Ku 1 Kolintu 15:8, Paulu ua handekele ngueni: “Co ha ku kotoka ua soloka naua kuli ange, ambe ngoco nji napu ngue uze ua semukile omo ntsimbu yeni tele kanda i ci hete.” (Shukulu Kalunga) Laza, tua kele na ku lombolola nguetu, Paulu halumo ua kele na ku handeka via viuma via lihitile navio mua muene Yesu muilu. Ca puile ngue va mu hanene civezikiso ca ku semuka ni nguetu ku sanguka mu ku pua muntu ua ku sipilitu tele ntsimbu ya cisangukilo caco kanda i hete. Vunoni ku hindisisa vuino ha cinimbu caco, ca tu kuasa ku mona ngecize tua pande ku sungamesa ku ivuisisa cetu ca laza. Cili vene Paulu ua kele na ku handeka ha viuma via mu solokelele mua alulukile mu ku pua mukua Kilistu. Vunoni, vika a lomboloka mezi ua semukile tele ntsimbu yeni kanda i hete? Mezi aco a hasa ku lomboloka via vingi.

Ku aluluka ceni ca puile ca ku tungumuna kaha ngue ciyovo. Misongo ya ku sulumuna kakeke ue ku semuka vuvusu ye ku tungumuna. Kaha Saulu (i va tantekeyele mu nima ya ntsimbu mu ku pua Paulu), ua kele na kuya ku Ndamasiku mu ku luisa Vakua Kilistu va keleko, vunoni ka lavelele ngecize Kilistu a ka mu solokela. Ngeci mukemuo, ku aluluka ca Paulu ca puile ca ku tungumuna kati lika kuli ikeye vunoni na Vakua Kilistu vaze va tondele mu ku ka va luisa. Cikuavo naua, evi via lihitile navio Paulu, via puile ciyovo kaha ua tundisileho vumo vupuputa vua ntsimbu ya indende.—Vil. 9:1-9, 17 19.

Va mua aluluisile ha “ntsimbu ka va lavelele vantu.” Lizi lia Cingelengu li va langulula nguavo “ua semukile tele ntsimbu yeni kanda i hete” citava naua tuli langulule nguetu, “ua semukile ha ntsimbu ya ku linga na umo uahi ua i lavelele.” (The Jerusalem Bible) Ha ntsimbu ya alulukile Paulu ku pua Mukua Kilistu, Yesu tele ua hiluka laza muilu. Evi via litepele na ntsimbu i va alulukile vaze vantu va livangele ku handeka Paulu mu vinimbu via ku nima, muomu vakevo va muene Yesu mu nima ya ku sanguka ceni. Vunoni Paulu ka mu muene. (1 Koli. 15: 4-8) Ku lisolola ca Yesu kuli kapostolo Paulu ca mu hele vukovelelo vua ku mu mona, vutuhu ha ntsimbu yaco Yesu “ke ku lisolola naua ku vantu.”

Ua kele na ku muesa ku likehesa mu ku handeka via muono ueni. Ku liya na vamo vakua ku lilongesa Mbimbiliya, lizi lia pangesele kapostolo Paulu citava ua li pangesele mu ku li paya ikeye ivene. Nga vikevio vene via singaniekele Paulu, kaha ua kele na ku litavela ngecize ua tambuile civezikiso ka ca mu pandele. Ngeci mukemuo ua vuezeleko ngueni: “Muomu yange nji ua mu ndendendende ha kati ka vapostolo, yange ka va pandele ku nji tumbula kapostolo, muomu nja yandesele mbunga ya Njambi. Muomu ku kavumbi ka Njambi ha nji napu ha nja pua vene.”—1 Koli. 15: 9, 10.

Ngeci mukemuo, cimoneka ngue kapostolo Paulu ua kele na ku handeka via ku tungumuna na ciyovo ca ku mu solokela kuli Yesu, ya ku mu aluluisa ha ntsimbu ka lavelele ni ya ku limona ngecize ka fuililile ku kala na cimona ca ku mona Yesu. Vunoni viose ovio via mu lingisile ku handekamo, tuli na vusunga nguetu kapostolo Paulu ua hakele seho ya kama ku cimona caco. Muomu ca muesele ha toma ngecize Yesu na sanguka ku vatsi. Ngeci mukemuo, vintsimbu via vingi Paulu ua kele na ku handeka via cimona ceni mua kele na ku ambuluila vakuavo ku tuala ha ku sanguka ca Yesu.—Vili. 22: 6-11; 26:13-18.