1. Vika ua lingile Yehova mu nima ya ku vulumuna ca Andama na Eva? (Njenisisi 3:15)

 MU NIMA ya ntsimbu ya indende tunde ha ku vulumuna ca Andama na Eva, Yehova ua hele lulavelelo ku mbuto yavo ku hitila mu vumo vupolofeto vua ku komouesa. Via handekele va vi soneka ku Njenisisi 3:15.—Tandenu.

2. Vika via komouesa cikuma ku tuala ha vupolofeto vuaco?

² Vupolofeto vuaco vua kala mu livulu lia katete lia mu Mbimbiliya. Vunoni mu njila imo ni ikuavo, mavulu ose a mu Mbimbiliya a likuata na vupolofeto vuaco. Ngeci mua kondzi ka ve ku kutisa mukuta ua vikuni, mezi a ku Njenisisi 3:15 a kutiliya mizimbu ya mu mavulu ose a Mbimbiliya ku muzimbu umo lika. Muzimbu uka? Uze ua muesa ngecize Njambi a ka tuma Muovole mu ku nongesa Satana na vakua ku mu kava. * Mua vusunga, eci ci ka pua civezikiso ca kama kuli vaze va lema Yehova!

3. Vika tu hilula mu cilongesa cino?

³ Mu cilongesa cino, tu kumbulula evi vihula vi na hatako ku tuala ha vupolofeto vua ku Njenisisi 3:15: Veya va tumbulamo? Vati vupolofeto vuaco vua lipuisamo? Kaha vukuasi vuka tuli na ku uanamo?

4. “Linoka” uemanena iya, kaha vati tua tantekeyamo?

⁴ Ku Njenisisi 3:14, 15, va tumbulako “linoka,” “mbuto” ya linoka,  kaha “mpuevo” na “mbuto” ya mpuevo. Mbimbiliya ya tu kuasa ku va nongonona vose. * Tu putukenu na “linoka.” Nga ua puile linoka mpundu, nga kevuisisile via handekele Yehova mu citungu ca Endene. Ngeci mukemuo, linga Yehova a hase ku handeka neni mu ku mu hisa, ca lomboloka ngecize ua kele na vuhasi vua ku ivuisisa. Kaha nga kati linoka, iya honi? Ku-Solola 12:9 ya mu solola ha toma. Ya muesa ngecize “linoka uze ua laza” ikeye Satana Ndiavu. Vunoni veya va pua mbuto ya linoka?

5. Veya va pua mbuto ya linoka?

⁵ Vintsimbu vimo, Mbimbiliya ya pangesa lizi “mbuto” mu ku tumbula vaze ve ku tambuluisa mua kama umo muntu ngue vana veni. Ngeci mukemuo, mbuto ya linoka ya pua tungelo na vantu vaze ve ku tambululisa Satana, kaha ve ku alulukila Yehova na ku luisa vantu veni. Mu civunga caco, mua kala tungelo vaze va sezele vihela viavo muilu ku matangua a Noa, kaha na vantu va ku vihia vaze ve ku tambuluisa iseavo Ndiavu.—Njen. 6:1, 2; Yoa. 8:44; 1 Yoa. 5:19; Yun. 6.

6. Omo lia vika “mpuevo” ua ku Njenisisi 3:15 kati Eva?

⁶ Hano honi, tu nongononenu “mpuevo.” Mpuevo uaco ka citava a pue Eva. Omo lia vika? Tu hilulenu lika vumo vusunga. Vupolofeto vua muesele ngecize mbuto ya mpuevo i ka “palakana” mutue ua linoka. Ngue mu tu na lilongesa, linoka ua pua kangelo, Satana. Ngeci mukemuo, na umo muntu uahi ua ku mbuto ya Eva ue ku hasele ku mu palakana ni nguetu ku mu nongesa. Iya honi ue ku hasele ku lingamo?

