CILONGESA 40
Ku Neha “Vavengi ku Vuviuke”
“Vaze va aluluisa va vengi ku vuviuke ngue zintangatanga ku miaka na miaka.”—NDAN. 12:3.
MUASO 151 A ka Sana
VI TU LILONGESAMO a
1. Viuma vika via ndzolela tua lavelela mu Likulukazi lia Miaka?
ACI SINGANIEKENU ndzolela i tu kevua omo cisangukilo ci ka putuka mu Likulukazi lia Miaka ya ku Sika ca Kilistu! Vose va tsisa vantu va va lema, va lavelela ku ka va mona naua. Yehova neni ue ku va vuila vusona. (Yombi 14:15) Aci singaniekenu ku lisesa ca ndzolela ci ka kalako ha litangua liaco. Ngue mu tua lilongesele mu cilongesa ci na hiti, ni nguetu, vaze va va soneka mu mukanda ua muono, va kaya ku “cisangukilo ca muono.” (Vili. 24:15; Yoa. 5:29) Kaha citava cingi ca vantu va tua lema va ka kala ha kati ka vaze va ka livanga ku sanguka. b Cikuavo naua “vakua vuhenge,” ngeci mua vaze ka va kele na vukovelelo vua ku tantekeya Yehova na ku mu pangela tele kanda va tse, va ka sangukila ku “cisangukilo ca cihiso.”
2-3. (a) Ngue mu ya muesa Isaya 11:9, 10, cipanga cika ca kama ca ku longesa ci ka lingika mu mavu ose? (b) Vika tu simutuila mu cilongesa cino?
2 Vose va ka sanguka va ka tondeka ku va longesa. (Isaya 26:9; 61:11) Ngeci mukemuo, ci ka tondeka ku tumbika cipanga ca kama ca ku longesa vantu mu mavu ose. (Tandenu Isaya 11:9, 10.) Omo lia vika? Muomu vaze vakua vuhenge va ka sanguka va ka tondeka ku lilongesa via Yesu Kilistu, Vuangana vua Njambi, nkombelo, ku lela ca lizina lia Yehova na mpoko yeni ya ku sika. Vunoni kati vakevo lika, muomu vakua vuviuke navo va ka tondeka ku va vueza mizimbu ya iha ku tuala ha vati Yehova ua ile na ku solola cizango ceni kamandende-kamandende ku tuala ha vutumbe vueni. Muomu vamo ha kati ka ava vakua ku tsiliela, va tsile vene tele na Mbimbiliya i ci li yahi. Mua vusunga, cipue vakua vuhenge ni vakua vuviuke, va ka tondeka ku lilongesa via vingi.
3 Mu cilongesa cino tu simutuila ha vihula evi: Vika vi ka tondeka mu ku puisamo cipanga ca kama ca ku longesa? Vati eci cipanga ci ka lingisa vantu va va soneke ni kuahi mu mukanda uaco? Vikumbululo vievi vihula tua pande ku vi haka seho lelo lino. Ngue mu tu mona, vumo vupolofeto vua ku komouesa vua ku Ndaniele na ku Ku-Solola vu tu kuasa ku ivuisisa vuino viuma vi ka soloka mu va ka sangula vatsi. Ha katete tu hilulenu mizimbu ya ndzolela i va polofetele ku Ndaniele 12:1, 2.
“VAZE VA KOSA KU ZIMPUMPUTA ZIA MAVU VA KA HINDUKA”
4-5. Vika Ndaniele 12:1 ya muesa ku tuala ha matangua aku kotokela?
4 Tandenu Ndaniele 12:1. Livulu lia Ndaniele lia solola viuma via ku komouesa vi ka soloka ku matangua a ku kotokela. Ca ku muenako, Ndaniele 12:1 ya muesa ngecize, Mingeli, uze ua pua Yesu Kilistu, “a ka katuka” mu “ku ovola [vantu va Njambi].” Ou mutamba ua vupolofeto ua putukile ku lipuisamo mu 1914 omo Yesu va mu vialekele ha Vuangana vua Njambi.
5 Vunoni Ndaniele va mu lekele naua ngecize Yesu “a ka katuka” ku “ntsimbu ya lamba, intsa ka ya keleko fume haze ha kele cifuti ca vantu na ku heta ku ntsimbu oyo.” Eyi “ntsimbu ya lamba” ikeyo vene “lamba ya kama” i va tumbula ku Mateo 24:21. Yesu a ka katuka mu ku hakuila vantu va Njambi, ku ntsongo ya lamba ya kama, ni nguetu, ku Alemangendo. Kaha livulu lia Ku-solola lia tumbula vantu vaco ngualio, “civunga ca kama ca fumine ku lamba ize ya kama.”—Ku-So. 7:9, 14.
