1-2. (a) Vati Yehova ua kele na ku handeka na vantu? (b) Vika tu lilongesa mu cilongesa eci?

YEHOVA ua lema ku handeka netu. Ku laza ua pangesele vapolofeto, tungelo, na Muaneni Yesu Kilistu mu ku leka visinganieka vieni ku vantu. (Amose 3:7; Ngal. 3:19; Ku-So. 1:1) Matangua ano ue ku handeka netu ku hitila mu Lizi lieni Mbimbiliya. Ua tu hanayo linga tu hase ku tantekeya visinganieka vieni na vinjila vieni.

² Yesu mua kele hano ha mavu, Yehova ua handekele ku tundilila muilu vintsimbu vitatu. Tu ci hilulenu mezi a handekele Yehova, tu mone vika tu hasa ku lilongesa na vivezikiso vi tu uana ku mezi a handekele.

3. Kuliya na Mako 1:​9-11, vika Yehova ua handekele ha mbatizimu ya Yesu, kaha mezi aco a muesele vusunga vuka?

³ Mako 1:​9-11 ya muesa ntsimbu ya ku livanga ya handekele Yehova ku tundilila muilu. (Tandenu.) Ua handekele ngueni: “Ove u muanange i nja lema, ove ua nji ya ku mutima!” Mua vusunga aa mezi eni a kuatele Yesu ku mutima mua vuile lizi lia Ise! Mezi a Yehova a handekele lutatu luose a soluele vumo vusunga ku tuala hali Yesu. Ca ku livanga, Yesu ua pua Muaneni. Ca mu civali, Yehova ua lema Muaneni. Kaha ca mu citatu, Yehova ua tava Muaneni. Tu ci hilulenu vuino ha vusunga vuaco ovu.

4. Vusamba vuka vua ku lifuila vua putukile ha kati ka Njambi na Yesu ha mbatizimu yeni?

⁴ “Ove u Muanange.” Aa mezi a muesele ngecize, Yehova na Yesu muaneni ya lema va likuatele vumo vusamba vua vuha. Muomu Yesu mua kele muilu ua puile muana Njambi ua sipilitu.  Vunoni ha mbatizimu yeni va mu vuavesele ku hitila mu sipilitu santu. Mu ntsimbu yaco Njambi ua muesele ngecize Yesu na pu honi Muaneni ua ku vuavesa, kaha na lavelela ku hiluka muilu na ku ka pua Muangana na Sasendote ua Kama. (Luka 1:​31-33; VaHe. 1:​8, 9; 2:17) Ngeci mukemuo ha ntsimbu ya Mbatizimu ya Yesu, Yehova ua kele na vusunga vua ku handeka ngueni: “Yove Muanange.”​—Luka 3:22.

5. Vati tua pande ku tambuluisa Yehova mu ku muesa cilemo na ku kaniamesa?

⁵ ‘Yove i . . . nja lema.’ Yehova ua muesele lungano lua cili lua vati tua pande ku muesa cilemo kaha na ku tonda vukovelelo vua ku-kaniamesa vakuetu. (Yoa. 5:20) Ce ku tu kaniamesa nga vakuetu va tu haka seho, ku tu muesa cilemo kaha na ku tu sangala nga tu linga vimo. Ngeci mua vamuanetu mu cikungulukilo kaha na va vusoko vuetu va tondeka ku va muesa cilemo na ku va kaniamesa. Nga tu kaniamesa vose, lutsilielo luavo lu ka kaniama kaha eci ci ka va kuasa ku pangela Yehova na lukakatela. Cikumakuma visemi va na pande ku kaniamesa vana vavo. Nga visemi va kaniamesa mpundu vana vavo na ku va muesa cilemo, ci ka va kuasa ku tuikilila.

