1. Kuliya na Mateo 28:18-20, lisiko lika ua hele Yesu?

MU NIMA ya ku sanguka ceni, Yesu ua ka lisoluele ku vandongesi veni va kele mu Ngalileya, muomu ua kele na umo muzimbu ua seho ua tondele ku va leka. Muzimbu uka? Tu u uana ku Mateo 28:18-20.—Tandenu.

2. Vika tu lilongesa lelo?

² Lisiko lia Yesu lia ku puisa vantu vandongesi, lia kuata naua ku nkala ngamba ya Njambi lelo lino. Ngeci mukemuo, tu hilulenu vihula vitatu via likuata na cipanga ca tu kundika Yesu. Ca katete, ku tundisako ku longesa vandongesi va vaha masiko a Njambi, vika vikuavo tua pande ku linga? Ca mu civali, vati vakua ku ambulula vose mu cikungulukilo va hasa ku kuasa ndongesi ku kola mu lutsilielo? Ca mu citatu, vati tu hasa ku kuasa vamuanetu va ku zeya va putuke lueka naua cipanga ca ku puisa vantu vandongesi?

3. Cimamuna cika mpundu Yesu ua tumbuile mu lisiko lieni?

³ Yesu ka handekele mu mahungu, via tu sikile via viasi ku vi ivuisisa. Ni nguetu ua tu lekele ku longesa vantu viuma via sikile. Vutuhu ngoco kua kala limo lizi lia seho ka tua pandele ku suvaho. Yesu ka handekele lika ngueni: ‘Na ku va longesa viuma viose vi nja mi sikile, houe.’ Vunoni ngueni: “Na ku va longesa ku niunga viuma viose vi nja mi sikile.” Linga tu kuase vandongesi vetu ku puisamo ou mutamba ua lisiko lia Yesu, ka ca tondekele  tu pue lika valongisi, vunoni tua pande naua ku pua vantuamalutue. (Vili. 8:31) Omo lia vika?

4. Ku niunga lisiko ca lomboloka vika? Hanenu cimueso

⁴ Ku tuala ha masiko, “ku niunga” ca lomboloka ku ononoka. Linga tu hase ku ivuisisa vi ca lomboloka ku kuasa muntu a niunge, ni nguetu, ononoke via sikile Yesu, tu talenu ha cimueso eci. Nga muntu a lilongesa ku endesa likalu, vati mukua ku mu longesa ue ku mu kuasa ku ononoka masiko a mu tapalo? Ha katete, mulongisi ue ku mu longesa masiko a tapalo mu hondo ya vilongesa. Vunoni linga a longese vandongesi veni ku ononoka masiko aco, kuli vikuavo via na pande ku linga. Na pande ku ya navo mu tapalo, na ku va mamuna mua ku niungila masiko aco oku vendesa. Vika tu lilongesa ku cimueso eci?

5. (a) Kuliya na Yoano 14:15 na 1 Yoano 2:3, vika tua tondeka ku longesa vandongesi vetu va Mbimbiliya? (b) Tumbulenu vimo viuma via vati tu hasa ku tuamenena vandongesi vetu.

⁵ Nga tuli na ku longesa muntu Mbimbiliya, tuli na ku mu longesa via tonda Njambi kuli ikeye. Vunoni kuli vikuavo vi tua pande ku linga. Tua pande ku longesa vandongesi vetu va pue na ku pangesa vize vi ve ku lilongesa mu muono ua tangua na tangua. (Tandenu Yoano 14:15; 1 Yoano 2:3.) Ca ku muenako, tu hasa ku longesa vandongesi vetu vati va hasa ku niunga vitume via mu Mbimbiliya, ku sikola, ku vipanga ni ku vueho. Tu hasa ku va leka via umo muzimbu ua mu muono uetu, ua muesa vati ku ononoka vitume via mu Mbimbiliya ca tu niungile ni ku tu kuasa ku linga cihangula ca mana. Kaha omo tu vundila na vandongesi vetu, tu hasa ku vundila Yehova a va tuamenene na sipilitu santu yeni.—Yoa. 16:13.

