1-2. (a) Vika vie ku tu kuasa ku kolesa tangua na tangua? Lombololenu. (b) Vika tu lilongesa mu cilongesa cino?

“MU NJE ku singanieka ha visoti vi nja lihita navio, nje ku mona ngecize nga ku ndzili yange lika nga ka nja hasele ku vi vula.” Nenu mua handekaho laza mezi ngeci mua aa ni? Cingi cetu, tua handekamo laza. Halumo mua a handekele mu nima ya ku singanieka ha ku kolesa ci mua muesele mu mua pindile na vumo vuvezi vua kama ni mu nima ya ku tsa ca umo kavusoko. Mua vusunga, mu mue ku hilula ha nkala cisoti ci mua lihitile naco, mue ku mona nguenu mua hasele ku kolesa tangua na tangua, muomu Yehova ua mi hanene “ngolo ya ku hiana cikumakuma” ku hitila mu sipilitu santu yeni.​—2 Kol. 4:7-9.

² Sipilitu santu ye ku tu kuasa naua ku lua na ku kokola ca ano mavu. (1 Yoa. 5:19) Cikuavo naua tue ku lua na “vimbembesi via vipi.” (Efe. 6:12) Omo tu singanieka ha vindzita viose evi, tu hilulenu ha vinjila vivali vi tu hasa ku tambuilamo vukuasi vua sipilitu santu. Mu nima yaco, tu simutuila vi tu hasa ku linga mangana sipilitu santu i tu kuase mu vutuntu.

3. Tumbulenu imo njila ye ku tu kuaselamo Yehova ku lua na visoti.

³ Sipilitu santu ye ku tu hana ngolo ni nguetu ndzili, ya ku puisamo viteli vietu vutuhu tue ku hita mu visoti. Kapostolo Paulu ua handekele ngueni vutuhu ua kele na ku hita mu visoti, vunoni ua hasele lika ku tualelelaho ku panga, muomu ua kulahelele mu “ngolo ya Kilistu.” (2 Kol. 12:9) Mu vungendzi vueni vua mu civali vua vumisionaliu, Paulu ka fuitanganene lika mu ku ambulula, vunoni na mu ku tonda via ku lisuka navio. Ua ka kele ku Kolintu, ku ndzivo ya Akuila na Pilisila, vakua ku panga vimbalaka ni nguetu vitenda. Mu ku linga Paulu neni ua puile mukua ku panga vitenda, ua pangesele umo mutamba ua ntsimbu yeni mu ku panga navo. (Vili. 18:1-4) Sipilitu santu ya kuasele Paulu kati lika  mu ku tonda via ku lisuka navio vunoni na ku puisamo cipanga ca ku ambulula.

4. Kuliya na 2 Kolintu 12:7b-9, vika ua kele na ku pinda navio Paulu?

⁴ Tandenu 2 Kolintu 12:7b-9. Cisoti cika ua pindile naco Paulu ca lukile ngueni “lumbimbo mu muvila”? Lumbimbo nga lu tuva muntu na ku mu sakamena, ue ku ivua ku vavala ca kama. Na vuno vene, Paulu ua kele na ku handeka ngueni ua kele na cimo cisoti ca kele na ku mu yandesa cikuma. Cisoti caco ua ci lukile ngueni “kanganda ka Satana” ua kele na ku mu “veta-veta.” Citava Satana ni vandemone veni kati vakevo mpundu va kokelele Paulu cize cisoti ca kele na ku mu tuva ngue lumbimbo. Vunoni ava vimbembesi va vapi va muene citanga ca Paulu, ngeci va ci vuezelelele, ngue muntu a sindika lumbimbo mu muvila ua mukuavo. Vati ua lingile Paulu?

5. Vati Yehova ua kumbuluile vivundilo via Paulu?

⁵ Ha katete Paulu ua tondele ku mu tundisa “lumbimbo” luaco. Ivene ngueni: “Omo cuma eci nja ci lambelelele zintsimbu zitatu kuli Muangana [Yehova], nguange ci nji fume.” Vunoni, vutuhu Paulu ua kele na ku vundila, cisoti caco ca tualeleleho. Vuno eci ca lomboloka ngecize Yehova ka kumbuluile vivundilo via Paulu ni? Houe. Ua vi kumbuluile. Vutuhu Yehova ka tundisile cize citanga kuli Paulu, vunoni ua mu hanene ngolo ya ku kolesa mu citanga caco. Yehova ua lekele Paulu ngueni: “Ngolo yange i puisamo mu ku zeya.” (2 Kol. 12:8, 9) Ni nguetu, vutuhu Paulu ua puile muntu ua ku zeya, sipilitu santu ya Yehova ya mu kuasele ku tualelelaho ku kolesa mu cisoti caco na ndzolela na ciyulo mu mutima!​—Filp. 4:4-7.

