1. Vika a tonda Yehova linga vi lipuisemo lelo lino?

 LELO LINO Yehova a tonda ngecize muzimbu ua cili ua Vuangana va u ambulule mu mavu ose. (Mako 13:10; 1 Tim. 2:3, 4) Eci cipanga ca pua ca Yehova, kaha ua ci haka seho ya kama cikuma ngeci ua ci kundika kuli Muaneni ya lema cikuma. Tuli na vusunga nguetu, Yesu a hasa ku tuamenena vuino eci cipanga na ku ci puisamo ngue mua tonda Yehova, ntsimbu ku kotoka kanda ci hete.—Mat. 24:14.

2. Vika tu lilongesa mu cilongesa cino?

² Mu cilongesa cino, tu mona vati Yesu ali na ku pangesa “mukuamanda” ueni mu ku hana via-ku-lia via mu lutsilielo ku vangamba veni, na ku va viukisa linga va puisemo cipanga ca ku ambulula ca ku komouesa mu mavu ose. (Mat. 24:45) Tu hilula naua viuma vi tu hasa ku linga muntu ku muntu, linga tu kuatese Yesu na mukuamanda ua cili.

3. Mpoko ika ua tambula Yesu?

³ Yesu ali na ku tuamenena cipanga ca ku ambulula. Vusunga vuka tuli navuo? Tele kanda aye muilu, Yesu ua likunguluile na vamo vakua ku mu kava ku muncinda ua mu Ngalileya. Ua va lekele ngueni: “Ngolo yose ya muilu na hano ha mavu, va na nji hieyo.” Kaha talenu mezi a vuezeleko ngueni: “Ngoco vene hamenu, puisenu vantu vose vandongesi vange.” (Mat. 28:18, 19) Eci ca muesa ngecize, Yesu va mu hana mpoko ya ku tuamenena cipanga ca ku ambulula.

4. Vusunga vuka tuli navuo ngecize Yesu kasi ali na ku tuamenena cipanga ca ku ambulula?

 ⁴ Yesu ua handekele ngueni, cipanga ca ku ambulula va ka ci linga ‘mu vifuti viose’ kaha ikeye a ka kala na vakua ku mu kava “matangua ose, na ha ku-kotoka.” (Mat. 28:20) Aa mezi a muesa ha toma ngecize Yesu ue ku tualeleho ku tuamenena cipanga ca ku ambulula na kuno ku matangua etu.

5. Mutamba uka tuli nauo mu ku lipuisamo ca Visamo 110:3?

⁵ Yesu ka lisosomuene nga ku ka kala vakua ku lihana mu cipanga ca ku ambulula ku matangua a ku kotokela. Muomu ua tantekeyele ku lipuisamo ca mezi a vupolofeto a mukua visamo nguao: “Vantu vove va lihana ku cizango cavo mu litangua lia ngolo yove.” (Visa. 110:3) Ngeci mukemuo, nga nenu mua lihaka mu cipanga eci ca ku ambulula, muli na ku kuatesa Yesu na mukuamanda ua cili mu ku puisamo ovu vupolofeto. Vutuhu eci cipanga ci li na kuya ku lutue, vunoni tue ku pinda na vimo vitanga.

6. Citanga cika ve ku pinda naco vakua ku ambulula muzimbu ua Vuangana lelo lino?

⁶ Cimo ca vitanga ci tue ku pinda naco mu ku ambulula muzimbu ua Vuangana, ca pua ku tu luisa. Vakua ku luisa vusunga, vakuluntu va malombelo, na vakua pulitika ve ku handeka makuli ku vantu ku tuala ha cipanga cetu. Nga vavusoko, vantu va tua tantekeya ni vaze va tue ku panga navo va tava makuli aco, ce ku va lingisa va tu sindiye ku likela ku pangela Yehova na ku ambulula. Mu vifuti vimo, vitozi ve ku tu luisa mu ku tu zuzuisa, ku imika vipanga vietu, ku tu tingula kaha na ku tu mbila mu tumenga. Kaha eci ka ce ku tu komouesa muomu Yesu ua handekele ngueni: “Miyati yose va ka mi zinda muomu lizina liange.” (Mat. 24:9) Ku luisa caco, ca pua vukaleho vua muesa ha toma ngecize tuli na kuya Yehova ku mutima. (Mat. 5:11, 12) Satana ikeye ali na ku sambeya ku luisa caco. Vunoni kuli Yesu ka heteko! Yesu ali na ku hasa ku tuamenena cipanga ca ku ambulula ci hete mu vifuti viose. Ku ambulula nkala, livindi.