6. Vika vikuavo tua pande ku linga mu ku longesa vakuetu ku ononoka masiko a Yesu?

⁶ Vika vikuavo tua pande ku linga mu ku longesa vakuetu ku ononoka masiko a Yesu? Tua pande ku kuasa vandongesi vetu va kale na cizango ca ku puisa vantu vandongesi. Vamo vandongesi ve ku ivua liova mu ve ku singanieka ha ku ambulula. Ngeci mukemuo, tua pande ku va muesa lukakatela na ku va longesa mu cifua cize ci ka va kuasa ku ivuisisa vuino, ku va kuata ku mutima, kaha na ku va lingisa va lingeko mumo vakevo vavene. Vati tu hasa ku linga, tu kuase vandongesi vetu va kale na cizango ca ku ambulula?

7. Vati tu hasa ku linga, tu kuase ndongesi a kale na cizango ca ku ambulula?

⁷ Tu hasa ku ihula ndongesi yetu vihula ngeci mua: “Vati ku tava muzimbu ua Vuangana ca mi kuasa mu muono? Mu ku mona cenu, vuno vantu veka navo va tondeka ku ivua muzimbu uaco ni? Vika mu hasa ku linga mu ku va kuasa?” (Visi. 3:27; Mat. 9:37, 38) Lekesenu vitratadu kuli ndongesi yenu, kaha mu hulenu tratadu ika i hasa ku ya ku mutima ua vavusoko, vavusamba ni vakuavo ku vipanga cipue ku sikola. Kaha hanenu ndongesi vimo vitratadu viaco na ku mu lekesa vati a hasa ku linga mu ku hana tratadu yaco. Kaha mu nima ya ku tava ndongesi yetu ku pua mukua ku ambulula ua ku hona ku mbatiza, tu ka tondeka ku tuhuka neni mu lihia linga tu ka mu tuamenene.—Ekel. 4:9, 10; Luka 6:40.

8. Vika ca puila ca seho kuli vandongesi vetu ku lema cikuma Njambi na vantu? (Talenu naua cikasa, “ Mua ku Kuasela Vandongesi va Leme Cikuma Njambi.”)

⁸ Vulukenu ngecize Yesu ua tu sikile ku longesa vakuetu “ku niunga viuma viose” via sikile. Mua vusunga, ku lingamo ca lomboloka naua ku niunga masiko avali a kama a Yesu, ni nguetu, ku lema Njambi na ku lema vakuetu. Kaha aa masiko aco a likuata na cipanga cetu ca ku ambulula na ku puisa vantu vandongesi. (Mat. 22:37-39) Haka a likuatela? Muomu  cilemo cetu kuli Njambi na ku vantu cikeco ce ku tu lingisa ku ambulula. Vutuhu ngoco, vamo vandongesi va Mbimbiliya mu ve ku singanieka ha ku ambulula ve ku ivua liova. Vunoni tu hasa ku va kaniamesa ngecize na vukuasi vua Yehova kamandende-kamandende va ka hasa ku vula liova li ve ku vuila vantu. (Visa. 18:1-3; Visi. 29:25) Cikasa ci li mu cilongesa cino, ca lombolola vinanga vi tu hasa ku puisamo linga tu kuase ndongesi yetu a leme Njambi. Cikuavo naua, vika ci hasa ku linga cikungulukilo mu ku kuasa vandongesi va vaha va lilongese ku muesa cilemo?