6. Omo lia vika tu hasa ku tsiliela muli Yesu Kilistu?

⁶ ‘Yove ua nji ya ku mutima.’ Aa mezi a muesa ngecize Yehova ua kele na vusunga vuose ngecize Muaneni a ka linga cizango ceni mu vutantuluke. Nga Yehova ali na vusunga vua ku tsiliela muli Muaneni, netu tu hasa ku kala na vusunga vuose nguetu Yesu tangua a ka puisamo vikulaheso via Yehova. (2 Kol. 1:20) Nga tu singanieka ha lungano lua Yesu, tu ka kaniamesa kapandi ketu ka ku kava lungano lueni na ku lilongesa kuli ikeye. Yehova ali naua na vusunga vuose ngecize, mu ku pua civunga, etu  vangamba veni tu ka tualelelaho ku lilongesa kuli Muaneni.​—1 Pet. 2:21.

7. Kuliya na Mateo 17:​1-5, ha ntsimbu ika Yehova ua handekele ku tundilila muilu, kaha vika ua handekele?

⁷ Tandenu Mateo 17:​1-5. Mu ntsimbu ya mu civali Yehova ua handekele ku tundilila muilu omo Yesu ua “himpukile.” Yesu ua laniene Petulu, Tiango na Yoano va mu kave ku muncinda ua laha. Mu va ka heteleko, va ka muene cimona ca ku komouesa. Cihanga ca Yesu ca tuile ceke na vuzalo vueni. Kua solokele vifua vivali, viemanena va Mosesa na Eliya, va putukile ku simutuila na Yesu via ku-tsa ceni na ku sanguka. Vutuhu vapostolo vatatu va lemene ha meso na tulo, va muene eci cimona ca ku lifuila mu tua va huile tulo. (Luka 9:​29-32) Kaha ceke ca kama ca va tuilile kaha va vuile lizi lia kama li tundilila mu liselua​—Lizi lia Njambi! Ngue naua ha mbatizimu ya Yesu, Yehova ua muesele cilemo ceni kuli Muaneni ngueni: “Ou muanange nji mu lema ikeye ua nji ya ku mutima.” Vunoni ku ntsimbu eyi ua vuezeleko naua ngueni: “Mu halakanienu.”

8. Mu njila ika cimona ca ku himpuka ca kuasele Yesu na vandongesi veni?

⁸ Eci cimona caco ca muesele Yesu mu vumpahu vueni na ngolo mua ka pua Muangana ua Vuangana vua Njambi. Mua vusunga, evi viaco via kaniamesele Yesu mue ku hitile mu tuyando na ku-tsa. Eci cimona caco ca kaniamesele naua lutsilielo lua vandongesi veni mu vieseko via va lavelele na vipanga via vingi vi ve ku puisilemo. Mu nima ya miaka 30, kapostolo Petulu ua handekele via cimona ca ku himpuka, ku muesa ngecize hanga ka ci suvile.​—2 Pet. 1:​16-18.

9. Vimamuna vika via seho Yesu ua hele ku vandongesi veni?

⁹ “Mu Halakanienu.” Yehova ua muesele ha toma ngecize a tonda tu halakane kuli Muaneni na ku mu ononoka. Vika Yesu ua handekele mua kele ha mavu? Ua handekele viuma via vingi vi tua pande ku halakana! Ca ku muenako, ua longesele vandongesi veni vati mua ku ambuluila muzimbu ua cili, kaha ha hengi ua va mamuine ngueni va pande ku vingila. (Mat. 24:42; 28:​19, 20) Ua va kaniamesele naua ngueni va pandele ku likolesa, kati va likele. (Luka 13:24) Yesu ua tsindikile naua ngecize vandongesi veni va pande ku lilema umo na mukuavo, ku pangela hamo, na ku niunga masiko. (Yoa. 15:​10, 12, 13) Cimamuna cika Yesu ua hele vandongesi veni! Evi vimamuna viaco na lelo lino hanga vi silivila.

10-11. Vati tu hasa ku muesa nguetu tue ku halakana kuli Yesu?

¹⁰ Yesu ua handekele ngueni: “Uose mukua vusunga a halakana lizi liange” (Yoa. 18:37) Tu ka muesa nguetu tue ku halakana ku lizi lieni nga tu ‘Liyandela umo na mukuavo, na ku liecela ha kati ketu ku milonga’ (Kolo. 3:13; Luka 17:​3, 4) Tu ka muesa naua nguetu tue ku halakana ku lizi lieni mu ku ambulula na ntuima yose muzimbu ua cili “omo ku i li ntsimbu nomo ntsimbu yahi.”​—2 Tim. 4:2.