7. Vukaleho vuka mue ku limuena enu vavene ngecize Ku-Solola 14:6, 7 ili na ku lipuisamo?

⁷ Citanga cikuavo ce ku tu solokela mu cipanga ca ku ambulula, ca pua ku liseza-seza ca malimi. Mu cimona ca hele kuli kapostolo Yoano, Yesu ua muesele ngecize ku matangua ano tu ka hasa ku vula citanga caco. (Tandenu Ku-Solola 14:6, 7.) Mu njila ika? Lelo lino, tue ku tuhula mikanda ya longesa via Mbimbiliya mu malimi a tuvakana 1.000 mu saiti yetu jw.org! Mu ku lingamo, tue ku hana vantu vukovelelo vua ku ivua Muzimbu ua Vuangana. Cikuavo naua, Civunga ca Vantuamena ca tavesele ku langulula livulu Yoyenu mu Ndzolela ku Miaka Yose! li tue ku pangesa mua kama mu ku puisa vantu vandongesi, mu malimi a tuvakana 700! Via-ku-lia via mu lutsilielo ve ku vi tuhula naua ku hitila mu vivideo via tuveveve na mikanda ya tupuputa. Mua vusunga, tue ku limuena ku lipuisamo ca vupolofeto vua mu Mbimbiliya. Vantu “va ku malimi ose a vakua vifuti” vali na ku lilongesa “lilimi lia ku lela” ni nguetu vusunga vua mu Mbimbiliya. (Zak. 8:23; Zef. 3:9) Viose evi vili na ku lipuisamo omo lia ku tuamenena ca vutongue ca Yesu Kilistu.

8. Vati honi ci li na ku enda cipanga cetu ca ku ambulula na hano?

⁸ Lelo lino, vantu va tuvakana 8.000.000 mu vifuti via ku pua 240 vali na ku pangela Yehova mu lukungulukilo lueni, kaha nkala muaka ve ku mbatiza makulukazi! Vunoni ca seho ya kama kati ku lana ca vantu, vunoni vifua via cili vi ve ku muesa ava vandongesi va vaha mu ku ‘zala vuntu vua vuha.’ (Kolo. 3: 8-10) Va likela vupangala, vukenia, kahangu na vikuavo. Vupolofeto vua ku Isaya 2:4 vuli na ku puisamo, ‘ka ve ku lilongesa ndzita naua.’ Tue ku lihakela kapandi ka ku zala mu vutuntu vuntu vua vuha, ku kuasa vantu veze mu lukungulukilo, na ku muesa ngecize tuli na ku kava ntuamena yetu Kilistu Yesu. (Yoa. 13:35; 1 Pet. 2:12) Evi ka viesi na ku lingika ngoco. Yesu ikeye ali na ku tu hana vukuasi vu tua tondeka.

9. Kuliya na Mateo 24:45-47, vika Yesu ua polofetele ngecize vi ka kalako ku matangua a ku kotokela?

⁹ Tandenu Mateo 24:45-47. Yesu ua polofetele ngecize ku matangua a ku kotokela, a ka hangula “mukuamanda ua cili mukua mana” a ka pue na ku hana via-ku-lia via mu lutsilielo. Ngeci mukemuo, ku matangua ano ku na pande ku kala mukuamanda a lingamo. Kaha cili vene kua kala. Ntuamena yetu ali na ku pangesa civunga ca cindende ca vamala va ku vuavesa, linga va hane ‘via-ku-lia ha ntsimbu ya pande’ ku vangamba va Njambi na vakua ku muesa cizango. Ava vamala vaco ka ve ku limona ngue vakevo vamiangana va lutsilielo lua vakuavo, houe. (2 Kol. 1:24) Vunoni va tava ngecize Yesu Kilistu ikeye “mukua ku tuamena na mukua ku sika” vantu veni.—Isaya 55:4.

