1. Omo lia vika cingi ca vantu va na zimbala?

MIZIMBU i muesa ngecize lelo lino, kua kala makulukazi na makulukazi a malombelo kaha ose e ku litumbula ngecize e ku lemesa Njambi mu vusunga. Kaha ku lana cao, ca lingisa vantu vavengi ku zimbala! Ngeci ve ku lihula nguavo, “Vuno kua kala vulombelo vumo lika vua vusunga ni? Ambe nguavo, vuno malombelo ose e kuya Njambi ku mutima ni? Kaha ku lana cao, ca lingisa vantu vavengi ku zimbala. Ngeci mukemuo, netu tu hasa ku lihula nga cili vene tue ku longesa vusunga, kaha cifua ci tue ku lemeselamo cikeco mpundu ca tava Yehova. Vuno citava vene tu tsiliele vusunga vuaco ni? Tu konkenu ha vukaleho.

2. Kuliya na 1 Tesalonika 1:5, omo lia vika kapostolo Paulu ua tavele na mutima uose ngecize na uana vusunga?

² Kapostolo Paulu ua tavele na mutima uose ngecize na uana vusunga. (Tandenu 1 Tesalonika 1:5.) Paulu, ka tsilielele vusunga vuaco muomu ua mu ile ku mutima houe. Vunoni ua lilongesele Lizi lia Njambi na civando. Muomu ua tsilielele ngecize “Visoneka viose Njambi ua vi huimina na muku ueni,” (2 Tim. 3:16) Vika ua nongonuene mu ku lilongesa ceni? Mu Lizi lia Njambi, Paulu ua uanenemo vukaleho ka citava ku vu sanguluka ngecize Yesu ikeye Mesiya. Vukaleho vuaco, vakuluntu va vaYundeya va vu sembuluile. Vaze vakua civembulu, va kele na ku lipamba nguavo ve ku lemesa vusunga ku tuala hali Njambi, vunoni va vu vianene ku hitila mu vilinga viavo. (Tito 1:16) Vunoni Paulu ka fuile ngeci muavo, ka taveleko vimo vilongesa via mu Mbimbiliya vikuavo co ku vi viana houe. Vunoni ua tavele ku longesa na ku ononoka “zintsimpi ziose zia Njambi.”—Vili. 20:27.

3. Vuno tua tondeka ku tantekeya vikumbululo via vihula vietu viose amba vuose tu tave ngecize tua uana vusunga ni? (Talenu cikasa “ Vipanga na Visinganieka via Yehova—Via Hiana Ku-vi-tanda.”)

 ³ Vamo ve ku singanieka nguavo vulombelo vua vusunga vua pande ku kumbulula vihula viose, cipue vene vize kaya kumbuluile mpundu Mbimbiliya. Vuno ku singanieka ngoco ca pua ku hianesamo ni kuahi? Tu hilulenu lungano lua Paulu. Vutuhu ua kaniamesele vakuavo Vakua Kilistu va eseke “viuma viose,” vunoni ua muesele naua ngecize kuli viuma via vingi ikeye mpundu ka vi ivuisisile. (1 Tes. 5:21) Ua handekele ngueni, “etu tua tantekeya ka vundende lika,” na ku vuezako ngueni, “vuovuno tu mona ha katalelo kavuivuivui.” (1 Kol. 13:9, 12) Paulu kevuisisile viose, kaha netu naua. Vunoni Paulu uevuisisile vusunga vua ku puamo ku tuala ha vutumbe vua Yehova vuze vua mu kuasele ku ivuisisa ngecize na uana vusunga!

4. Vati tu hasa ku kaniamesa lukulahelo luetu ngecize tua uana vusunga? Kaha vika tu simutuila ku tuala hali Vakua Kilistu va vusunga?

⁴ Imo njila i tu hasa ku kaniameselamo lukulahelo luetu ngecize tua uana vusunga, ya pua mu ku setekesa cifua ci ve ku lemeselamo Vakaleho va Yehova lelo, ku cifua ca lemeselelemo Yesu. Mu cilongesa cino, tu mona ngecize Vakua Kilistu va vusunga (1) ve ku viana ku lemesa mahamba, (2) va singimika lizina lia Yehova, (3) va lema vusunga, kaha (4) va lilema umo na mukuavo cikuma-kuma.

5. Vika tu lilongesa kuli Yesu ku tuala ha njila ya ku sungama ya ku lemeselamo Njambi? Kaha vati tu hasa ku puisamo via longesele?

