1. Yehova ua tu tavesa ku linga vika?

YEHOVA ua tu tavesa ku lihanguila etu vavene cifua ca ku yoyelamo. Vunoni ka tu ecelele ngoco, ue ku tu longesa mua ku lingila vihangula via cili. Kaha mu tue ku linga vihangula via cili, vize vie ku mu ya ku mutima, ue ku tu vezikisa. (Visa. 119:173) Ngeci mukemuo, nga tu tualelelaho ku kava mana a mu Lizi lia Njambi, tue ku vuezelela vunongotima vuetu vua ku linga vihangula via cili.​—VaHe. 5:14.

2. Citanga cika tu hasa ku pinda naco mu nima ya ku linga cihangula?

² Vunoni ambe vene nga tu na lingi cihangula ca cili, vintsimbu vimo ci hasa ku tu kaluuila ku ci puisamo. Talenu amo malungano: umo muanetu ua mukuendze a likuminia ku tanda Mbimbiliya mu vutuntu. Kaha a putuka ku i tanda na ku tualelelaho vuino mu visimano via katete, vunoni a likelela ha kati. Umo ndumbuetu a hangula ku putuka vupioneiro vua ntsimbu yose, vunoni a nakuila-nakuila ku lutue litangua lia ku putuka mpundu. Vakuluntu va cikungulukilo va likuminia mu cimo ciuano cavo, nguavo, va lihakela kapandi ka ku linga-linga mangendzi a ku meneka vampanga, vunoni mu nima ya vingonde via vingi kasi na vimo viahi va na lingiko. Evi vihangula vi tua tumbula via liseza, vunoni kuli hamo ha vi na lifuila viose. Vamuanetu vaco va lingile vihangula vunoni ka va hasele ku vi puisamo. Vakua Kilistu ku mbonge ya Kolintu navo va pindile na citanga ngeci mueci. Tu talenu vika tu hasa ku lilongesa kuli vakevo.

3. Cihangula cika va lingile Vakua Kilistu ku Kolintu, vunoni vika via solokele?

³ Kampe mu muaka ua 55 T.K.N, vamuanetu ku Kolintu va lingile cimo cihangula ca seho. Vamuanetu vaco va vuile nguavo vamuanetu va mu Yelusalema na Yundeya vali mu lamba na vuhutu, kaha vikungulukilo vi li na ku kungulula vimbongo linga vi ka kuase vaze vamuanetu. Ngeci ngozi na vuhuanga via sindiyile vamuanetu  va ku Kolintu navo va tumeko vumo vukuasi, kaha vehuile kapostolo Paulu vati va hasa ku lingamo. Paulu ua va lekele vati va hasa ku kuasa kaha ua hanguile Tito a va kuase ku kungulula vimbongo viaco. (1 Kol. 16:1; 2 Kol. 8:6) Vunoni mu nima ya vimo vingonde, Paulu ua vuile ngecize vakua Kolintu ka va puisilemo vi va likuminyine. Kaha ka ci ka tava ku tuma vuana vuavo ku Yelusalema hamo lika na vuana vua tundile ku vikungulukilo vieka.​—2 Kol. 9:4, 5.

4. Ngue mu ua tsindika 2 Kolintu 8:7, 10, 11, Paulu ua kaniamesele vamuanetu ku Kolintu va linge vika?

⁴ Vaze Vakua Kolintu va lingile cihangula ca cili, kaha Paulu ua va sangalele omo lia lutsilielo luavo lua ku komouesa na cimbembesi ca vuhuanga ci va kele naco. Vunoni ua pandele naua ku va kaniamesa va manusule vi va putukile. (Tandenu 2 Kolintu 8:7, 10, 11.) Via solokelele Vakua Kolintu vi tu kuasa ku mona ngecize cipue Vakua Kilistu va ku ononoka, navo ci hasa ku va kaluuila ku puisamo cihangula ca cili.

