MU nkala muaka, vampanga vavengi ve ku hiluka mu cikungulukilo. Singaniekenu ha vukama vua ndzolela ye ku kala muilu, mue ku hiluka nkala mpanga! (Luka 15:7, 10) Nga nenu mu na hiluka mu cikungulukilo, kalenu na vusunga ngecize Yesu, tungelo na Yehova mpundu va na viukilila mua kama ku mi mona mua hiluka mu vusunga. Vunoni omo mu hiluisa vusamba vuenu na Yehova mu hasa ku li uana na vimo vitanga. Vitanga vika, kaha vika vi hasa ku mi kuasa?

Vavengi kasi ve ku pinda na visinganieka via ku livua vungoco cipue mu nima ya ku hiluka mu cikungulukilo. Vamo halumo vene ve ku livua ngue mua livuile Muangana Ndaviti. Vutuhu tele Yehova na mu ecela laza, vunoni ua handekele ngueni: “Vipi viange via nji uana.” (Visa. 40:12; 65:3) Cipue mu nima ya ku hiluka kuli Yehova, muntu kasi a hasa ku livua mulonga na ntsuamua mu miaka ya ingi. Umo ndumbuetu ua lizina Isabelle, * ua uile mu miaka 20, ngueni: “Ca nji kaluuilile ku tava ngecize Yehova a hasa ku nji ecela.” Vunoni nga mu uila mu vusiua, mu hasa ku zeya mu lutsilielo. (Visi. 24:10) Ngeci mukemuo kati mu tave ku uila mu vusiua.

Vakuavo ve ku ivua liova mu ku singanieka ha viuma vi va na pande ku linga, mangana vusamba vuavo na Yehova vu hiluke muze mua laza. Muanetu Antoine, mu nima ya ku hiluka mu cikungulukilo ua handekele ngueni: “Nja livuile ngue nji na suvu Vukua Kilistu vuange vuose vua katete.” Visinganieka ngeci muevi, vie ku veta vavengi ku vinkokuela ku tuala ha viuma via mu lutsilielo.

Ve ku livua ngue muntu ua kala na ndzivo kaha i puzuka na niondzi. Ku singanieka ha ntsimbu na kapandi ka na pande ku lihakela mu ku i tungulula, ci hasa ku mu vuisa mu vitsiha keke. Na vuno vene, nga vumo vupi vua kama vua tsihile vusamba vuenu  na Yehova mu hasa ku livua ngecize ku vu hiluisa, ci ka tondeka mu lihakele kapandi ka kama cikuma. Vunoni tantekeyenu ngecize vukuasi ku vuli.

Yehova ua tu lania ngueni: “Ijeni tulizivasane.” (Isaya 1:18, Livulu lya Shukulu Kalunga) Mu na lihakela laza kapandi ka ku lizivasana na Yehova. Kaha Yehova ua mi lema omo lia kapandi kaco. Muomu ku hiluka cenu kuli ikeye, ca mu hana vukovelelo vua ku muesa ngecize Satana mukua makuli.—Visi. 27:11.

Mu ku lingamo, mu na suena laza kuli Yehova kaha neni na kulahesa ku suena kuli yeni. (Tia. 4:8) Vunoni via tondeka kati lika vakuenu va mi mone ngecize mu na hiluka mu cikungulukilo, kuli vikuavo naua. Mua pande ku tualelelaho ku kaniamesa cilemo cenu kuli kavusamba kenu na Isuenu ua muilu Yehova. Vati mu hasa ku lingamo?

Setekenu ku lihakela vizango via mu lutsilielo vize vi mu hasa ku puisamo. Halumo viuma vi mua lilongesele ku tuala hali Yehova na vikulaheso vieni, kasi ka mua vi suvile. Vunoni mua pande ku pangela honi ha vilinga vienu mu ku pua Mukua Kilistu. Ngeci mua ku ambulula muzimbu ua cili, ku kunguluka ntsimbu yose, kaha na ku likata na vamuanoko mu lutsilielo. Aci hilulenu ha vizango vi na hatako.