9. Vati mukua ku lilongesa ku endesa likalu, ue ku lilongesa viuma via seho?

⁹ Singaniekenu naua ha cimueso ca mukua ku lilongesa ku endesa likalu. Mu vinjila vika ndongesi ue ku lilongesa nga ali na ku endesa mu tapalo? Ue ku lilongesa mu ku halakana kuli mulongisi ueni na ku tala cifua ci vali na ku endeselamo vakuavo va sua laza. Ca ku muenako, mulongisi a hasa ku mu inikila umo mukua ku endesa likalu lieka, ali na ku hana mukuavo vukovelelo vua ku kovela mu tapalo. Ni a hasa ku mu inikila umo mukua ku endesa likalu mukuavo, na tepulula ceke ca ku likalu lieni linga kati a teteke vakuavo vali na ku iza ku lutue lueni mu meso. Vimueso viaco, vie ku kuasa ndongesi ku lilongesa viuma via seho vize via ka hasa ku pangesa, mua kendesa lika lieni.

10. Vika vie ku kuasa ndongesi ua Mbimbiliya ku kola mu lutsilielo?

¹⁰ Na vuno vene, ndongesi ua Mbimbiliya na putuka ku endela mu njila i tuala ku muono, ke ku lilongesa lika kuli mulongisi ueni, vunoni na ku vangamba veka va Yehova, va pua lungano lua cili. Ngeci mukemuo, vika vie ku kuasa cikuma vandongesi va Mbimbiliya ku kola mu lutsilielo? Kuya mu ku kunguluka. Omo lia vika? Muomu vilongesa via mu Mbimbiliya vi ve ku longesa ku viuano, vi ka vueza ku viuma via tantekeya ndongesi ku tuala hali Njambi, vika mu kaniamesa mu lutsilielo, na ku mu kuasa ku kolesa cilemo ceni kuli Njambi. (Vili. 15:30-32) Cikuavo naua, mulongisi ua Mbimbiliya a hasa ku lekesa ndongesi yeni kuli vamo vamuanetu na vandumbuetu va litombola na ndongesi mu via vingi. Ndongesi a hasa naua ku ka mona vinjila via cili via vati Vakua Kilistu va vusunga ve ku limuesa cilemo. Talenu vimueso vi na hatako.

11. Malungano aka a hasa ku mona ndongesi mu cikungulukilo, kaha vati a hasa ku mu kuata ku mutima?

¹¹ Mu lungano lua katete, umo ndongesi ua Mbimbiliya ua lela vana lika lieni, a hasa ku tantekeya umo ndumbuetu neni ua lela vana lika lieni. Ndongesi a hasa ku komoka kapandi ke ku lihakela ndumbuetu mu ku iza na vana veni ku Ndzivo ya Vuangana. Mu lungano lua mu civali, ndongesi ue ku pinda ku likela ku sipa, a hasa ku li tantekeya na umo mukua ku ambulula ua pindile na citanga caco laza, vunoni ua hasa ku ci vula. Mukua ku ambulula uaco a hasa ku lekesa ndongesi, vati ku kola ca cilemo ceni kuli Yehova ca mu sindiyile ku ononoka masiko eni. (2 Kol. 7:1; Filp. 4:13) Kaha mu nima ya ku mu leka muzimbu ueni, mukua ku ambulula a hasa ku leka ndongesi yeni ngueni, “Nenu mu hasa ku likela ku sipa.” Ku ivua muzimbu ueni, ci hasa ku kaniamesa ndongesi ku tualelelaho ku lua. Mu lungano lua mu citatu, umo muanampuevo mukua ku lilongesa Mbimbiliya, a hasa ku mona umo muanampuevo mukuavo ua pua ndumbuetu ua kala mu ndzolela mu ku pangela Yehova. Kaha ndzolela ya mona ndongesi kuli ou ndumbuetu, i hasa ku mu lingisa a tonde ku mu tantekeya vuino, linga a tantekeye lihungu lia ndzolela yaco.

12. Vika tu hasa ku handekela nguetu, nkala muntu mu cikungulukilo ua kala na mutamba mu ku kuasa ndongesi a kole mu lutsilielo?

