1-2. Njila ika ya cili cikuma ya ku tanda na ku lilongesa Mbimbiliya? Hanenu cimueso.

 ACI SINGANIEKENU nga mu tonda ku landa ndzivo. Vika mu ka talesesa vuino ntsimbu kanda mu lande? Cikupulo ca ndzivo lika ni? Houe. Mua vusunga, mu ka tondesesa ku mona mpundu ndzivo yaco na meso enu, ku i zenguluka, ku tala hondo ku hondo, na ku tala vukama vua vihondo viose na ndzivo yaco. Halumo mu ka tonda ku tala vutumbe vua ndzivo yaco na ku tantekeya vati va i tungile. Cili vene, mu ka tonda ku tantekeya ndzivo yaco mu vutuntu vuose ntsimbu kanda mu ci i lande.

² Na vuno vene, tu hasa ku linga evi nga tuli na ku tanda na ku lilongesa Mbimbiliya. Limo livulu lia setekesa Mbimbiliya na ndzivo ya kama ya kala na vimpaka via laha na luvula lua lova. Vunoni vati honi mu hasa ku tantekeya Mbimbiliya mu vutuntu vuayo? Nga mu i tanda vuasi-vuasi lika, mu hasa ku lilongesamo via vindende ni nguetu viuma via ku “livanga via ku mezi a Njambi.” (VaHe. 5:12) Vunoni ngeci mua ize ndzivo i va na ambele, mu ka tonda ku kovela mukati ni nguetu ku tondesesa mizimbu ya indende ya kala mu Mbimbiliya. Imo njila ya cili ya ku lilongeselamo Mbimbiliya, ya pua mu ku mona vati mizimbu yayo ya ku lizesa-seza ya likuata kumo. Lihakelenu kapandi ka ku ivuisisa kati lika vilongesa via kalamo, vunoni nomo lia vika mua tsiliela vilongesa viaco.

3. Vika kapostolo Paulu ua kaniamesele Vakua Kilistu ku linga kaha omo lia vika? (Efeso 3:14-19)

³ Linga tu ivuisise viseteko viose via Lizi lia Njambi, tua pande ku lilongesa vilongesa viayo via kama. Kapostolo Paulu ua mamuine Vakua Kilistu va lilongese Lizi lia Njambi na ntsintsa linga va hase ku ivuisisa “mu vuihi na mu vulahe, vutuntuke na mu ku lova,” ca vusunga. Ku lingamo, ce ku va kuasele ‘ku  soka mizi’ na ku tungisa lutsilielo luavo. (Tandenu Efeso 3:14-19.) Netu tua pande ku lingamo. Tu talenu honi vati tu hasa ku hilula Lizi lia Njambi linga tu hase ku li ivuisisa mu vutuntu.

4. Vika tu hasa ku linga linga tu hase ku likuata vusamba vua kama na Yehova? Hanenu vimueso.

⁴ Etu Vakua Kilistu, ka tue ku viukilila lika na vusunga vua helu-helu. Na vukuasi vua sipilitu santu ya Njambi, tua tonda ku lihakela kapandi ka ku ivuisisa vuino “vize via ku lova via Njambi.” (1 Kol. 2:9, 10) Ngeci mukemuo, ci pua ca cili nga mu putuka ku lilongesa mu ku lova mu cifua cize ci kaniamesa vusamba vuenu na Yehova. Ca ku muenako, mu hasa ku tondesesa vuino ku tuala ha vati Yehova ua muesele cilemo ku vangamba veni va ku laza na vati evi via muesa ngecize neni ua mi lema. Cikuavo naua, mu hasa ku hilula mua vati Yehova ua tumbikile ku lemesa mu Isaleli ya laza na vati ku lemesa caco ca lifua na ca Vakua Kilistu lelo lino. Ni halumo, mu hasa ku lilongesa mu ku lova vupolofeto vua puisilemo Yesu mu muono ueni na mu ku ambulula ceni hano ha mavu.

5. Vuno kuli cimpande ci mu tonda ku ka tondesesa vuino mu cilongesa cenu ca mu vulika ni?

⁵ Vamo vamuanetu va lema ku lilongesa Mbimbiliya mu ku lova, va handekele vimo viuma vi va lema cikuma ku hilula mu Lizi lia Njambi. Mu hasa ku mona viuma viaco vi va tumbula vakevo, mu cikasa “ Vimpande via ku Lilongesa mu Vulika.” Kaha citava mu pangese Índice das Publicações da Torre de Vigia ni Guia de Pesquisa. Nga mu pangesa vikuata viaco, lutsilielo luenu lu ka kaniama na ku “tantekeya Njambi.” (Visi. 2:4, 5) Tu talenu honi vumo vusunga vua ku lova, vua mu Mbimbiliya vu mua pande ku hinda.

