KU laza, kasongo ua puile ngamba ua kele na ku niunga viuma via ha ndzivo ya muntu ueka ni vikuata vieni. Lizi lia ciHevelu na ciNgelengu li va langulula nguavo “kasongo” vintsimbu vimo liemanene ntuamena ni mukua ku endesa viuma ha ndzivo.

Omo Yosefe, muana Yakomba ua puile ndungo ku Ingito, va mu puisile kasongo ka ndzivo ya sukulueni. Mbimbiliya nayo ya tava ou muzimbu, nguayo “viose via kele navio [sukulueni] ua vi kundikile ku livoko” lia Yosefe. (Njen. 39:2-6) Kaha mu nima ya ntsimbu, omo Yosefe va mu hakele ku vukama mu Ingito, neni ua hanguile umo kasongo endese viuma ha ndzivo yeni.—Njen. 44:4.

Ku matangua a Yesu, vakua ku fuka mehia va kele mu vimbonge, ku laako na mehia avo. Ngeci va kele na ku hangula tusongo linga va tuamenene vandimi mu vipanga via tangua na tangua ku mehia.

Muntu ua cifua cika va kele na ku hangula ku pua kasongo? Kolumela, umo mukua ku soneka mizimbu ya Loma ua ku sekulu ya ku livanga, ua mamuine vampite ngueni nkala ngamba ha ku mu puisa kasongo noho “a pue mukua vutongue mu ku linga cipanga.” Ua pandele ku pua muntu “ue ku tuamenene vipanga ca ku hona vulenda kaha ca ku hona vukenia.” Kolumela ua vuezeleko ngueni: “Vunoni cuma ca seho ca tondekele kuli kasongo ca puile kati a limone ngue a tantekeya viose, vunoni a kale na cizango ca ku lilongesa viuma via viha.”

Mbimbiliya ya pangesa cimueso ca kasongo mu ku muesa vimo vipanga vie ku lingika mu cikungulukilo ca Vakua Kilistu. Ca ku muenako, kapostolo Petulu ua kaniamesele Vakua Kilistu va pangese vuana vuavo vu va tambuile kuli Njambi, ngue tusongo ni nguetu “vangamba va cili va kavumbi ka Njambi.”—1 Pet. 4:10.

Yesu neni ua pangesele eci cimueso ca kasongo mu cisimo ci va soneka ku Luka 16:1-8. Cikuavo naua mua hele vupolofeto vua ku soloka ceni mu ku pua Muangana, Yesu ua kulahesele vakua ku mu kava ngecize a ka va hanguila “mukuamanda ua cili mukua mana” ni nguetu “kasongo ua cili mukua mangana.” Cipanga ca kasongo uaco ce ku puile ku hana via-ku-lia via mu lutsilielo kuli vandongesi va Kilistu ku matangua a ku kotokela. (Mat. 24:45-47; Luka 12:42) Mua vusunga, muntu ku muntu, tue ku santsela cikuma mu ku pua umo ua vaze ve ku tambula mikanda ye ku kaniamesa lutsilielo, ye ku tuhula kasongo ua cili na ku i tepela ku vantu mu mavu ose.