¹¹ Yesu ngueni: “Vampanga vange vevua lizi liange.” (Yoa. 10:27) vandongesi va Yesu ve ku muesa ngecize ve ku mu halakana kati lika mu ku ivua lizi lieni houe vunoni ve ku vi pangesa mu muono uavo. Mu njila ika? Ka ve ku hungumuka na “visoti via muono” ua ntsimbu ino. (Luka 21:34) Vunoni va tuameka ku ononoka Yesu mu muono uavo cipue nga va hita mu visoti. Cingi ca vamuanetu vali na ku kolesa mu vieseko, via ku va luisa, vuhutu na viyovo via mavu. Mu kati ka visoti evi ve ku tualelelaho ku ononoka Yehova na ndzili yose. Yesu ua hele ovu vusunga vuaco kuli vakevo ngueni: “Ou ali na mezi ange, a lisiko kaha a niunga, ikeye vene anji lema: nou anji lema, Tata a ka mu lema.”​—Yoa. 14:21.

12. Njila ikuavo ika i tu hasa ku mueselamo ngecize tuli na ku halakana kuli Yesu?

 ¹² Njila ikuavo i tu hasa ku muesa ngecize tuli na ku halakana kuli Yesu ya pua ku pangela hamo na vaze va va hangula mu ku tu tuamenena. (VaHe. 13:​7, 17) Mu miaka ino, lukungulukilo lua Yehova lu li na ku alulula viuma via vingi, ngeci mua ku pangesa vikuata via viha, cifua ci tue ku ambuluilamo, viuano vietu via mu kati ka simano, kaha na cifua ci tue ku tungilamo Vindzivo via Vuangana, ku vi tungulula na ku vi niunga. Mua vusunga tue ku ivua ndzolela na ku santsela cikuma ku vimamuna via mana na cilemo vi tue ku tambula! Ka tuesi na vimpata na vimo viahi ngecize Yehova a tu vezikisa nga tu tualelelaho ku kava vimamuna na ku tuamenena ca mu lukungulukilo lueni.

13. Vukuasi vuka vua kala ha ku halakana kuli Yesu?

¹³ Tue ku uana vukuasi vua kama mu ku halakana ku viose via longesele Yesu. Yesu ua lekele vandongesi veni ngecize vilongesa vieni vi ka va kaniamesa. Ngueni: “Mu ka uana ku huima ku miono yenu, muomu mukambo uange ua uasi, na citele cange ca cihehu.” (Mat. 11:​28-30) Lizi lia Njambi, lize lia ambatesela kumo lika na mavulu auana a handeka via Yesu, lie ku tu kolesa, ku tu kaniamesa mu lutsilielo na ku tu hana mana. (Visa. 19:7; 23:3) Ngeci Yesu ua ambele ngueni: “Va vezika vaze vevua lizi lia Njambi na ku li niunga!”​—Luka 11:28.

14-15. (a) Ngue mu ya muesa Yoano 12:​27, 28, ha ntsimbu ika Yehova ua handekele lua mu citatu ku tundilila muilu? (b) Omo lia vika mezi a Yehova a lembeziekele Yesu na ku mu kaniamesa?

¹⁴ Tandenu Yoano 12:​27, 28. Livulu lia Yoano lia tumbula via ntsimbu ya mu citatu ya handekele Yehova ku tundilila muilu. Evi via solokele tele ku na lisupu matangua a andende ku ku-tsa ca Yesu, kaha ikeye tele ali mu Yelusalema mu ku linga Pasovala yeni ya ku manusuila. Ha ntsimbu yaco tele nomu cikuma mutima, kaha ua handekele ngueni “mutima uange u li na ku mona lamba.” Ngeci ua vundilile ngueni: “Tata zumbangeya lizina liove.” Kaha Ise ua mu kumbuluile ngueni: “Nji na lizumbangeya, kaha nji ka lizumbangeya naua.”