6. Vika vi ka soloka mu nima ya civunga ca kama ku ovoka ku lamba ya kama? Lombololenu. (Talenu naua “Vihula via Vakua ku Tanda” ku tuala ha cisangukilo ca ha mavu.)
6 Tandenu Ndaniele 12:2. Vika vi ka soloka mu nima ya civunga ca kama ku ovoka ku lamba ya kama? Ovu vupolofeto ka vua handekele via cisangukilo ca cimueso, ni nguetu, cisangukilo ca mu lutsilielo ca vangamba va Njambi ku matangua a ku kotokela, ngue mu tuevuisisile laza, houe. c Vunoni mezi aco a handeka mpundu via cisangukilo ca vatsi ci ka kalako mu mavu aha. Vika via tu lingisa ku handeka ngoco? Lizi “zimpumputa” li va tumbula ku Ndaniele 12:2 likelio naua li va pangesa ku Yombi 17:16 kaha lia lomboloka “Vukalo vua Vatsi.” Evi via muesa ngecize Ndaniele 12:2 ya handeka via cisangukilo mpundu, cize ci ka kalako mu nima ya ku hua ca matangua a ku kotokela na Alemangendo.
7. (a) Vati ci ka fua “cisangukilo ca muono”? (b) Vika va ci tumbuila nguavo “cisangukilo ca ku hiana”?
7 Vika ya lombolola Ndaniele 12:2, mu ku handeka nguayo vamo va ka sangukila ku “muono ka ue ku hua”? Eci ca lomboloka ngecize vaze va ka sanguka na ku tantekeya Yehova na Yesu, ni ku tualelelaho ku va tantekeya, na ku vononoka mu likulukazi lia miaka, va ka tambula muono ka ue ku hua. (Yoa. 17:3) Eci ci ka pua “cisangukilo ca ku hiana” vize via keleko ku nima. (VaHe. 11:35) Omo lia vika? Muomu vaze va va sanguile ku nima ka va puile va ku tantuluka, kaha va tsile naua.
8. Vati vamo va ka sangukila “ku ntsoni na ku kasahuntu ka ka ka hua”?
8 Vunoni kati vose va ka sanguka va ka tava vilongesa via Yehova. Vupolofeto vua Ndaniele vua muesa ngecize vamo va ka sangukila ku “ku ntsoni na ku kasahuntu ka ka ka hua.” Vantu vaco va ka muesa lisino kuli Yehova, kaha mazina avo ka va ka a soneka mu mukanda ua muono. Cikuavo naua ka va ka tambula muono ua ya-ye. Vunoni va ka tambula “kasahuntu ka ka ka hua” ni nguetu ku nonga. Ngeci mukemuo, Ndaniele 12:2 ya handeka via fueto i va ka tambula vaze va ka sanguka, kuliya na vize vi va ka linga mu nima ya ku sanguka cavo. d (Ku-So. 20:12) Vamo va ka tambula muono ua ya-ye, vakuavo kuahi.
KU NEHA “VAVENGI KU VUVIUKE”
9-10. Vika vikuavo vi ka soloka mu nima ya lamba ya kama, kaha veya “va ka tua ceke ngue ceke ca lilu”?
9 Tandenu Ndaniele 12:3. Vika vikuavo vi ka soloka mu nima ya “ntsimbu ya lamba”? Mu ku vueza ku Ndaniele 12:2, cinimbu 3 ca muesa vi ka soloka mu nima ya lamba ya kama.
10 Veya “va ka tua ceke ngue ceke ca lilu”? Yesu ua tu ndemuinako mumo ku Mateo 13:43, ngueni: “Kaha vakua vuviuke va ka tua ceke ngue litangua mu vuangana vua Iseavo.” Ha ntsimbu eyi, Yesu ua kele na ku handeka via “vana va vuangana” ni nguetu Vakua Kilistu va ku vuavesa vaze va ka panga neni mu Vuangana vua muilu. (Mat. 13:38) Ngeci mukemuo, citava Ndaniele 12:3 ya handeka vene via Vakua Kilistu va ku vuavesa na vipanga vi va ka linga mu Likulukazi lia Miaka ya ku Sika ca Kilistu.
Va 144.000 va ka likuatasana na Yesu Kilistu mu ku tuamenena cipanga ca ku longesa, cize ci ka kalako mu Likulukazi lia Miaka (Talenu cinanga 11)
11-12. Vika va ka linga va 144.000 mu Likulukazi lia Miaka?
