Cinimbu caco nguaco: “Nga u mona ku-yandesa ca muhutu, na ku-tangula ca vusompelo vua vuoloke na vuviuke mu cifuti, kati u komoke cuma cize: muomu umo mukua ku hiana uze na hiana a li na ku tala-tala; kaha ku va li vaze va va hiana.”—Ekel. 5:8.

Nga tu hilula eci cinimbu mu ku singanieka lika hano ha mavu, tu hasa ku mona ngecize ca handeka lika vene via vanguvulu va mavu. Vunoni nga tu hilula vuino-vuino ha cinimbu caco, tu ka mona ngecize ca handeka naua vumo vusunga vua seho ku tuala hali Yehova, kaha vusunga vuaco vue ku tu lembezieka na ku tu kaniamesa.

Ekelesiaste 5:8 ya handeka via muangana ue ku pakesa vihutu kaha ke ku va hakuila mu vuoloke. Kaha tuamena uaco na pande ku vuluka ngecize, citava kuli umo ali na ku mu mona kaha ua mu hiana ku mpoko ya ku sika. Vunoni citava kuli vakuavo va hiana ava vavali ku vukama vua ku sika. Ca vusiua ku mona ngecize ku vinguvulu via vantu, vamiangana vose va pua vakua vuhenge, kaha mbunga ikeyo ye ku yandelamo.

Vunoni cipue nga viuma vi soloka ngue ku vi vuaha naua, ci hasa ku tu lembezieka ku tantekeya ngecize Yehova ali na ku tala ‘vakua ku hiana’ vose va ha mavu. Tu puenu na ku vundila vukuasi kuli Njambi na ku mbila citeli cetu kuli ikeye. (Visa. 55:22; Filp. 4:6, 7) Tu tantekeya ngecize “meso a Yehova a hita oku noku hose ha mavu, mu ku kuasa na zindzili zieni vaze va li na mutima ua ku tantuluka kuli ikeye.”—2 Miz. 16:9.

Ngeci mukemuo, Ekelesiaste 5:8 ye ku tu vuluisa cifua ca viuma hano ha mavu, ngecize kasi kua kala umo ntuamena ua kala na mpoko ya ku hiana vakuavo. Vunoni ca seho ya kama, eci cinimbu ci tu kuasa ku nongonona ngecize Yehova ikeye ua Hiana vose ka kuesi na umo ntuamena ua mu hiana uahi. Yehova ali na ku sika ku hitila muli Muaneni Yesu Kilistu, Muangana ua Vuangana vua Njambi. Mukua Ngolo Yose uze ue ku mona viose, ua pua mukua vuoloke mu vutantuluke kaha na Muaneni mukemuo muafua.