▪ Yesu ua nehele muzimbu ua ciyulo. Vunoni ntsimbu imo ua handekele ngueni: “Kati mu singanieke ngecize njezile ku tuma ciyulo hano ha mavu: ka njezile ku tuma ciyulo vunoni mpoko ya mukuale. Muomu njezile ku hangununa muntu na ise, na muana ua mpuevo na naye, na nemueno na nemueno.” (Mat. 10:34, 35) Vika ua tondele ku handeka Yesu?

Yesu ka tondele ku tepa masoko, vunoni ua tantekeyele ngueni muzimbu ua nehele ue ku tepele masoko. Ngeci mukemuo, vose va tonda ku va mbatiza na ku pua vandongesi va Kilistu, va na pande ku tantekeya ngecize halumo vavusoko vavo ka va ka viukilila na cihangula cavo. Kaha halumo mukua ndzivo yavo ka puile Mukaleho ni umo kavusoko mukuavo, a hasa ku va luisa. Eci ci hasa ku va puila ca cikalu ku kolesa na ku kakatela ku vilongesa via vusunga.

Mbimbiliya ya kaniamesa Vakua Kilistu va pue vakua “ciyulo na vantu vose.” (Loma 12:18) Vunoni ku masoko amo, vilongesa via Yesu vi hasa ku pua ngue “mukuale.” Mu njila ika? Nga umo mu vusoko a tava vilongesa via Yesu kaha vakuavo va viana ni vene ku vi luisa, vavusoko vaco ve ku pua “vakua nkole” ni nguetu vitozi va uze ali na ku lilongesa vusunga.—Mat. 10:36.

Vakua Kilistu vamo, va kala na vavusoko ka va puile Vakaleho. Ngeci vintsimbu vimo, ce ku va kaluuila ku ya Yehova ni Yesu ku mutima omo lia vieseko vi ve ku hita. Ca ku muenako, vavusoko vavo ka va puile Vakaleho halumo va hasa ku va kakateya ku linga cilika ka ca litombuele na Mbimbiliya. Ha ntsimbu yaco, va na pande ku hangula iya vononoka. Yesu ua handekele ngueni: “Uze a lema ise na naye ku nji hiana ange, ikeye ka nji pande.” (Mat. 10:37) Yesu ka tondele ku handeka ngueni linga muntu a pue ndongesi yeni ka pandele ku lema visemi veni, houe. Vunoni ua tondele ku va longesa va nongonone vika via hiana seho mu muono uavo. Nga vavusoko ka va puile Vakaleho va tu luisa omo lia ku pangela Yehova, vutuhu tua va lema vene, vunoni cilemo cetu kuli Njambi cikeco ca hiana.

Ku handeka vusunga, ku luisa ca vavusoko ce ku vavala. Vunoni vandongesi va Yesu va na pande ku vuluka mezi eni ngueni: “Uze ka tambula cilindakano ceni na ku nji kava ange, ikeye ka nji pande.” (Mat. 10:38) Ni nguetu, Vakua Kilistu ve ku mona ku luisa ca vavusoko ku pua mutamba ua lamba i va lavelela ku mona omo lia ku kava Kilistu. Vutuhu ngoco, va lavelela nguavo omo lia vilinga viavo via cili, tangua vavusoko vavo va ka tava vusunga vua mu Mbimbiliya.—1 Pet. 3:1, 2.