11 Vati Vakua Kilistu va ku vuavesa va ka neha “va vengi ku vuviuke”? Vakua Kilistu va ku vuavesa va ka likuatasana na Yesu Kilistu mu ku endesa cipanga ca ku longesa cize ci ka kala hano ha mavu mu Likulukazi lia Miaka. Va 144.000 ka va ka pu lika vamiangana, vunoni va ka pua naua vasasendote. (Ku-So. 1:6; 5:10; 20:6) Kaha mu ku pua vasasendote va ka kuasa “ku kanguisa vifuti,” ni nguetu, ku kuasa kamandende-kamandende vantu va ka hete ku vutantuluke. (Ku-So. 22:1, 2; Ezek. 47:12) Mua vusunga, evi vi ka vuisa Vakua Kilistu va ku vuavesa ndzolela ya kama!
12 Vuno “va vavengi” va va ka neha ku vuviuke va pua veya? Va pua vose vaze va ka sanguka na vaze va kovoka ku Alemangendo, hamo lika na nkala vana va va ka sema mu mavu a aha. Ku ntsongo ya Likulukazi lia Miaka, vose va ka kala ha mavu va ka pua va ku tantuluka. Amba ha ntsimbu ika va ka soneka mazina avo na cisonekeso ka ce ku zima mu mukanda ua muono?
CESEKO CA KU MANUSUILA
13-14. Vika va ka tondeka ku muesa vose vantu va ku tantuluka ntsimbu kanda va ka tambule muono ka ue ku hua?
13 Tua pande ku vuluka ngecize ku pua muntu ua ku tantuluka ka ca lombolokele ku yoya miaka ya ya-ye. Aci singaniekenu hali va Andama na Eva. Vutuhu va puile va ku tantuluka, vunoni va pandele ku muesa ku ononoka cavo kuli Yehova Njambi, ntsimbu kanda va va hane muono ka ue ku hua. Kaha ca vusiua ku handeka nguetu va vianene ku mu ononoka.—Loma 5:12.
14 Vati va ka fua vantu ha mavu ku ntsongo ya Likulukazi lia Miaka? Vose va ka heta ku vutantuluke. Vuno vose ava vantu va ku tantuluka va ka tualeleho ku hakuila mpoko ya Yehova ya ku sika ni? Ni ku ka kala vamo vutuhu va ka pua va ku tantuluka va ka muesa lisino ngeci mua Andama na Eva? Evi vihula vi ka tondeka ku vi kumbulula. Vunoni mu njila ika?
15-16. (a) Ntsimbu ika vantu vose va ka kala na vukovelelo vua ku muesa lukakatela kuli Yehova? (b) Vika vi ka soloka ku ntsongo ya ceseko ca ku manusuila?
15 Satana va ka mu haka mu kamenga mu Likulukazi lia Miaka. Mu ntsimbu yaco ka ka hasa ku sevuisa na umo uahi. Vunoni ku ntsongo ya Likulukazi lia Miaka va ka mu tundisa mu kamenga. Kaha a ka seteka ku sevuisa vantu va ku tantuluka. Mu ceseko caco, vantu vose va ku tantuluka va kala ha mavu, va ka kala na vukovelelo vua ku muesa ha toma ku mutamba uka va kala ku tuala ha lizina lia Yehova na mpoko yeni ya ku sika. (Ku-So. 20:7-10) Kaha viuma via ka linga nkala muntu ku tuala ha vieseko via Satana, vikevio vi ka muesa nga lizina lieni lia pande ku ka tualelelaho mu mukanda ua muono ni kuahi.
16 Vamo (ka va tumbuile numelu yavo) va ka linga ngeci mua Andama na Eva. Va ka viana ku sika ca Yehova. Va ka viana ku sika ca Yehova? Ku-Solola 20:15 ya tu leka nguayo: “Kaha nga umosi intsa ka va uanene ua ku soneka mu mukanda ua muono, ikeye i va mbilile mu cisali ca tuhia.” Eyo, ava vakua lisino va ka va nongesa mu vutuntu ku miaka yose. Vunoni cingi ca vantu va ku tantuluka va ka hasa ku hita mu ceseko ca ku manusuila. Kaha mazina avo va ka a soneka na cisonekeso ka ce ku zima mu mukanda ua muono.
KU “NTSIMBU YA KU KOTOKELA”
17. Vika va lekele Ndaniele ngecize vi ka soloka ku matangua ano? (Ndaniele 12:4, 8-10)
17 Mua vusunga, ku singanieka hali evi viuma vi ka soloka ku lutue ce ku tu vuisa ndzolela ya kama! Vunoni Ndaniele ua tambuile naua muzimbu ueka ua seho kuli umo kangelo ku tuala ha matangua ano, ni nguetu, “ntsimbu ya ku kotoka.” (Tandenu Ndaniele 12:4, 8-10; 2 Tim. 3:1-5) Kangelo uaco ua lekele Ndaniele ngueni: “Mana a ka likulisa.” Eci ca lomboloka ngecize vupolofeto vua mu livulu lieni, vue ku lombolokele vuino vangamba va Njambi ku ntsimbu yaco. Uze kangelo ua vuezeleko ngecize ku ntsimbu yaco “vakua vipi va ka linga vipi, kaha na umo uahi ua ku kuli vakua vipi a ka tantekeya.”