7. Kuliya na Ku-Solola 12:1, 2, 5, 10, iya uemanena mpuevo u va tumbula ku Njenisisi 3:15?

⁷ Mpuevo ua ku Njenisisi 3:15, va mu solola  mu luvulu lia ku manusuila lia mu Mbimbiliya. (Tandenu Ku-Solola 12:1, 2, 5, 10.) Ou mpuevo kati muntu mpundu! Muomu ku viliato vieni kua kala ngonde kaha ua kala na cilongo ca vintangantanga 12 ku mutue. Kaha ua sulumuine kati muana mpundu vunoni Vuangana vua Njambi. Mu ku linga Vuangana vua kala muilu, mpuevo uaco neni noho a pue ua muilu. Ngeci mukemuo, mpuevo uaco uemanena mutamba ua muilu ua lukungulukilo lua Yehova, uze ua ambatesela kumo na tungelo veni va ku ononoka.—Ngal. 4:26.

8. Iya ua pua mutamba ua katete ua mbuto ya mpuevo, kaha ntsimbu ika ua putukile ku pua mutamba uaco? (Njenisisi 22:15-18)

⁸ Lizi lia Njambi lia tu kuasa naua ku nongonona mutamba ua katete ua mbuto ya mpuevo. Ue ku puile mpundu ua ku cikota ca Avilahama. (Tandenu Njenisisi 22:15-18.) Kaha ngue mu vua muesele vupolofeto, Yesu ua puile vene ua ku cikota ca ku ntsitu, ca uze yala ua lutsilielo. (Luka 3:23, 34) Vunoni Yesu ua pandele ku kala na ngolo ku hiana vantu, muomu ikeye ue ku palakanene Satana Ndiavu ni nguetu ku mu nongesa. Ngeci mukemuo, omo Yesu ua puisile miaka 30 va mu vuavesele na ku pua Muana Njambi ua ku sipilitu. Mu va mu vuavesele, Yesu ua himpukile mutamba ua katete ua mbuto ya mpuevo. (Ngal. 3:16) Mu nima ya kutsa na ku sanguka ca Yesu, Njambi “ua mu hakele cilongo ca vumpahu na kasingimiko” kaha ua mu hele “ngolo yose ya muilu na hano ha mavu,” hamo lika na ngolo ya ku enieka “vipanga via Satana”.—VaHe. 2:7; Mat. 28:18; 1 Yoa. 3:8.

9-10. (a) Veya naua va pua mutamba ua mbuto ya mpuevo, kaha ntsimbu ika va putukile ku pua mutamba uaco? (b) Vika tu hilula vuovuno?

⁹ Kuliya na vupolofeto, kua pandele ku kala naua mutamba ua mu civali ua mbuto ya mpuevo. Kapostolo Paulu ua soluele mutamba uaco, mua lekele vaYundeya na vakua miyati yeka vaze va puile Vakua Kilistu va ku vuavesa, ngueni: “Nga mu Vakua Kilistu, kaha nga mu na pu mbuto ya Avilahama, vasuana va ku litavasiano.” (Ngal. 3:28, 29) Nga Yehova a vuavesa Mukua Kilistu na sipilitu santu, muntu uaco ue ku pua mutamba ua mbuto ya mpuevo. Ngeci mukemuo, mbuto ya mpuevo ya pua Yesu Kilistu na va 144,000 va ka sika neni. (Ku-So. 14:1) Vose ava ve ku lihakela kapandi ka ku tambuluisa Iseavo, Yehova Njambi.

¹⁰ Mu nima ya ku tantekeya veya mpundu va va tumbula ku Njenisisi 3:15, tu hilulenu vati Yehova ali na ku puisamo ovu vupolofeto kavundende-kavundende na vivezikiso vika tue ku uanaho.

11. Mu njila ika linoka ue ku sumine “ku ntsintsino” ya mbuto ya mpuevo?

¹¹ Kuliya na vupolofeto vua ku Njenisisi 3:15, linoka ue ku sumine ku “ntsintsino” ya mbuto ya mpuevo. Aa mezi a lipuisilemo omo Satana ua pangesele vaYundeya na vakua Loma mu ku tsiha Muana Njambi. (Luka 23:13, 20-24) Mbandu ya ku ntsintsino, i hasa ku tumbika muntu ha mavu na ku mu honouesa ku linga vipanga vieni mu imo ntsimbu. Na vuno vene, ku-tsa ca Yesu ca mu honouesele ku linga vipanga vieni mu matangua atatu.—Mat. 16:21.