6. (a) Vati Yehova a hasa ku kumbulula vivundilo vietu? (b) Ku lembezieka cika mua uana mu mikanda i va na tumbula mu cinanga?

⁶ Nenu mua lambelelaho laza Yehova a mi ohiele ku cimo ceseko, ngeci mua Paulu ni? Kaha vutuhu mua lambelelele cisoti caco ka ca huile vunoni ca tualelelaho ku livuezelela ni? Nga mukemuo, citava mua lisosomuene nguenu halumo kuli vimo vi mua pihisa kuli Yehova, ni vati? Vunoni vulukenu via lihitile navio Paulu. Yehova ua kumbuluile vivundilo vieni. Ngeci mukemuo, nenu kalenu na vusunga ngecize a ka kumbulula vivundilo vienu! Halumo Yehova ka ka tundisa mpundu cisoti cenu, vunoni ku hitila mu sipilitu santu yeni, a ka mi hana ngolo ya ku kolesa mu cisoti caco. (Visa. 61:3, 4) Ambe nga cisoti caco ci ka mi “uisa ha mavu” vunoni Yehova ka ka mi seza.​—2 Kol. 4:8, 9; Filp. 4:13.

7-8. (a) Mu njila ika sipilitu santu ya pua ngue mpundzi? (b) Vati Petulu ua muesele cifua ci ye ku pangelamo sipilitu santu?

⁷ Mu njila ika naua ye ku tu kuasa sipilitu santu? Tu hasa ku setekesa sipilitu santu na mpundzi. Mpundzi nga i na tala ku lutue, i hasa ku ku sindika mbapolo i ka hete vuino kuze ku i ya, ambe nga mu kalunga ndonga muli mankimba a kama. Sipilitu santu nayo i hasa ku tu sindikila ku lutue, linga tu ka hase ku heta mu mavu a aha a Njambi, ambe nga visoti via mu mavu ano vi seteka ku tu hiluisila mu nima.

⁸ Mu ku linga kapostolo Petulu ua puile mukua ku tsiha vantsi, ku enda na mato ca puile ca vundambo kuli ikeye. Evi halumo vikevio via mu lingisile ku pangesa lizi lia likuata na ku enda ca mato, mua lomboluele cifua ci ye ku pangelamo sipilitu santu. Ua sonekele ngueni: “Muomu vupolofeto na vumo vuahi vuezile ku cizango ca muntu: vunoni vantu va handekele via Njambi omo Sipilitu Santu ua va pangesele.” Lizi lia ciNgelengu li va langulula nguavo “ua va pangesele” lia lomboloka “ya va hungumuine; ya va sindikile.”​​—2 Pet. 1:21.

9. Ku viuma vika Petulu ua tundisile lizi “ya va pangesele” lia tumbuile? Lombololenu.

⁹ Vika tue ku singanieka nga tu ivua lizi “ya va  pangesele” ni nguetu “ya va sindikile” lia tumbuile Petulu? Luka, neni ua pangesele lizi lia ciNgelengu lia ku lifua neli, mua sonekele mukanda ua Vilinga. Ua muesele ngecize vuato vue ku ‘hungumuka’ na mpundzi. (Vili. 27:15) Ngeci mukemuo, umo mukua ku lombolola Mbimbiliya ua handekele ngueni, omo Petulu ua handekele ngueni vakua ku soneka Mbimbiliya ‘va va hungumuine ku sipilitu santu’ ua pangesele cimueso ku tovala cikuma, ca mato mu kalunga ndonga. Cinapu ngue Petulu ua handekele ngueni, ngeci mua mpundzi ye ku sindika vuato vu ka hete kuze ku vu ya, vapolofeto na vakuavo vakua ku soneka Mbimbiliya va va sindikile ku sipilitu santu linga va puisemo cipanga cavo. Mukua ku lombolola Mbimbiliya uaco ua handekele naua ngueni: “Ca puile ngue vapolofeto va tusuile vitenda via ku mato avo” linga sipilitu santu i va pangese. Kaha Yehova ua va pangesele vene. Ua va hele “mpundzi” i va tondekele ni nguetu sipilitu santu linga va puisemo cipanga ca va hanene. Kaha navo vononokele ku ku tuamenena ca sipilitu yaco.

10-11. Vinanga vika vivali tua pande ku puisamo linga tu tambule vukuasi vua sipilitu santu? Hanenu cimueso.