18. Vika vi ka solokela vakua vupi vuovuno?
18 Lelo lino, ce ku soloka ngue vakua vupi ve ku lihita, nou ue ku va hana kasitiku uahi. (Mal. 3:14, 15) Vunoni vuovuno Yesu a ka sompesa vaze va pua ngue vampembe na ku va tepesa kuli vaze va pua ngue vampanga. (Mat. 25:31-33) Ava vakua vupi ka va kovoka ku lamba ya kama, kaha ka va ka va sangula mu ku yoyela mu mavu a aha. Cikuavo naua, mazina avo ka va ka soneka mu “livulu lia civuluiso” li va tumbula ku Malakiya 3:16.
19. Ino inapu ntsimbu i tua pande ku linga vika, kaha omo lia vika? (Malakiya 3:16-18)
19 Ino ikeyo ntsimbu i tua pande ku muesa ngecize ka tuesi ha kati ka vakua vupi. (Tandenu Malakiya 3:16-18.) Yehova ali na ku kungulula vaze va pua ‘vupite vueni.’ Iya ha kati ketu ka tondo ku pua umo uavo?
Tu kevua ndzolela ya kama mu ku mona Ndaniele, vavusoko vuetu, na vantu veka vakuavo va “katuka” ku mu ku tambula mutamba uavo mu mavu a aha! (Talenu cinanga 20)
20. Cikulaheso cika ca ku manusuila va sikile Ndaniele, kaha omo lia vika nenu mua lavelela mua kama ku lipuisamo ca cikulaheso caco?
20 Mua vusunga, tuli na ku yoyela ku ntsimbu ya ndzolela. Vunoni kasi kuli viuma vikuavo via ku komouesa cikuma, vi tua lavelela. Vuovuno tu ka mona ku-hua ca vupi vuose. Mu nima yaco, tu ka mona ku lipuisamo ca cikulaheso ca lingile Yehova kuli Ndaniele ngueni: “U ka katuka ku mutamba uove, ha ku-hua ca matangua.” (Ndan. 12:13) Nenu mua lavelela na ndzolela omo Ndaniele, hamo lika na vantu va mua lema, va ka “katuka,” ni nguetu, ku sanguka ni? Nga mukemuo, lingenu cose mu tualeleho ku pua va ku ononoka. Nga mu lingamo kalenu na vusunga ngecize lizina lienu, li ka tualelelaho ku kala mu mukanda ua Muono ua Yehova.
MUASO 80 “Makelenu mu Mone Ngecize Yehova ua Cili”
a Cino cilongesa ci na neha vulumbunuiso vua vuha ku tuala ha cipanga ca ku longesa ci va tumbula ku Ndaniele 12:2, 3. Tu hilula ha ntsimbu ika eci cipanga ci ka lipuisamo na veya va kala mu cipanga caco. Kaha tu mona naua vati eci cipanga ca ku longesa ci ka kuasa vaze va kala ha mavu mu ku liviukisila ku ceseko ca ku manusuila ci ka kalako ku ntsongo ya Likulukazi lia Miaka.
b Citava cisangukilo ci ka putuka na vakua lutsilielo va ka tsa ku matangua a ku kotokela, kaha ci ka hiluka vuseta nima, cikota ku cikota. Nga mukemuo vene mu ci kenda, nkala vantu va ka kala na vukovelelo vua ku sesa vantu va va tantekeyele. Vunoni ambe nga kati mukemuo mu vi ka fua, Mbimbiliya ya handeka nguayo cisangukilo ca vaze va kaya muilu ci ka pua “muntu ku muntu ku ntsimbu yeni.” Ngeci mukemuo, citava tu lavelele ngecize cisangukilo ca ha mavu, naco Yehova a ka ci noneka mua cili.—1 Kol. 14:33; 15:23.
c Ovu vulumbunuiso vu na sungamesa vuze vua kala mu livulu Preste Atenção a Profecia de Daniel! kapitulu 17, na mu A Sentinela ya 1 de Julho, 1987, mafo 21-25.
d Vunoni mezi “vakua vuviuke” na “vakua vuhenge” a ku Vilinga 24:15 na mezi “vaze va na lingi via cili” na “vaze va na lingi via vipi” a ku Yoano 5:29, a muesa viuma vi va lingile vaze va ka sanguka tele kanda va tse.
