Vamo vaLevi vaze ka va puile vasasendote va kele na ku linga vipanga vieka ku tembele. Kaha vipanga viaco tu hasa vi setekesa na vize vie ku linga vapulisia. Kaha va kele na ku va tuamenena kuli kapitau ua ku tembele. Umo mukua ku soneka ua kaYundeya ua lizina Filo ua lombolola vipanga viavo ngueni: “Vamo vaLevi va kele na ku va haka ku cipanga ca ku niunga vimbelo via citali ca ku tembele. Vakuavo va kele mu ntima [kati ka citali] ku lutue lua cihela ca ku lela linga kati mu kovele vantu ka va kele na mpoko ya ku kovelamo, cipue vene ku sevuka kati va sevuke ku kovelamo. Kaha vakuavo naua va kele na ku zinguluka tembele mu ku i niunga vutsiki na mutana, kaha va kele na ku lisintsa-sintsa na vakuavo.”

Vakua mpunga navo va hasele ku vundila vukuasi vua ava vapulisia va ku tembele. Ava vaYundeya vakevo lika va ya tavesele nguvulu ya Loma ku panga na vitua.

Umo mulongisi ua Mbimbiliya ua lizina Joachim na Jeremias, ngueni nga vapulisia va ku tembele vakevo vezile mu ku kuata Yesu, kaha eci ci tu kuasa ku ivuisisa mezi a handekele Yesu mu va mu kuatele ngueni, “litangua ha litangua ua kele na ku longesa mu Tembele vunoni uahi ua mu kuatele.” (Mat. 26.55) Joachim ua handekele naua ngueni citava vaze vezile mu ku kuata Yesu imo ntsimbu ku nima vunoni ka va hasele, navo va puile vapulisia va ku tembele. (Yoa. 7:32, 45, 46) Mu nima ya ntsimbu, vakua Mpunga va tumine kapitau ua ku tembele na vamo vapulisia linga va kuate vapostolo na ku va neha ku mpunga. Kaha citava vakevo naua va tuhuile kapostolo Paulu mu tembele.—Vili. 4:1-3; 5:17-27; 21:27-30.