1-2. Vati Ekelesiaste 11:6 ya likuata na cipanga ca ku ambulula muzimbu ua cili?

KU VIFUTI vimo, vantu ve ku tava na ndzolela muzimbu ua cili. Muomu ukeuo u ve ku lavelela na laza! Vunoni mu vifuti vikuavo, vantu ka va lemene Njambi cipue Mbimbiliya. Amba co muimbo lienu? Cipue nga vantu ve ku tava ni kuahi, Yehova ua lavelela ngecize tu tualeleleho ku ambulula noho cipanga caco ci na hete haze ha tonda ikeye.

² Cipanga ca ku ambulula ci ka hua ha ntsimbu ya tumbika Yehova kaha “ku-kotoka ca mavu ci keza.” (Mat. 24:14, 36) Vunoni mu ntsimbu ino, vati tu hasa ku ononoka mezi a ku Ekelesiaste 11:6 a muesa ngecize ka tua pandele ‘ku vindika livoko lietu’? *—Tandenu.

3. Vika tu lilongesa mu cilongesa cino?

³ Cilongesa ci na hiti ca muesele viuma viuana vi tua pandele ku linga tu puisemo vuino cipanga ca “vakua ku tela vantu.” (Mat. 4:19) Mu cilongesa cino, tu simutuila vinjila vitatu vi tu hasa ku kaniameselamo cizango cetu ca ku ambulula ambe nga tu hita mu visoti via vikalu. Tu lilongesa omo lia vika ca puila ca seho (1) ku tuala mana ku cipanga cetu, (2) ku pua vakua lukakatela, kaha (3) ku tualelelaho ku kaniamesa lutsilielo luetu.

4. Omo lia vika tua pande ku tuala mana ku cipanga ca tu kundika Yehova?

⁴ Yesu ua polofetele vua lumo viuma vie ku solokele ku matangua a ku manusuila, kaha vie ku tanganesele vandongesi veni ku puisamo cipanga ca ku ambulula. Ngeci ua lunguile vandongesi veni va tualeleleho ku ‘vingila.’ (Mat. 24:42) Lelo lino, kua kala  vitanguizi via lifua na vize via tanguile vantu ku matangua a Noa linga kati va tuale mana ku muzimbu ua kele na ku va ambuluila Noa. (Mat. 24:37-39; 2 Pet. 2:5) Ngeci mukemuo, tu tonda ku tuala mana ku cipanga ca tu kundika Yehova.

5. Vati Vilinga 1:6-8 ya muesa vukama vua cipanga cetu?

⁵ Cipanga ca ku ambulula Vuangana ca tondeka tu ci tuale mana lelo lino. Yesu ua polofetele ngecize, cipanga caco ci ka livuezelela kaha ci ka tualelelaho ambe mu nima ya ku tsa ceni. (Yoa. 14:12) Mu nima ya kutsa ca Yesu, vamo vandongesi veni va hilukile ku cipanga ca ku tsiha vantsi. Kaha mu nima ya ku sanguka, Yesu ua lingilile vandongesi veni cikomoueso ca ku kuata vantsi vavengi. Ngeci ua pangesele vukovelelo vuaco mu ku tsindika ngecize, cipanga ca ku pua vakua ku tela vantu cikeco ca puile ca seho ya kama ku hiana nkala cipanga ceka. (Yoa. 21:15-17) Tele a lingila ku hiluka muilu, Yesu ua lekele va ndongesi veni ngecize cipanga ca putukile ca ku ambulula ka ci ka lengela lika mu Isaleli, vunoni ci ka lisanduoka na ku vifuti via ku lahako. (Tandenu Vilinga 1:6-8.) Mu nima ya miaka ya yingi, Yesu ua hele cimona kuli kapostolo Yoano ku tuala ha viuma vi ka soloka ha “litangua lia Muangana.” * Cimo ca vimona via muene Yoano, ca puile ca umo kangelo “ua kele na zimpande zia cili” zia ku ambuluila ku “vifuti viose, na miyati yose na malimi ose na vantu vose.” (Ku-So. 1:10; 14:6) Eci ca muesa ha toma ngecize, cizango ca Yehova kuli yetu lelo lino, ca pua ku ambulula ou muzimbu ua Vuangana noho ha ka tu imikila ivene.