¹⁰ Vutuhu ntsimbu ya ku soneka Mbimbiliya ya hua laza. Vunoni Yehova kasi ue ku lingako mutamba ueni. Ue ku hana sipilitu santu yeni linga i tuamenene vangamba veni. Vati honi tu hasa ku tambula mu vutuntu vukuasi vua sipilitu santu? Mu ku lingako mutamba uetu. Vati tu hasa ku lingamo?

¹¹ Tu ci singaniekenu ha cimueso eci, linga mpundzi i kuase mukua ku sunga vuato, na pande ku linga viuma vivali. Ca katete, na pande ku talekesa vuato muze mu na tala mpundzi. Muomu nga a kala lika kua leka ndonga ku laako na mpundzi, mpundzi yaco ka i ka mu kuasa. Ca mu civali, na pande ku tusula mu vutuntu vitenda via vuato, linga vi fukuke. Muomu ambe nga kuli mpundzi vuato ka vu ha hasa ku enda, nga vitenda hanga via ku kuta. Netu tu hasa lika ku tualelelaho ku pangela Yehova na vukuasi vua sipilitu santu. Kaha linga sipilitu santu i tu kuase tua pande ku linga viuma vivali. Ca katete, tua pande ku suena kuze ku ye ku pangela sipilitu  santu, ni nguetu ku linga vipanga via mu lutsilielo. Ca mu civali, tua pande “ku tusula vitenda vietu” mu vutuntu, mu ku linga vipanga via mu lutsilielo na ndzili yetu yose. (Visa. 119:32) Nga tu linga evi, sipilitu santu i ka tu sindika linga tu hase ku tuvakana mankimba a vutozi na vieseko vi tu ka liuana navio, mangana tu ka kovele mu mavu a aha a Njambi.

12. Vika tu lilongesa mu vinanga vi na hatako?

¹² Na hano, tua mono vinjila vivali vi ye ku tu kuaselamo sipilitu santu. Sipilitu santu ye ku tu hana ngolo na ku tu kuasa ku kolesa nga tu hita mu vieseko. Cikuavo, naua sipilitu santu ye ku tu sindika ni nguetu ku tu kuasa ku ya ku lutue na ku tu niunga linga tu tualelelaho ku endela mu njila ya ya ku muono ka ue ku hua. Tu ci talenu honi viuma 4 vi tua pande ku linga mangana sipilitu santu i tu kuase.

13. Kuliya na 2 Timoteo 3:16, 17, vati Mbimbiliya i hasa ku tu kuasa, vunoni vika tua pande ku linga?

¹³ Ha katete, ku lilongesa Lizi lia Njambi. (Tandenu 2 Timoteo 3:16, 17.) Njambi ua pangesele sipilitu santu mu ku “huimina” visinganieka vieni mu mitima ya vakua ku soneka Mbimbiliya. Mu tue ku tanda Mbimbiliya na ku hilula ha mezi ayo, vitume via Njambi vie ku kovela mu visinganieka na mitima yetu. Kaha evi visinganieka via Njambi vie ku tu lingisa tu tombuese muono uetu ku cizango ceni. (VaHe. 4:12) Linga sipilitu santu i tu kuase mu vutuntu, tua pande ku hangula ntsimbu ya ku pua na ku lilongesa Mbimbiliya ku sua kumo, na ku hilula na civando ha viuma vi tue ku tandamo. Nga tu lingamo, Lizi lia Njambi li ka tuamenena vihandeka vietu na vilinga vietu viose.

14. (a) Omo lia vika tu hasa ku handekela nguetu ku viuano vietu ku “kukekuo kue ku hita mpundzi” ni nguetu sipilitu santu? (b) Vati tu hasa ku kunguluka “oku tu na tusula vitenda” via mato etu?

¹⁴ Ca mu civali, ku likungulula mu ku lemesa. (Visa. 22:22) Tu hasa ku handeka nguetu ku viuano vietu “kukekuo kue ku hita mpundzi.” Ni nguetu ku viuano vietu kua kala sipilitu santu ya Yehova. (Ku-So. 2:29) Omo lia vika tu handekela ngoco? Muomu mu tue ku lemesa na vamuanetu Vakua Kilistu, tue ku vundila sipilitu santu, tue ku imba miaso ya Vuangana ya ku tundisa mu Lizi lia Njambi, kaha tue ku halakana ku vitume via Mbimbiliya vi ve ku tu longesa vamuanetu va ya hangula sipilitu santu. Sipilitu santu ye ku kuasa naua vandumbuetu ku liviukisila mitamba yavo na ku ka i linga mu ciuano. Vunoni linga sipilitu santu i tu kuase, tua pande ku pua na ku liviukisila viuano na ku ka kumbulula. Eci cikeco ca lomboloka ku kunguluka “oku tu na tusula vitenda” via vuato vuetu.