⁵ Omo lia vukama vua cilemo ceni kuli Yehova, Yesu ua lemesele lika Yehova cipue mua kele muilu ni hano ha mavu. (Luka 4:8) Kaha ua longesele vandongesi veni ku lingamo. Cipue Yesu ni vandongesi veni, ka va pangesele  tumponia mu ku lemesa Yehova. Mu ku linga Njambi ka citava ku mu mona, na umo uahi a hasa ku panga cuma ca ku lifua mpundu neni! (Isaya 46:5) Vuno citava ku pangesa tumponia mu ku imanena vakua ku lela, cipue ku vundila kuli vakevo ni? Mu lisiko lia mu civali lia Masiko Likumi, Yehova ua handeka ngueni: “Kati u ka lipangele cifua ca ku songa, cipue cifua ca nkala cuma ci li muilu, cipue muintsi lia mavu . . . Kati u ka likotamese ku vikevio.” (Ezu. 20:4, 5) Vose va tonda kuya Njambi ku mutima, ka va kele na citanga ca ku ivuisisa aa mezi.

6. Cifua cika ca ku lemesa ve ku kava Vakaleho va Yehova lelo lino?

⁶ Vakua ku lilongesa mizimbu ya laza, ve ku tava nguavo cili vene Vakua Kilistu va ku livanga va lemesele lika Njambi. Ca ku muenako, limo livulu lia mizimbu ngualio: “Vakua Kilistu va ku livanga, mueka va zindile vutumbe vua ku haka tumponia ku vihela viavo via ku lemesela,” (History of the Christian Church). Lelo lino, Vakaleho va Yehova ve ku kava eci cifua ca ku lemesa ca Vakua Kilistu va ku livanga. Ka tue ku vundila ku tumponia vemanena vakua ku lela, cipue ku tungelo ni vene kuli Yesu. Kaha naua, ka tue ku meneka pandela ni ku lemesa nkala vitantekeyeso vieka via cifuti. Tua likuminia ku ononoka aa mezi a Yesu: “U ka lemesa Muangana Njambi Yove.” Viose-ovio vizamo vi ize ngano.—Mat. 4:10.

7. Ku litepa cika ca kala ha Vakaleho va Yehova na malombelo akuavo?

⁷ Lelo lino, vantu vavengi vali na ku lema ku kava vakuluntu va malombelo a ku tsimana. Cifua ci ve ku va komokelamo, kampe vene ce ku suena ku ku va lemesa. Vantu mueka ve ku sula mu vitembele via valongisi vaco, ku landa mikanda yavo, kaha na ku lambula lumambongo ni ku kuasa matumbe avio. Kaha naua vamo, ve ku tsiliela viose ovio vi ve ku handeka valongisi vaco. Ndzolela i ve ku muesa vantu vaco, kampe vene ngue va na mono Yesu! Vunoni vakua ku lemesa Yehova mu vusunga, ka ve ku kava vantu vaco. Vutuhu tue ku ononoka vaze ve ku tuamenena cipanga cetu, vunoni tue ku kava eci citume ca Yesu: “Enu vose mu vana va naye.” (Mat. 23:8-10) Ka tue ku lemesa muntu na umo uahi, cipue nga ua pua ntuamena ua vulombelo ni ua pulitika. Kaha ka tue ku hakuila matumbe avo. Cikuavo naua, tue ku viana ku lihaka mu via mavu. Viose evi, vikevio via tu tepesa ku malombelo eka.—Yoa. 18:36.

8. Vati tua tantekeya ngecize Yehova a tonda lizina lieni vali zumbangeye na ku li tsimanesa?

⁸ Tangua limo, Yesu ua vundilile ngueni: “Tata zumbangeya lizina liove.” Yehova ua kumbuluile civundilo caco na lizi lia kama-kama lia ku tunda muilu ngecize a ka zumbangeya lizina lieni. (Yoa. 12:28) Mu ku ambulula ceni cose, Yesu ua zumbangeyele lizina lia Ise. (Yoa. 17:26) Ngeci mukemuo, kuli Vakua Kilistu va vusunga ku pangesa lizina lia Njambi na ku li tsimanesa ca pua civezikiso ca kama.

9. Vati Vakua Kilistu va katete va muesele ngecize va singimikile lizina lia Njambi?

⁹ Mu nima ya ku tumbika cikungulukilo ca ku livanga, Yehova “ua hinduisile vakua vifuti mu ku tambula ha kati kavo vantu vamo omo lizina lieni.” (Vili. 15:14) Vaze Vakua Kilistu va ku livanga, va vuile ndzolela ya kama ya ku pangesa lizina lia Njambi na ku li ambulula ku vakuavo. Va pangesele lizina lia Njambi kati lika mu ku ambulula cavo, vunoni na mu visoneka viavo. * Va li muesele ha toma ngecize va puile vantu vemanena lizina lia Njambi.—Vili. 2:14, 21.

