1. Vati 2 Kolintu 3:1-3, ua tu kuasa ku muesa seho ku civezikiso cetu ca ku longesa muntu na ku mbatizimu? (Talenu cikupulo ca helu lia Vutala)

VATI mue ku livua nga umo ndongesi ua mu cikungulukilo cenu va mu mbatiza? Mua vusunga tue ku ivua ndzolela ya kama. (Mat. 28:19) Cikuma kuma nga yetu mpundu tua puile mulongisi ua Mbimbiliya ua muntu uaco! (1 Tes. 2:19, 20) Vandongisi va vaha va ku mbatiza vapua ngue mikanda ya cili, kati lika ku li valongisi vavo, vunoni ku cikungulukilo cose.—Tandenu 2 Kolintu 3:1-3.

2. (a) Cihula cika ca seho tua pande ku hilula kaha omo lia vika? (b) Vika ca pua cilongesa ca Mbimbiliya? (Talenu litota)

² Ce ku tu vuisa ndzolela ya kama ku tantekeya ngecize, mu miaka iuana i na hiti, vakua ku ambulula mu mavu ose, vendesele vilongesa via Mbimbiliya via ku pua 10.000,000. * Kaha mu ku hita ca miaka yaco, nkampe vantu va ku pua 280.000 va vambatizile nkala muaka ku pua Vakaleho va Yehova na vandogesi va vaha va Yesu Kilistu. Vati tu hasa ku kuasa cingi ca ava vakuavo vandongesi va Mbimbiliya va hete ku mbatizimu? Yehova kasi ali na ku hana vantu vukovelelo vua ku pua Vakaleho veni. Ngeci mukemuo tue ku lihakela kapande ka ku kusa vose va tu hasa linga va kole mu lutsilielo na ku heta ku mbatizimu omo ku ci na lisupu ntsimbu. Muomu ntsimbu ili na ku ntuta cikuma!—1 Kol. 7:29a; 1 Pet. 4:7.

3. Vika tu lilongesa mu cilongesa cino ku tuala ha ku endesa vilongesa via Mbimbiliya?

 ³ Omo lia seho ya cipanga ca ku puisa vantu vandongesi lelo lino, vakua civunga ca vantuamena ve ku ya ku vimo viMbetele linga va tondesese vika vi tondeka ku vi linga mu ku kuasa vandongesi va Mbimbiliya va kole mu lutsilielo na ku heta ku mbatizimu. Mu cilongesa cino neci ci nahatako, tu simutuila vika tu hasa ku lilongesa ku vamuanetu va vutongue, ngeci mua va pionero, vamisionalio na tuniungi va ku zinguluka. * (Visi. 11:14; 15:22) Ava vamuanetu vaco, va na muesa vika va hasa ku linga valongesi va Mbimbiliya na vandongesi vavo linga cilongesa ci hase ku enda vuino. Mu cilongesa cino tu simutuila ha viuma vitanu via na pande ku linga nkala ndongesi ua Mbimbiliya, linga a hase ku kola vuino mu lutsilielo na ku heta ku mbatizimu.

4. Vika tua pande ku nongonona ku tuala ha vilongesa vi tue ku endesela ha vimbelo?

⁴ Cingi ca vamuanetu vali na ku endesa vilongesa via Mbimbiliya ha vimbelo via vantu. Vutuhu capua ca cili ku lingamo mu ku putuka ku simutuila na vantu via Mbimbiliya, vunoni ku simutuila caco ce ku pua ca cihi kaha halumo ka tue ku cilinga mu nkala simano. Mu ku kolesa cizango ca ndongesi, vamo vakua ku ambulula ve ku vundila ndongesi linga a va hane numelu yeni ya telefone ni mizimbu yeni yeka. Kaha ve ku pangesa mizimbu yaco mu ku mu tuma imo mizimbu ya mu Mbimbiliya ha matangua ka ve ku lilongesa. Kaha eci ku simutuila ca ha vimbelo, ci hasa ku ambata vingonde via vingi, ca ku hona mpundu ku kola ku pua cilongesa ca Mbimbiliya. Vuno ndongesi, a hasa mpundu ku kola mu lutsilielo, na ku heta ha ku mu mbatiza nga a lilongesa lika mu ka ntsimbu aka kakandende ha mbelo ni? Ca cikalu.

5. Kuliya na Luka 14:27-33, vika Yesu ua ntsindikile ngecize vi hasa ku tu kuasa mu cipanga ca ku puisa vantu vandongesi?

