1921—Cihita Ca Miaka Ku Nima
VUTALA vua 1 de Janeiro de 1921, mu Ingles vue huile vandongesi va Mbimbiliya nguavuo, “Cipanga cika tua pande ku puisamo muaka uno?” Kaha Vutala vuaco vua kumbuluile eci cihula mu ku vuluisa vamuanetu via cipanga cavo ca ku ambulula, ku Isaya 61:1, 2. Nguayo: “Sipilitu ua Sukulu Yehova ua kala hali ange; Muomu Yehova na nji vuavesa mu ku ambulula zimpande zia cili kuli vakua ku konkama. . . . “Ku zimbula muaka ua kavumbi ka Yehova, na litangua lia ku linguila lia Njambi yetu.”
VAKUA KU AMBULULA VA KU SIMPA
Linga va puisemo lisiko lia ku ambulula li va tambuile, vakua ku lilongesa Mbimbiliya va tondekele ku pua va ku simpa. Muomu va tondekele “ku ambulula zimpande zia cili kuli vakua ku konkama,” vunoni “na litangua lia ku linguila lia Njambi” kuli vakua vupi.
Muanetu J. Hoskin ua ku Canada, ua ambuluile na ku simpa cose vutuhu va kele na ku mu luisa. Ku vuputukilo vua 1921, muanetu Hoskin ua liuanene na umo mukuluntu ua igreja Metodista. Muanetu Hoskin ua putukile ku simutuila ceni ngueni: “Ka ca puile ca cili ku lihoya via Mbimbiliya. Ngeci mukemuo, ambe nga ka tua litombuele mu vimo kasi citava tu manusule vuino ku simutuila cetu, na ku litepa mu ciyulo.” Vutuhu ngoco cize ku simutuila ka ca huile mu ciyulo. Muanetu Hoskin a vuluka ngueni: “Tua simutuilile lika mu tu viminutu tua tundende kaha uze mukuluntu ua sokele ku mbelo na ndzili ya ku linga, nja muene nguange vitulu ya keleho i uila ha mavu.”
Kaha muata uaco ua tambakanene ngueni: “Ya u ka ambuluile vakua mavu.” Muanetu Hoskin vutuhu ka kumbuluileko, vunoni mua kele na ku tunda ha ndzivo ua singaniekele ngueni, nove vene u mukua mavu!
Kaha lia mukuavo, uze mukuluntu mua ile ku tembele yavo, ua ka handekele viuma via ku viha ku tuala hali muanetu Hoskin ku mutula. Muanetu Hoskin a vuluka ngueni, mukuluntu uaco ua mamuine vantu mu tembele ngueni, kati vapue na ku nji halakana muomu nja puile cingungu ua kama mu mbonge yose, nja tondekele ku nji loya na vuta. Vutuhu ngoco, muanetu Hoskin ka likelele ku ambulula. Kaha ua hasele ku handeka na vantu vavengi. Ivene a vuluka ngueni: “Lihia lia nji tovalele honi ku hiana na ntsimbu ya ku nima. Vamo vantu va putukile na ku handeka nguavo, tu tantekeya ngecize mua pua ngamba ya Njambi, ngeci mukemuo viose vi mu tonda tu lekenu linga tu mi kuase linga kati ku kale na vimo viahi vi mi kambela.”
KU LILONGESA MU VULIKA NA MU VUSOKO
Linga va kuase vantu ku kola mu lutsilielo, Vakua ku Lilongesa Mbimbiliya va putukile ku tuhula mutamba ua vihula na vikumbululo via mu Mbimbiliya mu mukanda u tue ku sana lelo nguetu Vingilenu!. * Programa yaco ya kele na ku tuhula vihula vi va hasa ku simutuila visemi na vana vavo. Visemi “va kele na ku linga vihula viaco ku vana vavo kaha na ku va kuasa ku uana vikumbululo mu Mbimbiliya.” Vihula ngeci mua, “Mavulu angahi a kala mu Mbimbiliya?” via kuasele vanike ku tantekeya vuino Mbimbiliya. Kaha vihula vikuavo ngeci mua: “Vuno Mukua Kilistu ua vusunga uose na pande ku lavelela ngecize va ka mu luisa ni?” Via viukisilile vakuendze na vahumbe ku pua vakua ku ambulula va ku simpa.