5. Vihula vika tu simutuila mu cilongesa cino?

⁵ Ngeci mua Vakua Kilistu ku Kolintu, nenu ci hasa ku mi kaluuila ku puisamo vihangula vienu. Omo lia vika? Omo lia ku hona ku tantuluka, tu hasa ku kala na ciizilila ca ku nakuila-nakuila ku lutue viuma. Ni visoti via ku tungumuna vi hasa ku tu vindika ku puisamo vi tua likuminyine. (Ekel. 9:11; Loma 7:18) Vati tu hasa ku hilula cihangula ci tua lingile ku nima na mona nga ci tondeka ku ci sungamesa ni ku ci alulula? Vati tu hasa ku lihakela kapandi ka ku manusula vi tue ku putuka?

6. Omo lia vika vimo vihangula vi hasa ku tondeka ku vi alulula?

⁶ Vimo vihangula via kama ka ve ku vi alulula. Ca ku muenako vihangula ngeci mua, ku pangela Njambi na ku kakatela kuli mukua ndzivo yetu, ka tua pandele ku vi alulula. (Mat. 16:24; 19:6) Vunoni kuli vimo vihangula citava ku vi alulula. Omo lia vika? Muomu cifua ca muono ce ku aluluka. Vinanga vika honi vi hasa ku tu kuasa ku linga vihangula via cili cikuma?

7. Vika tua pande ku vundila kaha omo lia vika?

⁷ Puenu na ku vundila mana kuli Yehova. Yehova ua huiminine Tiango ku soneka ngueni: “Nga umosi ha kati kenu na zela mangana, a a vundile kuli Njambi, ou ue ku hana-hana via vingi ku vose.” (Tia. 1:5) Tu vose “tua zela mangana” ku vimo viuma. Ngeci mukemuo, puenu na ku haka Yehova mu nkala cihangula ci mu linga, na ku mu hakamo naua nga cihangula caco ci tondeka ku ci alulula. Nga mu lingamo, Yehova a ka mi kuasa ku linga vihangula via mana.

8. Ku tondesesa cika tua pande ku linga ntsimbu kanda tu linge cihangula?

⁸ Puenu na ku tondesesa. Puenu na ku tonda vitume mu Lizi lia Njambi na vimamuna via mu mikanda i lue ku tuhula lukungulukilo ni ku handeka na umo muanetu u mua kulahela. (Visi. 20:18) Ku linga evi, ca tondeka ntsimbu kanda mu linge cihangula, ngeci mua: ku alulula cipanga, ku nunguluka, ni ku hangula haka mu lengela ku sikola linga mu hase ku ka uana kacipanga ka ku likuasa nako oku mu tualelelaho ku pangela Yehova.

9. Vati ku pua vakua vusunga kuli etu vavene ci hasa ku tu kuasa?

⁹ Puenu na ku hilula vika via mi lingisile ku linga cihangula: Yehova ua haka seho ku vutumbe vue ku tu lingisa ku linga viuma. (Visi. 16:2) Kaha ua tonda tu pue vakua vusunga mu viuma viose. Ngeci mukemuo, nga tu linga cihangula tua pande ku pua vakua vusunga kuli etu vavene na kuli vakuetu, ku tuala ha vika mpundu vi na tu lingisa ku linga cihangula caco. Muomu nga ka tua puile vakua vusunga mu ku linga cihangula, ci ka tu kaluuila ku ci puisamo. Ca ku muenako, umo muanetu ua mukuendze a hasa ku likuminia ngueni a pua pioneiro ua ntsimbu yose. Vunoni, mu nima ntsimbu ci putuka ku mu kaluuila ku puisamo viola via tondeka, kaha na ndzolela ya ku ambulula i mu tunda. Halumo ua singaniekele  ngueni ku lema Yehova cikeco ca mu lingisile ku lisonekesa vupioneiro. Nkuma houe, cizango ca ku ya visemi veni ku mutima ni vene cizango ca ku ya mutima ua umo muanetu ya lema, cikeco ca mu lingisilemo!