12. Vati kaha ntsimbu ika va ka palakana mutue ua linoka?

¹² Linga vupolofeto vua ku Njenisisi 3:15 vu lipuisemo, Yesu ka pandele ku tualelaho mu cihilo. Omo lia vika? Muomu vupolofeto vua muesele ngecize, mbuto ya mpuevo ye ku palakanene mutue ua linoka. Eci ca lomboloka, Yesu ua pandele ku kanguka ku mbandu yeni  ya ku ntsintsino ni nguetu ku sanguka. Kaha mukemuo vene mu via fuile! Mu litangua lia mu citatu tunde ha kutsa ceni, Yesu va mu sanguile na muvila ua sipilitu. Ha ntsimbu mpundu ya tumbika Yehova, Yesu a ka palakana Satana ni nguetu ku mu nongesa. (VaHe. 2:14) Kaha vaze va ka sika na Kilistu va ka lipandakana neni mu ku nongesa vitozi va Njambi ni nguetu mbuto ya linoka.—Ku-So. 17:14; 20:4, 10. *

13. Vukuasi vuka tuli na ku uana ku vupolofeto vuaco?

¹³ Nga mua pua ngamba ya Njambi ua ku mbatiza, nenu muli na ku uana vukuasi ku ku lipuisamo ca vupolofeto vuaco. Yesu uezile ha mavu na ku pua muntu. Ua tambuluisile Ise mu vutantuluke. (Yoa. 14:9) Ngeci mukemuo, ku hitila muli ikeye tua heta ha ku tantekeya na ku lema Yehova Njambi. Tue ku uana naua vukuasi ku vilongesa via Yesu na ku cifua ce ku tuamenenamo lukungulukilo. Ua tu longesa vati tu hasa ku yoya mu njila ize i tu kuasa kuya Yehova ku mutima. Kaha tu vose tu hasa ku uana vukuasi ku ku-tsa ca Yesu ni nguetu ku mbandu ya ku ntsintsino yeni. Mu njila ika? Mu nima ya ku sanguka , Yesu ua hele seho ya maninga eni ku pua cikombelo ca ku tantuluka cize ci “tu vukisa ku vipi viose.”—1 Yoa. 1:7.

14. Vuno vantu va pandele ku lavelela ngecize vupolofeto vua mu citungu ca Endene vu lipuisemo ha ntsimbu ize vene ni? Lombololenu.

¹⁴ Vupolofeto vua tumbuile Yehova mu citungu ca Endene vua muesa ngecize, kua pandele ku hita imo ntsimbu linga vu hase ku lipuisamo mu vutuntu. Ce ku ambatele ntsimbu linga mpuevo a solole mbuto yeni, Satana a kungulule vantu veni linga cizindo ni vutozi vu kale ha kati kevi vivunga vivali. Ku tantekeya vuino ovu vupolofeto ci hasa ku tu kuasa, muomu ci tu lungula ngecize mavu a Satana a ka zinda vangamba va Yehova. Mu nima ya ntsimbu, Yesu ua lunguile naua vandongesi veni ku tuala ha cizindo caco. (Mako 13:13; Yoa. 17:14) Mua vusunga, tua limuena ku lipuisamo ca umo mutamba ua vupolofeto vuaco cikumakuma mu ku hita ca ino miaka 100. Mu njila ika?

