Omo lia vika uze yala u va lukile nguavo “Ngandi,” ua handekele ngueni, ku ambata Lute ci ka pihisa vusuana vueni? (Lute 4:1, 6)

Ku ntsimbu i va sonekele Mbimbiliya, nga umo yala ua mbata ua tsile ca ku hona ku seza muana, kua kele vimo vihula via tondekele ku vikumbulula. Ngeci mua, vati va linga lihia lia seza? Vuno lizina lieni, lizimangana ku miaka yose ya ya-ye ni? Vunoni masiko a Njambi kuli Mosesa, a hanene vikumbululo ku vihula viaco.

Vati va pandele ku linga lihia lia sile muntu nga na tsi ni via landesele nga ali mu vuhutu? Muanaye ni umo kavusoko ua ha hiehi, ua pandele ku kula lihia liaco. Ku lingamo, ca lingisile mangana lihia kati litunde mu vusoko.—Levi. 25:23-28; Num. 27:8-11.

Vati va lingile mangana lizina lia mutsi kati lizimangane? Va pandele ku lingamo ku hitila mu vulo na niali ya muntu kaha evi vikevio via solokele kuli Lute. Yala ua pandele ku ambata niali yeni ni nguetu ntuluue ya sezele muanaye linga va seme muana uze ue ku puile suana mu ku hindula lizina lia uze ua tsa na ku hinga ha vusuana vueni. Eli lisiko, lia kuasele mukua ntuluue.—Ndeu. 25:5-7; Mat. 22:23-28.

Tu hilulenu naua lungano lua Naomi. Ikeye ua sombokele kuli umo yala, lizina lieni Elimeleke. Kaha omo ya lieni na vana veni va vamala va tsile, ua salele ua ngoco ca ku hona vukuasi. (Lute 1:1-5) Ngeci mukemuo, mua hilukile mu Yunda Naomi ua sikile nayemueno Lute, a ka vundile Mboaze linga a ku pue nguli yeni. Muomu Mboaze ua puile kavusoko ua ha hiehi ua Elimeleke. (Lute 2:1, 19, 20; 3:1-4) Vunoni Mboaze, ua nongonuene ngecize kua kale naua kavusoko ua ha hiehi cikuma, u ya luka Mbimbiliya nguayo “Ngandi.” Kaha ou kavusoko kaco, ikeye ua kele na mpoko ya ku pua nguli ua katete.—Lute 3:9, 12, 13.

Ha katete, “Ngandi” ua tondele ku kuasa. (Lute 4:1-4) Vutuhu ca tondekele ku pangesa vumo vufuko vueni mu ku vi puisamo, vunoni ua nongonuene ngecize Naomi ka hasa naua ku sema muana na umo uahi linga a ka suane Iihia lia ise Elimeleke. Ngeci mukemuo, lihia liaco lie ku puile lieni. Ngeci ua muene ngueni vutumbe vuaco vua puile vua cili.

Vunoni Ngandi ua aluluile visinganieka vieni, mu va mu lekele nguavo na pande ku ambata Lute. Ua handele ngueni: “Ka nji hasa ku li kula ange ivene, ku tina nji pihise vusuana vuange.” (Lute 4:5, 6) Vika via mu lingisile ku alulula visinganieka vieni?

Nga uze Ngandi ni umo ueka ua ambatele Lute na ku sema muana ua yala, muana uaco nga ikeye ua suanene lihia lia Elimeleke. Vati honi ku lingamo “ce ku pihisile vusuana vua Ngandi”? Mbimbiliya ka ya vi lomboluele. Vunoni tu hilulenu vimo halumo vie ku lingisile ngoco.

• Ca ku livanga, halumo vimbongo vieni vie ku ile mu ngoco, muomu lihia lia Elimeleke lie ku puile lia muntu ueka. Ni nguetu lia muana ue ku semene Lute.

• Ca mu civali, nga ua kele na citeli ca ku suka na ku niunga kati lika Lute, vunoni na Naomi.

• Ca mu citatu, nga Lute ua semene vana vakuavo ku hitila muli Ngandi nga navo ve ku kele na mutamba hamo lika na vana halumo va livangele ku kala navo ikeye.

• Ca mu ciuana, nga Ngandi ka kele na muana na umo uahi kaha muana ue ku semene Lute nga ikeye ue ku suanene lihia lia Elimeleke na lihia lia Ngandi. Mu ku lingamo, lihia lieni lie ku ile kuli muana ua semenene mu lizina lia Elimeleke kati mu lizina lieni. Ngeci mukemuo, ka tondele ku haka vusuana vueni mu vusonde mu ku kuasa lika Naomi. Ku lingamo, ua tavesele nguli ua mu hatele ni nguetu Mboaze linga a lingemo ikeye. Kaha Mboaze ua tavele ku lingamo, muomu ua tondele mpundu “ku sangula lizina lia mutsi.”—Lute 4:10.

Cimoneka ngue Ngandi ua tondele lika vene ku niunga lizina lieni na vusuana vueni, ku nahu. Ku lituameka ikeye ivene, ca puputisile visinganieka vieni. Vunoni ngandi ua lisinine ngoco ku seteka ku niunga lizina lieni, muomu na lelo lino lizina lieni ka tu litantekeya. Cikuavo naua, ua liputuisile citeli ca tambuile Mboaze. Kaha omo liaco, Mboaze va mu tumbula ha mukana ua vantu ua ku vusoko ua ku semukilile Mesiya, ni nguetu Yesu Kilistu. Mua vusunga, omo lia ku tuameka vizango vieni, Ngandi ua vianene ku kuasa mukuavo ua tondekele vukuasi, kaha ua liputuisele via vingi!—Mat. 1:5; Luka 3:23, 32.