10. Vika via tondeka linga muntu a hase ku alulula vimo mu muono?

¹⁰ Aci singaniekenu co hali umo ndongesi ua Mbimbiliya a likuminia ku likela ku sipa. Ha katete a lisuma ku mazo na ku likela ku sipa mu simano imo ni vivali, vunoni mu nima yaco a uila naua mu citanga ceni. Kaha mu nima ya ku lihakela kapandi ka kama, na hasa ku likela ku sipa! Omo lia vika? Na hasa ku vula ku tenguka caco, omo lia ku lema Yehova nomo lia cizango ceni ca ku linga vize vie ku ya Yehova ku mutima!—Kolo. 1:10; 3:23.

11. Omo lia vika ku puisamo vihangula ca tondeka ku kala na vutumbe mpundu?

¹¹ Kalenu na vutumbe mpundu. Nga muli na vumo vutumbe vu mu tonda ku puisilamo cihangula cenu, ci ka mi puila ca casi ku manusula vi mue ku putuka. Ca ku muenako, mu hasa ku likuminia ku tanda Mbimbiliya matangua ose, vunoni nga ka mu lingi imo programa, ci ka mi kaluuila ku puisamo cihangula cenu. * Ni vakuluntu mu cikungulukilo va hasa ku likuminia ku pua na ku linga mangendzi a ku meneka vampanga, vunoni mu nima ya imo ntsimbu, kasi kavesi na ku vi puisamo. Linga va vi puisamo va hasa ku lilinga vihula ngeci mua: “Vuno tu na hangula laza vamuanetu veya mpundu va tondeka ku va meneka ni? Tu na hangula mpundu ntsimbu ya ku ka va meneka ni?”

12. Vimo vihangula vie ku tondeka ku vi linga vati, kaha omo lia vika?

¹² Kati mu likuminie viuma ka mu hasa ku puisamo. Hano ha mavu, ka ha kele muntu na umo uahi, ue ku puisamo viose via tonda. Ngeci mukemuo, puenu va ku votsika na ku likuminia vize vi mu hasa ku puisamo. Nga kuli cimo cihangula ci mu mona nguenu ci tondeka ku ci alulula muomu mua likuminyineco ngoco, vunoni ka mu hasa ku ci puisamo, citava ku ci alulula. (Ekel. 3:6) Vunoni vati nga mu na hilula cimo cihangula ci mua lingile, kaha mua mono nguenu kasi citava mu ci puisemo? Vika vi hasa ku mi kuasa? Tu hilulenu vinanga 5 vi hasa ku mi kuasa ku puisamo viuma vi mua putukile.

13. Vati mu hasa ku uana ndzili ya ku puisamo cihangula cenu?

¹³ Vundilenu ndzili ya ku ci puisamo. Njambi a hasa ku mi hana “cizango” na ndzili ya ku puisamo cihangula cenu. (Filp. 2:13) Ngeci mukemuo, puenu na ku vundila ndzili kuli Yehova a mi kuase ku hitila mu sipilitu santu yeni. Kaha kakatelenu ku ku vundila cipue nga mu mona ngue cikumbululo ca vivundilo vienu ci li na ku simbula. Muomu Yesu ua tu kulahesele ngueni: “Vundilenu, kaha va ka mi hia [sipilitu santu].”—Luka 11:9, 13.

14. Vati citume ca ku Visimo 21:5, ci hasa ku mi kuasa ku puisamo cihangula cenu?

¹⁴ Kanenu vati mu puisamo cihangula cenu. (Tandenu visimo 21:5.) Na umo uahi ue ku puisamo vutumbe vueni, nga ka tumama ha mavu na ku singanieka vati a vu linga. Kaha ca tondeka naua ku kava vize via na kanene. Na vuno vene, nga mu linga cihangula, puenu na ku soneka vinanga viose vi mu tonda ku kava mu ku ci puisamo. Nga muli na cipanga ca cikalu, ci tepenu mu tumitamba tua tundende. Ku lingamo, ci ka mi asiuisa ku mona haka muli na ku endela. Paulu ua lekele vakua Kolintu va pue na ku tulika-tulika ka mulambu ha “litangua lia ku sangumuka simano,” ku hiana va vandamene noho he ku izilile ikeye, amba va sekasiane honi via ku kungulula milambu. (1 Kol. 16:2) Ku tepa cipanga ca kama mu tu vipanga tua tundende, ci hasa ku mi kuasa linga kati mu livue ngue cipanga caco ka mu hasa ku ci puisamo.