10. Livulu lika li va na muesa ha cikupulo, lia mi kuasele ku endela mu njila ya ya ku muono?

¹⁰ Tunde mu 1919, mukuamanda ua cili ue ku tuhula mikanda ya ku liseza-seza ye ku kuasa vaze ve ku makela lua katete ku via-ku-lia via cili via mu lutsilielo. Mu 1921, mukuamanda ua tuhuile livulu Halupa ya Njambi mu Ingles mu ku kuasa vantu va lilongese vusunga vua katete. Mu via alulukile vintsimbu, va vuezeleko mikanda ikuavo. Livulu lika lia mi kuasele ku tantekeya na ku lema Isuenu ua muilu? “Seja Deus Verdadeiro,” A Verdade Que  Conduz à Vida Eterna, Poderá Viver Para Sempre no Paraíso na Terra, Conhecimento Que Conduz à Vida Eterna, Vika Mpundu vi i Longesa Mbimbiliya?, Vika i Hasa ku tu Longesa Mbimbiliya? ni livulu lietu lia liha Yoyenu mu Ndzolela ku Miaka Yose! Mikanda eyi yose va i pangelele mu ku hana vukuasi mu ntsimbu ize i ca tondekele.

11. Omo lia vika tu vose tua tondeka via-ku-lia via mu lutsilielo?

¹¹ Vantu va vaha kati vakevo lika va tondeka via-ku-lia via ku kola via mu lutsilielo. Tu vose tua tondeka. Kapostolo Paulu ua sonekele ngueni: “Via-ku-lia via ku kola via pande vaze va na kolo.” Kaha Paulu ua vuezeleko naua ngueni, ku pangesa via-ku-lia via mu lutsilielo mu muono, ci hasa ku tu kuasa “ku hangununa via cili ku via vipi.” (VaHe. 5:14) Mu vintsimbu vino via vikalu, omo vupi vua vantu vuli na ku tualelelaho ku livuezelela, ci hasa ku pua citanga ca kama ku ononoka vitume via Yehova. Vunoni, Yesu ue ku linga cose mangana tu tambule via-ku-lia via mu lutsilielo vize vie ku tu kaniamesa. Ndundzi ya via-ku-lia viaco ya pua Lizi lia Njambi, Mbimbiliya. Yesu ue ku tuamenena mukuamanda ua cili linga a vuahese via-ku-lia via mu lutsilielo na ku vi tepela.

12. Ngeci mua Yesu, vati tue ku singimika lizina lia Njambi?

¹² Ngeci mua Yesu, tue ku singimika lizina lia Njambi, ngue mu ca pande. (Yoa. 17:6, 26) Ca ku muenako, mu 1931 tua hanguile lizina lia mu Mbimbiliya lia Vakaleho va Yehova. Mu ku lingamo, tua muesele ngecize tua lema Tatetu ua muilu kaha tua tonda vantu va tu tokakane ku lizina lieni. (Isaya 43:10-12) Kaha tunde mu Outubro ya muaka uaco, lizina lia Njambi lie ku tuhuka helu lia Vutala vua Kaniungi. Cikuavo naua, Mbimbiliya ya Tradução do Novo Mundo ya hiluisa lizina lia Njambi ha vihela viose ha lia pande ku kala. Eci ca muesa  ku litepa ca kama na malombelo a makuli, aze eku tundisa Lizina lia Yehova mu cingi ca viMbimbiliya viavo!