¹⁵ Yesu uomine mutima omo lia kapandi ka kama ka kele nako ka ku muesa lukakatela kuli Yehova. Yesu ua tantekeyele ngueni va ka mu yandesa cikuma na ku mu tsiha mua vukenia. (Mat. 26:38) Vutuhu ngoco, cuma ca tondele cikuma ca puile ku zumbangeya lizina lia Njambi. Vunoni vantu va mu vangeyele nguavo mukua ku sahula Njambi, ngeci ua lisosomuene  ngueni halumo ku-tsa ceni ci ka sahula lizina lia Njambi. Mua lingile navio ndu ku mutima, mua vusunga mezi a Ise a mu vuisile ndzolela ya kama! A mu hanene vusunga ngecize lizina lia Ise va ka lizumbangeya. Cili vene mezi a Ise a mu lembeziekele na ku mu kaniamesa ku visoti via mu lavelelele ku lutue. Vutuhu halumo Yesu ikeye lika uevuisisile mezi a Ise tangua lize, vunoni Yehova ua huiminine Yoano ku soneka mezi aco linga netu a tu kaniamese.​—Yoa. 12:​29, 30.

16. Omo lia vika vintsimbu vimo tue ku lisosomua na viuma vi hasa ku neha kasahuntu ku lizina lia Yehova?

¹⁶ Ngeci mua Yesu, netu tu hasa ku lisosomua na viuma vi hasa ku neha kasahuntu ku lizina lia Yehova. Ca ku muenako, halumo tu hasa ku hita mu vuhenge ngeci mua Yesu. Ni vakua ku luisa vusunga va hasa ku sanduola mizimbu ya makuli ku tuala ha Vakaleho va Yehova. Kaha evi, vi hasa ku tu umisa mutima, nguetu halumo vi hasa ku nehesa kasahuntu ku lizina lia Yehova na lukungulukilo lueni. Nga via cifua eci vi na soloka, mezi a Yehova netu a hasa ku tu lembezieka cikuma. Ka ci tondeka tu pue na ku lisosomua cikuma. Tu kalenu na vusunga ngecize “ciyulo ca Njambi cize ca hiana mana ose, ci ka niunga mitima yenu na visinganieka vienu muli Kilistu Yesu.” (Filp. 4:​6, 7) Cikuavo naua, na vimo viahi vi hasa ku honouesa Yehova ku zumbangeya lizina lieni. Ku hitila mu Vuangana vueni, a ka manusula vupi vuose vua koka Satana na mavu eni.​—Visa. 94:​22, 23; Isaya 65:17.

17. Kuliya na Isaya 30:​21, Yehova ue ku handeka netu mu njila ika?

¹⁷ Yehova kasi ali na ku handeka netu lelo lino. (Tandenu Isaya 30:21.) Vutuhu ka tue ku ivua mpundu lizi lia Njambi ku tundilila muilu, vunoni ua tu hana Lizi lieni lia ku soneka, Mbimbiliya, muze mu tue ku uana vilongesa via vingi. Cikuavo naua sipilitu ya Yehova ye ku tuamenena “kasongo ua cili mukua mangana” linga a tualeleho ku tu hana via-ku-lia. (Luka 12:42) Tue ku tambula via-ku-lia via mu lutsilielo via vingi cikumakuma, ngeci mua mikanda, vivideo, na miaso, vimo via ku mavoko vikuavo via mu internete!

18. Vati mezi a Yehova eku mi simpisa na ku kaniamesa lutsilielo luenu?

¹⁸ Ntsimbu yose tu puenu na ku livuluisa etu vavene mezi a handekele Yehova kuli Muaneni mua kele ha mavu! Muomu mezi aco ngue mu va a soneka mpundu mu Mbimbiliya, a ka tu hana vusunga ngecize na vimo viahi vi hasa ku kaluuila Yehova. Kaha vuovuno a sungamesa vupi vuose vua koka Satana na mavu eni. Ngeci mukemuo tu lihakelenu kapandi ka ku halakana vuino ku lizi lia Yehova. Ku lingamo, ci ka tu kuasa ku lua na nkala visoti, cipue vi tuli na ku lihita navio mu ntsimbu ino vene ni vi keza ku lutue. Mbimbiliya ya tu vuluisa nguayo: ‘Lukakatela lua mi pande, linga omo mu na lingi cizango ca Njambi, mu ka tambule litavasiano.’​—VaHe. 10:36.