15. Nga mu tonda mpundu ku puisamo cihangula cenu vika mu hasa ku linga?

 ¹⁵ Nga mu tonda mpundu ku puisamo cihangula cenu, kati ci pue ca mu kanua lika, ci sonekenu vati mu ci puisamo. (1 Kol. 14:40) Ca ku muenako, vakuluntu mu vikungulukilo va tambuile cimamuna ca ku hangula umo mukuluntu a pua na ku soneka nkala cihangula ci va linga. Mukuluntu uaco ue ku soneka naua, iya a kavangeya cihangula caco kaha tangua lika ca pande ku ci puisamo. Mua vusunga, vivunga via vakuluntu vie ku kava eci cimamuna, ce ku va puila ca casi ku puisamo vihangula viavo. (1 Kol. 9:26) Nenu mu hasa ku temunuina eci cimamuna mu vihangula vienu. Ca ku muenako, mu hasa ku pua na ku soneka viuma vi mu tonda ku puisamo tangua na tangua na ku vi noneka mu cifua ci mu tonda ku vi puisilamo. Evi, ka vi ka mi kuasa lika ku puisamo vi mue ku likuminia, vunoni na ku linga via vingi mu ntsimbu ya indende.

16. Vika via tondeka cikuma mu ku puisamo cihangula cenu, kaha vati Loma 12:11 ya muesa vusunga vuaco?

¹⁶ Pangenu na ndzili. Ku puisamo vi mue ku likuminia ca tondeka ku lihakela kapandi ka kama. (Tandenu Loma 12:11.) Paulu ua lekele Timoteo a tualeleho ku lihakela kapandi na ku kakatela ku vilongesa linga a pue mulongisi ua vutongue. Cimamuna caco citava naua ku ci pangesa na ku vizango vikuavo via mu lutsilielo.—1 Tim. 4:13, 16.

17. Vati tu hasa ku pangesa Efeso 5:15, 16, mu ku puisamo cihangula cetu?

¹⁷ Pangesenu ntsimbu yenu na mana. (Tandenu Efeso 5:15, 16.) Hangulenu ntsimbu ya ku pangela ha cihangula cenu, kaha likuatelelenu ku ntsimbu yaco. Kati mu i alulule. (Ekel. 11:4) Zangamenu linga viuma via seho ya indende kati vi mi lie ntsimbu na ndzili, i mu ka tondeka mu linga viuma via seho ya kama. (Filp. 1:10) Nga citava, hangulenu ku puisamo cihangula cenu ha ntsimbu ka yesi na vitanganeso via vingi. Vakuenu navo va vundilenu kati va mi tanganese. Cikuavo naua, nga citava, zimenu telefone yenu na ku tala vimesaje ni viemail ha ntsimbu yeka. *

18-19. Vika vi hasa ku mi kuasa linga kati mu likele ku puisamo cihangula cenu ambe nga vimo vi mi hiluisila mu nima?

¹⁸ Tualenu mana ku viuma vi ci ka puisamo cihangula cenu. Viuma via cili vie ku iza mu ku puisamo cimo cipanga, via pua ngue ku heta ku cimo cihela ci mu tonda kuya. Mu ka linga cose mu ka hete ku cihela caco. Ambe nga ku heta ha kati tapalo va na i ziki, mu ka tonda yeka. Na vuno vene, nga tu tuala mana ku viuma via cili vi keza mu cihangula cetu, ka tu ka likelela ha kati ambe nga ku kala vimo vi tu hiluisila mu nima.—Ngal. 6:9.

¹⁹ Ku linga vihangula via cili ca cikalu, kaha ku vi puisamo naco ca cikalu. Vunoni Yehova a hasa ku mi hana mana na ngolo i mua tondeka mu ku manusula vi mue ku putuka.