13. Vika via mi hana vusunga ngecize Yesu ali na ku pangesa “mukuamanda ua cili” lelo lino? (Yoano 6:68)

¹³ Ku hitila muli “mukuamanda ua cili” Yesu ua viukisa lukungulukilo hano ha mavu, luze lue ku sambeya ku lemesa ca ku lela. Vati mue ku livua ku tuala ha lukungulukilo luaco? Halumo mu hasa ku kumbulula ngue mua kumbuluile kapostolo Petulu, ngueni: “Tu ya kuli iyandzo? ove u li na mezi a muono ka ue ku hua ua ya-ye.” (Yoa. 6:68) Nga muntu ku muntu tuli hano ka tua tantekeyele lukungulukilo lua Yehova, nga kuiko tuli? Ku hitila mu lukungulukilo luaco, Kilistu ali na ku linga cose mu ku tu suka vuino mu lutsilielo. Ue ku tu longesa ku kala na vutongue mu cipanga ca ku ambulula. Cikuavo naua, ue ku tu kuasa ku zala ‘vuntu vua vuha’ linga tu hase kuya Yehova ku mutima.—Efe. 4:24.

14. Vati ku kala mu lukungulukilo lua Yehova ca mi kuasa mu ku hita ca musongo ua COVID-19?

¹⁴ Vati Yesu ue ku tu tuamenena mu vintsimbu via vikalu? Ku tuamenena caco tua ci muene ha toma mu ua putukile musongo ua COVID-19. Vutuhu vakua mavu ka va tantekeyele mua ku lingila, Yesu ua lingile cose mu ku tu tuamenena na ku tu muesa vati tu liniunga. Va tu kaniamesele ku zala tunguua nga tuli ha mbunga kaha na ku lisondoloka na vantu. Vakuluntu va va lekele va tonde vinjila via ku likatelamo ha laako na vamuanetu mu cikungulukilo, kaha na ku tala nga vali vuino ku muvila na mu lutsilielo. (Isaya 32:1, 2) Tua tambuile naua ku tuamenena na ku kaniamesa cikuavo ku hitila mu mizimbu ya Vakua Civunga ca Vantuamena.

15. Vimamuna vika tua tambuile ku tuala ha ku kunguluka na ku ambulula mu ku hita ca musongo ua COVID-19, kaha vika viezilemo?

 ¹⁵ Mu ua putukile musongo ua COVID-19, tua tambuile naua vimamuna ku tuala ha vati tu pua na ku likungulula na ku ambulula. Kampe mu litangua lia ngongo, tua putukile ku lingila viuano vietu viose, ngeci mua viuano via mu cikungulukilo, via limbo na via muhato, ku hitila mu videoconferência. Kaha naua tua putukile ku ambulula kampe ku hitila lika mu ku soneka mikanda na mu vitelefone. Yehova ua vezikisile kapandi ketu. Vimbetele via vingi via tuma mizimbu ya ndzolela ku tuala ha ku livuezelela ca numelu ya vakua ku ambulula. Mua vusunga, cingi cavio via tumine vimona vi kaniamesa mua kama mu ntsimbu yaco.—Talenu cikasa “ Yehova ue ku Vezikisa ku Ambulula Cetu.”

16. Vusunga vuka tu hasa ku kala navuo?

¹⁶ Vamo ve ku livua ngecize lukungulukilo lua hianeselemo ku liniunga ku musongo. Vunoni vintsimbu via vingi tua limuenene ha toma ngecize vimamuna vi tua tambuile vikevio mpundu via tondekele. (Mat. 11:19) Kaha ku hilula ha njila ya cilemo ye ku tuamenenamo Yesu vantu veni, ce ku tu hana vusunga ngecize, cipue nga ka tua tantekeyele via mene, Yehova na Muaneni kasi va ka kala netu.—Tandenu VaHevelu 13:5, 6.

17. Vati mue ku livua ku tuala ha ku pangela muintsi lia ku tuamenena ca Yesu?

¹⁷ Mua vusunga tua vezika mua kama mu ku pangela muintsi lia ku tuamenena ca Yesu! Tua kala mu lukungulukilo lue ku vula matapeso ose, cipue a cisemua, a vifuti ni a malimi. Tua kala na via-ku-lia via mu lutsilielo vi tua tondeka kaha na via ku pangesa mu ku ambulula. Muntu ku muntu, vali na ku tu kuasa ku zala vuntu vua vuha, kaha vali na ku tu longesa ku lilema umo na mukuavo. Tuli na vusunga vuose vua ku viukilila na ntuamena yetu Yesu!