6. (a) Ku litepa cika ca kala ha cizango na vutumbe? (b) Omo lia vika tu hasa ku handekela ngecize vutumbe vua Yehova ku tuala ha vantu na mavu vua pua vua ya-ye? (Efeso 3:11)

⁶ Ca ku muenako, tu hilulenu ha viuma vi ya handeka Mbimbiliya ku tuala ha vutumbe vua Njambi. Ha kala ku litepa ku tuala ha cizango na vutumbe. Cizango, ca pua ngue njila imo lika ize i mi kuasa ku ka heta kuze ku mu tonda kuya. Vunoni mu hasa ku likela ku puisamo  cizango caco, nga mu uana coua mu njila ni vimo vieka vi mi vindika ku tualelelaho. Vunoni vutumbe, vua tala mua kama ha viuma via tonda ku puisamo muntu. Tu tantekeya mpundu ku cihela ku tu tonda ku ka heta kaha ka tuesi na njila imo lika ya ku ka hetako. Muomu hose ha tondeka, tu hasa ku pangesa njila yeka. Yehova ua tu soluela kamandende-kamandende ‘vutumbe vueni’ mu Mbimbiliya. (Talenu nota de estudo ha Efeso 3:11.) Viuma vi kaluue vati, Yehova kasi ue ku puisamo vutumbe vueni, muomu ua “litangela viuma viose” linga vi puisemo vutumbe vueni. (Visi. 16:4) Kaha viose vie ku puisamo Yehova, via pua via ya-ye. Vutumbe vuka ua kala navuo Yehova kaha vati ue ku alulula viuma linga a hase ku vu puisamo?

7. Mu nima ya visemi vetu ku vulumuna, vati Yehova ua aluluile viuma, linga a hase ku puisamo vutumbe vueni? (Mateo 25:34)

⁷ Njambi ua lekele visemi vetu va katete, vutumbe vueni ku tuala hali vakevo. Ngueni: “Semenu, na ku lilanesa, kaha sulisenu mavu naua, na ku a ononuesa. . . na viuma viose via muono vienda hano ha mavu.” (Njen. 1:28) Va Andama na Eva va alulukile Yehova na ku kokela vupi ku vantu vose, vunoni eci ka ca tsihile vutumbe vua Yehova. Ua aluluile viuma linga a puisemo vutumbe vuaco. Ku ntsimbu ya ku nima, ua tumbikile Vuangana muilu vuze ue ku puisilemo vutumbe vueni vua katete ku tuala ha vantu na mavu. (Tandenu Mateo 25:34.) Kaha mu ya puilemo ntsimbu, Yehova ku cilemo ceni ua tumine muaneni ha mavu linga a ku longese vantu ku tuala ha Vuangana vua Njambi na ku hana muono ueni ku pua nkombelo ya ku tu patula ku vupi na ku-tsa. Mu nima yaco, Yesu ua sangukile na ku hiluka muilu kaha ua pua honi Muangana ua Vuangana vua Njambi. Vunoni kuli vikuavo naua vi tua pande ku hilula ku tuala ha vutumbe vua Njambi.

8. (a) Cimpande cika ca kama ci ya handeka Mbimbiliya? (b) Ngue mu ya lombolola Efeso 1:8-11, vutumbe vua kama vua Yehova vuka? (Talenu cikupulo ca helu.)

⁸ Muzimbu ua kama ua mu Mbimbiliya ua pua ku lela ca lizina lia Yehova, omo a ka puisamo vutumbe vueni ku tuala ha mavu ku hitila mu Vuangana vueni vua ali na ku sika Kilistu muilu. Ovu vutumbe vua Yehova ka citava ku vu alulula. Muomu ua linga cose linga vutumbe vuaco vu ka lipuisemo mu vutuntu. Na vimo viahi vi hasa ku vui imika. (Isaya 46:10, 11; VaHe. 6:17, 18) Mu nima ya ntsimbu ano mavu va ka alulula ku pua citungu ca ku tantuluka, muze mu ka kala vakua vuviuke va ku mbuto vua Andama na Eva, linga va ka yoyelemo “ku miaka na miaka ya ya-ye.” (Visa. 22:26) Vunoni kati ovio lika, vutumbe vua Yehova vua ambatesela kumo na vikuavo. Vutumbe vueni vua kama vua pua, ku pandakana vantu na tungelo muilu na ha mavu na ku va puisa vusoko vumo lika vue ku mu lemesa. Kaha vose va ka kala na muono ku ntsimbu oyo va ka lemesa lika ikeye mu ku pua Mukua ku Hiana Viose. (Tandenu Efeso 1:8-11.) Vuno ka ce ku mi komouesa ku mona njila ye ku puisilamo Yehova vutumbe vueni ni?