6. Vati tu hasa ku tuala mana ku cipanga ca ku ambulula?

⁶ Tu hasa ku tuala mana ku cipanga ca ku ambulula nga tu singanieka ha viose vie ku linga Yehova mu ku tu kuasa. Ca ku muenako, ue ku tu hana via kulia via mu lutsilielo via vingi ngeci mua mikanda ya ku mavoko na ya eletroniku, miaso, vivideo kaha na viprograma via mu JW  Broadcasting. Aci singaniekenuho: Mu saiti yetu mua kala mizimbu mu malimi a tuvakana 1.000! (Mat. 24:45-47) Mu mavu ano a ku sula na matepeso a pulitika, malombelo na vupite, mu li vangamba va Yehova va tuvakana 8 milhões va lipandakana mu ku pua civunga ca vamuanaye mu mavu ose. Ca ku muenako, Lia mu Citanu 19 ya Abril ya 2019, Vakaleho va mu mavu ose va likunguluile mu ku simutuila ha mukanda ua litangua. Kaha ku cinguezi ca litangua liaco, civunga ca vantu va ku pua 20.919,041 va likunguluile ku Mulalelo ua ku tsa ca Yesu. Mua vusunga, nga tu singanieka ha civezikiso ca ku pua mutamba ueci civunga ca ku komouesa, ce ku tu vuisa cizango ca ku tuala mana ku cipanga ca ku ambulula.

7. Vati lungano lua Yesu lue ku tu kuasa ku tuala mana ku cipanga ca ku ambulula?

⁷ Njila ikuavo i tu kuasa ku tuala mana ku cipanga ca ku ambulula ya pua ku tambuluisa lungano lua Yesu. Ka tavesele na vimo viahi vi mu tangule ku tuala mana ku cipanga ca ku ambulula vukaleho vua vusunga. (Yoa. 18:37) Ka tangukile na ceseko ca Satana ca ku mu hana “vifuti viose via hano ha mavu na vumpahu vuavio,” kaha ntsimbu ikuavo ua vianene ku mu puisa muangana. (Mat. 4:8, 9; Yoa. 6:15) Ka tangukile na cizango ca ku kala na vupite ni ku hilukila mu nima omo lia ku mu luisa cikuma. (Luka 9:58; Yoa. 8:59) Nga tu hita mu vieseko via mu lutsilielo, tu hasa ku tuala mana ku cipanga cetu nga tu vuluka cimamuna ca kapostolo Paulu. Paulu ua mamuine Vakua Kilistu va kave lungano lua Yesu linga ‘kati va katale na ku lezumuka’ ni nguetu ku likela.—VaHe. 12:3.

8. Lukakatela lua pua vika, kaha omo lia vika lua kala na seho ya ku lifuila matangua ano?

⁸ Lukakatela lua pua vuhasi vua ku lavelela ku aluluka ca vimo viuma na mutima ua ku lembama. Cipue nga tuli na ku lavelela ku hua ca cimo cisoti, ni ku lipuisamo ca cimo cizango cetu ci tua lavelela mu ntunda ya kama, tua pande ku pua vakua lukakatela. Kapolofeto Havakuke ua lavelele ku hua ca vukenia mu Yunda. (Hav. 1:2) Tangua limo vandongesi va Yesu va lavelele ngecize, Vuangana vua Njambi vu “soloka haze vene” na ku va patula ku mapakeso a vakua Loma. (Luka 19:11) Netu tua lavelela na cizango ca kama litangua omo Vuangana vua Njambi, vu ka fumisako vupi vuose na ku neha mavu a aha a vuviuke. (2 Pet. 3:13) Vunoni, tua pande ku pua vakua lukakatela na ku lavelela ntsimbu ya tumbika Yehova. Tu hilulenu vimo vinjila vie ku tu longeselamo Yehova ku pua vakua lukakatela.

