbu ya ku hilula ha muono na ku ambulula ca Yesu ku-sua kumo. Ku kava vuino vinanga via Yesu, ikeyo sapi ya ku pangela vuino Yehova, cikumakuma mu ntsimbu ya visoti. (1 Pet. 2:21) Yesu ua lomboluele ha toma visoti vi ve ku lihitile navio vandongesi veni. (Luka 14:27, 28) Vunoni ua kele na vusunga ngecize vandongesi veni va ka hasa ku vi vula. (Yoa. 16:33) Puenu na ku lilongesa na civando muono ua Yesu kaha na ku lihakela vizango via ku mu tambuluisa mu muono ueni ua tangua na tangua.

13. Vika mua pande ku tualelelaho ku vundila kuli Yehova kaha omo lia vika? (Talenu cikupulo.)

¹³ Ku tantekeya lika viuma ka ca puilemo. Noho nga viuma vi mua lilongesa vi mi kuase ku tantekeya vuino Yehova na ku kala na vifua via cili, ngeci mua cilemo na lutsilielo. (1 Kol. 8:1-3) Omo mu tualelelaho ku lilongesa, tualelenuho ku vundila Yehova a mi kuase ku vueza ku lutsilielo luenu. (Luka 17:5) Ikeye ue ku kumbulula na cizango cose vivundilo viaco. Lutsilielo lua vusunga, luze lua hitukila ha ku tantekeya Njambi, luka mi vuisa cizango ca ku lingako mumo.—Tia. 2:26.

14. Vati kapostolo Petulu ua muesele seho ya ku pangesa vi tue ku lilongesa? (Talenu cikupulo.)

¹⁴ Kapostolo Petulu, ua muesele ngecize ca pua ca seho ya kama kuli Vakua Kilistu ku pangesa vi ve ku lilongesa. Ua handekele via muzimbu ua Noa. Yehova ua lekele Noa ngueni ku hitila mu Livazi, a ka nongesa vakua vupi vose va kele ku ntsimbu ize. Vunoni ku tantekeya lika ngecize ku keza livazi, ka ca puilemo mu ku ovola Noa na vusoko vueni. Ngeci mukemuo Petulu ua handekele via ntsimbu ya ku nima, tele kanda livazi lize ngueni: “Mu va kele na ku tunga vuato.” (1 Pet. 3:20) Cili vene, Noa na vusoko vueni va pangesele viuma vi va lilongesele mu ku tunga vuato, vuze vua puile ngue cikasa ca kama. (VaHe. 11:7) Mu nima yaco, Petulu ua setekesele viuma via lingile Noa ngueni: “Akeo naua na cifua cao ca cili a li na ku mi ohiela vuovuno, akeo ku-mbatiza vene.” (1 Pet. 3:21) Ngeci mukemuo, tu hasa ku setekesa kapandi ka tue ku lihakela mu ku liviukisila mbatizimu na vipanga via lingile Noa na vusoko vueni mu miaka i va kele na ku tunga vuato. Vipanga vika mua pande ku puisamo linga mu liviukisile mbatizimu?

15. Ku liveya ca vusunga, ca ambatesela kumo na vika?

¹⁵ Cimo ca viuma ca katete ci mua pande ku linga, ca pua ku liveya mu vusunga ku vipi vienu. (Vili. 2:37, 38) Ku liveya ca vusunga, ce ku lingisa muntu ku aluluka. Vuno mua mbila kuti vilinga ka vie kuya Yehova ku mutima ngeci mua, vupangala, ku sipa na ku handeka via mazilo cipue ku tuka ni? (1 Kol. 6:9, 10; 2 Kol. 7:1; Efe. 4:29) Nga kanda mu ci lingemo, tualelenuho ku lihakela kapandi ka ku aluluka. Handekenu na muntu ue ku mi longesa Mbimbiliya ni vakuluntu va mu cikungulukilo va mi kuase na ku mi tuamenena. Kaha nga mua pua mu vanike kaha mua yoya na visemi venu, tualelenuho ku va pinga vukuasi linga mu hase ku vula vilinga viose via ku vihia vize vie ku mi vindika ku puisamo cinanga ca mbatizimu.

16. Ku pangela vuino Yehova, ca ambatesela kumo na vika?

¹⁶ Ca pua naua ca seho ya kama ku linga viuma via mu lutsilielo. Eci ca lomboloka ku kunguluka  na ku kumbulula ku viuano. (VaHe. 10:24, 25) Nga mu na puisamo via tondeka mu ku ambulula na cikungulukilo, lihakelenu kapandi ka ku lingamo ku-sua kumo. Nga mu tualelelaho ku linga eci cipanga ce ku ovola miono ya vantu, naco ci ka putuka ku mi tovala. (2 Tim. 4:5) Nga mu cili mu vanike kaha mua yoya na visemi venu, lihulenu nguenu: “Vuno ce ku tondeka visemi vange va nji vuluise via ku kunguluka ni ku tuhuka mu lihia ni? Nga mu pua na kuli lingila viuma ngeci mue vi enu vavene, mu ka muesa lutsilielo, cilemo na ku santsela cenu kuli Yehova Njambi. Muomu evi vikevio “vilinga via ku lela” vi mu hasa ku hana kuli Yehova. (2 Pet. 3:11; VaHe. 13:15) Kaha vuana vuose vu tu hasa ku hana ku cizango cetu kati ku ntsindiye, vukevuo vue kuya Njambi ku mutima. (Setekesenu na 2 Kolintu 9:7.) Tua lema ku linga evi, muomu tua tonda ku hana vuana vua cili cikuma kuli Yehova.