15. Omo lia vika mavu a Satana a na tu zindi cikuma, vunoni omo lia vika ka tua pandele kuivua vuoma?

¹⁵ Mu nima ya ku vialeka Yesu ha Vuangana vua Vumesiya mu 1914, Satana va mu lundumuine muilu. Mu ntsimbu ino, ali ha mavu kaha na vandamena ku mu nongesa. (Ku-So. 12:9, 12) Vunoni kesi na ku lavelela ngoco. Satana ali na matoto a kama kaha ali na ku tulila matoto eni ha vangamba va Njambi. (Ku-So. 12:13, 17) Omo liaco, mavu a Satana a na zindi cikuma vangamba va Njambi. Vutuhu ngoco, ka tua pandele kuivua vuoma vua Satana na vantu veni. Vunoni tua pande ku kala na vusunga ngue vua kele navuo kapostolo Paulu, uze ua sonekele ngueni: “Nga Njambi ivene a li netu, iyandzo a ka hasa ku tu vindika?” (Loma 8:31) Tuli na vusunga vua ku kulahela Yehova mu vutuntu muomu ngue mu tua mono, mutamba ua kama ua vupolofeto vua ku Njenisisi 3:15 ua lipuisamo laza.

16-18. Vati vamuanetu Curtis, Ursula, na Jessica va uana vukuasi ku kuivuisisa Njenisisi 3:15?

¹⁶ Cikulaheso ca Yehova ca ku Njenisisi 3:15, ci hasa ku tu kuasa ku lua na nkala cisoti ci tu solokela. Muanetu Curtis ua pua misionaliu ku cifuti ca Guam, ua handekele ngueni: “Vintsimbu vimo, nja hita mu vieseko na visoti viesekele lukulahelo luange muli Yehova. Vunoni ku singanieka ha vupolofeto vua ku Njenisisi 3:15 ca nji kuasa ku tualelelaho ku kulahela  muli Tatetu ua muilu.” Muanetu Curtis ua lavelela na ndzolela litangua lia ka manusula Yehova visoti viose.

¹⁷ Ndumbuetu Ursula ua ku Alemanha ngueni ku ivuisisa Njenisisi 3:15, ca mu kuasele ku tava ngecize nkuma cili vene Mbimbiliya va i huimina kuli Njambi. Ua muene vati vupolofeto vukuavo vua likuata novu, kaha eci ca mu komouesele cikuma. Ua handekele naua ngueni: “Mu nja muene ngecize vuasi-vuasi Yehova ua lingileko mumo linga vantu kati va kale ca ku hona lulavelelo, nja vuile cizango ca ku mu lema cikuma.”

¹⁸ Ndumbuetu Jessica ua ku Micronesia, ngueni: “Kasi nje ku vuluka mu nja vuile ku mutima, ntsimbu ya katete i nja nongonuene ngecize nji na uana vusunga! Vupolofeto vua ku Njenisisi 3:15 vua kele na ku lipuisamo. Vua nji kuasa ku nongonona ngecize ou muono u tuli na ku yoya lelo kati ukeuo muono ua vusunga. Kaha vua nji kaniamesa naua ku tsiliela ngecize ku pangela Yehova, ce ku tu lingisa ku yoya muono ua cili cikuma mu ntsimbu ino, kaha ku lutue tu ka yoya ua ku hiana uno.”

19. Vusunga vuka tuli navuo ngecize mutamba ua ku manusuila ua vupolofeto vua ku Njenisisi 3:15, u ka lipuisamo?

¹⁹ Ngue mu tua lilongesa, Njenisisi 3:15 ili na ku lipuisamo mu ntsimbu ino. Mbuto ya mpuevo na mbuto ya linoka va na va solola ha toma. Yesu ikeye mutamba ua katete ua mbuto ya mpuevo. Kaha ua kanguka laza ku mbandu ya ku ntsintsino, lelo lino na pu honi Muangana muilu. Cikuavo naua, ku hangula ca vakua mutamba ua mu civali ua mbuto ya mpuevo, ci li ku ntsongo. Mu ku linga mutamba ua katete ua vupolofeto u na lipuisamo, tuli na vusunga vuose ngecize mutamba ua ku manusuila ua ku palakana linoka ku mutue, nauo u ka lipuisamo. Ku nonga ca Satana ci ka pua ku patuka ca kama ku vantu! Ngeci mukemuo, kati mu hilukile mu nima. Njambi ke ku handeka makuli. Ku hitila mu mbuto ya mpuevo, a ka neha vivezikiso via vingi ku “miyati yose ya ha mavu.”—Njen. 22:18.