15. Sipilitu santu ya kala na mutamba uka mu cipanga ca ku ambulula?

¹⁵ Ca mu citatu, ku ambulula. Mu tue ku pangesa Mbimbiliya mu cipanga ca ku ambulula na ku longesa Lizi lia Njambi, tue ku tavesa sipilitu santu i tu kuase. (Loma 15:18, 19) Vunoni linga sipilitu santu i mi kuase mu vutuntu, mua pande ku pua na ku ambulula ku sua kumo na ku pangesa Mbimbiliya hose ha ci tavela ku lingamo. Njila imo i mu hasa ku tovaleselamo ku ambulula cenu, ya pua mu ku pangesa vimueso via ku ambulula, via mu mukanda ua viuano via Muono Uetu Vakua Kilistu na Vipanga Vietu.

16. Tumbulenu njila ya kama i tu hasa ku tambuilamo sipilitu santu.

¹⁶ Ca mu ciuana, ku vundila kuli Yehova. (Mat. 7:7-11; Luka 11:13) Njila ya kama i tu hasa ku tambuilamo sipilitu santu, ya pua mu ku i vundila mpundu kuli Yehova. Na vimo viahi vi hasa ku vindika vivundilo vietu vi ka hete kuli Yehova, ni ku vindika sipilitu santu yeni ku heta kuli etu, cipue vivumbe via kamenga ni vene Satana ka hasa. (Tia. 1:17) Vati honi tua pande ku vundila linga tu tambule sipilitu santu? Linga tu kumbulule eci cihula, tu konkenu vuino ha vivundilo,  mu ku hilula ha cimo cisimo ca mu livulu lia Luka. *

17. Vika tu hasa ku lilongesa ku tuala ha vivundilo mu cisimo ca Yesu ca ku Luka 11:5-9, 13?

¹⁷ Tandenu Luka 11:5-9, 13. Eci cisimo ca Yesu ca muesa vati tu pande ku vundila sipilitu santu. Yala ua mu cisimo caco, ua tambuile via tondele “omo ntsintsa yeni.” Ka vuile liova lia ku vundila vukuasi kuli kavusamba keni, vutuhu tele mu kati ka vutsiki. (Talenu mu mwb ya Julho 2018, ku tuala ha Luka 11:8.) Vati Yesu ua tokakanene eci cisimo na vivundilo? Mu ku handeka ngueni: “Vundilenu, kaha va ka mi hia; lengeyenu, kaha mu ka uana; totenu, kaha va ka mi sokoluela.” Vika tu lilongesaho? Linga sipilitu santu i tu kuase tua pande ku i vundila na ntsintsa.

18. Kuliya na cisimo ca Yesu, omo lia vika tu hasa ku kala na vusunga ngecize Yehova a ka tu hana sipilitu santu?

¹⁸ Cisimo ca Yesu ca tu kuasa naua ku ivuisisa vika Yehova ue ku tu hanena sipilitu santu. Yala u va tumbula mu cisimo ua tondele ku muesa vuhuanga kuli ngendzi yeni. Ua vuile ntsindiye ya ku zumbula uze ngendzi uezile vutsiki, vunoni ka kele na vimo viahi mu ndzivo. Ngeci ua ile kuli kavusamba keni. Yesu ua handekele ngueni kavusamba ka uze yala ua tavele ku mu hana mbolo muomu ua mu vundilile na ntsintsa. Vika a lomboloka aa mezi a Yesu? Nga muntu ua ku hona ku tantuluka ua tavele ku kuasa kavusamba keni, nkuma Tatetu ua ngozi Yehova ka ka kuasa vaze va mu vundila sipilitu santu na ntsintsa ni? Cili vene, tu hasa ku vundila na vusunga vuose ngecize Yehova a ka kumbulula vivundilo vietu na ku tu hana sipilitu santu yeni!​—Visa. 10:17; 66:19.

19. Omo lia vika tuli na vusunga ngecize tangua tu ka vula?

¹⁹ Tu kalenu na vusunga ngecize, vutuhu Satana ue ku takamesa ku tu luisa linga a tu vule, yetu tu ka mu vula. Omo lia vika? Muomu sipilitu santu ye ku tu kuasa mu vinjila vivali. Ha katete, ye ku tu hana ngolo i tua tondeka mu ku vula vieseko. Ca mu civali, ye “ku sindika vitenda vietu” linga tu tualeleleho ku pangela Yehova oku tu endela mu njila i tuala ku muono ka ue ku hua. Ngeci mukemuo, tu puenu na ku lihakela kapandi ka ku tambula vukuasi vua sipilitu santu!