9. Viuma vika tu hasa ku tantekeya mu ku lilongesa Mbimbiliya?

⁹ Aci singaniekenu ha vupolofeto vua handekele Yehova mu citungu ca Endene ngue mu ya muesa Njenisisi 3:15. b Vupolofeto vuaco, vua muesele viuma vi ka soloka ku lutue mu ku puisamo vutumbe vua Njambi. Viuma ngeci mua ku semuka ca mukua mbuto ya Avilahama na cikota ceni cize ce ku tualele ku semuka ca  Kilistu. (Njen. 22:15-18) Kaha mu muaka ua 33 T.K.N., Yesu va mu sumine ku ntsintsino ngue mu ya muesele vupolofeto vuaco. (Vili. 3:13-15) Ku vumanusuilo vua vupolofeto vuaco, Satana va ka mu pulakana ku mutue, vunoni kua ci lisupu 1.000 lia miaka ku tunda hano. (Ku-So. 20:7-10) Mbimbiliya, ya muesa vikuavo naua vi ka soloka omo vitozi va ha kati ka Satana na lukungulukilo lua Yehova vu ka heta ha ntuintui.

10. (a) Viuma vika vi ka soloka ku lutue vi tua lavelela? (b) Vati tu hasa ku vuahesa visinganieka na mitima yetu? (Talenu naua litota.)

¹⁰ Aci singaniekenu hali eyi mizimbu i ka ninganga mavu i va tumbula mu Mbimbiliya. Ha katete, vifuti vi ka tambeka nguavio: “Kua holo tu novoka.” (1 Tes. 5:2, 3) Kaha vuasi-vuasi, lamba ya kama i ka putuka omo vakua vifuti va ka nongesa vulombelo vua makuli. (Ku-So. 17:16) Mu nima yaco, halumo ku hitila mu cikomoueso va ka mona “Muana muntu a li na ku iza ha maselua a muilu na ngolo na vumpahu vua kama.” (Mat. 24:30) Yesu a ka sompesa vantu vose na ku tepesa vampanga ku vampembe. (Mat. 25:31-33, 46) Vunoni Satana ka ka kosa mu kaali. Omo lia ku zinda vangamba va Njambi a ka sangumuna civunga ca vifuti, ci ya tumbula Mbimbiliya nguayo Ngonge ua ku cifuti ca Mangonge linga ci ka luise vakua ku lemesa Yehova. (Ezek. 38:2, 10, 11) Kaha ha ntsimbu imo, vakua ku vuavesa vaze va ka lisupa ha mavu va ka va likunguluila muilu linga va ka lipandakane na Yesu na vivunga via tungelo muilu, mu kulua Ndzita ya Alemangendo, ize i ka kala ku vumanusuilo vua lamba ya kama. c (Mat. 24:31; Ku-So. 16:14, 16) Mu nima yaco, Kilistu a ka putuka ku sika mavu mu Likulukazi lia Miaka.—Ku-So. 20:6.

11. Vika mu ka hasa ku puisamo omo lia lulavelelo lua ku ka yoya miaka yose? (Talenu naua cikupulo.)

¹¹ Na hano honi, setekenu ku tala vulaha vua viuma vi ka soloka ku lutue. Mbimbiliya ya handeka nguayo, Sakatanga ua ‘haka ntsimbu ka ye ku hua mu mitima yetu.’ (Ekel. 3:11) Aci singaniekenu vati evi vi ka kuata kuli yenu na ku vusamba vuenu na Yehova. Livulu Achegue-se a Jeová ha lifo 319 lia vueza ku cizango cetu ca  ku ka yoya miaka yose mu ku handeka ngualio: “Mu nima ya ku yoya vihita, makulukazi na makulukazi a miaka, tu ka tantekeya via vingi ku tuala hali Yehova Njambi, ku hiana mu ntsimbu ino.” Vutuhu ngoco, kasi tu ka livua ngecize kuli viuma vikuavo via ku komouesa vi tua pande ku lilongesa ku tuala hali Ikeye . . . . Mua vusunga, muono ka ue kuhua u ka sula na via vingi via ku linga kaha via ku liseza-seza. Kaha cuma ca kama ho, ci ka pua ku tualelelaho ku kaniamesa vusamba vuetu na Yehova. Vika vikuavo tu hasa ku lilongesaho mu Mbimbiliya?