¹² Omo vandongesi ve ku litantekeya na vamuanetu va ku liseza-seza, ve ku lilongesa ku  malungano avo vi ca lomboloka ku ononoka lisiko lia Kilistu, lia ku lema Njambi na ku lema vantu. (Yoa. 13:35; 1 Tim. 4:12) Kaha helu lia viose evi, ndongesi ua Mbimbiliya, a hasa ku lilongesa vati a lua na visoti vieni mu ku tala kuli vaze va luile navio ku nima ngue mu tu na handeka laza. Kaha mu ku lingamo, ndongesi ue ku lilongesa ngecize viuma via na pande ku alulula mu muono, linga a hase ku pua ndongesi ua Kilistu, a vi hasa, muomu kuli vakuavo va na vi hasa. (Ndeu. 30:11) Nkala muntu mu cikungulukilo, a hasa ku kuasa mu vinjila via ku liseza-seza mu ku kola ca ndongesi ua Mbimbiliya. (Mat. 5:16) Ngeci mukemuo tua pande ku lihula nguetu, kapandi kaka nje ku lihakela mu ku kuasa vandongesi ve ku kunguluka?

13-14. Vati Yesu ua lingile vandongesi veni mu va zeyele?

¹³ Tua tonda ku kuasa vamuanetu va ku zeya, linga va putuke naua ku puisamo lisiko lia Kilistu lia ku puisa vantu vandongesi. Via lingile Yesu ku vandongesi veni va ku zeya, netu vi hasa ku tu kuasa.

¹⁴ Yesu, mua kele ku hiehi na ku manusula cipanga ceni hano ha mavu, kaha tele vuovuno va mu kuata na ku mu tsiha, “vapostolo veni vose va mu sile, va tinine.” (Mako 14:50; Yoa. 16:32) Vati ua lingile Yesu vandongesi veni mu ntsimbu ya yindende i va zeyele? Mu nima ya ntsimbu ya indende tunde ha ku sanguka ceni, Yesu ua lekele vamo vakua ku mu kava, ngueni: “Kati mu ivue vuoma, hamenu mu ka ambulule kuli vana va nana, ngecize nji na sanguka.” (Mat. 28:10a) Yesu ka likelele ku kuasa vandongesi veni. Vutuhu va mu tinine, vunoni kasi ua va sanene ngueni vana va nana. Ngeci mua Yehova, Yesu ua puile mukua cikeketima na mukua ku ecela.—2 Vam. 13:23.

15. Vati tue ku livua ku mitima ku tuala hali vaze va likela ku ambulula?

¹⁵ Ngeci mukemuo, netu tua haka seho ya kama kuli vaze va likela ku ambulula. Va pua vamuanetu na vandumbuetu, kaha tua va lema cikuma! Kasi tue ku vuluka viuma vi va fuitanganene ava vamuanetu na vandumbuetu ku nima, mu cipanga ca Yehova, vamo va fuitanganene mu miaka ya ingi. (VaHe. 6:10) Mua vusunga tue ku va vuila vusona vua kama! (Luka 15:4-7) Ku tuala hali ava vamuanetu, vati tu hasa ku tambuluisa viuma via lingile Yesu?

16. Vati tu hasa ku muesa ngecize tua haka seho ku vamuanetu va ku zeya?

¹⁶ Va lanienu na ndzolela. Imo njila ya pangesele Yesu mu ku kaniamesa vapostolo veni, ya puile ku va lania ku cimo ciuano. (Mat. 28:10b; 1 Kol. 15:6) Netu lelo lino, tu hasa ku kaniamesa vakua ku zeya, mu ku va lania ku viuano nga ka ve ku kunguluka. Kaha tua tantekeya ngecize, halumo ci ka tondeka ku va lania vintsimbu via vingi amba va tave. Mua vusunga, Yesu ua vuile ndzolela ya kama omo vandongesi va tavele cilanio ceni.—Setekesenu na Mateo 28:16 na Luka 15:6.