9. Malungano aka a muesa lukakatela lua Yehova?

⁹ Yehova ua tu sila lungano lua ku tantuluka ku tuala ha ku muesa lukakatela. Ua hele kuli Noa ntsimbu ya ku puamo ya ku tunga na ku manusula vuato na ku pua “mukua ku ambulula vuviuke.” (2 Pet. 2:5; 1 Pet. 3:20) Yehova ua halakanene na lukakatela omo Avilahama ua tualeleho ku mu ihula ha cihangula ceni, ca ku nongesa vakua Sondoma na Ngomola. (Njen. 18:20-33) Mu vihita via miaka, Yehova ua muesele lukakatela lua ku komouesa na vakua cifuti ca Isaleli vutuhu va puile vakua vungungu kuli ikeye. (Neh. 9:30, 31) Na lelo lino, tue ku mona vukaleho vua lukakatela lua Yehova omo lia ntsimbu yali na ku hana ku vantu vaze va ali na ku lania linga “va hete ku ku-aluluka.” (2 Pet. 3:9; Yoa. 6:44; 1 Tim. 2:3, 4) Mua vusunga, lungano lua Yehova lua tu hana vusunga vua kama, vua pande ku tu lingisa ku muesa lukakatela omo tu tualelelaho ku ambulula na ku longesa muzimbu ua cili. Kaha naua ue ku tu muesa lukakatela ku hitila mu cimo cimueso ca kala mu Lizi lieni Mbimbiliya.

10. Vika tu lilongesa ku cimueso ca ndimi ci va tumbula ku Tiango 5:7, 8?

¹⁰ Tandenu Tiango 5:7, 8. Lungano lua ndimi lue ku tu kuasa ku pua vakua lukakatela. Vutuhu kua kala vimo vimbuto vie ku soka vuasi, vunoni  vikuavo ngeci mua vize vie ku ima via kulia, vie ku simbula ku kola na ku hia. Ntsimbu ya ku lima na ku tia vimbuto mu Isaleli ya kele na ku ambata kampe vingonde vitanu na imo. Vandimi va kele na ku kuna vimbuto ku vuputukilo vua kashukue ni nguetu ntsimbu ya ku lalumuka ca mafo, vunoni va kele na ku vi tia lika ku ntsongo ya luindza ni ndombo. (Mako 4:28) Netu tu lihakelenu kapandi ka ku tambuluisa lukakatela lua ndimi. Vunoni kati ca casi.

11. Vati lukakatela lu ka tu kuasa mu cipanga ca ku ambulula?

¹¹ Etu vantu va ku hona ku tantuluka tue ku tonda ku mona vusuka vua vipanga vietu mu ntsimbu oyo vene. Vunoni ku mona kuhia ca vimbuto ce ku tondeka lukakatela. Ca ku muenako, mu mihaka mua tondeka ku pangelamo ntsimbu yose ngeci mua ku tipa, ku kuna, ku shakuila ni ku sondzola na ku tukumuina. Na vuno vene, cipanga ca ku puisa vantu vandongesi ca tondeka ku tualelelaho ku lihakela kapandi. Ce ku ambata ntsimbu linga tu tukule muila ua kahangu na ku hona cilemo mu mitima ya vandongesi vetu. Lukakatela lue ku tu kuasa linga kati tu uile mu vusiua ambe nga tu hita mu visoti. Vunoni ambe nga vantu va na tava muzimbu uetu, kasi tua pande ku muesa lukakatela. Muomu ka citava ku kakateya vandongesi va Mbimbiliya va kole mu lutsilielo. Ambe vandongesi va Yesu, vintsimbu vimo va kele na ku ambata ntsimbu ya kama amba vevuisise via kele na ku va longesa. (Yoa. 14:9) Ngeci mukemuo, ka tua pandele ku suva ngecize, vutuhu yetu tue ku kuna na ku tukumuina, vunoni Njambi ikeye ue ku kolesa.—1 Kol. 3:6.