Ku handeka na Yehova ku sua kumo. Isuenu ua muilu a tantekeya ngecize citakutaku ci hasa ku mi kaluuisa ku vundila kuli ikeye. (Loma 8:26) Vunoni “kakatelenu mu ku vundila” na ku leka Yehova ngecize mu tondeka mua kama vusamba vueni. (Loma 12:12) Muanetu Andrej, ngueni: “Nja vuile citakutaku ca kama na ntsuamua. Vunoni ha ntsimbu i nja kele na ku vundila, visinganieka viaco via kele na ku tepuluka. Kaha na mutima uange ua tualeleleho ku lembama.” Nga ka mu tantekeya vika mua pande ku vundila, hilulenu vivundilo via lingile Muangana Ndaviti mu nima ya ku aluluka ku vipi vieni, vili ku Visamo 51 na 65.

Ku lilongesa Mbimbiliya ku sua kumo. Ku lingamo, ci ka mi kaniamesa mu lutsilielo na ku kolesa cilemo cenu kuli Yehova. (Visa. 19:7-11) Muanetu Felipe ua handekele ngueni: “Mua lumo kati mua luvali. Ku honoua ku tanda Mbimbiliya ku sua kumo na ku lilongesayo, vikevio via nji zeyesele mu lutsilielo na ku nji lingisa nji vulumune kuli Yehova. Nga nja lihakelele kapandi ka ku lilongesa mu vulika nga nja niungile vusamba vuange na Yehova.” Nenu mu hasa ku lingamo. Nga mu tonda vimpande via ku lilongesa mu vulika, mu hasa ku vundila umo kavusamba kenu ua ku hia mu lutsilielo a mi kuase.

Ku hiluisa vusamba na vamuanetu mu lutsilielo. Vamo vamuanetu mu ve ku hiluka mu cikungulukilo, ve ku lisosomua ngecize halumo vakuavo vali na ku va vuila matoto. Ndumbuetu Larissa ua litavelele ngueni: “Nja vuile ntsuamua ya kama. Muomu nja livuile ngecize nja vuisile vamuanetu vusiua vua kama. Vi singanieka viaco via nji yandesele mu ntsimbu ya kama.” Nga nenu mukemuo mu mue ku livua, kalenu na vusunga ngecize vakuluntu na vamuanetu vakuavo va kuhia mu lutsilielo, vali na cizango ca kama ca ku mi kuasa ku hiluisa vusamba vuenu na Yehova. (Talenu cikasa “ Vi va Hasa ku Linga Vakuluntu mu Cikungulukilo?”) Va viukilila mua kama ku mi mona mu na hiluka kaha va tonda mu yoye mu ndzolela!—Visi. 17:17.

Vika vi hasa ku mi kuasa ku likata na cikungulukilo? Lihakenu mu vutuntu mu viuma vi vali na ku linga vamuanoko mu lutsilielo. Ngeci mua ku kunguluka na ku ambulula ku sua kumo. Ku lingamo ci ka mi kuasa mu njila ika? Muanetu Felix ngueni: “Cikungulukilo ca kele na ku lavelela ku hiluka cange. Evi via nji kuasele ku livua ngecize nja kala na seho. Vose va nji kuasele ku livua ngecize nji na pu naua mutamba ua cikungulukilo, Yehova na nji ecela kaha citava nji mu pangele na mutima umo.”—Talenu cikasa “ Vi mu Hasa ku Linga.”

Satana a tualelelaho ku mi tuma vimpuendza linga a mi zeyese, omo mu tungulula ndzivo ya vusamba vuenu na Yehova. (Luka 4:13) Vunoni kati mu li ecelele, tualelelenuho ku i tungulula vene.

Ku tuala ha vampanga veni, Yehova ua kulahesa ngueni: “Nji ka tonda uze ua zimbalele na ku hiluisa uze iva tele, na ku kuta uze ua pokokele na ku kolesa uze ua vavalele.” (Ezek. 34:16) Yehova ua kuasa vavengi ku hiluisa vusamba vuavo neni. Ngeci mukemuo, kalenu na vusunga ngecize nenu a tonda ku mi kuasa mu tualeleleho ku kaniamesa vusamba vuenu neni.