Tu talenu vati Mbimbiliya ya kumbulula eci cihula.

Vilinga 24:15 ya tu leka nguayo: “Ku ka kala cisangukilo ca vakua vuviuke na vakua vuhenge.” Vakua vuviuke va pua vaze vononokele Njambi tele kanda va tse, kaha mazina avo va a soneka mu mukanda ua muono. (Mal. 3:16) Vakua vuhenge va pua vaze va tsile ca ku hona vukovelelo vua ku lilongesa via Yehova na ku mu tantekeya, kaha mazina avo ka va a sonekele mu mukanda ua muono.

Yoano 5:28, 29 ya handeka via vivunga vivali vi va tumbula naua ku Vilinga 24:15. Yesu ua handekele ngueni “vaze va na lingi via cili ku cisangukilo ca muono; na vaze va na lingi via vipi, ku cisangukilo ca cihiso.” Vakua vuviuke va lingile viuma via cili tele kanda va tse. Kaha va ka ya ku cisangukilo ca muono, muomu mazina avo kasi a ka kala mu mukanda ua muono. Vunoni vakua vuhenge va lingile via vipi tele kanda va tse. Kaha va ka ya ku cisangukilo ca cihiso, muomu mazina avo ka esi mu mukanda ua muono. Ngeci mukemuo, va ka tondeka ku hita mu ntsimbu ya ku va sompesa ni nguetu ku va hilula. Mu ntsimbu yaco, va ka va hana vukovelelo vua ku lilongesa via Yehova na ku lingisa mazina avo va a soneke mu mukanda ua muono.

Ku-Solola 20:12, 13 ya lombolola ngecize vose va ka sanguka va ka tondeka ku ononoka “vize vi va na sonekele mu mikanda.” Eyi “mikanda” ni nguetu mazengununo a ka pua masiko a aha a ka kalako mu mavu a aha. Vaze va ka viana ku ononoka, va ka va nongesa.—Isaya 65:20.

Ndaniele 12:2 ya polofetele laza ngecize vaze va na kosa mu tulo va ku-tsa va ka sangukila “ku muono ka ue ku hua” vakuavo ku “ntsoni na ku kasahuntu ka ka ka hua.” Eci cinimbu ca muesa fueto i va ka tambula mu nima ya ku sanguka: Vamo “muono ka ue ku hua” vakuavo “kasahuntu ka ka ka hua.” Ngeci mukemuo, ku ntsongo ya Likulukazi lia Miaka, vamo va ka tambula muono ua ya-ye, kaha vakuavo ku nonga ca ya-ye.—Ku-So. 20:15; 21:3, 4.

Evi vivunga vivali tu hasa ku vi setekesa na vantu va tonda ku ka yoyela mu cifuti ceka. Vakua vuviuke va pua ngue vaze ve ku tambula mukanda ua vipanga ni ua ku pua mulungi mu cifuti. Kaha evi vie ku va hanako cimo ku zituka. Vunoni vakua vuhenge va pua ngue vaze ve ku tambula mikanda ya vakua ku meneka lika, kaha ya ntsimbu ya indende. Vantu vaco ve ku tondeka ku ci va hilula, linga va mone nga citava ku va tavesa va tualeleho ku yoyela mu cifuti ca ciha. Na vuno vene, vakua vuhenge va ka tondeka ku va hilula nga ve ku ononoka masiko a Yehova, na ku mona nga va pua vakua vuviuke kaha citava ku va tavesa ku yoyela mu Citungu. Kaha vutuhu vivunga viose vivali via tambuile mikanda ya ku liseza mu va kovelele mu cifuti, vamo ve ku va hana mukanda ua pua ntungi mpundu, vakuavo co ve ku va hiluisamo. Evi vie ku hitukila ha vilinga via vantu vaco mu cifuti ca ciha. Na vuno vene, viuma vi ka solokela vose va ka sanguka, vi ka hitukila ha lutsilielo na vilinga viavo mu mavu a aha.

Yehova ka puile lika Njambi ua cikeketima, vunoni ua pua naua Njambi ua vuoloke. (Ndeu. 32:4; Visa. 33:5) Ngeci mukemuo, a ka muesa cilemo ceni mu ku sangula kati lika vakua vuviuke, vunoni na vakua vuhenge. Vutuhu ngoco, a ka va tumbikila naua masiko a vuviuke aze a va ka tondeka ku kava. Vaze lika va ka mu lema na ku yoya muaya vitume vieni, vakevo va ka va tavesa ku yoyela mu mavu a aha.