12. Vati tu hasa ku muesa lukakatela nga tu ambuluila vavusoko vuetu?

¹² Imo njila ye ku tu kaluuila ku muesa lukakatela, ya pua nga tu ambuluila vavusoko. Vunoni citume ca ku Ekelesiaste 3:1, 7 ci hasa ku tu kuasa. Citume caco nguaco: “Ku i li ntsimbu . . . ya ku holoka, na ntsimbu ya ku handeka.” Tu puenu na ku tavesa vilinga vietu vi tu ambuluileko, oku tu lavelela ntsimbu ya cili ya ku handeka  navo muzimbu ua Vuangana. (1 Pet. 3:1, 2) Tua pande ku ambulula na ntuima vunoni oku tu muesa lukakatela ku vantu vose cipue vene vavusoko vetu.

13-14. Tumbulenu amo malungano a lukakatela a tu hasa ku tambuluisa.

¹³ Tu hasa ku lilongesa lukakatela ku malungano a vantu vakua lutsilielo va va tumbula mu Mbimbiliya, na vamuanetu va ku matangua ano. Vutuhu Havakuke ua lavelele kuhua ca vukenia, vunoni ua handekele na ku simpa cose ngueni: “Nji ka mana ha vuvingililo vuange.” (Hav. 2:1) Kapostolo Paulu neni ua handekele via cizango ca ku mutima ueni ngueni, ua tondele ku ‘manusula’ cipanga ceni. Vutuhu ngoco, ua tualeleleho ku ambulula “vukaleho vua zimpande zia cili” na lukakatela.—Vilinga 20:24.

¹⁴ Aci hilulenu lumo lungano lua umo muanetu na mpueyeni va hitile mu sikola ya Ngileande, kaha va va tumine ku cifuti kua kala Vakaleho va vandende. Ku cifuti caco vulombelo vua tsimanako, ka vua puile vua Vakua Kilistu. Kaha va vandende lika va tondele ku lilongesa Mbimbiliya. Vunoni vakuavo va va ile navo ku sikola ya Ngileande kaha va va tumine ku cifuti ceka, va kele na ku va tuma mikanda ya ndzolela ya vilongesa via Mbimbiliya via vingi vi va kele na ku endesa. Vunoni vutuhu mu cifuti cavo vusunga ka vua kele na ku kola vuasi, vaze va yala na mpuevo va tualeleleho ku ambulula muzimbu ua cili na lukakatela. Kaha mu nima ya ku ambulula miaka itanu na itatu mu cihela cize ca vantu ka va lemene ku lilongesa vusunga, va hasele ku kuasa muntu umo lika a hete ha ku mu mbatiza. Haka a likuatela malungano a mu Mbimbiliya na aa a vuovuno? Ava vakua lutsilielo ka va kokoluele ntuima yavo ni ku vindika livoko liavo, ngeci Yehova ua va vezikisile omo lia lukakatela luavo. Ngeci mukemuo, tu “tambuluisenu vaze va ku suana matavasiano mu ku tsiliela na lukakatela.”—VaHe. 6:10-12.

15. Tumbulenu imo njila lutsilielo luetu lue ku kaniameselamo cizango cetu ca ku ambulula.

¹⁵ Tua tsiliela mu muzimbu u tue ku ambulula, ngeci tue ku ivua cizango ca ku ambuluila ku vantu vose va tu hasa. Kaha naua tua kulahela mu vikulaheso via mu Lizi lia Njambi. (Visa. 119:42; Isaya 40:8) Tue ku mona vupolofeto vua vuingi vua mu Mbimbiliya vue ku lipuisamo matangua ano. Tue ku limuena naua, vati vantu ve ku alulula miono yavo na ku yoya vuino mu ve ku putuka ku yoya muaya vitume via mu Mbimbiliya. Evi vie ku tu hana vusunga ngecize, muzimbu ua Vuangana ua pua muzimbu u va na pande kuivua vantu vose.