Kua kele naua mutamba ukuavo ua vihula na vikumbululo via mu Mbimbiliya, ua vaze va tantekeyeleko vimo ku tuala ha Mbimbiliya. Mutamba uaco ua kele mu livulu lia katete lia Estudo das Escrituras. Makulukazi na makulukazi a vantu va uanene vukuasi vua kama mu vi programa viaco. Vunoni mukanda A Idade de Ouro ua 21 de Dezembro ya 1921, ua hanene mutambi ngecize vi programa viaco vi ka li kela. Omo lia vika honi?
LIVULU LIA LIHA!
Livulu Halupa ya Njambi
Ka lipapelo ka muesa mafo a kele na ku tanda muntu
Tu mapapelo tua kele na vihula
Vamuanetu va kele na ku tuamenena va muene ngecize vantu va tondeka ku lilongesa via Mbimbiliya cimpande ku cimpande, kaha naua mu cifua ca ku noneka vuino. Linga va puisemo vutumbe vuaco, mu Novembro ya 1921 va tuhuile livulu, Halupa ya Njambi mu ingles. Vose va tavele livulu liaco, va va sonekesele naua mu kursu ya Mbimbiliya ya Halupa ya Njambi. Kursu yaco, ya puile ya ku lilongesa mu vulika kaha ya kuasele vakua ku tanda va nongonone “vutumbe vua Njambi vua ku vezikisa vantu na muono ua yaye.” Vuno kursu yaco ya kuasele ni?
Nga muntu na tava ku tambula livulu liaco, va kele naua na ku mu hana ka lipapelo ka muesele mafo aka a mu livulu na pande ku tanda. Kaha mu simano ya hateleko ua tambuile ka lipapelo ka kuavo ka kele na vihula via ku tundisa ha viuma via tandele kuliya na ka lipapelo ka ku livanga. Ku ntsongo ya ka lipapelo kaco, kua kele naua mukana ua mafo a pandele ku tanda mu simano ya hateleko.
Ndongesi ua kele na ku tambula tu mapapelo tuaco simano ku simano, mu visimano via ku pua 12. Tu va kele na ku mu tuma vakua klase ni nguetu cikungulukilo ca kele ha hiehi neni. Vintsimbu via vingi, vamuanetu va kele na ku tuma tu mapapelo tuaco, va puile vaze ku va hasele kuya ku ndzivo na ndzivo. Ca ku muenako, ndumbuetu Anna K Gardner, ua ku Millvale, Pensilvânia U.S.A., a vuluka ngueni: “Ku tuhuka ca livulu Halupa ya Njambi, ca hele yaya ua mpuevo Thayle, ua puile cilema ca mikono vukovelelo vua ku tuma-tuma tu mapapelo tuaco mu nkala simano. Nga muntu na manusula kursu yaco, cikungulukilo ca kele na ku tuma umo muanetu linga a ka mu kuase ku lilongesa vikuavo mu Mbimbiliya.
Thayle Gardner ali mu cituamo ca ku sindumuna
VIPANGA VIA TU LAVELELELE KU LUTUE
Ku ntsongo ya muaka, muanetu J.F.Rutherford ua tumine mukanda ku viklasi viose. Mu mukanda uaco ua handekele ngueni, “Vukaleho vua Vuangana vu tua hana mu muaka uno, vu na hiana vukaleho vuose vu tua hele ku miaka ya ku nima.” Mu ku handeka via ku lutue ngueni: “Kasi kua lisupu vipanga via vingi. Ngeci mukemuo, kaniamesenu vakuenu va kovele mu cipanga eci ca vezikisa Njambi.” Tuli na vusunga nguetu, vakua ku lilongesa Mbimbiliya vononokele eci cimamuna. Muomu mu muaka ua hateleko mu 1922, va ambuluile na ku simpa cose muzimbu ua Vuangana mu njila ya ku komouesa.
^ cin. 9 Mukanda uaco, laza va u lukile nguavo, A Idade de Ouro. Mu 1937 nguavo, Consolação. Kaha mu 1946, nguavo Despertai!.