10. Vukaleho vuka vua muesa ngecize Vakaleho va Yehova vakevo lika ve ku imanena lizina lia Yehova?

 ¹⁰ Vuno Vakaleho va Yehova ve ku imanena mpundu lizina lia Yehova ni? Tu hilulenu vukaleho. Lelo lino, cingi ca vakuluntu va malombelo ve ku linga viose vi va hasa, mu ku sueka lizina lia Njambi. Va tundisa lizina liaco mu viMbimbiliya viavo kaha na ku vindika ku pangesa lizina liaco mu vitembele viavo. * Na umo uahi a hasa ku viana ngecize Vakaleho va Yehova vakevo lika ve ku singimika lizina lia Yehova, ngue mu lia pande. Tue ku tsimanesa lizina lia Njambi, ku hiana malombelo ose! Mu njila eyi, tue ku linga cose mu ku puisamo vi lia lomboloka lizina li tua liluka, Vakaleho va Yehova! (Isaya 43:10-12) Tua tuhula viMbimbiliya via Tradução do Novo Mundo, vi tuvakana 240 milhões. Kaha viMbimbiliya viaco via pangesa lizina lia Yehova ha vihela vize vi va lizima mu viMbimbiliya vieka. Kaha tue ku tuhula mikanda ya lombolola Mbimbiliya na ku tsimanesa lizina lia Njambi mu malimi a tuvakana 1000!

11. Vati Vakua Kilistu va ku livanga va muesele ngecize va lema vusunga?

¹¹ Yesu ua lemene vusunga, ni nguetu vusunga ku tuala hali Njambi na matumbe eni. Yesu ua yoyele mu cifua ca litombuele na vusunga kaha ua ambuluile vusunga vuaco ku vantu. (Yoa. 18:37) Vakua Kilistu va vusunga, navo mueka va lemene vusunga. (Yoa. 4:23,  24) Ngeci kapostolo Petulu ua tumbuile Vukua Kilistu ngueni, “njila ya vusunga.” (2 Pet. 2:2) Omo lia ku lema cikuma vusunga, Vakua Kilistu va ku livanga va vianene vilongesa via vakua malombelo, visemua na vilinga via vantu vize ka via litombuele na vusunga. (Kolo. 2:8) Ngeci Vakua Kilistu va vusunga lelo lino, ve ku lihakela kapandi “ku enda-enda mu vusunga.” Mu ku tundisa vilongesa viavo viose mu Lizi lia Yehova na ku yoya muaya vitume vieni.—3 Yoa. 3, 4.

12. Vika ve ku linga vamuanetu ve ku tu tuamenena lelo lino, nga va mona ngecize kuli cimo cilongesa ci tondeka ku ci lombolola vuino? Kaha vika ve ku lingilamo?

¹² Vangamba va Yehova lelo lino ka ve ku lipamba ngecize va tantekeya vusunga mu vutantuluke houe. Vintsimbu vimo, ve ku sevuka ku tuala ha cifua ci ve ku lomboluelamo vimo vilongesa via mu Mbimbiliya, na cifua ci ve ku tuamenenamo lukungulukilo. Vunoni evi ka via pandele ku tu komouesa. Muomu visoneka via muesa ha toma ngecize, vusunga vue kuya na ku lomboloka kamandende-kamandende mu ku hita ca ntsimbu. (Kolo. 1:9, 10) Yehova, ue ku solola vusunga kamandende-kamandende, kaha tua pande ku kala na lukakatela omo vilongesa via vusunga vi ya na ku tavuluka. (Visi. 4:18) Vakua Civunga ca Vantuamena, mu ve ku mona ngecize kuli cimo ku ivuisisa ci tondeka ku ci alulula, ka ve ku tala ku nima, ve ku lingamo vene. Vakua malombelo a engi ve ku alulula vilongesa viavo linga vi tovale ku matuitui a vantu ni linga vi litombole na visinganieka via vakua mavu. Vunoni lukungulukilo lua Yehova, lue ku alulula vilongesa linga vi tu kuase ku suena mu hiehi na Njambi na ku litombola na cifua ca ku lemesa ca sile Yesu. (Tia. 4:4) Tue ku alulula vilongesa vietu kati mu ku vi tombuesa ku ku aluluka ca cifua ci ve ku muenamo viuma vakua mavu, vunoni ku cifua ca ciha ci tuli na ku ivuisisilamo Mbimbiliya. Tua lema cikuma Mbimbiliya!—1 Tes. 2:3, 4.