17. Vati tua pande ku linga nga umo ua ku zeya neza mu ku kunguluka?

¹⁷ Va tambulenu na mavoko avali. Yesu ua lingisile vandongesi veni va livue ngecize na va tambula na mavoko avali; ka lavelele va mu suene vakevo, vunoni ikeye ua va suenene na ku putuka ku simutuila navo. (Mat. 28:18) Vati co tua pande ku linga, nga umo muanetu ua ku zeya eza mu ku kunguluka? Tua pande ku mu sesa na ku mu tambula na ndzolela. Ha katete, tu hasa ku lisosomua ku tuala ha vika tu handeka neni. Ca ku hona ku va vuisa ntsuama, tu hasa lika ku va leka nguetu, tuli na ndzolela ya ku va mona.

18. Vati tu hasa ku kaniamesa vakua ku ambulula va ku zeya?

¹⁸ Va kaniamesenu. Vandongesi va Yesu, halumo  va livuile ngecize ka va hasa ku ambulula na kua lenga mavu. Vunoni Yesu ua va kaniamesele ngueni: “Njili nenu matangua ose.” (Mat. 28:20) Vuno aa mezi a va kuasele ni? Eyo. Ka mua hitile ntsimbu ya kama, va putukile ku “longesa na ku ambulula muzimbu ua cili.” (Vili. 5:42) Vakua ku ambulula va ku zeya, navo va tondeka ku va kaniamesa. Halumo va hasa ku ivua liova lia ku putuka ku ambulula naua. Ngeci mukemuo, tu hasa ku va kaniamesa nguetu ka va ka ambulula lika liavo. Nkala litangua li va ka tonda ku putuka, citava tu ka tuhuke navo. Mua vusunga, va ka santsela cikuma ku vukuasi vu tu ka va hana mu va ka putuka ku ambulula naua. Nga tu pua na ku lihakela kapandi ka ku mona vakua ku zeya ku pua vamuanetu na vandumbuetu, va ka hasa ku kaniama naua kaha eci ci ka vuisa cikungulukilo cose ndzolela.

19. Cizango cika tua kala naco, kaha omo lia vika?

¹⁹ Tangua lika honi ci ka hua cipanga ca ku puisa vantu vandongesi? Ci ka tualelelaho na ku ku kotoka. (Mat. 28:20) Vuno tu ka hasa vene ku hetesa cipanga ca ku ambulula na ku ku kotoka ni? Kakeko kapandi ka tua lihakela! Na ndzolela yose tue ku hana ntsimbu, ngolo na vupite vuetu mu ku tonda vaze va fuila ku ka tambula “muono ka ue ku hua.” (Vili. 13:48) Mu tue ku lingamo tue ku kava lungano lua Yesu. Yesu ua handekele ngueni: “Ku linga cizango ca uze ua nji tumine na ku manesa vipanga vieni, vikevio vene via-ku-lia viange.” (Yoa. 4:34; 17:4) Netu cikeco cizango cetu. Tu tonda ku manusula cipanga ci va tu kundika. (Yoa. 20:21) Kaha tu tonda vakuetu, hamo lika na vakua ku zeya, va lipandakane netu mu ku manusula cipanga caco.—Mat. 24:13.

20. Kuliya na Filipu 4:13, omo lia vika tu ka hasa ku manusula cipanga ca tu sikile Yesu?

²⁰ Vutuhu ku puisamo lisiko lia tu sila Yesu ca cikalu, vunoni ka tuesi lika lietu mu cipanga caco. Yesu ua tu kulahesele ngueni a ka kala netu. Kaha naua tue ku puisamo cipanga caco “kumo na Njambi.” (1 Kol. 3:9; 2 Kol. 2:17) Ngeci mukemuo tu hasa ku ci manusula. Mua vusunga, ca pua ku vezika ca kama ku puisamo eci cipanga na ku kuasa vakuetu ku lingamo!—Tandenu Filipu 4:13.