KU CIMENE ca 24 ya Janeiro ya 2018 vusoko vua Mbetele vua ku Estados Unidos na vua ku Canada va vuile mutambi ua ku lifuila ua va vuisile ndzolela ya kama, ngecize: Muanetu Kenneth Cook, Jr., va na mu hangula ku pua mukua Civunga ca Vantuamena ca Vakaleho va Yehova.

Muanetu Cook ua semukilile na ku kolela ku Pennsylvania, Estados Unidos. Ua lilongesele vusunga kuli umo mukuavo ku sikola, tele vuovuno a lingila ku manusula Ensino Médio, kaha va mu mbatizile lia 7 ya Junho ya 1980. Ua putukile vupioneiro vua ntsimbu yose lia 1 ya Setembro ya 1982. Mu nima ya miaka ivali mu vupioneiro va mu laniene a ka pangele ku Mbetele kaha ua putukile ku pangela ku Wallkill, Nova Yorque lia 12 ya Outubro ya 1984.

Kaha mu miaka 25 ya hateleko, Muanetu Cook ua pangelele ku viseketa via ku liseza-seza, ngeci mua ku Vutuhuilo vua Mikanda na ku Seketa ya tala via vusoko vua Mbetele. Ua ambatele ndokazi Jamie ku pua mpueyeni mu 1996, kaha ndokazi Jamie neni ua kovelele ha Mbetele, ngeci va putukile ku pangela hamo ku Wallkill. Mu Dezembro ya 2009, Muanetu Cook na mpueyeni va va nunguluilile ku Patterson Nova Yorque ku Cikota ca Visikola via Vuangana via Watchtower, kaha Muanetu Cook ua pangelele ku Seketa ya ku Lituma Mikanda. Vunoni mu Abril ya 2016 va va hiluisile naua ku Wallkill, kaha mu kantsimbu ka kandende va va nunguluila naua ku Brooklyn, Nova Yorque. Va ka keleko lika vingonde vitanu, va nunguluka naua, muomu Mbetele yose ya nungulukilile ku cikota ca ciha ca Vakaleho va Yehova ku Warwick, Nova Yorque. Mu Janeiro ya 2017, Muanetu Cook va mu hanguile ku pua mukuasi ua ku Mukana ua Vakua ku Soneka ua ku Civunga ca Vantuamena.