⁵ Tangua limo, Yesu ua lomboluele via na pande ku puisamo muntu linga a pue ndongesi yeni mu ku pangesa cimo cimueso. Ua handekele via muntu a tonda ku tunga imo ndzivo na via muangana a tonda ku ya ku ndzita. Yesu ua handekele ngecize: “Mukua ku tunga ua pandele ku livanga ku tumama na ku tanda fueto ya ku i tungisa,” kaha uze muangana ua pandele ku linga ku tumama na ku yongola nga masualale veni va ka hasa ku puisamo viose via tondele ni kuahi. (Tandenu Luka 14:27-33.) Na vuno vene, Yesu ua tantekeyele ngecize uose a tonda ku pua ndongesi yeni, ua pandele  ku hilula vuino vuino vika ca lomboloka ku pua mukua ku kava Yesu. Omo liovu vusunga, tua pande ku kaniamesa vandongesi vetu va pue na ku lilongesa netu mu nkala simano. Vati tu hasa ku lingamo?

6. Kapandi ka ka tu hasa ku lihakela linga tu kale na vandongesi ve ku kola mu lutsilielo?

⁶ Putukenu ku vueza ku ntsimbu ya vilongesa via ha mbelo. Ca ku muenako, nga mua kele na ku simutuila ha vintsina vimo lika via mu Mbimbiliya, mu hasa ku vuezako ikuavo. Nga ku simutuila ka ce ku enda vuino ha cihela ci mue ku liuanena, mu hasa ku hula muntu uaco nga ku li cimo cihela ceka ci mu hasa ku ka lilongesela. Cikumbululo ca ka mi hana muntu uaco ci ka mi kuasa ku mona seho ya haka ku cilongesa ca Mbimbiliya. Kaha mu nima ya ntsimbu, mu ku vueza ku ntsimbu ya cilongesa, mu hasa ku hula ndongesi nga citava mu pue na ku lilongesa luvali mu simano. Vunoni kua tondeka vikuavo naua kati lika ku lilongesa lumo ni luvali mu simano houe.

7. Vati mulongisi ua Mbimbiliya a hasa ku liviukisa vuino nkala cilongesa?

⁷ Mu ku pua mulongisi, mua pande ku liviukisila vuino nkala cilongesa. Mu hasa ku putukila mu ku tanda vinanga na ku tanda mikanda ya mu Mbimbiliya iliho. Lingenu cose linga mu ivuisise vintsina via kama. Singaniekenu ha mitue ya cilongesa, mitue ya indende, vihula via cilongesa, mikanda i va soneka tandenu, vikupulo na nkala video ya lombolola cimpande caco. Singaniekenu hali ndongesi yenu, na ku hilula vati mu ka mu longesa mu njila ya yasi, linga viuma vi ka mu lomboloke vuino, kaha a ka hase ku vi pangesa.—Nehe. 8:8; Visi. 15:28a.

8. Vika mezi a Paulu a ku Kolose 1:9, 10, a tu longesa ku tuala ha ku kundika vandongesi vetu mu vivundilo?

⁸ Omo mu liviukisila, puenu na ku leka Yehova via ndongesi yenu na viuma via tondeka. Vundilenu Yehova a mi kuase ku endesa cilongesa mu cifua ci ka kuata vandongesi ku mitima. (Tandenu Kolose 1:9, 10.) Lihulenu nga ku li vimo vi hasa ku kaluuisa ndongesi ku vi ivuisisa ni ku vi tava. Kaha kati mu suve ngecize, vutumbe vuenu vua pua ku kuasa ndongesi ku kola mu lutsilielo na ku heta ku mbatizimu.

9. Vati mulongisi a hasa ku kuasa ndongesi yeni ku liviukisila cilongesa? Lombololenu.

⁹ Tua kulahela ngecize, ku hitila mu cilongesa ca Mbimbiliya, ndongesi a ka haka seho ku viuma via mu lingila Yehova na Yesu kaha na ku tonda ku lilongesa via vingi ku tuala hali vakevo.  (Mat. 5:3, 6) Linga cilongesa ci hase ku mu lomboloka vuino, ndongesi na pande ku tuala mana ku viuma viali na ku lilongesa. Linga a hase ku tuala mana ku viuma viali na ku lilongesa, mu lomboluelenu seho ya kala ha ku liviukisila nkala cilongesa na ku mona vati via likuata neni. Vati honi mu hasa ku mu kuasa? Liviukisilenu cimo cilongesa hamo neni, linga a tantekeye vati ve ku lingamo. * Mu lomboluelenu vati a hasa ku uana vikumbululo via vihula na ku muesa vati ku tua cipalo ha mezi a ntsindo ci ka mu kuasa ku vuluka cikumbululo. Kaha mu lekenu a hane cikumbululo mu mezi eni va vene. Nga mu lingamo, mu ka hasa ku nongonona nga nevuisisa vuino cilongesa ni kuahi. Vunoni ku li vikuavo naua vi mu hasa ku kaniamesa ndongesi yeni a pue na ku vi linga. Viuma vika?