12. Vati tu hasa ku tala muilu? Hanenu cimueso.

¹² Lizi lia Njambi, lia tu kuasa ku nongonona Yehova ngualio: “Ua kala muilu.” (Isaya 33:5) Mbimbiliya, ya solola viuma via ku komouesa ku tuala hali Yehova na mutamba ua muilu ua lukungulukilo lueni. (Isaya 6:1-4; Ndan. 7:9, 10; Ku-So. 4:1-6) Ca ku muenako, tu hasa ku tanda ha viuma viaco evi via ku komouesa ku hitila mu viuma via muene Ezekiele, ngueni: “Melu a sokolokele, kaha nja muene vimona via Njambi.”—Ezek. 1:1.

13. Vika mue ku komoka mua kama ku tuala ha cipanga ca kala naco Yesu muilu, ngue mu ya muesa VaHevelu 4:14-16?

¹³ Aci singaniekenu ha cipanga ca kala naco Yesu, mu ku pua Muangana ua Vuangana vua Njambi na Sasendote ua Kama. Ku hitila muli ikeye, tu hasa ku suena ku “citumamo ca kavumbi” ku hitila mu vivundilo na ku vundila cikeketima na vukuasi “ku ntsimbu i tu ka vi zela.” (Tandenu VaHevelu 4:14-16.) Ngeci mukemuo, ka tu ka tavesa na limo litangua liahi ku hita ngoco, ca ku hona ku hilula ha viuma via tu lingila Yehova na Yesu na vize vi vali na ku tualelelaho ku tu lingila muilu. Cilemo cavo kuli yetu, ca pande ku tu kuata mua kama ku mutima na ku tu vuisa cizango ca ku kala na  ntuima mu vipanga via Vuangana na mu ku lemesa cetu.—2 Kol. 5:14, 15.

14. Cuma cika ca cili cikuma ci tu hasa ku linga mu ku muesa ku santsela cetu kuli Yehova na Yesu? (Talenu naua vikupulo.)

¹⁴ Imo ya vinjila via kama vi tu hasa ku mueselemo ku santsela cetu kuli Njambi na Muaneni, ya pua mu ku lihakela kapandi ka ku kuasa vakuetu va pue Vakaleho va Yehova na vandongesi va Yesu. (Mat. 28:19, 20) Evi vikevio via lingile kapostolo Paulu mu ku muesa ku santsela ceni kuli Njambi na Kilistu. Muomu ua tantekeyele ngecize Njambi “a hianga vantu vose vovoke, va hete ha ku tantekeya vusunga.” (1 Tim. 2:3, 4) Ngeci ua lihakelele kapandi ka kama mu ku ambulula na ku kuasa vantu vose va hasele, linga a “kovole vamo cili.”—1 Kol. 9:22, 23.

15. Kuliya na Visamo 1:2, vika vi hasa ku tu vuisa ndzolela?

¹⁵ Ngeci mukemuo, mukua visamo ka sevukile mu ku handeka ngueni, muntu ua ndzolela ua pua uze ue ku “viukilila lisiko lia Yehova; Kaha a yongola lisiko lieni mutana na vutsiki.” (Visa. 1:1-3) Mukua ku langulula Mbimbiliya Joseph Rotherham, ua handekele ngueni: “Muntu na pande ku lema mua kama ku tuamenena ca Njambi mu cifua ca ku linga evua cizango ca ku ci lengeya, ku lilongesa co na civando kaha na ku ci ononoka. (Studies in the Psalms).” Kaha ua vuezeleko naua ngueni: “Mukua ku tanda Mbimbiliya na pande ku mona litangua liose li mu hita ca ku hona ku tanda Lizi lia Njambi ngue na liputuisa litangua liaco.” Mu hasa ku ivua ndzolela ya ku lilongesa Mbimbiliya mu ku i hilula mu civando, cipue ya indende na ku mona vati yose ya likuata kumo. Mua vusunga, ce ku vuisa ndzolela ya kama ku hilula Lizi lia Njambi mu viseteko vialio viose!

16. Vika tu ka simutuila mu cilongesa ci na hatako?

¹⁶ Viuma via ku tovala via tu hakela Njambi mu Lizi lieni, ka via puile via vikalu cikuma mu cifua ca ku linga ka tu hasa ku vi ivuisisa. Mu cilongesa ci na hatako, tu ka hilula vumo vusunga vua lova ni nguetu tembele ya kama ya mu lutsilielo, ize ya tumbuile Paulu mu mukanda ya sonekelele Vakua Kilistu vaHevelu. Kaha tua vundila ngecize ku hilula muzimbu uaco ci ka mi vuise ndzolela ya kama.