17-18. Cifua cika ca seho ya kama ci ka mi kuasa ku tualelelaho ku kola mu lutsilielo na ku mbatizimu kaha omo lia vika? (Visimo 3:3-6)

¹⁷ Omo mu tualelelaho ku kola mu lutsilielo na ku mbatizimu, mu ka hita mu vieseko. Vamo vantu va ka putuka ku mi tsopa omo lia ku alulula vulombelo. (2 Tim. 3:12) Vamo va hasa vene ku himpuka vitozi venu na ku mi luisa. Kaha nga muli na ku pinda na cimo cilinga ca ku vihia ci mu tonda ku ci vula, vintsimbu vimo mu ka sevuka-sevuka. Ni mu hasa ku futuka vene ku mu mutima, muomu cizango ci mu tonda ku puisamo ci soloka ngue cili ku laako mua kama. Vika vi hasa ku mi kuasa ku kolesa? Cimo cifua ca seho—ku lema Yehova.

¹⁸ Ku lema Yehova, cikeco cifua ca cili cikuma ci mua kala naco. (Tandenu Visimo 3:3-6.) Cilemo cenu ca ku kaniama muli Yehova, ci ka mi kuasa nga mu hita mu visoti. Vintsimbu via vingi, Mbimbiliya ya muesa ngecize Yehova ua kala na cilemo ca ya-ye ku vangamba veni. Cilemo ca ya-ye, ca lomboloka ngecize Njambi ka ka mbila kuti vangamba veni ni ku likela ku va lema. (Visa. 100:5) Va mi tanga mu cifua ca Njambi. (Njen. 1:26) Ngeci mukemuo, vati nenu mu hasa ku muesa cilemo ca cifua eci?

19. Vati mu hasa ku vueza ku ku santsela cenu ku viose via mi lingila Yehova? (Ngalata 2:20)

¹⁹ Putukenu na ku santsela. (1 Tes. 5:18) Mu nkala litangua puenu na ku lihula nguenu:  ‘Vati Yehova na nji muesa cilemo?’ Kaha mu nima yaco, lingenu cose linga mu mu santsele mu ku tumbula mpundu viuma via na mi lingila. Puenu na ku mona viuma via cilemo via linga Yehova ngue yenu mpundu na vi lingila, ngue muze mua nongonuene kapostolo Paulu ku tuala hali Yehova. (Tandenu Ngalata 2:20.) Lihulenu nguenu: ‘Vuno nange nji tonda ku mu muesa cilemo ni?’ Ku lema Yehova ci ka mi kuasa ku viana vieseko na ku kolesa mu visoti. Ci ka mi kuasa ku kakatela ku viuma via mu lutsilielo na ku muesa cilemo kuli Isuenu ua muilu tangua na tangua.

20. Vika ca lomboloka ku lihana kuli Yehova kaha seho ika ya kala ha ku puisamo cinanga caco?

²⁰ Mu nima ya ntsimbu, cilemo cenu kuli Yehova ci ka mi vuisa cizango ca ku linga cimo civundilo ca ku lifuila. Civundilo caco, mu ka lihana kuli Njambi. Kaha vulukenu ngecize nga mu lihana kuli Yehova, mu ka lavelela evi viuma via cili: Ku kundama kuli Yehova ku miaka yose ya ya-ye. Ku lihana kuli Yehova, ca pua ku likundika kuli ikeye na ku tualelelaho ku mu pangela ambe mu vintsimbu via vikalu. Kaha ve ku ci linga lika lumo. Cili vene, ku lihana kuli Yehova ca pua cimo cinanga ca seho ya kama. Vunoni singaniekenu hali evi: Omo mu ya na ku kola, mu ka linga vihangula via vingi mu muono uenu. Vunoni na cimo cihangula cahi ci ka tuvakana eci. (Visa. 50:14) Satana a ka linga cose mu ku zeyesa cilemo cenu kuli Isuenu ua muilu linga mu likele ku mu pangela. Vunoni kati mu mu tavese a mi hungumune! (Yombi 27:5) Ku lema mua kama Yehova, ci ka mi kuasa ku tualelelaho ku yoya mua ya ku lihana cenu na ku kaniamesa vusamba vuenu na Isuenu ua muilu.

21. Vika tu hasa ku handekela nguetu, mbatizimu ka ya puile vumanusuilo, vunoni vuputukilo?

²¹ Mu nima ya ku lihana kuli Yehova, handekenu na vakuluntu va mu cikungulukilo cenu linga mu puisemo cinanga cikuavo ci na hatako. Vunoni puenu na ku vuluka ntsimbu yose ngecize mbatizimu ka ya kele na vumanusuilo, vunoni vuputukilo. Muomu ya pua ku putuka ku pangela Yehova kaha ku lingamo ka ca kele na vumanusuilo. Ngeci mukemuo, kaniamesenu cilemo cenu na Isuenu ua muilu mu ntsimbu ino vene. Kaha lihakelenu vizango vize vi ka mi kuasa ku kolesa cilemo cenu tangua na tangua. Ku lingamo, ci ka mi kuasa ku heta ku mbatizimu. Litangua lia mbatizimu lika pua litangua lia ndzolela ya kama, vunoni ovu vu na pu lika vuputukilo. Ngeci mukemuo, tua vundila ngecize cilemo cenu muli Yehova na kuli Muaneni, ci tualeleho ku kola ku miaka yose ya ya-ye!