10. Vika ca puila ca seho ku tanda Mbimbiliya matangua ose, Kaha vika tua pande ku linga mangana tu lilongesemo via vingi?

¹⁰ Ndongesi a hasa ku lilongesa via vingi ikeye ivene, kati ku hitukila lika ha vize vie ku mu longesa mulongisi ueni. Cuma ca katete ca na pande ku linga, ca pua na ku simutuila na Yehova. Vati a hasa ku lingamo? Mu ku halakana Yehova na ku handeka neni. A hasa ku halakana Yehova mu ku tanda Mbimbiliya matangua ose. (Yeho. 1:8; Visa. 1:1-3) Mu longesenu mua ku pangesela programa ya ku “Tanda Mbimbiliya” ili mu saiti jw.org na ku mu leka ngecize citava ku i tupulula. * Vunoni linga a uane vukuasi mu ku tanda Mbimbiliya, mu kaniamesenu a pue na ku hilula ha viuma vie ku lilongesa ku tuala hali Yehova na vati a hasa ku vi pangesa mu muono ueni.—Vili. 17:11; Tia. 1:25.

11. Vati ndongesi a hasa ku lilongesa ku vundila kuli Yehova, kaha seho ika ya kala ha ku vundila ntsimbu yose?

¹¹ Kaniamesenu ndongesi yeni a pue na ku simutuila na Yehova mu ku vundila matangua ose. Ku vuputukilo na ku ntsongo ya nkala cilongesa, puenu na ku vundila kuli Yehova na mutima uose kaha puenu na ku kundika ndongesi yenu ku vivundilo. Omo a halakana ku vivundilo vienu, neni a ka lilongesa vati mua ku vundila kuli Yehova Njambi na mutima uose ku hitila mu lizina lia Yesu Kilistu. (Mat. 6:9; Yoa. 15:16) Singaniekenu ha vati ku tanda Mbimbiliya matangua ose ni nguetu (ku halakana kuli Yehova) na ku vundila ni nguetu (ku handeka na Yehova) ci hasa ku kuasa ndongesi yenu ku likuata vusamba na Yehova. (Tia.  4:8) Ku kuasa ndongesi yenu ku linga evi viuma, ci ka mu kuasa ku puisamo vikuavo via tondeka linga a kole mu lutsilielo na ku heta ku mbatizimu.

12. Vati mulongisi a hasa ku kuasa ndongesi ku likuata vusamba na Yehova?

¹² Viuma vie ku ivua ndongesi mue ku lilongesa Mbimbiliya, ka via pandele ku mu kovela lika mu visinganieka, vunoni vi na pande na ku mu kuata ku mutima. Omo lia vika? Muomu mutima uetu uze ua ambatesela kumo na vizango, vutumbe, na cifua ci tue ku livuilamo, ukeuo ue ku tu sindiya ku lingako mumo. Yesu ua longesele viuma via vingi vi va lemene vantu. Vunoni vantu va kele na ku mu kava muomu ua kele na ku va heta ku mitima. (Luka 24:15, 27, 32) Ndongesi yenu ua tondeka ku mona Yehova ku pua muntu mpundu, uze ya hasa ku likuata neni vusamba. Na ku mu puisa Ise, Njambi yeni, na kavusamba keni. (Visa. 25:4, 5) Omo mu mu longesa, mu kuasenu a mone vuntu vua ku komouesa vua Yehova Njambi. (Ezu. 34:5, 6; 1 Pet. 5:6, 7) Kaha puenu na ku lingamo, mu nkala cimpande ci mu simutuila. Puenu na ku kuasa ndongesi yenu, a leme vifua via ku komouesa via Yehova ngeci mua, cilemo, ngozi na cikeketima. Yesu ua handekele ngueni: “Lisiko lia kama kaha lia ku li vanga lia pua ku lema Yehova Njambi. (Mat. 22:37, 38) Ngeci mukemuo, puenu na ku kuasa ndongesi yenu a leme Yehova na mutima ueni uose.