13. Cifua cika ca seho ya kama ve ku muesa Vakua Kilistu va vusunga? Vati Vakaleho va Yehova ve ku ci muesa lelo lino?

¹³ Vakua Kilistu va ku livanga va kele na vifua via vingi via cili, vunoni cifua ca va tsimanenene mua kama, cilemo. Yesu ua handekele ngueni: “Hakeho vose va ka tantekeya ngecize mu vandongesi vange, nga mu lilema umo na mukuavo.” (Yoa. 13:34, 35) Lelo lino, Vakaleho va Yehova va lilema umo na mukuavo na ku likuata kumo mu mavu ose. Tua liseza na malombelo akuavo, muomu tua yoya ngue vusoko, ka tue ku tala ku cifuti ni cisemua ca vamuanetu. Tue ku limuena vusunga vuaco ku viuano vietu via mu simano, via limbo na via muhato. Ovu vukaleho vue ku tu kuasa ku kala na vusunga ngecize tuli na ku lemesa Yehova mu njila ya muya ku mutima.

14. Kuliya na Kolose 3:12-14, mu njila ika ya kama tu hasa ku limuesa cilemo umo na mukuavo?

¹⁴ Mbimbiliya ya tu mamuna nguayo, “lilemienu cikumakuma ha kati kenu.” (1 Pet. 4:8) Imo njila i tue ku mueselamo cilemo caco, ya pua mu ku liecela umo na mukuavo na ku limuesa lukakatela. Kaha naua tue ku tonda vukovelelo vua ku muesa vuhuanga ku vose mu cikungulukilo, cipue vene vaze ve ku tu vulumuina. (Tandenu Kolose 3:12-14.) Mua vusunga, eli lizitiko lia cilemo likelio lia pua citantekeyeso ca kama ca muesa ngecize tu Vakua Kilistu va vusunga.

15. Mu vinjila vika vikuavo tue ku kava cifua ca ku lemeselamo ca Vakua Kilistu va ku livanga?

¹⁵ Kuli naua vinjila vikuavo vi tue ku kavelamo cifua ca ku lemesa ca Vakua Kilistu va ku livanga. Ca ku muenako, tua tumbika lukungulukilo  luetu ngue muze vene mu va lingile Vakua Kilistu va ku livanga. Ngeci muavo, netu tua kala na tuniungi va ku zinguluka, vakuluntu na vakua ku kuasa vipanga. (Filp. 1:1; Tito 1:5) Kaha naua, tue ku singimika masiko a Yehova ku tuala ha ku limona ku mivila na vulo, ha ku lela ca maninga na ku niunga cikungulukilo mu ku uisa vaze ka ve ku aluluka ngue muze vene mu va lingile vakevo.—Vili. 15:28, 29; 1 Kol. 5:11-13; 6:9, 10; VaHe. 13:4.

16. Vika tu lilongesa ku mezi a ku Efeso 4:4-6?

¹⁶ Yesu ua handekele ngueni, vantu vavengi va ka litumbula ku pua vandongesi veni, vunoni vamo kati va vusunga. (Mat. 7:21-23) Mbimbiliya ya lunguile laza ngecize ku matangua a ku kotokela, ku kala vamo “va kakatela cifua ca ku lemesa Njambi, vunoni va na viana vukama vuaco.” (2 Tim. 3:1, 5) Vutuhu ngoco, ya muesa ha toma ngecize kua kala “ku-tsiliela cimo lika” ce kuya Njambi ku mutima.—Tandenu Efeso 4:4-6.

17. Lelo lino, veya ve ku kava Yesu mu vusunga kaha naua ve ku lemesa mu ku tsiliela cimo lika ca vusunga?

¹⁷ Veya ve ku lemesa mu ku tsiliela cimo lika ca vusunga lelo lino? Tu vose tua limuena vukaleho. Tua hilula cifua ca ku lemesa ca longesele Yesu na cize ci va lingile Vakua Kilistu va ku livanga. Ngeci mukemuo, cikumbululo cimo lika, Vakaleho va Yehova. Mua vusunga, ca pua civezikiso ca kama ku pua umo ua vangamba va Yehova na ku tantekeya vusunga ku tuala hali ikeye na vutumbe vueni! Ngeci mukemuo, tu lihakelenu kapandi ka ku kakatela ku vusunga na mutima uose.