Vihula via Vakua ku Tanda
Vuno vaIsaleli va kele na via-ku-lia vieka mu vindinda ku tundisako manna na vantento ni?
Manna, vikevio via-ku-lia vi va lile mua kama vaIsaleli mu miaka 40 i va kele mu vindinda. (Ezu. 16:35) Kaha Yehova ua va hele naua vantento luvali. (Ezu. 16:12, 13; Num. 11:31) Vunoni vaIsaleli va keleko naua na vimo via-ku-lia vikuavo.
Ca ku muenako, vintsimbu vimo Yehova ua tualele vantu veni ku vumo “vuhuimino” ku va uanene via-ku-lia vikuavo na mema a ku nua. (Num. 10:33) Cimo ca vihela viaco, ca puile ku Elime “kuze kua kele zindundzi likumi na zivali zia mema na tunkoma makumi atanu na avali.” Miti yaco ya tunkoma citava ya puile ngue eyi ili ha cikupulo ca cino cimpande. (Ezu. 15:27) Limo livulu ngualio miti yaco “ye ku hasa ku soka ha livu lia ku liseza-seza, . . . kaha kukekuo ku ve ku uana cikuma vantu via-ku-lia mu makango. Cikuavo naua, makulukazi a vantu ve ku nonako mazi na ku pangesa miti yaco mu ku tunga vindzivo.”—Plants of the Bible
Kaha halumo vaIsaleli va tulilile naua ku cimo cihela ca kama ca mu vindinda ca kala na miti na mema, ci va luka lelo nguavo Feiran, kaha ca pua mutamba ua Cana ci va luka naua nguavo Feiran. a Limo livulu likuavo ngualio “vulaha vua cana caco vua pua 130 km. Cikeco ca pua cana ca laha cikuma kaha ca cili cikuma ku Sinai.” (Discovering the World of the Bible) Kaha naua ngualio “mu nima ya imo 45 km tunde ha ca putukila cana caco, mua kala cihela ca cili ca mema na miti ca Feiran. Kaha ku mikulo yaco kua kala miti ya tunkoma. . . Tu hasa vene ku ci tumbula nguetu Endene ya mu Sinai. Eyi miti i muli na ku mona ha cikupulo ye ku lingisa vantu vavengi kuiza mu ku tunga ku cihela caco tunde ku laza.”
Miti ya tunkoma mu can ca Feiran
Mu va tundile mu Ingito, vaIsaleli va ambatele vunga vua tiliku vua ku tika laza na vitikilo kaha halumo na vimo vimbuto vene na mazi. Vunoni via-ku-lia viaco citava via huile vuasi. Va ambatele naua ‘vampembe, vampanga, na vangombe va vengi cikumakuma.’ (Ezu. 12:34-39) Vunoni omo lia ku kaluua ca viuma mu makango, citava cingi ca vimuna vaco va tsile. Vamo halumo va va tengele vifo ni nguetu mbelela, vakuavo va va kombeleyele kuli Yehova ni vene ku vanjambi va makuli. b (Vili. 7:39-43) Vutuhu ngoco, citava vaIsaleli kasi va kele na vamo vimuna, ngue mua muesa mezi a va lekele Yehova mu va mu alulukilile, ngueni: “Vana venu va ka pua viendangane [tuniungi va tusitu] mu zindinda miaka makumi auana.” (Num. 14:33) Ngeci mukemuo, citava va kele naua na mavisi a ku tunda ku vimuna vavo kaha na ntsitu vene, vunoni ka ya puilemo mu ku suka vantu va heta ku 3 milhões mu miaka 40. c
Vunoni kuliko va uanene via-ku-lia na mema a ku hana ku vimuna vavo? d Ku ntsimbu ize, citava kua kele na ku noka-noka mua kama ngeci mu mpambo mua kele muila ua uingi. Livulu Estudo Perspicaz volume 1 ngualio miaka 3.500 “ku nima, mu Arabia mua kele mema a engi ku hiana lelo lino. Ku lana ca viana via lova kaha via ku uma, vize halumo via puile vene vindonga, ca muesa ha toma ngecize ku laza kua kele na ku noka mema a engi aze a himpukile vene vindonga.” Vutuhu ngoco vindinda via puile via ku uma kaha via ku zuzuisa. (Ndeu. 8:14-16) Mua vusunga, vaIsaleli hamo lika na vimuna vavo nga va tsile, ca ku hona mema a va hanene Yehova ku hitila mu vikomoueso.—Ezu. 15:22-25; 17:1-6; Num. 20:2, 11.
Mosesa ua lekele vaIsaleli ngueni Yehova ua va lisile manna linga a va “tantekeyese ngecize muntu ke ku yoya na mbolo lika, vunoni na viose vi tuhuka mu kanua ka Yehova.”—Ndeu. 8:3.
a Talenu A Sentinela ya 1 ya Maio, 1992, mafo 24-25.
b Mbimbiliya ya tumbula vintsimbu vivali omo vaIsaleli va kombeleyele vimuna kuli Yehova. Ya katete, omo va tumbikile vusasendote. Ya mu civali ha Pasovala. Viose evi via solokele mu muaka ua 1512 T.K.K.E. Ni nguetu, muaka ua mu civali u va kele vaIsaleli mu vindinda.—Levi. 8:14–9:24; Num. 9:1-5.
c Kampe ku ntsongo ya miaka 40 mu vindinda, vaIsaleli va pupile tusitu vavengi ku vindzita vi va luile. (Num. 31:32-34) Vutuhu ngoco va tualeleho ku lia manna noho ha va kovelele mu Cifuti ca Cikulaheso.—Yeho. 5:10-12.
d Ka kuesi vukaleho vua muesa ngecize vimuna navo va lile manna, muomu nguavo manna va kele na ku i hana kuliya na ku-lia ca nkala muntu.—Ezu. 16:15, 16.