13. Hanenu cimueso ca vati tu hasa ku kuasa ndongesi a lilongese vuntu vua Yehova.

¹³ Mu ku simutuila na ndongesi yenu, puenu na ku mu leka vika via mi lingisa ku lema cikuma Yehova. Eci ci ka lingisa ndongesi yenu a mone ngecize neni a tondeka ku likuata vusamba vua lika lieni na Yehova. (Visa. 73:28) Ca ku muenako, ha cinanga ni cinimbu ha muli na ku tanda, hali vimo via muesa vuntu vua Yehova ni? Hali vimo via muesa mana, vuoloke, ngolo na cilemo ceni ni? Nga mukemuo, lekenu ndongesi yenu nguenu, eci cikeco cimo ca viuma via mi lingisa ku lema Isuenu ua muilu. Kua kala vikuavo naua vi va na pande ku linga vandongisi va Mbimbiliya linga va kole mu lutsilielo na ku heta ku mbatizimu.

14. Vika ya handeka VaHevelu 10:24, 25, ku tuala ha seho ya viuano ku lutsilielo lua ndongesi?

¹⁴ Tu vose, tua tonda vandongesi vetu va kole mu lutsilielo na ku heta ku mbatizimu. Imo njila i tu hasa ku va kuaselamo ya pua ku va kaniamesa va pue na ku kunguluka. Vamuanetu va pua vatongue mu ku longesa nguavo,  vantu ve ku putuka ku kunguluka ku vuputukilo vua cilongesa ve ku kola vuasi mu lutsilielo. (Visa. 111:1) Vamo vamuanetu ve ku leka vandongesi vavo nguavo, cilongesa ca Mbimbiliya ca kala na mitamba ivali, mutamba umo uze vene u ve ku lilongesa navo, vunoni ukuavo va ka lilongesauo ku viuano. Tandenu VaHevelu 10:24, 25 na ndongesi yenu, na ku mu kuasa ku mona vivezikiso via a ka tambula nga a putuka ku ya mu ku kunguluka. Mu lekesenu video, Vika vie ku Hita mu Ndzivo ya Vuangana? * Kuasenu ndongesi yeni a puise ku kunguluka ku pua mutamba ua seho mu muono ueni.

15. Vika tu hasa ku linga mu ku kuasa ndongesi yetu a pue na ku kunguluka ntsimbu yose?

¹⁵ Vika mu hasa ku linga nga ndongesi yenu kanda a ci kungulukeho ni ue ku kunguluka noho-noho? Na ndzolela yose, mu lekenu viuma vi mua lilongesele vuovuno ku ciuano. Ku lingamo ci ka mu kuata cikuma ku mutima, ku tuvakana ku mu lania ngoco. Mu hanenu Vutala ni Mukanda ua Viuano via ngonde oyo. Mu lekesenu vi tu ka lilongesa mu ciuano cizaho, na ku mu hula mutamba uka na lemeho cikuma. Via ka mona ndongesi yenu ku ciuano ca katete, vi ka tuvakana viose via monaho laza ku malombelo eka. (1 Kol. 14:24, 25) A ka tantekeya vantu va vifua via cili, va ka hasa ku tambuluisa na ku kola mu lutsilielo na ku mbatizimu.

16. Vika via tondeka mu ku longesa muntu a hete na ku mbatizimu, kaha vika tu ka simutuila mu cilongesa ci na hatako?

¹⁶ Vati tu hasa ku longesa muntu a ka hete na ku mbatizimu? Tu hasa ku kuasa nkala ndongesi a hake seho ku cilongesa na ku mu kaniamesa a pue na ku liviukisila vuino nkala cilongesa na ku lilongesa mu nkala simano. Tu hasa naua ku mu kaniamesa, a pue na ku simutuila na Yehova matangua ose na ku likuata neni vusamba. Cikuavo naua, tua pande ku mu kaniamesa a pue na ku kunguluka. (Talenu naua Cikasa “ Vi va Tondeka ku Linga Vandongesi va Kole mu Lutsilielo na ku Mbatizimu.”) Vunoni ngue mu ci ka muesa cilongesa ci na hatako, ku li viuma vikuavo vitanu vi va pande ku linga valongisi va Mbimbiliya mu ku kuasa vandongisi va hete ku mbatizimu.