16. Kuliya na Visamo 46:1-3, vati ku tsiliela muli Yehova na Yesu ce ku kaniamesa kapandi ketu ka ku ambulula?

¹⁶ Ca mu civali, tua tsiliela muli Yehova Ivene muzimbu u tue ku ambulula, kaha naua tua tsiliela muli uze ya hangula mu ku pua Muangana ua Vuangana vua Njambi, ni nguetu Yesu. (Yoa. 14:1) Ambe tu hite mu visoti via ku fua vati, Yehova kasi a ka tualelelaho ku pua ngolo yetu na vutinino vuetu. (Tandenu Visamo 46:1-3.) Cikuavo naua, tuli na vusunga ngecize Yesu ikeye ali na ku tuamenena cipanga ca ku ambulula ku tundilila muilu, kaha ali na ku pangesa ngolo na mpoko ya mu hana Yehova.—Mat. 28:18-20.

17. Hanenu lungano lua muesa omo lia vika tua pande ku tualelelaho ku ambulula.

¹⁷ Lutsilielo lue ku kaniamesa lukulahelo luetu ngecize, Yehova a ka tualelelaho ku vezikisa kapandi ketu vintsimbu vimo mu vinjila ka tua lavelele. (Ekel. 11:6) Ca ku muenako, tangua ku tangua makulukazi na makulukazi a vantu ve ku nona mikanda ha tuntsandia tuetu tua ku ambulula natuo. Vuno eci cifua ca ku ambuluilamo cili na ku kuasa vene ni? Eyo ce ku kuasa cikuma! Mu Novembro ya 2014, mukanda ua Vipanga Vietu via Vuangana ua handekele via umo muhumbe ua ku imo sikola ya kama ua tondele  ku soneka umo muzimbu ku tuala ha Vakaleho va Yehova. Kaha ka hasele ku uana Ndzivo ya Vuangana, vunoni ua uanene mikanda yetu ha kamo kantsandia mu citali ca sikola ya kele na ku lilongesela, kaha mu mikanda yaco ua uanenemo vimpande via tondele ku soneka mu muzimbu ueni. Mu nima ya ntsimbu, ua hetele ha ku pua Mukaleho ua ku mbatiza kaha lelo lino ua pua pioneiro ua ntsimbu yose. Mizimbu ya cifua eci, ye ku tu kuasa ku tualelelaho ku ambulula muomu ye ku muesa ngecize kasi kuli vantu va tondeka kuivua muzimbu ua Vuangana.

18. Vusunga vuka tuli navuo ngecize cipanga ca ku ambulula ci ka lengela mpundu haze ha tonda Yehova?

¹⁸ Tu kalenu na vusunga ngecize, cipanga ca ku ambulula ci ka hua mpundu ha litangua li va ci tumbikila. Tu hilulenu via solokele ku matangua a Noa. Yehova ua muesele ngecize ue ku kava mu vutantuluke ntsimbu ya hangula. Tele kua lisupu miaka 120, Yehova ua hanguile litangua li lia pandele ku putuka Livazi. Mu nima ya miaka ya yingi, Yehova ua kundikile Noa cipanga ca ku tunga vuato. Noa ua tualeleleho ku fuitangana tele ku Livazi kua lisupu miaka 40 ni 50. Vutuhu vantu ka va kele na ku tava muzimbu ueni, vunoni Noa ua tualeleleho ku ambulula noho Yehova ua mu lekele ngueni i na puho ntsimbu ya ku kovelesa tusitu mu vuato. Kaha mu ya puilemo ntsimbu Mbimbiliya nguayo, “Yehova ua mu patelelemo.”—Njen. 6:3; 7:1, 2, 16.

19. Vika tu hasa ku lavelela nga ka tu vindika livoko lietu?

¹⁹ Yehova vuovuno a manusula cipanga ca ku ambulula, kaha a ka “soka ku mbelo” ya mavu a Satana na ku sokolola ku mbelo ya mavu a aha. Noho ha i ka puilamo ntsimbu yaco, tu lihakelenu kapandi ka ku tambuluisa Noa, Havakuke na vakuavo vaze ka va vindikile mavoko avo. Tu tualelelenuho ku lihakela kapandi mu ku ambulula, ku pua vakua lukakatela na ku tualelelaho ku kaniamesa lutsilielo luetu muli Yehova na mu vikulaheso vieni.