Mua vi Tantekeyele Laza Ni?
Sinangonga ya ku Sekulu ya ku Livanga: Eyi sinangonga i va tungulula mu Gamla, ya kala ha 10 km ku hiehi na Cisali ca Ngalileya. I tu kuasa ku ivuisisa vati ya fuile mpundu sinangonga ya laza
Vati via putukile visinangonga?
LIZI “Sinangonga” lia tunda mu ciNgelengu kaha lia lomboloka “ciuano” ni “ku likungulula.” Va li luka lizina lia cili muomu sinangonga ya pua cihela ci ve ku likunguluila vaYundeya linga va lilongese na ku lemesa tunde ku ntsenkulu. Vutuhu visoneka via ciHevelu ka via tumbuile mpundu lizi sinangonga, vunoni nga tu tala mu visoneka via ciNgelengu tu mona ngecize vihela viaco ku via kele laza tele na sekulu ya ku livanga (T.K.N.) kanda i hete.
Vakua ku tondesesa vavengi nguavo visinangonga via putukile tele vaYundeya va kala mu vundungo ku Mbambilone. Limo livulu lia handeka ngualio: “Mu ku linga kuze ku vundungo ku va ile ka kua kele Tembele, kaha ca puile cifuti ca vungendzi, va tondele ku lilembezieka ku lamba yavo, ngeci va putukile ku likungulula, halumo ha visapalalo, linga va tande Visoneka via ku Lela.” Mu va va patuile ku vundungo, vaYundeya va tualeleleho ku likungulula mu ku vundila na ku tanda Visoneka via ku Lela kaha va tungile visinangonga ku vihela viose ku va ka yoyelele.
Mu ya hetele sekulu ya ku livanga T.K.N, visinangonga via puile ha vuliuaneno vua vaYundeya mu muono ua tangua na tangua na vihela via ku lemesela, ku vose va lisanduokele mu Menditelaniu, vifuti via ha kati ka Afrika, Azia na Europa na Isaleli. Mulongisi Lee Levine ua ku Universidade ya mu Yelusalema ngueni: “[Visinangonga] via puile vihela via ku lilongesela, via ku lila via-ku-lia via ku lela, via vusompelo, via ku hanena milambu ya tondekele muimbo, via ku likunguluila mu ku tala via pulitika na via muono ua tangua na tangua.” Ua vuezeleko naua ngueni: “Vunoni cikumakuma, via puile vihela via ku lemesela.” Ngeci ka ci tu komouesa ngecize Yesu ua kele na kuya mu ku kunguluka ku visinangonga. (Mako 1:21; 6:2; Luka 4:16) Mua kele na kuyako ua kele na ku longesa na ku kaniamesa vaze va kele na kuyako. Mu ca putukile cikungulukilo ca Vakua Kilistu, kapostolo Paulu neni ua kele na ku ambuluila cikuma mu visinangonga. Vakua ku haka seho ku via Njambi va lemene kuya ku visinangonga, ngeci mukemuo nkala mbonge ya kovelele Paulu ha katete ua kele na kuya mu sinangonga yaco linga a ka ambuluilemo.—Vili. 17:1, 2; 18:4.
